ചിക്കാഗോ സീറോ മലബാര്‍ കത്തീഡ്രലില്‍ പത്താമത് കുടുംബ നവീകരണ കണ്‍വന്‍ഷന്‍

ചിക്കാഗോ: ചിക്കാഗോ (ബല്‍വുഡ്) സെന്റ് തോമസ് സീറോ മലബാര്‍ കത്തീഡ്രലില്‍ വച്ചു 2018 ജൂണ്‍ 14 മുതല്‍ 17 വരെ രാവിലെ 9.30 മുതല്‍ വൈകുന്നേരം 5 വരെ കുടുംബനവീകരണ കണ്‍വന്‍ഷന്‍ നടത്തപ്പെടും. പ്രശസ്ത വചന പ്രഘോഷകനും അട്ടപ്പാടി സെഹിയോന്‍ ധ്യാനകേന്ദ്രം ഡയറക്ടറുമായ റവ.ഫാ. സേവ്യര്‍ ഖാന്‍ വട്ടായിലച്ചന്റെ നേതൃത്വത്തിലുള്ള സെഹിയോന്‍ ടീമാണ് ധ്യാനം നയിക്കുന്നത്.

മുതിര്‍ന്നവര്‍ക്ക് മലയാളത്തിലും, യുവജനങ്ങള്‍, കുട്ടികള്‍ എന്നിവരെ ഗ്രൂപ്പുകളായി വേര്‍തിരിച്ച് ഇംഗ്ലീഷിലുമായിരിക്കും വചനശുശ്രൂഷകളും മറ്റ് ശുശ്രൂഷകളും നടത്തുക. ബേബി സിറ്റിംഗിനു സൗകര്യമുണ്ടായിരിക്കും.

ദൈവകൃപ സമൃദ്ധമായി വര്‍ഷിക്കപ്പെടുന്ന ഈ ആത്മീയവിരുന്നിലേക്ക് എല്ലാവരേയും സ്‌നേഹപൂര്‍വ്വം ക്ഷണിക്കുന്നതായി വികാരി റവ.ഡോ. അഗസ്റ്റിന്‍ പാലയ്ക്കാപ്പറമ്പിലും, അസി. വികാരി റവ.ഡോ. ജയിംസ് ജോസഫും അറിയിച്ചു.

ജോയിച്ചന്‍ പുതുക്കുളം

ഫാ. ജോസഫ് ഉപ്പാണി നയിക്കുന്ന മരിയൻ ധ്യാനം ഡാലസിൽ

പിൻസ്ടൺ (ടെക്‌സാസ്) : ചിറ്റൂർ ധ്യാനകേന്ദ്രം ഡയറക്ടർ ഫാ ജോസഫ് ഉപ്പാണി നയിക്കുന്ന മൂന്നു ദിവസത്തെ താമസിച്ചുള്ള മരിയൻ ധ്യാനം, പ്രിൻസ്ടൺ ലേക്ക് ലാവൻ ക്യാമ്പ് ആൻഡ് കോൺഫറൻസ് സെന്ററിൽ (8050 Co Rd 735, Princeton, TX 75407) നടക്കും. മെയ് 25 മുതൽ 27 (വെള്ളി-ഞായർ ) വരെയാണ് ധ്യാനം.

മാതാവിന്റെ വണക്കമാസത്തിൽ നടക്കുന്ന ഈ പ്രത്യേക മരിയൻ ഭക്തി ധ്യാനത്തിനു രജിസ്റ്റർ ചെയ്യുവാൻ www.amoj.org എന്നെ വെബ്സൈറ്റ് സന്ദർശിക്കുക. രജിസ്‌ട്രേഷൻ 20 നു അവസാനിക്കുന്നതാണ്.

കൂടുതൽ വിവരങ്ങൾക്ക്:
ജോജു ജോസ്: 540 728 5950
മാത്യു തോമസ്: 214 714 0833

മാർട്ടിൻ വിലങ്ങോലിൽ

കെ.എം.ജോര്‍ജ് നിര്യാതനായി

ഡാളസ്: പത്തനംതിട്ട പ്രാക്കാണം കൊല്ലണ്ടേത്ത് കുളങ്ങര വീട്ടില്‍ കെ.എം.ജോര്‍ജ് ഡാളസില്‍ നിര്യാതനായി. പരേതന്‍ കേരള പോലീസില്‍, വിജിലന്‍സ് ഡിപ്പാര്‍ട്ട്‌മെന്റിലെ സേവനത്തിനു ശേഷം റിട്ടയര്‍ ചെയ്തയാളാണ്. കേരള പോലീസിന്റെ വോളിബോള്‍ ടീമംഗവുമായിരുന്നു.

അനീഷ് ജോര്‍ജ്(യു.എസ്.എ.), ആന്‍സി ചെറിയാന്‍(കോട്ടയം) എന്നിവര്‍ മക്കളും, മിനി ജോര്‍ജ്, ചെറിയാന്‍ ഐപ്പ് എന്നിവര്‍ മരുമക്കളുമാണ്. അന്‍സി, അഞ്ചു അനീഷ്, ഐറിന്‍ എന്നിവര്‍ കൊച്ചുമക്കളാണ്. ഓതുരേത്ത് പൊന്നമ്മ ജോര്‍ജാണ് സഹധര്‍മ്മിണി.

ടാമ്പാ ശ്രീഅയ്യപ്പക്ഷേത്രത്തില്‍ മഹാകുംഭാഭിഷേകം മെയ് 22 മുതല്‍ 28 വരെ

ടാമ്പാ: ടാമ്പായിലെ അയ്യപ്പഭക്തരുടെ ചിരകാല അഭിലാഷമായ അയ്യപ്പക്ഷേത്രം യാഥാര്‍ത്ഥ്യമാകുന്നു. വരുന്ന മെയ് 22 മുതല്‍ 28 വരെ നടക്കുന്ന മഹാ കുംഭാഭിഷേക ചടങ്ങുകളിലൂടെ ക്ഷേത്രം ഭക്തജനങ്ങള്‍ക്കായി തുറന്നുകൊടുക്കും. നോര്‍ത്ത് അമേരിക്കയില്‍ ആദ്യമായി ശബരിമല ക്ഷേത്രത്തിന്റെ പതിനെട്ട് പടികളുടെ പുനരാവിഷ്കാരം ടാമ്പാ അയ്യപ്പക്ഷേത്രത്തില്‍ (6829 Maple Lane, Tampa, FL 33610) ഉണ്ടാകും.

മെയ് 27-നു രാവിലെ 5.45 മുതല്‍ 7.45 വരെ “പ്രാണ പ്രതിഷ്ഠ’കര്‍മ്മങ്ങള്‍ നടക്കും. അന്നു വൈകുന്നേരത്തോടെ ഇരുമുടിക്കെട്ടുകളുമായി ശരണംവിളികളോടെ ഭക്തര്‍ക്ക് 18 പടികള്‍ ചവുട്ടി കടന്ന് ലോകപാപങ്ങളില്‍ നിന്നു മുക്തിനേടി, “തത്വമസി’ എന്ന പൊരുള്‍ തിരിച്ചറിഞ്ഞ് അയ്യപ്പദര്‍ശനം നടത്താവുന്നതാണ്. ഈ ദിവ്യമുഹൂര്‍ത്തത്തില്‍ ഭാഗമാകാനും അനുഗ്രഹങ്ങള്‍ നേടാനും ഏവരേയും ഭാരവാഹികള്‍ കുടുംബസമേതം ക്ഷണിക്കുന്നു.

2000-ല്‍ രൂപംകൊണ്ട ശ്രീഅയ്യപ്പ സൊസൈറ്റി ഓഫ് താമ്പാ (എസ്.എ.എസ്.ടി.എ)യുടെ വളരെ നാളത്തെ പ്രാര്‍ത്ഥനയുടേയും പരിശ്രമത്തിന്റേയും ഫലമാണ് ശ്രീഅയ്യപ്പക്ഷേത്രം. തുടര്‍ച്ചയായി അയ്യപ്പദര്‍ശനത്തിന് നാട്ടില്‍ പോകേണ്ടിയിരുന്ന അയ്യപ്പഭക്തര്‍ക്ക് ഇനി ടാമ്പായില്‍ അയ്യപ്പദര്‍ശന പുണ്യം ലഭിക്കും. ക്ഷേത്രത്തില്‍ ഗണപതി, മുരുകന്‍, ശിവന്‍, നാരായണന്‍, മാളികപ്പുറത്തമ്മ എന്നീ പ്രതിഷ്ഠകളും ഉണ്ടാകും.

മെയ് 22 മുതല്‍ 28 വരെ നടക്കുന്ന കുംഭാഭിഷേക ചടങ്ങുകള്‍ക്ക് മുന്‍ ശബരിമല മേല്‍ശാന്തി മേലേപ്പള്ളില്‍ ഈശ്വരന്‍ നമ്പൂതിരി മുഖ്യകര്‍മ്മിയായിരിക്കും. ഈ മഹാസംരംഭത്തിന് സഹായികളാകാന്‍ ആഗ്രഹിക്കുന്നവരും ധനസഹായം നല്‍കാന്‍ താത്പര്യമുള്ളവരും എക്‌സിക്യൂട്ടീവ് കമ്മിറ്റിയുമായി ബന്ധപ്പെടുക.

കൂടുതല്‍ വിവരങ്ങള്‍ക്ക്: വിജയ് (813 220 1999), കൗശിക് (813 470 8202), ഗോകുല്‍ (813 220 9415), ടി. ഉണ്ണികൃഷ്ണന്‍ (813 334 0123), പ്രദീപ് (813 765 5374), അനില്‍ (813 748 8498).

ജോയിച്ചന്‍ പുതുക്കുളം

എസ്.എം.സി.സി വെല്‍ഫെയര്‍ റിഫോം സെമിനാര്‍ വന്‍വിജയമായി

ചിക്കാഗോ: എസ്.എം.സി.സി ചിക്കാഗോ ചാപ്റ്ററിന്റെ ആഭിമുഖ്യത്തില്‍ വെല്‍ഫെയര്‍ റിഫോമും അതിനോടനുബന്ധിച്ചുള്ള വിഷയങ്ങളേയും സംബന്ധിച്ച സെമിനാര്‍ നടത്തപ്പെട്ടു.

സെമിനാറിന്റെ ഉദ്ഘാടനം നിര്‍വഹിച്ചത് കത്തീഡ്രല്‍ അസിസ്റ്റന്റ് വികാരി റവ.ഡോ. ജയിംസ് അച്ചനായിരുന്നു. ജയിംസച്ചന്റെ പ്രാര്‍ത്ഥനയോടെ സെമിനാര്‍ ആരംഭിച്ചു. അച്ചന്റെ ഉദ്ഘാടന പ്രസംഗത്തില്‍ കമ്യൂണിറ്റിയുടെ നന്മയ്ക്കായി ഇത്തരത്തില്‍ നടത്തപ്പെടുന്ന സെമിനാറുകളുടെ പങ്ക് വളരെ വലുതാണെന്ന് പറഞ്ഞു.

കത്തീഡ്രല്‍ ഇടവകാംഗവും ഇല്ലിനോയി സ്റ്റേറ്റ് എംപ്ലോയിയുമായ ജോസ് കോലഞ്ചേരിയാണ് ക്ലാസുകള്‍ നയിച്ചത്. സെമിനാറില്‍ സദസ്യരുടെ ചോദ്യോത്തരങ്ങള്‍ക്കും സംശയങ്ങള്‍ക്കും മറുപടികള്‍ നല്‍കുകയും, ഭാവിയില്‍ ഇതുപോലുള്ള സെമിനാറുകള്‍ക്ക് സഹായ സഹകരണങ്ങള്‍ വാഗ്ദാനം ചെയ്യുകയും ചെയ്തു.

എസ്.എം.സി.സി പ്രസിഡന്റ് ഷിബു അഗസ്റ്റിന്‍ സ്വാഗതം പറയുകയും ജോണ്‍സണ്‍ കണ്ണൂക്കാടന്‍ കൃതജ്ഞത പ്രകാശിപ്പിക്കുകയും ചെയ്തു. എസ്.എം.സി.സി ഭാരവാഹികളായ മേഴ്‌സി കുര്യാക്കോസ്, ആന്റോ കവലയ്ക്കല്‍, സണ്ണി വള്ളിക്കളം, ബിജി വര്‍ഗീസ്, ജേക്കബ് കുര്യന്‍, ജോണ്‍സണ്‍ കണ്ണൂക്കാടന്‍, ഷിബു അഗസ്റ്റിന്‍, ഷാജി കൈലാത്ത്, സജി വര്‍ഗീസ്, ആഗ്‌നസ് മാത്യു, ഷാബു മാത്യു, ജേക്കബ് ചക്കാലയ്ക്കല്‍, ജോസഫ് നാഴിയംപാറ, ജയിംസ് ഓലിക്കര, ജോയി വട്ടത്തില്‍, കുര്യാക്കോസ് തുണ്ടിപ്പറമ്പില്‍ എന്നിവര്‍ സെമിനാറിന്റെ നടത്തിപ്പിന് നേതൃത്വം നല്‍കി. പബ്ലിസിറ്റിക്കായി പത്രപ്രവര്‍ത്തകന്‍ ജോയിച്ചന്‍ പുതുക്കുളം സന്നിഹിതനായിരുന്നു. സൗണ്ട് സിസ്റ്റം മനീഷിന്റെ നേതൃത്വത്തില്‍ കൈകാര്യം ചെയ്തു.

ജോയിച്ചന്‍ പുതുക്കുളം

ചിക്കാഗോ കൈരളി ലയണ്‍സ് വോളിബോള്‍ ക്ലബ്ബിന്റെ പിക്‌നിക് ജൂണ്‍ 3 ന്

ചിക്കാഗോയില്‍ മാത്രമല്ല നോര്‍ത്ത് അമേരിക്കയിലെ തന്നെ വോളിബോള്‍ പ്രേമികളുടെ മനസ്സ് തൊട്ടറിഞ്ഞ ചിക്കാഗോ കൈരളി ലയണ്‍സിന്റെ ഈ സീസണിലെ പിക്‌നിക് 2018 ജൂണ്‍ 3 ന് രാവിലെ 12 മണി മുതല്‍ 6 മണി വരെ Glemview (ഗ്ലിവ്യൂ) ലുള്ള ജോസ് പാര്‍ക്കില്‍ വച്ച് (433 ELM St Central & Shermar) നടത്തുന്ന വിവരം സന്തോഷപൂര്‍വ്വം അറിയിക്കുന്നു. ചിക്കാഗോയിലെ മുഴുവന്‍ വോളിബോള്‍ കളിക്കാരെയും, വോളിബോള്‍ പ്രേമികളെയും, അഭ്യൂദയകാംക്ഷികളെയും പങ്കെടുപ്പിച്ചുകൊണ്ട് നടത്തുന്ന ഈ മഹാസംഗമത്തിന് പ്രവീണ്‍ തോമസ്, ജോസ് മണക്കാട്ട് എന്നിവര്‍ കണ്‍വീനര്‍മാരായുള്ള കമ്മിറ്റി വിപുലമായ ഒരുക്കങ്ങള്‍ ആണ് നടത്തിവരുത്.

ചിക്കാഗോയിലെ വോളിബോള്‍ കളിക്കാര്‍ക്കും വോളിബോളിനെ നെഞ്ചോടു ചേര്‍ക്കുവര്‍ക്കും ഓര്‍ത്ത് വയ്ക്കാനും സ്മരണകള്‍ പങ്കിടാനും ഇത് നല്ലൊരു അവസരമാണെന്നതില്‍ സംശയമില്ല.

സിബി കദളിമറ്റം (പ്രസിഡന്റ്), സാജന്‍ തോമസ് (വൈസ് പ്രസിഡന്റ്), ടോണി സങ്കാര (സെക്രട്ടറി), പ്രിന്‍സ് തോമസ് (ട്രഷറര്‍), അലക്‌സ് കാലായില്‍ (ജോ. സെക്രട്ടറി), റിന്റു ഫിലിപ്പ് (ഓഡിറ്റര്‍), പ്രവീണ്‍തോമസ് (കണ്‍വീനര്‍), ജോസ് മണക്കാട്ട് (കണ്‍വീനര്‍), പ്രദീപ് തോമസ്, നിമ്മി തുരുത്തുവേലിയില്‍, പുന്നൂസ് തച്ചേട്ട്, ജെസ്സ്‌മോന്‍ പുറമടം എന്നിവരാണ് സഘാടകര്‍. ചിക്കാഗോയിലെ എല്ലാ നല്ലവരായ കായികപ്രേമികളെയും ഈ പിക്‌നിക്കിലേക്ക് ഹൃദയപൂര്‍വ്വം ക്ഷണിക്കുന്നു, സ്വാഗതം ചെയ്യുന്നു. അന്നേദിവസം വോളിബോള്‍ കളിക്കുന്നതിനും കളി കാണുന്നതിനും അവസരം ഉണ്ടായിരിക്കുന്നതാണ്.

കൂടുതല്‍ വിവരങ്ങള്‍ക്ക്: സിബി കദളിമറ്റം (184 733 88265), പ്രവീണ്‍ തോമസ് (184 776 90050), ജോസ് മണക്കാട്ട് 18478304128.

മാത്യു തട്ടാമറ്റം അറിയിച്ചതാണിത്.

ജോയിച്ചന്‍ പുതുക്കുളം

ഡോ. ഇ.സി.ജി സുദര്‍ശന്റെ നിര്യാണത്തില്‍ കല മലയാളി അസോസിയേഷന്‍ അനുശോചിച്ചു

ഫിലാഡല്‍ഫിയ: അക്ഷര നഗരിയായ കോട്ടയത്തുനിന്നും അറിവിന്റെ ചിറകിലേറി ശാസ്ത്രലോകത്തിന്റെ നെറുകയിലെത്തിയ പദ്മഭൂഷണ്‍ ഡോ. ഇ.സി. ജോര്‍ജ് സുദര്‍ശന്റെ വേര്‍പാടില്‍ ഫിലാഡല്‍ഫിയയിലെ കലാ മലയാളി അസോസിയേഷന്‍ അനുശോചിച്ചു.

കലയുടെ ചിരകാല സുഹൃത്തും അമേരിക്കയിലെ മലയാളി മുന്നേറ്റങ്ങളുടെ വഴികാട്ടിയുമായിരുന്നു ഡോ. സുദര്‍ശന്‍ എന്നു കലാ പ്രസിഡന്റ് ഡോ. ജയിംസ് കുറിച്ചി അനുസ്മരിച്ചു. പേരിലും പെരുമാറ്റത്തിലും ഭാരതീയത പുലര്‍ത്തിയിരുന്ന ഡോ. സുദര്‍ശന്‍ പരമ്പരാഗത ശാസ്ത്ര സങ്കല്പങ്ങളോട് അറിവിന്റേയും തെളിവിന്റേയും അടിസ്ഥാനത്തില്‍ പോരടിക്കുമ്പോഴും താന്‍ ഒരു മലയാളിയാണെന്നതില്‍ ഏറെ അഭിമാനിച്ചിരുന്നുവെന്ന് മുന്‍ ഫോമ പ്രസിഡന്റ് ജോര്‍ജ് മാത്യു പ്രസ്താവിച്ചു. ശാസ്ത്രലോകത്തെ സംബന്ധിച്ചടത്തോളം ആധികാരികതയുടെ അവസാന വാക്കാണ് ഈ ഭാരതപുത്രന്റെ നിര്യാണം വഴി നഷ്ടമായിരിക്കുന്നത്. അദ്ദേഹത്തിന്റെ കണ്ടെത്തലുകള്‍ വരും തലമുറകളെ കൂടുതല്‍ ശാസ്ത്രസത്യങ്ങളിലേക്ക് വഴി നയിക്കട്ടെ എന്നു കല അനുശോചന സന്ദേശത്തിലൂടെ അറിയിച്ചു. ജോജോ കോട്ടൂര്‍ അറിയിച്ചതാണിത്.

ജോയിച്ചന്‍ പുതുക്കുളം

ആന്റോ കവലയ്ക്കല്‍ ഫോമ ദേശീയ കമ്മിറ്റിയിലേക്ക് മത്സരിക്കുന്നു

ചിക്കാഗോ: ചിക്കാഗോയിലെ പ്രമുഖ പൊതുപ്രവര്‍ത്തകനായ ആന്റോ കവലയ്ക്കല്‍ ഫോമയുടെ ദേശീയ കമ്മിറ്റിയിലേക്ക് മത്സരിക്കുന്നു. കേരളാ അസോസിയേഷന്‍ പൊതുയോഗം കൂടിയാണ് ആന്റോയുടെ സ്ഥാനാര്‍ത്ഥിത്വം പ്രഖ്യാപിച്ചത്. ജൂണ്‍ 20 മുതല്‍ ചിക്കാഗോയില്‍ നടക്കുന്ന ഫോമ കണ്‍വന്‍ഷനില്‍ വച്ചാണ് മത്സരം നടക്കുന്നത്.

കര്‍മ്മമണ്ഡലങ്ങളിലെല്ലാം വേറിട്ട വ്യക്തിമുദ്ര പതിപ്പിച്ചയാളാണ് ആന്റോ. വിവിധ രംഗങ്ങളില്‍ സ്ഥാനമാനങ്ങളുടെ പുറകെ പോകാതെ ആത്മാര്‍ത്ഥതയോടും കാര്യക്ഷമതയോടും പ്രവര്‍ത്തിക്കാന്‍ തനിക്ക് സാധിച്ചിട്ടുണ്ടെന്ന് ആന്റോ പറഞ്ഞു. ഉത്തരവാദിത്വബോധത്തോടെ തന്റെ കടമകള്‍ നിര്‍വഹിക്കുന്നതില്‍ ചാരിതാര്‍ത്ഥ്യം കണ്ടെത്തുന്ന ആളാണ് ആന്റോ.

ഫോമ കണ്‍വന്‍ഷനില്‍ ജനറല്‍ കണ്‍വീനര്‍, ചിക്കാഗോ എക്യൂമെനിക്കല്‍ കൗണ്‍സിലിന്റേയും, കേരളാ അസോസിയേഷന്റേയും ട്രഷറര്‍, സീറോ മലബാര്‍ കാത്തലിക് കോണ്‍ഗ്രസ് വൈസ് പ്രസിഡന്റ്, ചിക്കാഗോ സെന്റ് തോമസ് സീറോ മലബാര്‍ ഇടവകയുടെ പാരീഷ് കൗണ്‍സില്‍ അംഗം എന്നിങ്ങനെ വിവിധ തലങ്ങളില്‍ പ്രവര്‍ത്തിച്ചുകൊണ്ട് തന്റെ നേതൃപാടവം തെളിയിച്ചിട്ടുള്ള വ്യക്തികൂടിയാണ് ആന്റോ.

ചിക്കാഗോ എക്യൂമെനിക്കല്‍ കൗണ്‍സിലിന്റെ കുടുംബസംഗമം പരിപാടിയുടെ കണ്‍വീനറായി പ്രവര്‍ത്തിച്ച് ആയിരക്കണക്കിന് ഡോളര്‍ അധികസമാഹരണം നടത്തി നാട്ടിലെ വീടില്ലാത്തവര്‍ക്ക് വീട് വച്ചു നല്‍കുന്ന പ്രവര്‍ത്തനങ്ങളില്‍ മുഖ്യപങ്കുവഹിക്കാനും സാധിച്ചിട്ടുണ്ടെന്ന് ആന്റോ അനുസ്മരിച്ചു.

തന്റെ സ്ഥാനാര്‍ത്ഥിത്വത്തിന് പിന്‍ബലം നല്‍കി തന്നെ വിജയിക്കണമെന്ന് ചിക്കാഗോയിലെ വിവിധ അസോസിയേഷനുകളിലെ ഡെലിഗേറ്റ്‌സിനോടും ദേശീയ കൗണ്‍സില്‍ അംഗങ്ങളോടും, എക്‌സിക്യൂട്ടീവ് ബോര്‍ഡ് അംഗങ്ങളോടും അപേക്ഷിക്കുന്നതായും ആന്റോ കലയ്ക്കല്‍ അറിയിച്ചു.

ജോയിച്ചന്‍ പുതുക്കുളം

കാന്‍ പത്താം വാര്‍ഷികം നെപ്പോളിയന്‍ ഉത്ഘാടനം ചെയ്തു

കേരള അസോസിയേഷന്‍ ഒഫ് നാഷ്‌വില്‍ (കാന്‍) പത്താം വാര്‍ഷികാഘോഷ പരിപാടികള്‍ മുന്‍ കേന്ദ്ര മന്ത്രിയും പ്രശസ്ത സിനിമാ താരവുമായ ശ്രി നെപ്പോളിയന്‍ ഉത്ഘാടനം ചെയ്തു. നാഷ്‌വില്ലിലെ ടെന്നിസ്സി സ്‌റ്റേറ്റ് യൂണിവേര്‍സിറ്റി പെര്‍ഫോമിങ്ങ് ആര്‍ട്ട്‌സ് ഓഡിറ്റോറിയത്തില്‍ നടന്ന പ്രൗഢഗംഭീരമായ ചടങ്ങില്‍ കാന്‍ പ്രസിഡണ്ട് ബിജു ജോസഫ് അദ്ധ്യക്ഷത വഹിച്ചു. കാനിന്റെ വൈസ് പ്രസിഡണ്ട് അശോകന്‍ വട്ടക്കാട്ടില്‍, മുന്‍ പ്രസിഡണ്ടുമാരായ ജോര്‍ജ് മാത്യൂസ്, തോമസ് വര്‍ഗീസ്, സാം ആന്റൊ, നവാസ് യൂനസ്, ഫെഡറേഷന്‍ ഓഫ് മലയാളി അസോസിയേഷന്‍ ഒഫ് അമേരിക്കാസ് (ഫോമാ) സൗത്ത് ഈസ്റ്റ് റീജിയണ്‍ വൈസ് പ്രസിഡണ്ട് റെജി ചെറിയാന്‍, ഫോമാ അഡ്വസറി കൗണ്‍സില്‍ ജോയിന്റ് സെക്രട്ടറി ബബ്ലു ചാക്കോ എന്നിവര്‍ ചടങ്ങില്‍ സന്നിഹിതരായിരുന്നു.

തുടര്‍ന്ന് പ്രശസ്ത സിനിമാതാരം ബിജു മേനോന്റെ നേതൃത്വത്തിലുള്ള “മധുരം 18” എന്ന മെഗാഷോ അരങ്ങേറി. പ്രസിദ്ധ സിനിമാ സംവിധായകന്‍ ഷാഫി സവിധാനം ചെയ്ത മധുരം 18ല്‍ ശ്വേത മേനോന്‍, മിയ, ഗായത്രി സുരേഷ്, ഷാജോണ്‍, രാഹുല്‍ മാധവ് അടക്കം ഇരുപതോളം സിനിമാ താരങ്ങള്‍ അണിനിരന്നു.

ലോക കേരള സഭ മെമ്പര്‍ ഷിബു പിള്ള, കാന്‍ ഔട്ട് റീച്ച് ചെയര്‍മാന്‍ ശങ്കര്‍ മന, കാന്‍ ക്രിക്കറ്റ് ടീമിനു വേണ്ടി ക്യാപ്റ്റന്‍ രാകേഷ കൃഷ്ണന്‍ എന്നിവരെ മധുരം 18 സംവിധായകന്‍ ഷാഫി മൊമന്റൊ നല്കി ആദരിച്ചു. കാന്‍ െ്രെതമാസികയായ കാഞ്ചനത്തില്‍ പ്രസിദ്ധീകരിച്ച കൃതികള്‍ക്കുള്ള അവാര്‍ഡുകള്‍ ഡോ: സൂശീല സോമരാജനും, കുമാരി ദിയ മനോജും, കാഞ്ചനം പേര്‍ നിര്‍ദ്ദേശിച്ചതിനുള്ള പാരിതോഷികം അനില്‍കുമാര്‍ ഗോപാലകൃഷ്ണനും ബിജു മേനോനില്‍ നിന്നും ഏറ്റുവാങ്ങി. പത്തു വര്‍ഷത്തെ കാനിന്റെ പ്രവര്‍ത്തന മികവ് വെളിപ്പെടുത്തുന്ന ഹൃസ്വ ചിത്ര പ്രദര്‍ശനവും ഉണ്ടായിരുന്നു.







ജോയിച്ചന്‍ പുതുക്കുളം