മഞ്ഞിനിക്കര ബാവായുടെ ഓര്‍മ്മപ്പെരുന്നാള്‍ ചിക്കാഗോയില്‍

ചിക്കാഗോ: ചിക്കാഗോയില്‍ അന്ത്യോഖ്യ സിംഹാസനത്തിന്‍ കീഴിലുള്ള സെന്റ് പീറ്റേഴ്‌സ് യാക്കോബായ സുറിയാനി പള്ളി, സെന്റ് ജോര്‍ജ് യാക്കോബായ സുറിയാനി പള്ളി, സെന്റ് മേരീസ് ക്‌നാനായ യാക്കോബായ സുറിയാനി പള്ളി, എന്നീ ഇടവകകള്‍ ചേര്‍ന്നു നടത്തിവരുന്ന പരിശുദ്ധ മോറാന്‍ മോര്‍ ഇഗ്നാത്തിയോസ് ഏലിയാസ് തൃതിയന്‍ പാത്രിയര്‍ക്കീസ് ബാവായുടെ, 86-ാമത് ഓര്‍മ്മപ്പെരുന്നാള്‍ 2018 ഫെബ്രുവരി 10, 11 തിയതികളില്‍ ചിക്കാഗോ സെന്റ് പീറ്റേഴ്‌സ് യാക്കോബായ സുറിയാനി പള്ളിയില്‍ വച്ചു നടത്തുന്നതിന് തീരുമാനിച്ചു.

ഫെബ്രുവരി 4 ഞായറാഴ്ച വി: കുര്‍ബ്ബാനക്കു ശേഷം 12.30 ചിക്കാഗോ സെന്റ് പീറ്റേര്‌ഴ്‌സ് യക്കോബായ പള്ളിയില്‍ പെരുന്നാള്‍ കൊടിയേറ്റുന്നതാണു. ഫെബ്രുവരി 10 ശനിയാഴ്ച വൈകുന്നേരം 7 മണിക്ക് അമേരിക്കന്‍ ഭദ്രാസന മെത്രാപ്പോലിത്ത അഭി: യല്‍ദോ മോര്‍ തീത്തോസ് തിരുമേനിയുടെ പ്രധാന കാര്‍മ്മികത്വത്തില്‍ സന്ധ്യാപ്രാര്‍ത്ഥനയും തുടര്‍ന്ന് വചനസന്ദേശവും നടക്കും.
പെരുന്നാളിനോടനുബന്ധിച്ച് ശനിയാഴ്ച സന്ധ്യാപ്രാര്‍ത്ഥനക്കു ശേഷം ക്വയര്‍ഫെസ്റ്റ് ഉണ്ടായിരിക്കുന്നതാണു. ആശിര്‍വാദത്തോടുകൂടി ശനിയാഴ്ചത്തെ പരിപാടികള്‍ അവസാനിക്കും.

ഫെബ്രുവരി 11-ാം തിയതി ഞായറാഴ്ച രാവിലെ 9 മണിക്ക് പ്രഭാതപ്രാര്‍ത്ഥനയും 10 മണിക്ക് അഭി: യല്‍ദോ മോര്‍ തീത്തോസ് തിരുമേനിയുടെ പ്രധാന കാര്‍മ്മികത്വത്തില്‍ വി: അഞ്ചിന്മേല്‍ കുര്‍ബ്ബാനയും ആരംഭിക്കും. തുടര്‍ന്ന് സ്‌നേഹവിരുന്നോടു കൂടി ഈ വര്‍ഷത്തെ പെരുന്നാളിനു് തിരശീലവീഴും.

ജോയിച്ചന്‍ പുതുക്കുളം

കുട്ടമ്പുഴയിലെ ആദിവാസി ജനങ്ങള്‍ക്ക് ഫൊക്കാനയുടെ കൈത്താങ്ങ്

കോതമംഗലം: അമേരിക്കയിലെ മലയാളി കൂട്ടായ്മയായ ഫൊക്കാന കേരളത്തിലെ കോതമംഗലം താലൂക്കിലെ കുട്ടമ്പുഴ പഞ്ചായത്തിലെ ആദിവാസി ജനങ്ങളുടെ കുടിയിലേക്ക് രോഗനിര്‍ണ്ണയ ഉപകരണങ്ങളും, അത്യാഹിത രക്ഷാ സജ്ജീകരണങ്ങളും എത്തിക്കുന്നു. ഇതിലൂടെ കുട്ടമ്പുഴയെ ഗോഗവിമുക്ത ഗ്രാമമാക്കി മാറ്റുകയാണ് ഫൊക്കനയുടെ ലക്ഷ്യം.

കേരളത്തിലെ വിദൂര ഗ്രാമങ്ങളിലൊന്നാണ് കുട്ടമ്പുഴ. 2011-ലെ കണക്ക് പ്രകാരം അവിടുത്തെ ജനസംഖ്യ 24,791 ആണ്. കുട്ടമ്പുഴ പഞ്ചായത്തില്‍ നിന്നും 15 കിലോമീറ്റര്‍ വനത്തിലൂടെ നടന്നുവേണം ആദിവാസികളുടെ കുടിയിലെത്താന്‍. അതുകൊണ്ടുതന്നെ ഇവര്‍ക്ക് പുറംലോകവുമായി ആശയവിനിമയം സാധ്യമല്ല. അതിനാല്‍ അപകടങ്ങള്‍ നടന്നാല്‍ പോലും 15 കിലോമീറ്റര്‍ മറികടന്നുവേണം കുട്ടമ്പുഴ പഞ്ചായത്തിലെ ജീപ്പ് പോലുള്ള വാഹനങ്ങളെ ആശ്രയിക്കാന്‍. ഇതിമൂലം അപകടങ്ങള്‍ സംഭവിച്ചാല്‍ വിദഗ്ധ ചികിത്സ കിട്ടാതെയുള്ള മരണം ഇവിടെ പതിവാണ്. ഓരോ വര്‍ഷവും നൂറിലേറെ ആദിവാസി ജനങ്ങള്‍ക്ക് പാമ്പുകടിയേല്‍ക്കുകയും, മരത്തില്‍ നിന്നു വീഴുകയും, വന്യമൃഗങ്ങളുടെ ആക്രമണത്തിന് ഇരയാകുകയും ചെയ്യുന്നു. അത്യാഹിത സജ്ജീകരണങ്ങള്‍ ഇല്ലാത്തതിനാല്‍ ഗര്‍ഭിണികളായ സ്ത്രീകളേയും തക്ക സമയത്ത് ആശുപത്രിയിലെത്തിക്കാനാകാതെ മരണപ്പെടുന്നു.

ഈ പ്രതിസന്ധിക്ക് പരിഹാരമായും, കുട്ടമ്പുഴയിലെ ആദിവാസികളുടെ മരണനിരക്ക് കുറയ്ക്കാനും, ഫൊക്കാനയുടെ പ്രതിനിധികളായ പോള്‍ കറുകപ്പള്ളി, ജോയ് ഇട്ടന്‍, ഫിലിപ്പോസ് ഫിലിപ്പ് എന്നിവരും , അമേരിക്കന്‍ സംഘടനയായ എന്‍.എ.ഐ.ഐ.പി ഭാരവാഹികളും, കൂടാതെ അമൃത ഹോസ്പിറ്റല്‍, നാഷണല്‍ ഹെല്‍ത്ത് മിഷന്‍ എന്നിവരും ഈ സംരംഭത്തില്‍ അണിചേരുന്നു.

ഇതിലൂടെ കുട്ടമ്പുഴയിലെ 14 കുടികളില്‍ ആരോഗ്യ നിരീക്ഷണ ഉപകരണങ്ങള്‍ നല്‍കുകയും, അത്യാഹിതം സംഭവിച്ചാല്‍ ആശുപത്രികളേയും ജീപ്പ്, ആംബുലന്‍സ് തുടങ്ങിയ വാഹനങ്ങളേയും വിവരം അറിയിക്കാനും ഇവയുടെ സാന്നിധ്യം ജനങ്ങളെ അറിയിക്കാനുമായി വികസിപ്പിച്ചെടുത്ത മൊബൈല്‍ ആപ്ലിക്കേഷന്‍ എല്ലാ ജീപ്പ്, ആംബുലന്‍സ് ഡ്രൈവര്‍മാര്‍ക്കും എത്തിക്കുന്നു.

ഇതിനു മുന്നോടിയായി 2018 ജനുവരി 28-നു കുട്ടമ്പുഴയിലെ സ്‌പെഷാലിറ്റി ക്ലിനിക്കല്‍ ലബോറട്ടറി അംഗമായ ബിനോയ്, പി.എച്ച്.സി ഹെല്‍ത്ത് ഇന്‍സ്‌പെക്ടര്‍ കെ.ആര്‍ സുഗുണന്‍, വാര്‍ഡ് മെമ്പര്‍ നിബി എബി, ഫൊക്കാനയെ പ്രതിനിധീകരിച്ച് ജോയ് ഇട്ടന്‍, ഉരുളന്തണ്ണി ഫ്രണ്ട്‌സ് ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ് എന്നിവരുടെ മഹനീയ സാന്നിധ്യത്തില്‍ ഉരുളന്തണ്ണി സരസ്വതി ശിശുമന്ദിരം സ്കൂളില്‍ വച്ച് ഈ ദൗത്യത്തിനു തുടക്കംകുറിച്ചു.

കൂടുതല്‍ വിവരങ്ങള്‍ക്ക്: യു.എസ്.എ 847 562 1051, ഇന്ത്യ 9496 955 379.

ജോയിച്ചന്‍ പുതുക്കുളം

സീറോ മലബാര്‍ കത്തീഡ്രലില്‍ ടാക്‌സ് സെമിനാര്‍ ജനുവരി 28-ന്

ഷിക്കാഗോ: ഷിക്കാഗോ എസ്.എം.സി.സിയുടെ നേതൃത്വത്തില്‍ ജനുവരി 28-ന് നികുതിയെക്കുറിച്ചുള്ള സെമിനാര്‍ നടത്തുന്നു. വര്‍ഷങ്ങളായി ഈ മേഖലയില്‍ പ്രാവീണ്യമുള്ള ജോസഫ് ചാമക്കാല സി.പി.എ, ആന്‍ഡ്രൂസ് തോമസ് സി.പി.എ എന്നിവരാണ് സെമിനാറില്‍ സംസാരിക്കുന്നത്.

ജനുവരി 28-നു രാവിലെ 9.30-ന് ആരംഭിക്കുന്ന സെമിനാറില്‍ ചോദ്യോത്തരങ്ങള്‍ക്കുള്ള സമയവും ക്രമീകരിച്ചിരിക്കുന്നു. 2017-ലെ ടാക്‌സ് സംബന്ധമായ മാറ്റങ്ങളും വിശദാംശങ്ങളും സെമിനാറില്‍ വിശദീകരിക്കും.

സീറോ മലബാര്‍ കത്തീഡ്രലിന്റെ പാരീഷ് ഹാളില്‍ വച്ചാണ് സെമിനാര്‍ നടത്തപ്പെടുന്നത്. സെമിനാറിന്റെ സുഗമമായ നടത്തിപ്പിന് ഷിബു അഗസ്റ്റിന്‍, ജോസഫ് നാഴിയംപാറ, ജോണ്‍സണ്‍ കണ്ണൂക്കാടന്‍ എന്നിവര്‍ നേതൃത്വം നല്‍കുന്നു.

എസ്.എം.സി.സിക്കുവേണ്ടി മേഴ്‌സി കുര്യാക്കോസ് അറിയിച്ചതാണിത്.

ജോയിച്ചന്‍ പുതുക്കുളം

ഫ്രണ്ട്സ് ഓഫ് തിരുവല്ലയ്ക്കു പുതിയ സാരഥികൾ

ഹൂസ്റ്റൺ: ഹൂസ്റ്റണിലെ പ്രമുഖ മലയാളി സംഘടനകളിലൊന്നായ ഫ്രണ്ട്സ് ഓഫ് തിരുവല്ലയുടെ 2018-19 ലേക്കുള്ള പുതിയ ഭാരവാഹികളെ തെരഞ്ഞെടുത്തു.

ജനുവരി 20നു ശനിയാഴ്ച വൈകുന്നേരം 5:30 മുതൽ സ്റ്റാഫോർഡിലുള്ള ദേശി റെസ്റ്റോറന്റിൽ വച്ച് നടന്ന പുതുവത്സര കുടുംബ സംഗമത്തോടനുബന്ധിച്ചാണ് തെരഞ്ഞെടുപ്പ് നടന്നത്.

പ്രസിഡന്റ് റോബിൻ ഫിലിപ്പ് അധ്യക്ഷത വഹിച്ച ചടങ്ങിൽ മാർത്തോമാ സഭയിലെ സീനിയർ വൈദികൻ റവ. എസ്. അലക്സാണ്ടർ ക്രിസ്തുമസ് പുതുവത്സര സന്ദേശം നൽകി. റവ.ഫാ. എബ്രഹാം തോട്ടത്തിൽ ആശംസകൾ അർപ്പിച്ചു.

സെക്രട്ടറി ഉമ്മൻ തോമസ് വാർഷിക റിപ്പോർട്ടും ട്രഷറർ ടെറീഷ് തോമസ് കണക്കും അവതരിപ്പിച്ചു. തുടർന്ന് നടന്ന തെരഞ്ഞെടുപിന് എം.ടി.മത്തായി ഇലക്ഷൻ കമ്മിഷണർ ആയി പ്രവർത്തിച്ചു.

2018-19 ലേക്കു തെരഞ്ഞെടുക്കപ്പെട്ട ഫ്രണ്ട്സ് ഓഫ് തിരുവല്ല ഭാരവാഹികൾ;

ഈശോ ജേക്കബ് (പ്രസിഡന്റ്), റോബിൻ ഫിലിപ്പ് (വൈസ് പ്രസിഡന്റ് ), തോമസ് ഐപ്പ് (സെക്രട്ടറി), ഉമ്മൻ തോമസ് (ട്രഷറർ), ബിജു ജോർജ് (ജോയിന്റ് സെക്രട്ടറി), സുജ കോശി (ജോയിന്റ് ട്രഷറർ).

ഡയറക്ടർ ബോർഡ് അംഗങ്ങൾ ; പി.എ വർഗീസ്, സാം സക്കറിയ,മറിയാമ്മ ഉമ്മൻ, ജോർജ്‌ തോമസ്, ഡോ. അന്ന.കെ ഫിലിപ്പ്, മോൻസി വർഗീസ്,വിനോദ് ഈപ്പൻ, ഇ.എ.എബ്രഹാം, റെനി കവലയിൽ.

വൈസ് പ്രസിഡന്റ് തോമസ് ഐപ്പ് നന്ദി പ്രകാശിപ്പിച്ചു.

വിവിധ കലാപരിപാടികളും വിഭവ സമൃദ്ധമായ ഡിന്നറും തിരുവല്ല സംഗമ സന്ധ്യയെ മികവുറ്റതാക്കി മാറ്റി.

ജീമോൻ റാന്നി

ഐ എൻ ഓ സി ടെക്സാസ് ചാപ്റ്ററിന്റെ ഇന്ത്യൻ റിപ്പബ്ലിക്ക് ദിനാഘോഷം 27 നു

ഹൂസ്റ്റൺ: ഇന്ത്യൻ നാഷണൽ ഓവർസീസ് കോൺഗ്രസ് ടെക്സാസ് (INOC) ചാപ്റ്ററിന്റെ ആഭിമുഖ്യത്തിൽ 69 മത് ഇന്ത്യൻ റിപ്പബ്ലിക്ക് ദിനാഘോഷം ജനുവരി 27 നു ശനിയാഴ്ച വൈകുന്നേരം 5 മുതൽ സൗത്ത് ഇന്ത്യൻ ചേംബർ ഓഫ് കോമേഴ്‌സ് ഹാളിൽ വച്ചു ( 445, Murphy Road, Stafford, TX 77577) നടത്തപെടുന്നതാണ്.

യോഗത്തിൽ ഓവർസീസ് കോൺഗ്രസിന്റെ പ്രമുഖ നേതാക്കളും സാംസ്‌കാരിക നേതാക്കളും പങ്കെടുക്കും. ഹൂസ്റ്റണിലെ എല്ലാ ദേശസ്നേഹികളെയും ഈ സമ്മേളനത്തിലേക്ക് ക്ഷണിക്കുന്നുവെന്നു ഭാരവാഹികൾ അറിയിച്ചു.

കൂടുതൽ വിവരങ്ങൾക്ക് ; ജോസഫ് എബ്രഹാം (പ്രസിഡന്റ്) : 713-582-9517, ബേബി മണക്കുന്നേൽ (ജനറൽ സെക്രട്ടറി): 713-291-9721, എബ്രഹാം തോമസ് (ട്രഷറർ) : 832 -922-8187.

ജീമോൻ റാന്നി

കുന്നിത്തറയിൽ കെ.ഇടിക്കുള നിര്യാതനായി

ഹൂസ്റ്റൺ : പത്തനാപുരം ചാച്ചിപുന്ന കുന്നിത്തറയിൽ വീട്ടിൽ കെ. ഇടിക്കുള (93) നിര്യാതനായി. പരേതന്റെ ഭാര്യ ഏലിയാമ്മ ഇടിക്കുള.

മക്കൾ : ഏലിയാമ്മ ജോർജ് (ഹൂസ്റ്റൺ), പരേതയായ ലീലാമ്മ മാത്യൂസ്, എബ്രഹാം ഇടിക്കുള, വര്ഗീസ് ഇടിക്കുള, തോമസ് ഇടിക്കുള (മോനി), ഷാജിമോൻ ഇടിക്കുള (എല്ലാവരും ഹൂസ്റ്റൺ)

മരുമക്കൾ: ജോസഫ് ജോർജ് (ഹൂസ്റ്റൺ) മാത്യൂസ് വി (ബാംഗ്ലൂർ) സൂസി എബ്രഹാം, മേഴ്‌സി വർഗീസ്, ലില്ലിക്കുട്ടി തോമസ്, ആലീസ് ഷാജിമോൻ (എല്ലാവരും ഹൂസ്റ്റൺ)

സംസ്‌കാര ശുശ്രൂഷകൾ ജനുവരി 27 നു ശനിയാഴ്ച രാവിലെ 11 മണിക്ക് ചാച്ചിപുന്ന ശാലേം മാർതോമ്മാ ദേവാലയത്തിൽ ആരംഭിക്കുന്നതും തുടർന്ന് മൃതദേഹം ശാലേം മാർതോമ്മാ ദേവാലയ സെമിത്തേരിയിൽ സംസ്കരിക്കുന്നതുമാണ്.

കൂടുതൽ വിവരങ്ങൾക്ക് ബന്ധപെടുക; മോനി – 713 870 2151, 9846853155 (ഇന്ത്യ).

ഐ.എന്‍.ഒ.സി കേരള പെന്‍സില്‍വാനിയ ഇന്ത്യന്‍ റിപ്പബ്ലിക് ദിനാഘോഷം ജനുവരി 27-ന്

ഫിലാഡല്‍ഫിയ: ഇന്ത്യന്‍ നാഷണല്‍ ഓവര്‍സീസ് കോണ്‍ഗ്രസ് കേരള പെന്‍സില്‍വാനിയ ചാപ്റ്ററിന്റെ ആഭിമുഖ്യത്തില്‍ ഇന്ത്യയുടെ അറുപത്തൊമ്പതാമത് റിപ്പബ്ലിക് ദിനാഘോഷം ജനുവരി 27-നു ശനിയാഴ്ച വൈകുന്നേരം 6 മുതല്‍ അതിഥി റെസ്റ്റോറന്റ് ഓഡിറ്റോറിയത്തില്‍ (9321 Krewstone Rd, Phila, PA 19115) വച്ചു നടത്തുന്നു. 1947 ഓഗസ്റ്റ് 15-നു സുര്യന്‍ അസ്തമിക്കാത്ത സാമ്രാജ്യത്വത്തില്‍ നിന്നും സ്വാതന്ത്ര്യം നേടിയ ഇന്ത്യ, 1950 ജനുവരി 26-നു ഡോ. ബി.ആര്‍. അംബേദ്കറിന്റെ നേതൃത്വത്തില്‍ ഭരണഘടന എഴുതിയുണ്ടാക്കി സ്വതന്ത്ര റിപ്പബ്ലിക്കായി പ്രഖ്യാപിക്കപ്പെട്ടു.

ഈ യോഗത്തില്‍ ഓവര്‍സീസ് കോണ്‍ഗ്രസിന്റേയും, കോണ്‍ഗ്രസിന്റേയും അമേരിക്കയിലെ പ്രമുഖ നേതാക്കള്‍ പങ്കെടുക്കുന്നതാണ്. പബ്ലിക് മീറ്റിംഗിനുശേഷം പ്രോഗ്രാം കണ്‍വീനര്‍മാരായ ജീമോന്‍ ജോര്‍ജിന്റേയും, ഷാലു പുന്നൂസിന്റേയും നേതൃത്വത്തില്‍ മിമിക്രിയും, ഗാനസന്ധ്യയും കോര്‍ത്തിണക്കി കാണികള്‍ക്ക് നയനശ്രവണ വിസ്മയം ഉളവാക്കുന്ന കള്‍ച്ചറല്‍ പ്രോഗ്രാമും ഉണ്ടായിരിക്കുന്നതാണ്. ഈ റിപ്പബ്ലിക് ദിനാഘോഷത്തിലേക്ക് ഫിലാഡല്‍ഫിയയിലെ എല്ലാ മലയാളി സുഹൃത്തുക്കളേയും സ്വാഗതം ചെയ്യുന്നു.

കൂടുതല്‍ വിവരങ്ങള്‍ക്ക്: കുര്യന്‍ രാജന്‍ (പ്രസിഡന്റ്) 610 457 5868, സന്തോഷ് ഏബ്രഹാം (ജനറല്‍ സെക്രട്ടറി) 215 605 6914, ഫിലിപ്പോസ് ചെറിയാന്‍ (ട്രഷറര്‍) 215 605 7310.

ജോയിച്ചന്‍ പുതുക്കുളം

മാധ്യമ പ്രവർത്തകൻ ഏലിയാസ് മാർക്കോസിന്റെ നിര്യാണത്തിൽ ഐപിസിഎൻഎ നോർത്ത് ടെക്സാസ് അനുശോചിച്ചു

ഡാളസ് : മാധ്യമ പ്രവർത്തകനും ഇന്ത്യ പ്രസ് ക്ലബ് ഓഫ് നോർത്ത് അമേരിക്ക -നോർത്ത് ടെക്സാസ് മുൻ മെമ്പറും ഡാളസിലെ സാമൂഹിക സാംസ്കാരിക പ്രവർത്തകനുമായിരുന്നു ഏലിയാസ് മാർക്കോസിനെ നിര്യാണത്തിൽ ഐപിസിഎൻഎ ഡാളസ്ചാപ്റ്റർ അനുശോചനം രേഖപ്പെടുത്തി.

ജനുവരി 21 ഞായർ വൈകിട്ട് ഗാർലൻഡ് ഇൻഡ്യാ ഗാർഡനിൽ ചേർന്ന യോഗത്തിൽ പ്രസിഡണ്ട് ബിജിലി ജോർജ് അധ്യക്ഷത വഹിച്ചു. എബ്രഹാം തെക്കേമുറി, ടി സി ചാക്കോ, പി പി ചെറിയാൻ തുടങ്ങിയവർ സ്മരണകൾ പങ്കുവെക്കുകയും അംഗങ്ങൾ അനുശോചനം രേഘപ്പെടുത്തുകയും ചെയ്തു

ജനുവരി 23 ചൊവ്വാഴ്ച ഉച്ചക്ക് കേരളത്തിൽ നടക്കുന്ന സംസ്കാര ശുശ്രൂഷകളുടെ തത്സമയ സംപ്രേഷണം
http://www.funeralonlive.com/ ലും https://www.facebook.com/funeralonlive ലഭിക്കുന്നതാണ്.

ഫൈന്‍ ആര്‍ട്‌സിന് പുതിയ ഭരണസമിതി

ന്യൂജേഴ്‌സി: അമേരിക്കയിലെ കാലരംഗത്ത് ശക്തമായ സാന്നിദ്ധ്യമായി മലയാളി സാന്നിദ്ധ്യമായി മലയാളി മനസുകള്‍ കീഴടക്കിയ ഫൈന്‍ ആര്‍ട്‌സ് മലയാളം പതിനേഴാം വയസിലേക്ക്. പതിനേഴിന്റെ ചുറുചുറുക്കോടെ മുന്നേറുന്ന ഫൈന്‍ ആര്‍ട്‌സിനെ നയിക്കുംവിധം പുതിയ ഭരണസമിതിയും വാര്‍ഷിക പൊതുയോഗത്തില്‍ വെച്ച് തിരഞ്ഞെടുത്തു. എഡിസണ്‍ ഏബ്രഹാം ആണ് പ്രസിഡന്റ് റോയി മാത്യു സെക്രട്ടറിയും, ടീനോ തോമസ് ട്രഷറാറുമാണ്. കമ്മിറ്റി അംശങ്ങള്‍. സജിനി സഖറിയ, റെഞ്ചി കൊച്ചുമ്മന്‍, ജോര്‍ജ് തുമ്പയില്‍. ഓഡിറ്റര്‍-സിബി ഡേവിഡ്. ഫൈന്‍ ആര്‍ട്‌സിന്റെ ഉപജ്ഞാതാവും മാര്‍ഗദര്‍ശിയുമായ പി.ടി.ചാക്കോ സ്ഥിരം രക്ഷാധികാരിയാണ്.

സ്തുത്യര്‍ഹമായി രണ്ട് വര്‍ഷം സേവനമനുഷ്ഠിച്ച ഭരണസമിതി അംഗങ്ങളെ പൊതുയോഗം അനുമോദിച്ചു. അമേരിക്കയിലെ കലാരംഗത്ത് സ്വന്തമായി കൈയ്യൊപ്പുള്ള ഫൈന്‍ ആര്‍ട്‌സ് ഇപ്പോള്‍ തുടര്‍ന്നു വരുന്ന മാനദണ്ഡങ്ങളും, കീഴ് വഴക്കങ്ങളുമായി തന്നെ മുമ്പോട്ട് പോയാല്‍ മതിയെന്നും പൊതുയോഗം തീരുമാനിച്ചു. കൂടുതല്‍ പ്രോഗ്രാമുകളുടെ പുറകെ പോകുന്നതിന് പകരം ചെയ്യുന്ന പ്രോഗ്രാമുകള്‍ എല്ലാവരും വന്ന് പങ്കെടുത്ത് പോകാന്‍ പറ്റുന്ന രീതിയില്‍ പിന്‍തുടരുന്നതാണ് നന്ന് എന്നും യോഗം അഭിപ്രായപ്പെട്ടു.

പത്മഭൂഷണ്‍ ഡോ.കെ.ജെ.യേശുദാസ് 2001-ല്‍ ഭദ്രദീപം കൊളുത്തി ഉദ്ഘാടനം ചെയ്ത ഫൈന്‍ ആര്‍ട്‌സ് മലയാളം ഇതിനോടകം നാടകം, നൃത്തം, ഡാന്‍സ്, ഡ്രാമ, ചരിത്രാവിഷ്‌ക്കാരം തുടങ്ങി വിവിധ കലാരൂപങ്ങള്‍ രംഗത്ത് അവതരിച്ചിട്ടുണ്ട്.

ജോര്‍ജ്ജ് തുമ്പയില്‍