ഓവര്‍സീസ് കോണ്‍ഗ്രസ്സ് നേതാവ് ജോയ് ഇട്ടന് എ.ഐ.സി.സി പ്ലീനറി സമ്മേളനത്തിലേക്ക് ക്ഷണം

ന്യൂയോര്‍ക്ക്: ഇന്ത്യന്‍ നാഷണല്‍ ഓവര്‍സീസ് കോണ്‍ഗ്രസ്സിന്റെ ന്യൂയോര്‍ക്ക് സ്‌റ്റേറ്റ് ചാപ്റ്റര്‍ പ്രസിഡന്റ് ജോയ് ഇട്ടന് ഈ മാസം 16 നു ഡല്‍ഹിയില്‍ ആരംഭിക്കുന്ന എ.ഐ.സി.സി പ്ലീനറി സമ്മേളനത്തിലേക്ക് പ്രത്യേക ക്ഷണം ലഭിച്ചു .കോണ്‍ഗ്രസ് വക്താവ് പി സി ചാക്കോ ഫോണില്‍ വിളിച്ചാണ് ഈ വിവരം അറിയിച്ചത്. ഇന്ത്യക്ക് പുറത്തു പ്രവര്‍ത്തിക്കുന്ന കോണ്‍ഗ്രസ്സ് പ്രവര്‍ത്തകരെ കൂടി എ. ഐ .സി .സി സമ്മേളനങ്ങളില്‍ ഉള്‍പ്പെടുത്തുകയും കോണ്‍ഗ്രസിന്റെ പ്രവര്‍ത്തന മേഖല ഭാരതീയര്‍ ഉള്ള സ്ഥലങ്ങളിലേക്ക് വ്യാപിപ്പിക്കുന്നതിന്റെയും ഭാഗമായും 2019 ലെ പൊതു തെരഞ്ഞെടുപ്പില്‍ എല്ലാ കോണ്‍ഗ്രസ്സ് പ്രവര്‍ത്തകരെയും തയ്യാറാക്കുക എന്നതാണ് ഈ ക്ഷണത്തിനു പിന്നിലെന്ന് താന്‍ വിശ്വസിക്കുന്നതായി ജോയ് ഇട്ടന്‍ അറിയിച്ചു .ഇങ്ങനെ ഒരു ക്ഷണം കിട്ടിയതില്‍ അതിയായ സന്തോഷമുണ്ടെന്ന് അദ്ദേഹം പറഞ്ഞു.ഇപ്പോള്‍ ഇന്ത്യന്‍ നാഷണല്‍ ഓവര്‍സീസ് കോണ്‍ഗ്രസ്സിന്റെ ന്യൂയോര്‍ക് സ്‌റ്റേറ്റ് ചാപ്റ്റര്‍ പ്രസിഡന്റ് ആയി പ്രവര്‍ത്തിക്കുന്ന അദ്ദേഹം സംഘടനയുടെ സെക്രെട്ടറിയായും പ്രവര്‍ത്തിച്ചുണ്ട്.

വിദ്യാര്‍ത്ഥി രാഷ്ട്രീയത്തിലൂടെയാണ് രാഷ്ട്രീയ രംഗത്ത് കടന്ന് വരുന്നത്.1984 ഇല്‍ കെ.എസ്.യൂ. സംസ്ഥാന സെക്രട്ടറി, യൂത്ത് കോണ്‍ഗ്രസ് എറണാകുളം ജില്ലാ ജനറല്‍ സെക്രട്ടറി, കെ.പി,സി.സി. മെമ്പര്‍, ഐ എന്‍ ടി യു സി സംസ്ഥാന കമ്മിറ്റി മെമ്പര്‍ ,മൂവാറ്റുപുഴയിലെ തൊഴിലാലായി സംഘടനാ പ്രവര്‍ത്തനം തുടങ്ങി കോണ്‍ഗ്രസ്സ് പ്രസ്ഥാനത്തിനൊപ്പം സഞ്ചരിക്കുന്ന ജോയ് ഇട്ടന്‍ 1990 അമേരിക്കയില്‍ എത്തുന്നത് . വെസ്റ്റ് ചെസ്റ്റര്‍ മലയാളി അസ്സോസിയേഷന്റെ മുന്‍ പ്രസിഡന്റ്, വൈസ് പ്രസിഡന്റ്, ട്രഷറര്‍, എക്‌സിക്യൂട്ടീവ് കമ്മിറ്റി അംഗം, സിറിയന്‍ ഓര്‍ത്തഡോക്‌സ് സഭ അമേരിക്കന്‍ കാനഡ ഭദ്രാസനം കൗണ്‍സില്‍ അംഗം വല്‍ഹാല സെയിന്റ് ജോണ്‍സ് യാക്കോബായ പള്ളി ട്രസ്റ്റി എന്നീ നിലകളില്‍ പ്രവര്‍ത്തിക്കുന്നു .ഇപ്പോള്‍ ഫൊക്കാനയുടെ ചാരിറ്റി കമ്മിറ്റിയുടെ ചെയര്‍മാന്‍ ആയി പ്രവര്‍ത്തിക്കുന്ന ജോയി ഇട്ടന്റെ നേതൃത്വത്തില്‍ നിര്‍ധനരായ കേരളത്തിലെ ജനങ്ങള്‍ക്ക് ഫൊക്കാനാ നിര്‍മ്മിച്ച് നല്‍കുന്ന സ്‌നേഹവീട് പദ്ധതിയുടെ പ്രവര്‍ത്തനങ്ങളില്‍ മുഴുകിയിരിക്കുന്ന അദ്ദേഹം .കൈവച്ച മേഖലയില്‍ എല്ലാം വിജയം വരിച്ചാണ് ജോയ് ഇട്ടന്റെ യാത്ര. കോണ്‍ഗ്രസിന്റെ പ്ലീനറി സമ്മേളനത്തില്‍ പങ്കെടുക്കുവാന്‍ പ്രവാസികള്‍ക്ക് അവസരം ലഭിക്കുന്നത് നടാടെയാണ് .അഖിലേന്ത്യ കോണ്‍ഗ്രസ് കമ്മിറ്റിയുടെ 64മത് പ്ലീനറി സമ്മേളനം 16 മുതലാണ് ഡല്‍ഹിയില്‍ ആരംഭിക്കുന്നത് .പതിമൂവായിരത്തോളം അംഗങ്ങളാണ് ഇത്തവണ പ്ലീനറി സമ്മേളനത്തില്‍ പങ്കെടുക്കുന്നത്. കോണ്‍ഗ്രസ് അദ്ധ്യക്ഷനായി രാഹുല്‍ ഗാന്ധി ഔദ്യോഗികമായി ചുമതലയേല്‍ക്കുന്ന സമ്മേളനത്തില്‍ കോണ്‍ഗ്രസ് വര്‍ക്കിങ് കമ്മിറ്റി അംഗങ്ങളുടെ തിരഞ്ഞെടുപ്പും നടക്കുന്നതു എന്ന പ്രത്യേകാതെയും ഉണ്ട് .

16 നു സബ്ജക്ട് കമ്മിറ്റി എന്ന നിലയില്‍ പാര്‍ട്ടിയുടെ സ്റ്റിയറിങ് കമ്മിറ്റി യോഗം ചേരും. പ്രത്യേക ക്ഷണിതാക്കളടക്കമുള്ള സ്റ്റിയറിങ് കമ്മിറ്റി യോഗമാണ് സമ്മേളനത്തില്‍ അവതരിപ്പിക്കേണ്ട പ്രമേയങ്ങള്‍ അംഗീകരിക്കേണ്ടത്. മുന്‍ പ്രധാനമന്ത്രി മന്‍മോഹന്‍ സിങ്ങും, മുന്‍ ധനമന്ത്രി പി ചിദംബരവും ചേര്‍ന്ന് തയ്യാറാക്കിയ സാമ്പത്തിക നയപ്രമേയം, കോണ്‍ഗ്രസ് വര്‍ക്കിങ് കമ്മിറ്റി അംഗം എ കെ ആന്റണി തയ്യാറാക്കിയ രാഷ്ട്രീയ പ്രമേയം, അന്തര്‍ദേശിയ രംഗത്തെ സംബന്ധിച്ച് പാര്‍ട്ടിയുടെ കാഴ്ചപ്പാട് വ്യക്തമാക്കുന്ന പ്രമേയം, കാര്‍ഷിക – തൊഴില്‍ മേഖലയെ സംബന്ധിച്ചുള്ള പ്രമേയം തുടങ്ങി നാല് പ്രമേയങ്ങളാണ് പ്ലീനറി സമ്മേളനത്തില്‍ ചര്‍ച്ച ചെയ്യുന്നത്. 17 നു 9 മണിക്ക് ഇന്ദിര ഗാന്ധി ഇന്‍ഡോര്‍ സ്‌റ്റേഡിയത്തില്‍ കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധി പതാക ഉയര്‍ത്തുന്നതോടെ പ്ലീനറി സമ്മേളന നടപടികള്‍ ആരംഭിക്കും. 18 നു നാല് മണിക്ക് ചര്‍ച്ചകള്‍ ഉപസംഹരിച്ചുള്ള കോണ്‍ഗ്രസ് അദ്ധ്യക്ഷന്റെ മറുപടി പ്രസംഗത്തോടെ സമ്മേളനം അവസാനിക്കും.കോണ്‍ഗ്രസ് വര്‍ക്കിങ് കമ്മിറ്റി അംഗങ്ങളുടെ തിരഞ്ഞെടുപ്പും ഈ സമ്മേളനത്തില്‍ നടക്കും. കമ്മിറ്റിയിലെ പകുതി അംഗങ്ങളെ പ്ലീനറി സമ്മേളനം തിരഞ്ഞെടുക്കും. പകുതി അംഗങ്ങളെ കോണ്‍ഗ്രസ് അദ്ധ്യക്ഷന്‍ നാമനിര്‍ദേശം ചെയ്യും.