വേള്‍ഡ് മലയാളി കൗണ്‍സില്‍ ന്യൂയോര്‍ക്ക് പ്രോവിന്‍സിന്റെ ഈസ്റ്റര്‍, വിഷു ദിനാഘോഷ പരിപാടികള്‍ മെയ് 14ന്, ഒരുക്കങ്ങള്‍ പൂര്‍ത്തിയായി

ന്യൂയോര്‍ക്ക്: വേള്‍ഡ് മലയാളി കൗണ്‍സില്‍ ന്യൂയോര്‍ക്ക് പ്രോവന്‍സിന്റെ നേത്രുത്വത്തില്‍ നടത്തുന്ന ഈസ്റ്റര്‍ വിഷു ദിനാഘോഷ പരിപാടികള്‍ വരുന്ന ശനിയാഴ്ച ഏപ്രില്‍ 14ന് ന്യൂയോര്‍ക്കിലെ ടൈയിസന്‍ സെന്റെറില്‍ (ഫ്‌ളോറല്‍ പാര്‍ക്ക് ന്യൂയോര്‍ക്ക് ) Tyson Center Floral Park New York) വച്ച് നടത്തുന്നതിന്റെ ഒരുക്കങ്ങള്‍ പൂര്‍ത്തിയായതായി പ്രസിഡന്റ് ശ്രീ. കോശി ഉമ്മന്‍ തോമസ് അറിയിച്ചു.

വൈകുന്നേരം കൃത്യം 5 മണിയോടുകൂടി ആരംഭിക്കുന്ന കലാപരിപാടികള്‍ നമ്മുടെ തന്നെ കമ്മ്യൂണിറ്റിയില്‍ വളര്‍ന്നുവരുന്ന മികവാര്‍ന്ന കുട്ടികളുടെ കഴിവുകളെ പ്രോത്സാഹിപ്പിക്കുക എന്ന ഉദേശത്തോടുകൂടിയാണ് ഈ കലാപരിപാടികള്‍ എന്ന് ചെയര്‍മാന്‍ ശ്രി. പോള്‍ ചുള്ളിയില്‍
അറിയിച്ചു.

ആറു മണിയോടുകൂടി ആരംഭിക്കുന്ന പബ്ലിക്ക് മീറ്റിംഗില്‍ റെവ. സക്കറിയ തോമസ് , ശ്രീ.പാര്‍ത്തസാരഥി പിള്ളൈ എന്നിവര്‍ മുഖ്യാതിഥികളായിരിക്കും. വേള്‍ഡ് മലയാളി കൗണ്‍സില്‍ അമേരിക്കാ റീജിയന്റെയും മറ്റു പ്രോവിന്‍സുകളുടെയും പ്രതിനിധികള്‍ ഈ യോഗത്തില്‍ പങ്കെടുക്കും.

ഏഴു മണിയോടുകൂടി, ഓഗസ്റ്റ് 2426, 2018 ല്‍ ന്യൂ ജേഴ്‌സിയില്‍ വച്ച് നടത്താനിരിക്കുന്ന ലോകമലയാളി കൗണ്‍സിലിന്റെ പതിനൊന്നാമത് ബയന്യല്‍ വാര്‍ഷികത്തിന്റെ രജിസ്‌ട്രേഷന്‍ കിക്ക് ഓഫ് കണവന്‍ഷന്‍ ചെയര്‍മാന്‍ ശ്രീ തോമസ് മൊട്ട്കലിന്റെയും, കണ്‍വീനര്‍ തങ്കമണി അരവിന്ദന്റെയും സാന്നിദ്ധ്യത്തില്‍ നടത്തുന്നതായിരിക്കും .തുടര്‍ന്ന് മറ്റു കലാപരിപാടികളും, എട്ടു മണിക്ക് ഈസ്റ്റര്‍ വിഷു ദിനാഘോഷ ങ്ങളുടെ വിഭവ സമൃദ്ധമായ സദ്യ ഉണ്ടായിരിക്കും
എന്നും പ്രോഗ്രാം കോഓര്‍ഡിനേറ്റര്‍ ആയ ശ്രീ.ഷാജി എണ്ണശ്ശേരില്‍ അറിയിച്ചു. ഈ ആഘോഷ ചടങ്ങിലേക്ക് എല്ലാ മലയാളികളെയും സാദരം ക്ഷണിച്ചുകൊള്ളുന്നു. കൂടുതല്‍ വിവരങ്ങള്‍ക്ക് : 917 868 6960

ഫിലിപ്പ് മാരേട്ട്

ജെസിക്ക മേരി ഫിലിപ്പ് (35) നിര്യാതയായി

ന്യു യോര്‍ക്ക്: ലോംഗ് ഐലന്‍ഡിലെ പ്ലെയിന്‍ വ്യൂവില്‍ താമസിക്കുന്ന ജെയ്‌സന്‍ ഫിലിപ്പിന്റെ ഭാര്യ ജെസിക്ക മേരി ഫിലിപ്പ് (35) മാര്‍ച്ച് 31നു നിര്യാതയായി.

ന്യു ഹൈഡ് പാര്‍ക്കില്‍ താമസിക്കുന്ന കോലഞ്ചേരി താമരച്ചാലില്‍ ജോയ് ടി. പീറ്ററുടെയും വത്സ ജോയിയുടെയും പുത്രിയാണ്.

ആറ് വയസുള്ള ഏവ, നാലു വയസുള്ള ഒലിവിയ എന്നിവരാണു പുത്രിമാര്‍.

ഡോ. ജോയ്‌സി ജേക്കബ് (ഭര്‍ത്താവ് റോണ്‍ ജേക്കബ്), അറ്റോര്‍ണിയായബേസില്‍ ജോയ് എന്നിവരാണു സഹോദരര്‍. മുത്തശി മറിയാമ്മ ഏബ്രഹാം ജീവിച്ചിരിപ്പുണ്ട്.എഴുത്തുകാരനായ വര്‍ഗീസ് പോത്താനിക്കാടും ഏബ്രഹാമും മാത്രുസഹോദരരാണ്.

ചിന്നമ്മ സിന്‍ഹ, ജോര്‍ജ് പീറ്റര്‍, മുന്‍ യു.എന്‍. ചീഫ് പ്രോട്ടോക്കോള്‍ ഓഫീസര്‍ റവ. ഫാ. പൗലോസ് ടി. പീറ്റര്‍, തമ്പി പീറ്റര്‍ എന്നിവര്‍ പിത്രുസഹാദരരാണ്.
ലോംഗ് ഐലന്‍ഡിലെ വില്ലിസ്റ്റന്‍ പാര്‍ക്കില്‍ താമസിക്കുന്ന ചെങ്ങന്നൂര്‍ കോയിപ്പുറം കൊല്ലമ്പറമ്പില്‍ ഫിലിപ്പ് ചാക്കോയുടെയും മറിയാമ്മ ചാക്കോയുടെയും പുത്രനാണ് ജെയ്‌സന്‍ ഫിലിപ്പ്. ജെയ്‌സന്റെ സഹോദരി ജാനറ്റ്, ഭര്‍ത്താവ് ജോണ്‍.

സുനി ഫാര്‍മിംഗ്‌ഡേലില്‍ നിന്നു നഴ്‌സിംഗ് ബിരുദമെടുത്ത ജെസിക്ക ബെത്ത്‌പേജ് സെന്റ് ജോസഫ്’സ് ഹോസ്പിറ്റലില്‍ ആര്‍.എന്‍. ആയിരുന്നു. സെന്റ് മേരീസ് ഓര്‍ത്തഡോക്‌സ് ചര്‍ച്ച്, വൈറ്റ് പ്ലെയിന്‍സ്, സെന്റ് മേരീസ് ഓര്‍ത്തഡോക്‌സ് ചര്‍ച്ച്, ബ്രോങ്ക്‌സ് എന്നിവിടങ്ങളില്‍ സജീവ പ്രവര്‍ത്തകയും യൂത്ത് ലീഡറുമായിരുന്നു

പൊതുദര്‍ശനം: ഏപില്‍ 4 ബുധന്‍ വൈകിട്ട് 5 മുതല്‍ 9 വരെ: സെന്റ് തോമസ് മലങ്കര ഓര്‍ത്തഡോക്‌സ് ചര്‍ച്ച്, 110 സ്കൂള്‍ ഹൗസ് റോഡ്, ലെവിടൗണ്‍, ന്യു യോര്‍ക്ക്

സംസ്കാര ശുശ്രൂഷ: ഏപ്രില്‍ 5 രാവിലെ 7 മുതല്‍ 9 വരെ പ്രാര്‍ഥനയും വി. കുര്‍ബാനയും റവ. ഫാ. പൗലോസ് ടി. പീറ്ററിന്റെ കാര്‍മ്മികത്വത്തില്‍. 9 മുതല്‍ 10 വരെ സംസ്കാര ശുശ്രൂഷ അന്ത്യഘട്ടം. നോര്‍ത്ത് ഈസ്റ്റ് അമേരിക്കന്‍ ഡയോസിസ് ഭദ്രാസനാധിപന്‍ സഖറിയ മാര്‍ നിക്കോളാവൂസ് മെത്രാപ്പോലീത്ത നേത്രുത്വം നല്‍കും. ബ്രോങ്ക്‌സ് സെന്റ് മേരീസ് വികാരി റവ. ഫാ. എ.കെ. ചെറിയാന്‍ പങ്കെടൂക്കും.

സംസ്കാരം: ഓള്‍ സെയിന്റ് സെമിത്തേരി, 855 മിഡില്‍ നെക്ക് റോഡ്, ഗ്രേറ്റ് നെക്ക്, ന്യു യോര്‍ക്ക്11024

റോക്ക് ലാന്‍ഡ് സീറോ മലബാര്‍ സെന്റ് മേരീസ് പള്ളിയില്‍ യേശുവിന്റെ തിരുസ്വരൂപം പ്രദക്ഷണത്തിന്

ന്യുയോര്‍ക്ക്: റോക്ക് ലാന്‍ഡ് വെസ്ലി ഹിത്സിലുള്ള സെന്റ് മേരീസ് സീറോ മലബാര്‍ ദേവാലയത്തില്‍ ദുഖവെള്ളിയാഴ്ച ഏതാനും ഇടവകക്കാരുടെ സംഭാവനയായ യേശുവിന്റെ തിരുസ്വരൂപം ആദ്യമായി പ്രദക്ഷണത്തില്‍ ആനയിക്കും.

ജെയിംസ് കാനാച്ചേരിയുടെ നേത്രുത്വത്തിലാണു ആറടിയുള്ളതിരുസ്വരൂപം കേരളത്തില്‍ നിന്നു കൊണ്ടു വന്നത്. ഒറ്റ തടിയില്‍ കൊത്തിയെടുത്തതാണു എതാണു പ്രത്യേകത. ചമ്പക്കുളത്തായിരുന്നു തിരുസ്വരൂപം നിര്‍മ്മിച്ചത്.

ദുഖവെള്ളിയാഴ്ച വൈകിട്ട് ആറു മണിക്കുള്ള തിരുക്കര്‍മ്മങ്ങളോടനുബന്ധിച്ച് രൂപത്തിന്റെ വെഞ്ചരിപ്പും നടക്കും. പ്രക്ഷണത്തിനു ശേഷം തിരുസ്വരൂപ ചുംബനം.തുടര്‍ന്ന് രൂപം പള്ളിയില്‍ സ്ഥാപിക്കും.

വിശുദ്ധ വാരത്തിലെ പ്രധാന ദിനങ്ങളില്‍ പള്ളിയില്‍ ഒരേ സമയം ഇംഗ്ലീഷിലും മലയാളത്തിലുമുള്ള വി. കുര്‍ബാന ഉണ്ടായിരിക്കുമെന്ന് വികാരി ഫാ. തദ്ദേവുസ് അരവിന്ദത്ത് അറിയിച്ചു. പള്ളി ഹാളില്‍ നടക്കുന്ന മലയാളത്തിലുള്ള വി. കുര്‍ബാനക്കുഫാ. ഫ്രാന്‍സിസ് നമ്പ്യാപറമ്പില്‍ കാര്‍മ്മികത്വം വഹിക്കും. സോഷ്യല്‍ ഹാളില്‍ സീറോ മലബാര്‍ ക്രമത്തിലുള്ള ഇംഗ്ലീഷ് കുര്‍ബാനക്കു വികാരി ഫാ. തദ്ദേവുസ് കാര്‍മ്മികത്വം വഹിക്കും.

പെസഹ വ്യാഴാഴ്ച തിരുക്കര്‍മങ്ങള്‍ വൈകിട്ട് 8 മണിക്കു ആരംഭിക്കും. ദുഖവെള്ളിയാഴ്ച വൈകിട്ട് 6 മണി.

ദുഖശനി രാവിലെ 10:30നു പള്ളിയില്‍ മലയാളം കുര്‍ബാന. വൈകിട്ട് 7:30നു ഈസ്റ്റര്‍ വിജില്‍
ഈസ്റ്റര്‍ ഞായറാഴ്ച രാവിലെ 11 മണിക്ക് പള്ളിയില്‍ മലയാളം കുര്‍ബാന.

റൌണ്ട് ടേബിള്‍ കോണ്‍ഫറന്‍സുകള്‍ക്കു തുടക്കം കുറിച്ച് ഇന്ത്യാ പ്രസ് ക്ലബ് ഡാളസ് ചാപ്റ്റർ

മാർട്ടിൻ വിലങ്ങോലിൽ

ഡാളസ്: ഇന്ത്യ പ്രസ്സ് ക്ളബ് ഓഫ് നോര്‍ത്ത് അമേരിക്ക ഡാളസ് ചാപറ്ററിന്റെ നേതൃത്വത്തിൽ ദേശീയ, പ്രാദേശീക തലങ്ങളിലെ വിവിധ സംഘടനാ നേതാക്കളെ ഏകോപിച്ചു നടത്തിയ റൌണ്ട് ടേബിള്‍ കോണ്‍ഫറന്‍സും , സിംപോസിയവും വൻ വിജയമായി. ഇന്ത്യാ പ്രസ് ക്ലബ് ഓഫ് നോർത്ത് അമേരിക്ക ഡാളസ് ചാപറ്ററിന്റെ 2018-19 വർഷത്തിലെ പ്രവർത്തനോദ്ഘാടനവും തദവസരത്തിൽ നടന്നു.
ഇർവിങ്ങിലെ പസന്ത്‌ ഓഡിറ്റോറിയത്തിൽ ശനിയാഴ്ച വൈകുന്നേരമായിരുന്നു പരിപാടികൾ.

ഡാളസ് ചാപറ്റർ പ്രസിഡന്റ് റ്റി സി ചാക്കോ അധ്യക്ഷത വഹിച്ചു പരിപാടികൾ ഉദ്ഘാടനം ചെയ്തു. സെക്രട്ടറി
ബിജിലി ജോർജ് ഏവർക്കും ഏവർക്കും സ്വാഗതം ആശംസിച്ചു.

ചാപറ്ററിന്റെ നേതൃത്വത്തിൽ 2018-19 വർഷത്തിൽ നടത്താനുദ്ദേശിക്കുന്ന നൂതന പരിപാടികളെക്കുറിച്ചു
റ്റി. സി ചാക്കോ വിവരിച്ചു. പ്രസ് ക്ലബിന്റെ ഭാവിയിലെ ദേശീയ കൺവൻഷൻ ഡാലസിൽ നടത്താനുള്ള സന്നദ്ധതയും പ്രത്യാശയും പ്രകടിപ്പിച്ചു അദ്ദേഹം മധു കൊട്ടാരക്കരയുടെ നേത്രൃത്വത്തിലുള്ള ദേശീയ സംഘടനക്കു ചാപ്റ്ററിന്റെ എല്ലാ പിന്തുണയും വാഗ്ദാനം ചെയ്തു.

ഫോമാ, കേരള അസോസിയേഷൻ ഓഫ് ഡാളസ്, ഇൻഡ്യാ കൾച്ചറൽ ആൻഡ് എഡ്യൂക്കേഷൻ സെന്റർ, ഡാളസ് മലയാളി അസോസിയേഷൻ (ഡിഎംഎ), ഇർവിങ് ഡിഎഫ് ഡബ്‌ള്യൂ ഇന്ത്യൻ ലയൺസ് ക്ലബ് ,ഡാളസ് എയ്‌സ്‌ ലയൺസ് ക്ലബ്, റാന്നി അസോസിയേഷൻ തുടങ്ങി വിവിധ സംഘടനാ പ്രതിനിധികൾ ആശംസകൾ അർപ്പിച്ചു സംസാരിച്ചു.

ഇൻഡ്യാ പ്രസ് ക്ലബിന് വളർച്ചയുടെ പടവുകൾ കീഴടക്കാനാവട്ടെ എന്ന് ഫോമയുടെ മുതിർന്ന നേതാവും, പ്രസിഡണ്ട് സ്‌ഥാനാർഥിയും, ഡാളസ് മലയാളി അസോസിയേഷൻ മുൻ പ്രസിഡന്റുമായ ഫിലിപ്പ് ചാമത്തിൽ ആശംസിച്ചു.

സത്യസന്ധമായ വാർത്തകൾ നിരന്തരം എത്തിക്കുന്ന ഇന്ത്യ പ്രസ്സ് ക്ലബ്ബിന്റെ പ്രവർത്തനങ്ങളെ
ഇർവിങ് ഡിഎഫ് ഡബ്‌ള്യൂ ഇന്ത്യൻ ലയൺസ് ക്ലബ് പ്രസിഡന്റും ഇൻഡ്യാ കൾച്ചറൽ ആൻഡ് എഡ്യൂക്കേഷൻ സെന്റർ സെക്രട്ടറിയുമായ ജോർജ് ജോസഫ് വിലങ്ങോലിൽ പ്രകീർത്തിച്ചു.

കാലത്തിൻെറ മാറ്റങ്ങൾക്കനുസരിച്ചു പ്രസ് ക്ലബിന്റെ കാഴ്ചപ്പാടിലും മാറ്റങ്ങളുണ്ടാകട്ടെയെന്നു ഡാളസ് എയ്‌സ്‌ ലയൺസ് ക്ലബിനെ പ്രതിനിധീകരിച്ചു ജോജോ കോട്ടക്കൽ ആശംസകൾ നേർന്നു. കേരള അസോസിയേഷാൻ ഓഫ് ഡാളസ് സെക്രട്ടറി ഡാനിയേൽ കുന്നിൽ, അസോസിയേഷനെ പ്രതിനിധീകരിച്ചു എല്ലാ സഹായസഹകരങ്ങളും പിന്തുണയും ചാപ്റ്ററിനു വാഗ്ദാനം ചെയ്തു.

പ്രസ് ക്ളബിന്റെ പ്രവർത്തനങ്ങൾക്കു എല്ലാ ഭാവുകങ്ങളും നേർന്നു ഡിഎംഎംയെ പ്രതിനിധീകരിച്ചു സുജൻ കാക്കനാട് സംസാരിച്ചു. കലാ കായികാ സാംസ്കാരിക പ്രവർത്തനങ്ങൾക്ക് മാധ്യമപ്രവർത്തകർ മുൻ‌തൂക്കം നൽകണമെന്ന് റാന്നി അസോസിയേഷൻ പ്രസിഡണ്ട് ഷിജു എബ്രഹാം തന്റെ ആശംസാ പ്രസംഗത്തിൽ സൂചിപ്പിച്ചു. ഡാളസ് ചാപ്റ്റർ മുൻ പ്രസിഡന്റും മുതിർന്ന പത്രപ്രവർത്തകനുമായ എബ്രഹാം തോമസ് മാധ്യമപ്രവർത്തനം നേരിടുന്ന വെല്ലുവിളികളെപറ്റി സംസാരിച്ചു.

“മാറുന്ന സാഹചര്യത്തിൽ മാധ്യമ ശൈലിയിൽ മാറ്റം അനിവാര്യമോ” എന്ന വിഷയത്തിൽ ബിജിലി ജോർജ് മോഡറേറ്ററായി സിമ്പോസിയവും ചർച്ചകളും തുടർന്ന് നടന്നു. വിവിധ സംഘടനകളിൽ നിന്നെത്തിയവരുടെ നിർദേശങ്ങളും അഭിപ്രായങ്ങളാലും പുരോഗമിച്ച റൌണ്ട് ടേബിള്‍ കോണ്‍ഫറന്‍സ് വൻവിജയമായി.

ഷഷ്ഠിപൂർത്തി ആഘോഷിക്കുന്ന ഇന്ത്യ പ്രസ്സ്ക്ലബ്ബ് ഓഫ് നോർത്ത് ടെക്സാസിന്റെ ആദ്യ പ്രസിഡന്റ് എബ്രഹാം തെക്കേമുറിയെ, റ്റി സി ചാക്കോയുടെ നേതൃത്വത്തിൽ പ്രസ് ക്ലബ് അംഗങ്ങൾ പൊന്നാടയണിയിച്ച് ചടങ്ങിൽ ആദരിച്ചു. ജോ. സെക്രട്ടറി മാർട്ടിൻ വിലങ്ങോലിൽ നന്ദി പ്രകാശനം നടത്തി.

ഫോമാ പ്രഥമ സൗത്ത് ഈസ്റ്റ് റീജിയണല്‍ സാംസ്കാരിക സംഗമം ജൂണ്‍ ഒന്‍പതിന് അറ്റലാന്റായില്‍

ജോയിച്ചന്‍ പുതുക്കുളം

അറ്റ്‌ലാന്റ: അമേരിക്കന്‍ മലയാളികളുടെ സാംസ്കാരിക സംഘടനകളുടെ കൂട്ടായ്മയായ ഫോമയുടെ പ്രഥമ സൗത്ത് ഈസ്‌റ് റീജിയണല്‍ സാംസ്കാരിക സംഗമം ജൂണ്‍ ഒന്‍പതിന് അറ്റലാന്റായില്‍ നടക്കുമെന്ന് ഫോമാ റീജിയണല്‍ വൈസ് പ്രസിഡന്റ് റെജി ചെറിയാന്‍ അറിയിച്ചു .ഫോമയെ കൂടുതല്‍ ജനകീയമാക്കുന്നതിന്റെ ഭാഗമായി സൗത്ത് ഈസ്റ്റ് റീജിയനിലുള്ള എല്ലാ മലയാളി സംഘടനകളെയും കോര്‍ത്തിണക്കിയ ഒരു സാംസ്കാരികോത്സവത്തിനാണ് ജൂണ്‍ ഒന്‍പതിന് അറ്റലാന്റയില്‍ വേദിയൊരുങ്ങുന്നത്. ഇതോടനുബന്ധിച്ചു യുവജനങ്ങളുടെ സാമൂഹ്യാവബോധത്തെ ഉയര്‍ത്തുകയും കലാ സാംസ്കാരിക മൂല്യങ്ങളെ പ്രചോദിപ്പിക്കുകയും ,പ്രോത്സാഹിപ്പിക്കുകയും ചെയ്യുന്നതിന് സൗത്ത് ഈസ്റ്റ് റീജിയണല്‍ യുവജനോത്സവം കൂടി സംഘടിപ്പിക്കുകയാണ്

യുവപ്രതിഭകള്‍ക്ക് പങ്കാളിത്തത്തിനു പ്രാധാന്യം നല്‍കിക്കൊണ്ട് അരങ്ങേറുന്ന ഈ സാംസ്കാരിക സംഗമത്തില്‍ മലയാളി യുവതയുടെ സൃഷ്ടി വൈഭവങ്ങള്‍ കലയുടെ വര്‍ണ്ണ വിസ്മയങ്ങള്‍ തീര്‍ക്കുമെന്ന് സൗത്ത് ഈസ്‌റ് റീജിയണല്‍ കണ്‍വന്‍ഷന്‍ എന്ന സാംസ്കാരിക സംഗമം കണ്‍വീനര്‍ തോമസ് ഈപ്പന്‍ (സാബു) അറിയിച്ചു. അറ്റലാന്റയിലെ എല്ലാ മലയാളികളുടേയും നിസ്വാര്‍ത്ഥമായ സഹായ സഹകരണങ്ങള്‍ ഈ കലാ മാമാങ്കത്തിന്റെ വിജയത്തിനായി ഉണ്ടാവണമെന്നു ഗാമയുടെ മുന്‍ പ്രസിഡന്റ് കൂടിയായിരുന്ന അദ്ദേഹം സ്‌നേഹപൂര്‍വ്വം അഭ്യര്‍ത്ഥിച്ചു.

സൗത്ത് ഈസ്റ്റ് റീജിയണല്‍ കണ്‍വന്‍ഷണ് വിജയിപ്പിക്കുന്നതിനായി വിപുലമായ ഒരു കമ്മിറ്റിയും പ്രവര്‍ത്തിക്കുന്നുണ്ട് .കോ കണ്‍വീനര്‍ ആയി പ്രവൃത്തിക്കുന്ന ബിനു കാസിം അറ്റലാന്റായില്‍ സാംസ്കാരിക രംഗത്തെ നിറ സാന്നിധ്യമാണ് .ഗാമയുടെ അംഗവും ,അറ്റലാന്ടയിലെ പൊതുപരിപാടികളുടെ ഒഴിച്ചുകൂടാനാവാത്ത വ്യക്തിത്വവുമായ ബിനു കാസിമിന്റെ പ്രവര്‍ത്തനം ഫോമാ യുവജനോത്സവത്തിനു മുതല്‍ക്കൂട്ടായിരിക്കും.മാധ്യമ പ്രവര്‍ത്തകയും സാംസ്കാരിക പ്രവര്‍ത്തകയുമായ മിനി നായര്‍ വുമണ്‍ ചെയര്‍ ആയി പ്രവര്‍ത്തിക്കുന്നു.അറ്റലാന്റായിലെ യുവജനതയുടെ കലാ മേള ഏറ്റവും വിജയപ്രദമാക്കുവാന്‍ തന്നാലാകുന്ന എല്ലാ സഹായവും മിനി നായര്‍ വാഗ്ദാനം ചെയ്തു. കള്‍ച്ചറല്‍ കണ്‍വീനര്‍ ആയി സാമൂഹ്യപ്രവര്‍ത്തകയായ ശ്രീദേവി രഞ്ചിത്തും പ്രവര്‍ത്തിക്കുന്നു .ഫോമയുടെ അറ്‌ലാന്റാ സാംസ്കാരികോത്സവത്തെ ഏറ്റവും മികച്ചതാക്കുവാന്‍ ഈ റീജിയണിലെ എല്ലാ മലയാളി സംഘടനകളുടെയും ആത്മാര്‍ത്ഥമായ സഹകരണം ഉണ്ടാകണമെന്ന് ഫോമാ സൗത്ത് ഈസ്റ്റ് റീജിയണല്‍ വൈസ് പ്രസിഡന്റ് റെജി ചെറിയാനും റീജിയണല്‍ വൈസ് പ്രസിഡന്റ് ഇലെക്ട് തോമസ് കെ ഈപ്പനും സംയുകതമായി അഭ്യര്‍ത്ഥിച്ചു .

ഈ സാംസകാരിക സംഗമത്തിന്റെ ലാഭവിഹിതത്തിന്റെ ഒരു പകുതി അറ്റലാന്റയുടെ സ്വന്തം കലാപ്രതിഭയെ അമേരിക്കന്‍ ദേശീയ തലത്തിലേക്ക് പങ്കെടുപ്പിക്കുന്നതിനായും മറു പകുതി ജീവകാരുണ്യ പ്രവര്‍ത്തനങ്ങള്‍ക്കായി വിനിയോഗിക്കുമെന്നു കണ്‍വീനര്‍ അറിയിച്ചു.

മിനി നായര്‍ അറ്റ്‌ലാന്റ അറിയിച്ചതാണിത്.