പെസഹാ മുതല്‍ ഈസ്റ്റര്‍ വരെ ഇന്നു മുതല്‍ കൊല്ലത്ത്

2006-ല്‍ കൊല്ലം നഗരത്തില്‍ നടന്ന സ്വര്‍ഗ്ഗീയ വിരുന്നിന്റെ മഹായോഗത്തിനുശേഷം നീണ്ട 12 വര്‍ഷം കഴിഞ്ഞ് കൊല്ലം ആശ്രാമം മൈതാനത്ത് ഇന്നുമുതല്‍ വീണ്ടും പ്രാര്‍ത്ഥനാപൂര്‍വ്വമായ അഞ്ച് ദിവസങ്ങള്‍ക്ക് ലോകത്തിന്റെ വിവിധ ഭാഗങ്ങളില്‍ നിന്നുമുള്ള വിശ്വാസികള്‍ നിറഞ്ഞുകവിയുന്നു.

പെസഹാ മുതല്‍ ഈസ്റ്റര്‍ വരെ എന്ന ഈ മഹാ സുവിശേഷ സംഗമത്തില്‍ പങ്കെടുക്കാന്‍ ഈ വിശുദ്ധവാരത്തില്‍ കൊല്ലം ആശ്രാമം മൈതാനവും വിശ്വാസികളും ഒരുങ്ങിക്കഴിഞ്ഞു.

സര്‍ര്‍ഗ്ഗീയ വരുന്ന് സഭയുടെ സീനിയര്‍ ഫൗണ്ടിംഗ് പാസ്റ്റര്‍ ഡോ. മാത്യു കുരുവിള (തങ്കു ബ്രദര്‍), ഡോ. തോമസ് ഏബ്രഹാം (തോമസുകുട്ടി ബ്രദര്‍), സഭയുടെ പാസ്റ്റേഴ്‌സ്, വിവിധ രാജ്യങ്ങളിലുള്ള ഹെവന്‍ലി ഫീസ്റ്റ് പ്രെയര്‍ ടീംസ്, ലോകമെമ്പാടുമുള്ള വിശ്വാസികള്‍ എന്നിവര്‍ ഈ മഹാസംഗമത്തിന്റെ അനുഗ്രഹത്തിനായി പ്രാര്‍ത്ഥനയിലാണ്.

മാര്‍ച്ച് 28 ബുധന്‍ (ഇന്നു മുതല്‍), പെസഹാ വ്യാഴം, വലിയ വെള്ളി, ശനി, ഉയിര്‍പ്പ് ഞായര്‍ വരെ എല്ലാദിവസവും രാവിലെ 10-നും വൈകിട്ട് 6-നും അനുഗ്രഹീത ആരാധന, അത്ഭുത സാക്ഷ്യങ്ങള്‍, ദൈവ വചനം, ശാപവിമുക്തി ശുശ്രൂഷ, രോഗസൗഖ്യ പ്രാര്‍ഥന എന്നിവയുണ്ടായിരിക്കുന്നതാണ്.

കേരളത്തിലെ സ്വര്‍ഗ്ഗീയ വിരുന്നിന്റെ പാസ്റ്റേഴ്‌സ്, വിശ്വാസികള്‍, വിവിധ രാജ്യങ്ങളിലുള്ള സ്വര്‍ഗ്ഗീയ വിരുന്നിന്റെ വിശ്വാസികള്‍ ഈ മഹാസംഗമത്തില്‍ പങ്കെടുക്കുന്നതാണ്.

ജാതി മത സഭാ വ്യത്യാസമില്ലാതെ ഏവര്‍ക്കും കൊല്ലം ആശ്രാമം മൈതാനിയില്‍ ഇന്നുമുതല്‍ നടക്കുന്ന പ്രാര്‍ത്ഥനാസംഗമത്തിലേക്ക് സ്വാഗതം.

പ്രമുഖ ക്രൈസ്തവ ടെലിവിഷന്‍ ചാനലായ പവര്‍വിഷന്‍, ഹാര്‍വെസ്റ്റ് ടിവി, വിവിധ സെക്കുലര്‍ ടിവി ചാനലുകള്‍ എന്നിവയില്‍ എല്ലാദിവസവും തങ്കു ബ്രദറും, തോമസുകുട്ടി ബ്രദറും ദൈവ വചനം ശുശ്രൂഷിക്കുന്നു.

അമേരിക്കയിലെ സ്വര്‍ഗ്ഗീയ വിരുന്നിന്റെ ന്യൂയോര്‍ക്ക് മെയിന്‍ ചര്‍ച്ച് വളരെ ചുരുങ്ങിയ വര്‍ഷത്തിനുള്ളില്‍ അതിവേഗം വളര്‍ന്നുകഴിഞ്ഞു. ന്യൂയോര്‍ക്ക്, ചിക്കാഗോ, ഫിലാഡല്‍ഫിയ, ഡാലസ്, ഹൂസ്റ്റണ്‍, ലോസ്ആഞ്ചലസ് എന്നീ പ്രധാന നഗരങ്ങളില്‍ തങ്കുബ്രദറും, തോമസുകുട്ടി ബ്രദറും ശുശ്രൂഷിച്ചിട്ടുണ്ട്. കൂടുതല്‍ വിവരങ്ങള്‍ക്ക്: www.theheavenlyfeast.org

ജോയിച്ചന്‍ പുതുക്കുളം

‘ഓശാന ഓശാന ദാവീദിന്റെ പുത്രന്‌ ഓശാന’

Fr.Johnson Punchakonam

എന്റെ ആലയം പ്രാർത്ഥനാലയം നിങ്ങളോ അതിനെ കള്ളന്മാരുടെ ഗുഹയാക്കി മാറ്റി.
യേശു യരുശലേം ദൈവാലയത്തെ ശുദ്ധീകരിക്കുന്നതാണ്‌ ഓശാനയുടെ പരമ പ്രധാനമായ സന്ദേശം.
(മത്തായി 21:1214 , മർക്കോസ് 11:1517 , ലൂക്കോസ് 19:4546 ,യോഹന്നാൻ 2:1317)

വർഷങ്ങളായി ദൈവാലയത്തെ കച്ചവട സ്ഥാപനങ്ങളായി കണ്ട് അവയിൽ വില്പന നടത്തി അതിൽ നിന്നുള്ള ലാഭത്തിന്റെ പങ്ക് കൈപ്പറ്റിയിരുന്ന മഹാപുരോഹിതനും ശാസ്ത്രിമാർക്കും ഏറ്റ വലിയ ഒരു തിരിച്ചടിയായിരുന്നു യെശുവിന്റെ പ്രതികരണം. ചോദ്യചെയ്യപ്പെടാത്ത ശക്തികളായി വളരുകയും ചോദ്യം ചെയ്യുന്നവരെ ന്യായപ്രമാണത്തിന്റെ തെറ്റായ വിശകലനത്തിലൂടെ നിശ്ബദ്ദരാക്കുകയും കായികമായും നേരിടുകയും ചെയ്തിരുന്ന ദൈവാലയ പ്രമാണികൾക്ക് യേശു ഉചിതമായ മറുപിടി ന്യായപ്രമാണത്തിൽ നിന്ന് നൽകുകയും അവരെ കായികമായി തന്നെ നേരിടുകയും ചെയ്യുന്നു. ദൈവാലയത്തിൽ നിന്ന് മാറി നിൽക്കേണ്ടീ വന്നവരെല്ലാം / അധികാരികൾ മാറ്റി നിർത്തിയവരെല്ലാം യേശുവിന്റെ അടുക്കലേക്ക് ദൈവാലയത്തിലേക്ക് വരുന്നു. മതനേതാക്കൾക്കുള്ള ശക്തമായ മുന്നറിയിപ്പായ്യിരുന്നു യേശുവിന്റെ ശബ്‌ദ്ദം. നീതിക്കുവേണ്ടീ , ന്യായത്തിനു വേണ്ടീ സമൂഹത്തിൽ പാർശ്വവൽക്കരിക്കപെടേണ്ടിവന്നവർക്കു വേണ്ടീ യേശു ശബ്ദ്ദം ഇന്നും ഉയരുന്നു. മതനേതാക്കളും അധികാരികളും ഇന്നും ഇത് തിരിച്ചറിയുന്നില്ല. തങ്ങളെ ചോദ്യം ചെയ്യുന്ന യേശുവിനെ കൊല്ലാൻ തന്നെ അവർ തീരുമാനിക്കുകയും ചെയ്യുന്നു.
തെറ്റ് ചെയ്യുന്നവർക്ക് ദൈവാലയത്തിന്റെ പേരിൽ സംരക്ഷണം ഒരുക്കുകയല്ലേ ഇന്ന് ദൈവാലയത്തെ പ്രാർത്ഥനാലയം ആയി സംരക്ഷിക്കെണ്ടവർ ചെയ്യുന്നത്? തിന്മ ചെയ്യുന്നവരെ/ചെയ്തവരെ ദൈവാലയത്തിൽ സ്വികരിച്ചിരുത്തകയും അവർക്ക് ജയ് വിളിക്കുകയും ചെയ്യുമ്പോൾ അവരാൽ പീഡനവും നഷ്ടവും ഏറ്റുവാങ്ങേണ്ടി വന്നവരെ ദൈവാലയത്തിൽ നിന്ന് പുറത്താക്കുകയും ചെയ്യുന്നു. യേശു ചെയ്ത പ്രവൃത്തിയുടെ കടകവിരുദ്ധമായ ചെയ്തികൾ.

മതഭക്തി, പള്ളിഭക്തി, വ്യക്തിഭക്തി തുടങ്ങി ആധുനികഭക്തികൾ നിരവധി.
ശൗലേ ശൗലേ നീ എന്നെ ഉപദ്രവിക്കുന്നത് എന്തിന് ? സ്നേഹത്തോടു കൂടിയ യേശുക്രിസ്തുവിന്റെ ഈ കരച്ചിൽ ശൗലിനെ പൗലോസാക്കി മാറ്റിയെങ്കിലും കർത്താവിന്റെ കരച്ചിലിന്റെ ശബ്ദം കേൾക്കാൻ കഴിയാത്ത ആധുനിക ശൗലുമാർ ഇന്നും ദേവാലയം കള്ളകച്ചവടകേന്ദ്രങ്ങളാക്കി മാറ്റുന്നു.

“അവൻ നഗരത്തിന്നു സമീപിച്ചപ്പോൾ അതിനെ കണ്ടു അതിനെക്കുറിച്ചു കരഞ്ഞു. ഈ നാളിൽ നിന്റെ സമാധാനത്തിന്നുള്ളതു നീയും അറിഞ്ഞു എങ്കിൽ കൊള്ളായിരുന്നു, ഇപ്പോഴോ അതു നിന്റെ കണ്ണിന്നു മറഞ്ഞിരിക്കുന്നു.”

ഇടയന്മാർ സാധാരണക്കാർക്കും, പാവപ്പെട്ടവര്ക്കും സമീപിക്കാൻ സാധിക്കാത്ത സാഹചര്യം.
• ആർഭാടജീവിതം ശൈലിയാക്കുന്ന നേതൃത്വം
• സമൂഹത്തിലെ ഏറ്റവും താഴെ തട്ടിലുള്ളവരുടെ ആവശ്യങ്ങളോട് ഇടയന്മാരുടെ പ്രതികരണങ്ങൾ.
• വിശ്വാസികളോടുള്ള ധാര്ഷ്ട്യത്തോടെയുള്ള പെരുമാറ്റങ്ങൾ
• സ്വാഭാവിക നിഷേധിക്കപ്പെടുന്ന സാഹചര്യങ്ങൾ
• സ്ഥാപനവല്ക്കരിക്കപ്പെടുന്ന ആദ്ധ്യാത്മികത
• കമ്പോളവല്ക്കരിക്കപ്പെടുന്ന ആഘോഷങ്ങളും, ആചാരങ്ങളും, അനുഷ്ഠാനങ്ങളും.
• മത, ജാതി ഭേദ്യമെന്യേ ഒരു മാത്സര്യക്കളരിയാവുന്ന ആഘോഷങ്ങൾ
• ഉള്ളവനും ഇല്ലാത്തവനും തമ്മിലുള്ള അന്തരം
• കുടുംബ പ്രശ്‌നങ്ങളും കടക്കെടുതികളും മൂലമുൾള അപമാനഭയത്താൽ ദേവാലയം ഉപേക്ഷിക്കേണ്ടിവന്നവർ
• ആവശ്യത്തേക്കാളും, സൗകര്യങ്ങളെക്കാളും അധികമായി ആകര്ഷണത്തിനും ആഡംബരത്തിനും ആര്ഭാടത്തിനും മുന്തൂക്കം കൊടുക്കുന്ന ഇടവകകൾ
• സഭയുടെ സ്ഥാപനങ്ങളിൽ പലതും വ്യക്തികളുടെ പേരും പെരുമയും നിലനിര്ത്തുന്നതിനുള്ള ഉപാധികളായി മാറുന്നതും അവ തമ്മിൽ അനാരോഗ്യകരമായ മത്സരങ്ങളും നടക്കുന്നതും
• ദേവാലയ നിര്മ്മാണത്തിൽ പണക്കൊഴുപ്പിന്റെ സ്വാധീനം. *പ്രൗഢിക്കും ആകർഷകത്വത്തിനും പണക്കൊഴുപ്പിനും പ്രാധാന്യം നൽകികൊണ്ടുള്ള ദേവാലയ പുനർനിര്മ്മാണങ്ങൾ:കേവലം പിരിവുകൾ നൽകാൻ മാത്രമായി വിധിക്കപ്പെട്ട വിശ്വാസികൾ. പള്ളിയും പള്ളിമേടകളും പൊളിക്കുകയും പുതുക്കി പണിയുകയും, മതിലുകൾ, കുരിശടികൾ, സ്വർണ കൊടിമരങ്ങൾ, വെടിക്കെട്ടുകൾ, തിരുശേഷിപ്പ് കച്ചവടം. ദേവാലയം അലങ്കരിക്കാൻ ലക്ഷങ്ങൾ ചെലവിടുമ്പോൾ അത് ദേവാലയ ചൈതന്യത്തിന് ചാരുത പകരുന്നില്ല എന്നതു ഓര്ക്കണം. ഓരോ അനാവശ്യവും ആവശ്യമാക്കി മാറ്റുമ്പോൾ ജീവിതത്തിന്റെ പുറമ്പോക്കിൽ അനേകർ ജീവിക്കുന്നു എന്നതും നാം മറന്നു പോവുന്നു.
• സാമ്പത്തിക സമൃദ്ധി സഭയുടെയും ക്രിസ്തീയ കുടുംബത്തിന്റെയും ആത്യന്തിക ലക്ഷ്യമായ മാറി.
• ചില ആഘോഷങ്ങൾ കുടുംബങ്ങളുടെയും അവരുടെ ബന്ധുക്കളുടെയും സമ്പത്തും കുലമഹിമയും വിളംബരം ചെയ്യാനുള്ള വേദികളായി മാറുന്നു.
• മദ്യപാനത്തിന്റെയും അനാവശ്യമായ വൈദേശിക സംസ്‌കാരങ്ങളുടെയും രംഗവേദികളാക്കിയതുമൂലം മനംമടുത്തു മാറി നിൽക്കുന്നവർ
• ഇടവകകളിലെ അനാവശ്യമായ ‘ഫോര്മാലിറ്റി’കൾ മൂലം സഭ വിടേണ്ടിവന്നവർ
• വിദ്യാഭ്യാസകച്ചവടവും ആതുരസേവനവിതരണവും മൊത്തവ്യാപാരമായി വിലപേശുന്ന കമ്പോള സംസ്‌കാരം സാധാരണ വിശ്വാസികളെ പുത്തൻ സഭകളിലേക്കു ചേക്കേറുവാൻ നിർബന്ധിതരാകുന്നു. യെരുശലേം ദേവാലയത്തിൽ ചെങ്ങാലിവില്പനക്കാരെ ചാട്ടവാർ കൊണ്ടടിച്ചു പുറത്താക്കിയ കർത്താവ് വീണ്ടും വരുവാൻ താമസിക്കുന്നത് ഭാഗ്യമോ നിർഭാഗ്യമോ എന്നറിയില്ല.

‘അല്പനേരക്രിസ്ത്യാനി’കളുടെ എണ്ണം സഭകളിൽ കൂടിവരുന്നു. ദേവാലയത്തിനകത്തു വരുമ്പോൾ വിശ്വാസിയുടെ മുഖം മൂടിയണിയുകയും അതിനു പുറത്തു ഏതു മാർഗ്ഗത്തിലൂടെയും അത്യാഡംബരമായി ജീവിക്കുകയും ചെയ്യുക എന്നത് ഒരു ശൈലിയായി മാറുന്നു. തന്നിൽ അർപ്പിതമായ കര്ത്തവ്യങ്ങൾ അനുഷ്ഠിക്കുകയും അര്ത്ഥവത്തായി, മാതൃകയായി ജീവിക്കുകയും ചെയ്യുന്നവരുടെ എണ്ണം കുറയുന്നു. ജീവിതം കൊണ്ട് സംസാരിക്കുന്നവരുടെ എണ്ണം കുറയുകയും നാവു കൊണ്ടു സംസാരിക്കുന്ന നേതാക്കളുടെ എണ്ണം വർദ്ധിക്കുകയും ചെയ്തത് വിശ്വാസികളുടെ സഭകളോടുള്ള അകൽച്ചക്കു കാരണമാകുന്നുണ്ട്. വിശ്വസ്തതയും ആത്മാർഥതയും കുറഞ്ഞുവരുന്നതും, ആത്മീയത അഭിനയിക്കുന്നവരുടെ എണ്ണം കൂടുന്നതും വിശ്വാസികളെ സഭയിൽ നിന്നകറ്റുന്നു.

ലാളിത്യം ക്രൈസ്തവസഭകളിൽ കുറയുന്നു
‘ജീവിതത്തിലെ ലാളിത്യം’ ക്രൈസ്തവസഭകളിൽ കുറയുന്നു എന്നതാണ് ഉത്തരാധുനികതയുടെ പ്രത്യേകത. അത്യാവശ്യത്തിനു പോലും ലഭിക്കാതെ വരുമ്പോഴും ‘മതി’ എന്നു പറയാനുൾള ആർജവത്വമാണ് ആത്മീയശക്തിയുടെ ലാളിത്യം. നസ്രായനായ യേശുക്രിസ്തുവിന്റെയും ശിഷ്യരുടെയും മാതൃക അനുകരിച്ച് ലളിതജീവിത ശൈലിയിലേയ്ക്ക് മാതൃകയാകേണ്ടവർ മാറണം. മനോഭാവത്തിലും പ്രവര്ത്തനശൈലികളിലും, കൂടുതല് ലാളിത്യം പുലർത്തണം. സമൃദ്ധിയുടെ സംസ്‌ക്കാരത്തില് ജീവിക്കുന്ന ആധുനിക സമൂഹത്തിൽ, യേശുക്രിസ്തുവിന്റെ ജീവിതത്തിലെ ലാളിത്യമെന്ന നന്മ കാട്ടികൊടുക്കുവാൻ അസാമാന്യമായ ആത്മാർത്ഥതയും ധീരതയും നേതാക്കൾക്ക് അനിവാര്യമാണ്. എന്നാൽ ഇന്ന് വിപരീതദിശയിൽ ഉപഭോഗസംസ്‌കാരത്തിലും, വ്യക്തിപൂജയിലും സ്വാധീനിക്കപ്പെട്ടുമലിനമാക്കപ്പെടുന്നു ആധുനികക്രൈസ്തവനേതൃത്വം. ആന്തരികസ്വാതന്ത്ര്യമുള്ളിടത്തേ ആവശ്യങ്ങളില് നിന്നുൾള വിടുതൽ സാധ്യമാകൂ. കൊളുത്തിപ്പിടിക്കുവാനോ, ഒട്ടിപ്പിടിക്കുവാനോ സ്വയം അനുവദിക്കാതിരിക്കുന്ന ഉള്ളിന്റെ സ്വാതന്ത്ര്യമാണത്. ഈ നാളിലെങ്കിലും സമാധാനത്തിനുള്ളത് നീ അറിയണം. യെരുശലേം ദേവാലയം അറിഞ്ഞില്ല, മതപുരോഹിതന്മാർ അറിഞ്ഞില്ല. ശാസ്ത്രിമാരും പരീശന്മാരും അറിഞ്ഞില്ല. സദൂക്യർ അറിഞ്ഞില്ല, എരിവുകാർ അറിഞ്ഞില്ല.

വാസ്തവത്തിൽ പ്രാർത്ഥനാലയങ്ങളിൽനിന്നു പുറത്താക്കപ്പെടേണ്ടവർ, അവയെ കൊള്ളക്കാരുടെ ഗുഹകളാക്കുന്നവരാണ്.
ഇടയന്റെ ജീവിതവിശുദ്ധി പരമപ്രധാനമാണ്.

അധികാരി എന്ന ഭാവം വെടിഞ്ഞു പകഷപാതം കാണിക്കാതെ, ഗ്രൂപ്പ് പിടിക്കാതെ തന്റെ ചുമതലയിലുൾള ഇടവകയിലെ, സഭയിലെ വിശ്വാസികളെ എല്ലാവരെയും ഒരുപോലെ കാണുകയും നീതിയുടെയും, സത്യത്തിന്റെയും മാർഗത്തിൽ പുരോഹിതരും അല്മായരും തമ്മിലുൾള പരസ്പരബഹുമാനവും, വ്യക്തിബന്ധവും, സ്‌നേഹവും, കരുതലും വളർത്തുകയും ചെയ്താൽ ഒരളവുവരെ വിശ്വാസി സമൂഹത്തെ ചിതറി പോകാതെ പരിരക്ഷിക്കുവാൻ സാധിക്കും.

ആടുകളുടെ ചോര കുടിക്കുന്ന ഇടയന്മാർ സഭയെ നശിപ്പിക്കും. രണ്ടു കണ്ണുകൾ കൊണ്ട് മാത്രം നോക്കി കാണുന്ന ഇടയനെ അനേകം കണ്ണുകളിലൂടെയാണ് വിശ്വാസികൾ നോക്കികാണുന്നത് എന്ന യാഥാർഥ്യം ചിലപ്പോഴെങ്കിലും മറന്നു പോകുന്ന ഇടയന്മാർ. ഇടയന്റെ നോട്ടം, പെരുമാറ്റങ്ങൾ, സ്പർശനം, സംസാരങ്ങൾ, സുതാര്യത തുടങ്ങി നിരവധി കാര്യങ്ങളിൽ ഇടയന്മാർ ശ്രദ്ധിച്ചില്ലെങ്കിൽ ആടുകൾ ചിതറിപ്പോകും.
സമ്പത്തിന്റെയും, അധികാരത്തിന്റെയും, പ്രൗഡിയുടെയും, സുഖലോലുപതയുടെയും കയത്തിൽ മുങ്ങി കുളിക്കുന്ന ഗോവിന്ദച്ചാമിമാരായ ഇടയന്മാർ വിശ്വാസികളെ സഭകളിൽ നിന്നകറ്റും. തങ്ങൾക്ക് ദൈവദാനമായി കിട്ടിയ കൊച്ചു രാജ്യം ഭരിച്ച് സുഖിച്ച് ജീവിച്ച് മരിക്കുന്നു. കാപട്യത്തിന്റെ പര്യായമായ ഇവർ ദൈവവചനങ്ങളെ ഉദ്ധരിച്ചുകൊണ്ട് ദരിദ്രജീവിതത്തെപ്പറ്റിയും സഹനജീവിതത്തെപ്പറ്റിയും നീണ്ട പ്രസംഗങ്ങൾ നടത്തുന്നു. ചെമ്മരിയാടുകളെ നയിക്കുന്ന കപടവേഷ ധാരികളായ പുരോഹിത ഇടയതാരങ്ങൾ ബലിപീഠത്തിൽ ക്രിസ്തുവിന്റെ ബലിയെ വെറും പ്രഹസനങ്ങളാക്കി മാറ്റി സഭയെ ദിനംപ്രതി തകർത്തുകൊണ്ടിരിക്കുന്നു. സത്യവും നീതിയും ധർമവും എന്താണെന്നു നന്നായി മനസ്സിലാക്കിയിട്ടു ള്ള, ഏറെ അറിവും പഠിപ്പുമുൾള വൈദികന്മാര് ഗോവിന്ദച്ചാമിയെപ്പോലെ പെരുമാറുമ്പോള് എന്തുകൊണ്ട് വിശ്വാസികള് പള്ളിയില് നിന്നകലുന്നു എന്ന ചോദ്യം ചോദിക്കാതിരിക്കുന്നതാണ് നല്ലത്. പള്ളിയില് നിന്നും പള്ളീലച്ചന്മാരിൽ നിന്നും പരമാവധി അകന്നു നിൽക്കുന്നതാണ് നല്ലത് എന്നു ശരാശരി ക്രിസ്ത്യാനി വിചാരിക്കുന്നുണ്ടെങ്കില് അത് മേല്പ്പറഞ്ഞ ഗഡികളുടെ കുഴപ്പം കൊണ്ടു തന്നെയാണ്.

മുഖസ്തുതികളിൽ കോൾമയിർ കൊള്ളുന്ന മതമേലദ്ധ്യക്ഷന്മാർ. അത് സ്വയം പൂജയാണ്. അതിലുള്‌പ്പെട്ടിരിക്കുന്ന വ്യക്തിക്കും അയാളുമായി ബന്ധപ്പെട്ടവര്ക്കും, അയാൾ ഉള്‌പ്പെടുന്ന സമൂഹത്തിനും അതു ഗുണം ചെയ്യിൽല. യഥാര്ത്ഥ പ്രശ്‌നം അതൊരുതരം മാനസിക വിഭ്രാന്തിയാണ്. ഇത് പിടിപെട്ടിരിക്കുന്ന പലരും അധികാര സ്ഥാനങ്ങളിൽ ഇരിക്കുന്നവരുമാണ്. മിക്കപ്പോഴും അധികാരികൾ ആത്മാനുരാഗികളാണ്. സഭാമേലദ്ധ്യക്ഷന്മാർ പലപ്പോഴും ആത്മാനുരാഗികളായിരുന്നിട്ടുണ്ട് – കൊട്ടാര വിദൂഷകരുടെ മുഖസ്തുതികളില് കോള്മയിർ കൊള്ളുന്ന ആത്മാനുരാഗികള്. ‘ഈ കൊട്ടാര വിദൂഷകരാണ് സഭാനേതൃത്വത്തെ കുഷ്ഠരോഗികളാക്കുന്നത്. വിശ്വാസികളെ സഭകളിൽ നിന്നകറ്റുവാൻ ഈ കൊട്ടാര വിദൂഷകരുടെ മുഖസ്തുതിസംസ്‌കാരം കാരണമാകുന്നു.

ദേവാലയങ്ങളിലെ ഹാജർ നില കുറവാണെങ്കിലും ദൈവവിശ്വാസം ഉള്ളവർ കൂടുന്നു എന്നത്യാഥാർഥ്യമാണ്. വിശ്വാസം എന്തായിരുന്നാലും, ആഭരണങ്ങളും, വസ്ത്രങ്ങളും പ്രദർശിപ്പിക്കുവാന് കിട്ടുന്ന അവസരങ്ങള് അതിനുൾള ഏറ്റവും നല്ല വേദികള് ആയി മാറുന്നില്ലേ നമ്മുടെ ആരാധനാലയങ്ങൾ പോലും. ഒരു കണക്കിന് പറഞ്ഞാല്, അമേരിക്കയിലെ ദേവാലയങ്ങളും കലാസാംസ്‌കാരിക സംഘടനകളും തമ്മിൽ വലിയ വിത്യാസം അനുഭവപ്പെടുന്നിൽല. രണ്ടിടങ്ങളിലും കലാഅഭ്യസപ്രകടനങ്ങള്, സാംസ്‌കാരിക പഠനങ്ങള്, ഗ്രൂപ്പു രാഷ്ട്രീയം, അധികാരകസേര, പടലപിണക്കങ്ങൾ, കാലുവാരൽ, കുതികാല് വെട്ട്, തൊഴുത്തിൽ കുത്ത്, പണപ്പിരിവിവ്, പണം വെട്ടിപ്പ്, കുപ്പിയില് ഇറക്ക്, കുഴിയില് വീഴ്ത്തല്, മദ്യപാനം തുടങ്ങി മലയാളികളുടെ കൂട്ടായ്മയിലെ സ്ഥിരം കലാപരിപാടികൾ ദേവാലയങ്ങളിലും അരങ്ങേറുന്നു. ഇതുമൂലം മനംമടുത്തു സഭകൾ വിട്ടുപോകുന്നവരും, ദേവാലയഅനുഭവത്തിൽ നിന്ന് മാറി നിൽക്കുന്നവരും കുറവല്ല.

നരേന്ദ്ര പ്രസാദ് സ്മാരക നാടക പഠന ഗവേഷണ കേന്ദ്രം സംഘടിപ്പിക്കുന്ന സാംസ്കാരികോത്സവം ഉദ്ഘാടനം ചെയ്തു

മാവേലിക്കര ലോക നാടക ദിനാഘോഷത്തിന്റെ ഭാഗമായി നരേന്ദ്ര പ്രസാദ് സ്മാരക നാടക പഠന ഗവേഷണ കേന്ദ്രം സംഘടിപ്പിക്കുന്ന സാംസ്കാരികോത്സവം ആര്‍.രാജേഷ് എംഎല്‍എ ഉദ്ഘാടനം ചെയ്തു. പഠന കേന്ദ്രം ചെയര്‍മാന്‍ ഫ്രാന്‍സിസ് ടി.മാവേലിക്കര അധ്യക്ഷത വഹിച്ചു. സംസ്ഥാന സിനിമ പുരസ്കാര ജേതാവ് അലന്‍സിയര്‍ നാടകം എന്ന സമരായുധം എന്ന വിഷയത്തില്‍ പ്രഭാഷണം നടത്തി. നടൻ സന്തോഷ് കീഴാറ്റൂര്‍, കൗൺസിലർമാരായ പ്രസന്ന ബാബു, എസ്.രാജേഷ്, നടൻ അലൻസിയർ, പഠന കേന്ദ്രം സെക്രട്ടറി റൂബി രാജ്, വൈസ് ചെയർമാൻ കോശി അലക്‌സ്, അംഗങ്ങളായ കന്നിമേൽ നാരായണൻ, പ്രഫ.സുകുമാര ബാബു, ശശികുമാർ, പ്രേം വിനായക്, ഗോപകുമാർ വാത്തികുളം തുടങ്ങിയവർ പ്രസംഗിച്ചു.

കേരള ഹിന്ദൂസ് ഓഫ് നോര്‍ത്ത് അമേരിക്കയുടെ സ്‌കോളര്‍ഷിപ്പിന് അപേക്ഷ ക്ഷണിച്ചു

തിരുവനന്തപുരം: അമേരിക്കയിലെ മലയാളി ഹിന്ദു സംഘടനകളുടെ പൊതുവേദിയായ കേരള ഹിന്ദൂസ് ഓഫ് നോര്‍ത്ത് അമേരിക്കയുടെ സ്‌കോളര്‍ഷിപ്പിന് അപേക്ഷ ക്ഷണിച്ചു. പ്രൊഫഷണല്‍ കോഴ്‌സിലേക്ക് പ്രവേശനം തേടുന്ന കേരളത്തിലെ പാവപ്പെട്ട കുട്ടികള്‍ക്കാണ് സ്കോളര്‍ഷിപ്പ് നല്കുക.

എഞ്ചിനീയറിംഗ്, മെഡിസിന്, നേഴ്‌സിംഗ്, ഫാര്‍മക്കോളജി, ദന്തിസ്റ്ററി തുടങ്ങിയ പ്രൊഫഷണല്‍ കോഴ്‌സുകള്‍ക്ക് ഒന്നാം വര്‍ഷ പ്രവേശനം തേടുന്ന കുട്ടികള്‍ക്കാണ് പ്രതിവര്‍ഷം 250 ഡോളര്‍ വീതം നല്കുക. പ്ലസ്ടു പരീക്ഷയില്‍ 85 ശതമാനത്തിലധികം മാര്‍ക്കും കുടുംബത്തിലെ വാര്‍ഷിക വരുമാനം അരലക്ഷത്തില്‍ കുറവുമാണ് അപേക്ഷിക്കാനുള്ള അടിസ്ഥാന യോഗ്യത.

www.namaha.org എന്ന വെബ്‌സൈറ്റില്‍ നിന്നും ലഭിക്കുന്ന ഫോറമാണ് പൂരിപ്പിച്ച് അയക്കേണ്ടത്. വരുമാന സര്‍ട്ടിഫിക്കറ്റ്, മാര്‍ക്ക് ലിസ്റ്റിന്‍റെ അറ്റസ്റ്റഡ്‌കോപ്പി, പാസ്‌പോര്‍ട്ട് സൈസ് ഫോട്ടോ, സാമ്പത്തിക ആവശ്യം വ്യക്തമാക്കിക്കൊണ്ടുള്ള കുട്ടിയുടെ കത്ത്, പ്രൊഫഷണല്‍ കോഴ്‌സിന് പ്രവേശനം ലഭിച്ചതിന്‍റെ തെളിവ്, പ്രാദേശിക ഹിന്ദു സംഘടനയുടെ ശുപാര്‍ശ കത്ത്, വസുദൈവ കുടുംബം- നേടാനാകുമോ അതോ അസാധ്യ ദൗത്യമോ” എന്ന വിഷയത്തില്‍ 3 പേജില്‍ കുറയാതെ ഉപന്യാസം എന്നിവയും അപേക്ഷയോടൊപ്പം അയയ്ക്കണം.

2018 ഏപ്രില്‍ 30 ന് മുന്‍പ് പി.ഒ., ബോക്‌സ് 1244, പേരൂര്‍ക്കട. തിരുവനന്തപുരം 695005 എന്ന വിലാസത്തില്‍ അപേക്ഷകള്‍ ലഭിക്കണം.

ജോണ്‍ ഇളമതയുടെ മേപ്പിള്‍ മരങ്ങളില്‍ മഞ്ഞുവീഴുമ്പോള്‍ (നോവല്‍) പ്രകാശനം ചെയ്തു

ജോയിച്ചന്‍ പുതുക്കുളം

തിരുവനന്തപുരം: പ്രശസ്ത അമേരിക്കന്‍ സാഹിത്യകാരന്‍ ജോണ്‍ ഇളമതയുടെ “മേപ്പിള്‍മരങ്ങളില്‍ മഞ്ഞുവീഴുമ്പോള്‍’ എന്ന നോവല്‍ പ്രകാശനം ചെയ്തു.

2018 ഫെബ്രുവരി 17 ശനിയാഴ്ച വൈകുന്നേരം തിരുവനന്തപുരം പ്രസ്ക്ലബ് ഹാളില്‍ നടന്ന സൗഹൃദ സാഹിത്യ സമ്മേളനത്തില്‍ പ്രശ്‌സത സാഹിത്യകാരനായ ശ്രീ സക്കറിയ എഴുത്തുകാരനായ ശ്രീ പ്രതീപ് പനങ്ങാടിന് നല്‍കി പ്രകാശന കര്‍മ്മം നിര്‍വഹിച്ചു.

ശ്രീമതി ആനിമ്മ ഇളമത സദസ്യക്ക് സ്വാഗതമരുളി. എഴുത്തുകാരനായ ശ്രീ എഡ്വേര്‍ഡ് നസ്രത്ത് (മുക്കാടന്‍) പുസ്തകപരിചയം നടത്തി, തുടര്‍ന്ന് ചിത്രകാരനും, ശില്പ്പിയുമായ കെവി ജ്യോതിലാല്‍,കവിയും,സാഹിത്യകാരനുമായ ശ്രീ അബ്ദുള്‍ പുന്നയൂര്‍കുളം എന്നിവര്‍ ആശംസകള്‍ നേര്‍ന്നു. കൈരളിബുക്‌സ് മനേജിങ് ഡയറക്ടര്‍ ശ്രീ ഒ.അശോകകുമാര്‍ അദ്ധ്യക്ഷനായിരുന്നു.

ശ്രീ പോള്‍ സക്കറിയ ആമുഖ പ്രസംഗത്തില്‍,ഒരു കുടിയേറ്റക്കാരനായ എഴുത്തുകാരനു മാത്രമേ അവിടത്തെ ജീവിതാനുഭവങ്ങള്‍ ഉള്‍ക്കൊള്ളാനും, എഴുതാനും ആകൂ എന്നും,അത്തരമൊരു ഹൃദയസ്പര്‍്ടിയായ നോവല്‍ ജോണ്‍ വളരെ കയ്യടക്കത്തോടെ കൈകാര്യം ചെയ്തിരിക്കുന്നു എന്ന് അഭിപ്രായപ്പെട്ടു.ഇതു പ്രവാസത്തിന്‍െറ ഒരു പുതിയ മുഖമാണന്നും,ബന്യാമിനു ശേഷം ഇത്തരം കൃതികള്‍ ഉണ്ടായികൊണ്ടിരിക്കന്നത് മലയാള സഹിത്യത്തിന് അപരിചിതമായ മേഖലകളിലേക്ക് സാഹിത്യത്തിന്‍െറ സഞ്ചാരവഴികളെന്നും,പ്രത്യേകിച്ചും കനേഡിയന്‍ പശ്ചാത്തലത്തില്‍ ഇത്തരമൊരു നോവല്‍ പുതുമ തന്നെ എന്നും അദ്ദേഹം കൂട്ടിച്ചേര്‍ത്തു. ശ്രീ ജോണ്‍ ഇളമത ഏവര്‍ക്കും നന്ദി രേഖപ്പെടുത്തി.

കൈരളി ബുക്‌സ്,കണ്ണൂര്‍ ആണ് പ്രസാധകര്‍.

ത്രിപുരയില്‍ സല്‍ഭരണത്തിനുള്ള വിധിയെഴുത്ത്- കുമ്മനം

തിരുവനന്തപുരം: സല്‍ഭരണത്തിനായുള്ള ജനാഭിലാഷമാണ് ത്രിപുരയില്‍ പ്രകടമായതെന്ന് ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍. കാല്‍നൂറ്റാണ്ടുകാലം ത്രിപുര ഭരണം അടക്കിവാണ സിപിഎം ജനങ്ങളെ വെറും അടിമകളായാണ് കണക്കാക്കിയത്. അതില്‍നിന്നും മോചനം നേടാനുള്ള ആദ്യ അവസരം തന്നെ ജനങ്ങള്‍ പ്രയോജനപ്പെടുത്തിയതായി കുമ്മനം ചൂണ്ടിക്കാട്ടി.

വികസനം തിരിഞ്ഞുനോക്കാത്ത സംസ്ഥാനമായി ത്രിപുരയെ സിപിഎം മാറ്റി. മതിയായ വിദ്യാലയങ്ങളോ ആശുപത്രികളോ അടിസ്ഥാനസൗകര്യമോ ഏര്‍പ്പെടുത്താന്‍ സിപിഎം ഭരണത്തിനായിട്ടില്ല. കേന്ദ്രവിഹിതം ശരിയാംവണ്ണം പ്രയോജനപ്പെടുത്താന്‍ കഴിഞ്ഞിട്ടില്ല. മതേതര ശക്തികള്‍ ഒന്നിച്ചുനില്‍ക്കാത്തതാണ് ത്രിപുരയിലെ ഫലമെന്ന നിരീക്ഷണം നിര്‍ത്ഥകമാണ്. അവിടെ ബിജെപിയും സിപിഎമ്മും നേരിട്ട് മത്സരമായിരുന്നു. കോണ്‍ഗ്രസ് അപ്രസക്തമായി. ഇത് കേരളത്തിലെ ജനങ്ങള്‍ക്ക് അനുകരണീയ മാതൃകയാണ്. മാറിമാറി ഭരണം പങ്കിട്ടെടുത്ത് ജനങ്ങളെ വഞ്ചിക്കുന്ന മാര്‍ക്‌സിസ്റ്റുകാരെയും കോണ്‍ഗ്രസുകാരെയും മാറ്റി പുതിയൊരു ശക്തിയാക്കി ബിജെപിയെ ജയിപ്പിക്കാന്‍ കേരളത്തിനും സാധിക്കുമെന്നാണ് ത്രിപുര നല്‍കുന്ന പാഠം.

മതേതര വായ്ത്താരി മുഴക്കുന്ന ബിജെപി വിരുദ്ധര്‍ നാഗാലാന്റിലെയും മേഘാലയത്തിലെ ഫലം കൂടി മനസ്സിലാക്കണം. ക്രൈസ്തവ സമൂഹത്തിന് വന്‍ മേല്‍ക്കൈയുള്ള ഇവിടങ്ങളിലും ബിജെപി നല്ല നിലയില്‍ അംഗീകരിക്കപ്പെട്ടു. 75 ശതമാനം ക്രൈസ്തവരുള്ള നാഗാലാന്റില്‍ ഭൂരിപക്ഷം നേടാനും ബിജെപിക്ക് കഴിഞ്ഞത് കുമ്മനം ചൂണ്ടിക്കാട്ടി.

ആദിവാസികളുടെ കണ്ണുനീരും,നമ്മുടെ ദുഖവും നിറഞ്ഞ നവ മാധ്യമ ഉത്സവത്തിൽ മറയുന്നത്..

അപ്രസക്തമായ പലതിനെയും പ്രശസ്‌തിയിലേയ്ക്ക് ഉയർത്തുന്നതാണ് എഴുത്തുകളും തലക്കെട്ടുകളും.വളച്ചൊടിക്കുന്ന അസത്യങ്ങൾ ആണ് സത്യങ്ങൾ ആയി മാറി വരുന്നത്,അതുമല്ല എങ്കിൽ സത്യങ്ങളെ വളച്ചൊടിക്കുന്നതാണ് അസത്യം .

ഗോത്ര വർഗ്ഗത്തിന്റെ ഉന്നമനത്തിനായി മാറിവരുന്ന സർക്കാരുകൾ പല പദ്ധതികൾ പ്രഗ്യാപ്പിക്കുകയും,അവ പലവഴികളിലൂടെ പല പാതകളിലേയ്ക്ക് ഒഴുകുകയും ചെയ്യുന്നു.ഓരോ ആദിവാസി വിദ്യാ സമ്പന്നനും,ചെറുത് നിൽപിനു വീണ്ടും വിധത്തിൽ പ്രാപ്തനാകുകയും ചെയ്യുന്നത് പരിഷ്കൃത സമൂഹത്തിലെ മുതൽ മുടക്കുകാർ അനുവദിക്കുകയില്ല.കാരണം പലതാണ്.നമ്മുടെ ഗോത്ര മേഖലയിൽ നടക്കുന്ന,അവരോടു കാണിക്കുന്ന അവജ്ഞകൾ വാർത്തകളിൽ നിറയുമ്പോൾ ജനം അറിയാത്ത ഒരു ചരട് പിടുത്തം ആദിവാസി വന മേഖലയിൽ നടക്കുന്ന പല രഹസ്യ നീക്കങ്ങളും പലരും അറിയുന്നില്ല (മാധ്യമങ്ങൾ അറിയാതെ ഇരിന്നിട്ടും ഇല്ല) .

കേരളത്തിൽ വികസിച്ചു വരുന്ന രണ്ടു പദ്ധതികൾ ആണ് ടൂറിസവും,ആയുർവേദ കൃഷിയും,ഉത്പന്നങ്ങളും,പരമ്പരാഗത ചികത്സാ രീതികളും.സർക്കാർ ,വിദേശികളും,സ്വദേശികളും ആയ പല മുതല്മുടക്കുകാരെയും ഈ പദ്ധതിയിലേയ്ക്ക് ക്ഷണിക്കുന്നു.പലരും മുതൽ മുടക്കുന്നു.കേരളത്തിന്റെ വാൻ മേഖലയിൽ നിന്നും അതിരുകൾ കടക്കുന്ന പല ഔഷധങ്ങൾ,ധാതുക്കൾ,മൃഗങ്ങളുടെ ഇറച്ചി,പാമ്പിൻ തുകൽ,വിഷം എന്നിവയുടെ കടത്തുന്ന യദാർത്ഥ കണക്കുകൾ എവിടെ ആണ് രേഖപ്പെടുത്തിയിട്ടുള്ളത്.

മധു എന്ന ചെറുപ്പക്കാരന്റെ മരണം കേരളത്തെ ആകെ ദുഃഖത്തിൽ ആഴ്ത്തി,പലരും ആത്മാർത്ഥമായി വേദനിച്ചു,ചിലർ നവ മാധ്യമങ്ങളിൽ അക്ഷര,ഫോട്ടോ ഷോപ്,കവിത വിക്രയങ്ങളിലൂടെ വളരെ ശ്രദ്ധയോടെ അവസരോചിതമായ കണ്ണുനീർ തൂവി.ആരെയും കുറ്റം പറയുകയല്ല.
കുറച്ചു വര്ഷങ്ങള്ക്കു മുൻപ് ഇടുക്കി കട്ടപ്പന,ഏലപ്പാറ,കുമളി,വണ്ടിപ്പെരിയാർ മേഖലകളിൽ നിന്നും ഗ്യാസ് സിലിണ്ടറുകൾ,കോട്ടയം,ചങ്ങനാശ്ശേരി ടൗൺ കളിലേയ്ക്ക് ബസ്സുകളിലും,ജീപ്പുകളിലും ഒക്കെ ആയി ഇടക്കൊക്കെ യാത്ര ചെയ്യുമായിരുന്നു.ഈ സിലിണ്ടറുകളിൽ,നിറച്ചിരുന്നതു എന്തെല്ലാം ആയിരുന്നു എന്ന് പല പ്രമുഖ നേതാക്കൾക്കും,മാധ്യമങ്ങൾക്കും അറിവുള്ളതും ആയിരുന്നു.പല പത്ര പ്രസിദ്ധീകരണങ്ങൾക്കും കഴിയുന്ന രീതിയിൽ പലതും റിപ്പോർട്ട് ചെയ്തിട്ടും ഉണ്ട് എങ്കിലും ഇന്നുവരെയും ഒരു നടപടിയും ഉണ്ടായിട്ടില്ല എന്ന് മാത്രമല്ല,പ്രസിദ്ധീകരിച്ചതും കണ്ടിട്ടില്ല..
മധുവിനെ കാട്ടി കൊടുത്ത് ഫോറസ്ററ് ജോലിക്കാർ ആണെന്ന് പറയുന്നു.അതിൽ സത്യം ഉണ്ടായിരിയ്ക്കാം.

അട്ടപ്പാടി ആദിവാസി മേഖലയിൽ മനുഷ്യരെ കൊലചെയ്യുന്നു എങ്കിൽ അതിനു പിന്നിൽ കാടുകയരി ഇറങ്ങുന്ന ചില കച്ചവടക്കാർ കൂടി ഉണ്ട് എന്നത് വ്യക്തം.വനത്തിൽ അമൂല്യമായ മാത്രം ലഭിക്കുന്ന ധാതു ലാവണങ്ങളും ,മറ്റു വന സമ്പത്തുകളെയും നിസ്സാരമായി കടത്തി കൊണ്ട് പോകുന്ന,മാഫിയകൾ. കാട്കക്കുന്നതിൽ മാറി മാറി വരുന്ന സർക്കാരുകളും.,ഉദ്യോഗസ്ഥരും ഒരു ഇടനിലക്കാരൻ മാത്രമാണ്.

ആദിവാസി മരണത്തിൽ കണ്ണുനീർ ഒഴുക്കി ജന ശ്രദ്ധ അകറ്റുമ്പോൾ കേരള ജനതയെ ,നമ്മുടെ കാടിനെ കൊള്ളയടിയ്ക്കപ്പെടുന്നത് ആരും അറിയുന്നില്ല,കണ്ടാലും കാണുന്നില്ല.ഗവേഷണങ്ങളുടെയും,ടൂറിസത്തിന്റെയും ,പേരിൽ കാടുകയറുന്നവർ ഭയക്കുന്നത് അവിടുള്ള മൃഗങ്ങളെയല്ല മറിച്ചു കാട് സ്വർഗ്ഗമെന്നു കരുതുന്ന അവിടുത്തെ ആദിവാസി ഉടയോരെ ആണ്.അവരെ ഭയപ്പെടുത്തി ഓടിക്കേണ്ടത്,മനോരോഗികൾ എന്ന് മുദ്ര കുത്തേണ്ടത്,നിരക്ഷരൻ ആയി നിലനിത്തേണ്ടത് വൻ മാഫിയകളുടെയും,കൊള്ളക്കാരെ സഹായിക്കുന്ന ചുരുക്കം ചില പ്രമാണിമാരുടെയും മാത്രം അജണ്ടയും,ആവശ്യവും മാത്രമാണ്.ഇതിൽ ചുവപ്പെന്നോ,വെളുപ്പെന്നോ,കാവി എന്നോ വ്യത്യാസം ഇല്ല.ആദിവാസികൾ, നമ്മൾ പരിഷ്കൃത മനുഷ്യരെ പേടിക്കുന്ന ആദിവാസി മാത്രമായി നിലനിക്കപ്പെടേണ്ടത് കരകൾക്കും അപ്പുറം ഉള്ള വൻ കച്ചവടക്കാരുടെ ആവശ്യം കൂടിയാണെന്നും,അവരുടെ വലയിൽ പല ഉദ്യോഗസ്ഥരും കുടുങ്ങിയിട്ടുണ്ട് എന്നും പൊതു ജനം അറിയേണ്ടിയിരിക്കുന്നു.

പല പ്രശ്നങ്ങളെയും രാഷ്ട്രീയ പരമായി കുറ്റപ്പെടുത്തി അതിന്റെ പിന്നിലുള്ള സത്യത്തെ മറക്കുന്നതിൽ സോഷ്യൽ മീഡിയ ഉയർത്തുന്ന വെല്ലുവിളി വളരെ വലുതാണ്.കേരളത്തിലെ മാവോയിസ്റ് വേട്ട ഫാബ്രിക്കേറ്റഡ് ആണ് എന്ന വാദത്തെ തള്ളി പറയുവാൻ ബഹുഭൂരി പക്ഷവും ശ്രമിക്കുന്നു.എന്നാൽ ആ ഒരു വേട്ട മൂലം കാട് കയറിയവരും,നവ വേഷ ധാരികളെ നിർബാധം കാട്ടിൽ മേയാൻ അനുവാദം കൊടുക്കാൻ നിര്ബന്ധിതരായവർ ആണ് ഇന്നുള്ള ആദിവാസികൾ,കാരണം അവർക്കു സാമാന്യ വിദ്യാഭ്യാസം ഉണ്ടെങ്കിലും,നേരും,നുണയും തിരിച്ചറിയാൻ ഉള്ള അറിവ് നാം നൽകിയിട്ടില്ല.ഒറ്റ മാവോയിസ്റ്റുവേട്ടയിൽ ,മാവോയിസ്റ്റുകളിൽ നിന്നും സംരക്ഷണം ലഭിക്കുവാൻ എന്ന പേരിൽ കേന്ദ്ര,സംസ്ഥാന ഫണ്ടുകൾ കവർന്നവർ ആണ് ഭരണ വർഗ്ഗം എന്ന സത്യം എത്ര മാധ്യമങ്ങൾ/ എത്ര ഭരണാധികാരികൾ/ പ്രതി പക്ഷം,ഉദോഗസ്ഥരോ അവരുടെ സംഗടനകളോ ഉയർത്തി കാട്ടി.ആരും തന്നെ ഇല്ല.ആദിവാസി മേഖലയിലെ പട്ടിണിയും,മരണവും നമുക്ക് സോഷ്യൽ മീഡിയയിൽ ചർച്ചകൾ ആകുമ്പോൾ അവർ സംരക്ഷിക്കുന്ന നമ്മുടെ കേരളത്തിന്റെ മാത്രം ഔഷധങ്ങളുടെയും,വന സമ്പത്തിന്റെയും കണക്കുകൾ ആരും ചർച്ച ചെയ്യുന്നില്ല.?കേരളത്തിലെ മാവോയിസ്റ്റുകൾ പോലും മറന്ന മാവോയിസ്റ്റിന്റെ പേരിൽ നടക്കുന്ന തട്ടിപ്പുകൾ ആരും പുറം ലോകത്തെ അറിയിക്കുന്നില്ല?
ആദിവാസികളുടെ കണ്ണുനീരും,നമ്മുടെ ദുഖവും നിറഞ്ഞ നവ മാധ്യമ ഉത്സവത്തിൽ മറയുന്നത് വൻ കൊള്ളയുടെ നേർക്കാഴ്ചകൾ മാത്രമാണ്.

മധുവിന്റെ കൊലപാതകം: കുമ്മനത്തിന്റെ ഉപവാസം തുടങ്ങി

തിരുവനന്തപുരം: ആദിവാസി യുവാവ് മധുവിന്റെ ദാരുണ മരണത്തിനിടയാക്കിയതിലെ സംസ്ഥാന സര്‍ക്കാരിനുളള കുറ്റകരമായ പങ്കില്‍ പ്രതിഷേധിച്ച് എന്‍ഡിഎ ചെയര്‍മാന്‍ കുമ്മനം രാജശേഖരന്റെ24 മണിക്കൂര്‍ ഉപവാസം തുടങ്ങി. സെക്രട്ടറിയേറ്റിനു മുന്നിലെ ഉപവാസം ഒ.രാജഗോപാല്‍ എംഎല്‍എ യുടെ നേതൃത്വത്തില്‍ നേതാക്കള്‍ കൈകള്‍ കൂട്ടിക്കെട്ടിനിന്ന് മധുവിന് ആദരാജ്ഞലി അര്‍പ്പിച്ച ശേഷമാണ് ആരംഭിച്ചത്.പട്ടിക വര്‍ഗ്ഗമോര്‍ച്ച അഖിലേന്ത്യപ്രസിഡന്റും ഛത്തീസ്ഗഡ് മുന്‍ ആഭ്യന്തരമന്ത്രിയുമായ റാം വിചാര്‍ നേതാം എംപി ഉപവാസം ഉദ്ഘാടനം ചെയ്തു. കേരളം പേരുകേട്ട സംസ്ഥാനമാണെങ്കിലും ഭരണാധികാരികളുടെ പിടിപ്പുകേടു കാരണം വിശന്ന് വലഞ്ഞ് അരിയെടുത്തവനെ അടിച്ചു കൊല്ലുന്ന അവസ്ഥയിലേയ്‌ക്കെത്തിയെന്ന് റാംവിചാര്‍ നേതാം പറഞ്ഞു. പൊതു സമൂഹം ഉണര്‍ന്ന് പ്രവര്‍ത്തിച്ചതിനാലാണ് മധുവിന്റെ മരണം പുറത്ത് അറിഞ്ഞത്. അല്ലെങ്കില്‍ അട്ടപ്പാടിയില്‍ നടന്ന മറ്റ് മരണങ്ങളെപ്പോലെ അസ്വാഭിവിക മരണമാകുമായിരുന്നു. കോടിക്കണക്കിന് രുപയാണ് ആദിവാസി ക്ഷേമത്തിന് കേന്ദ്രസര്‍ക്കാര്‍ നല്‍കുന്നത്. മധുവിന്റെ മരണം ലോകസഭയും രാജ്യസഭയും ചര്‍ച്ച ചെയ്യണമെന്നും റാം വിചാര്‍ നേതാം ആവശ്യപ്പെട്ടു. ജെആര്‍എസ് ചെയര്‍മാന്‍ സി.കെ.ജാനു അദ്ധ്യക്ഷത വഹിച്ചു. അവകാശങ്ങള്‍ക്ക് വേണ്ടി പൊരുതുന്ന ആദിവാസികളെ നക്‌സലൈറ്റുകളെന്നും തീവ്രവാദികളെന്നും മുദ്രകുത്തരുതെന്ന് സി.കെ. ജാനു പറഞ്ഞു. അട്ടപ്പാടിയുടെ വികസനത്തിനു വേണ്ടി കോടിക്കണക്കിന് രൂപയാണ് വിനിയോഗിക്കുന്നത്. ആദിവാസികള്‍ പട്ടിണിയിലും ഇവരുടെ ക്ഷേമത്തിനു വേണ്ടി വിനിയോഗിക്കുന്ന തുക ആദിവാസികള്‍ക്ക് നേരിട്ട് കൊടുത്തിരുന്നുവെങ്കില്‍ അവര്‍ കോടീശ്വരന്‍മാരാകുമെന്ന് സി.കെ.ജാനു പറഞ്ഞു. കാട്ടില്‍ നിന്ന് തടികടത്തുന്നവനും, ആനക്കൊമ്പ് മോഷ്ടിക്കുന്നവനും സമൂഹത്തില്‍ സൈ്വരമായി വിഹരിക്കുമ്പോള്‍ വിശന്ന് വലയുന്നവനെ അടിച്ചുകൊല്ലുന്ന രീതിയാണ് നടന്നുവരുന്നത്. മന്ത്രി എ.കെ ബാലന്‍ രാജിവയ്ക്കണമെന്നും ജാനു ആവശ്യപ്പെട്ടു.

മനസാക്ഷി ഒട്ടുമില്ലാത്ത മേലാളന്മാര്‍ ഭരിക്കുന്ന സംസ്ഥാനത്ത് ആദിവാസി യുവാവ് മധു കൊല്ലപ്പെട്ടതില്‍ മുഖ്യമന്ത്രി പിണറായി വിജയന്‍ ഒന്നാം പ്രതിയാണെന്ന് കുമ്മനം രാജശേഖരന്‍ ആരോപിച്ചു. മധുവിന്റെ വീട്ടില്‍ പോകാനോ മോര്‍ച്ചറിയില്‍ പോയി മൃതദേഹം കാണാനോ മുഖ്യമന്ത്രികൂട്ടാക്കിയില്ല. ആദിവാസി ക്ഷേമത്തിനു നല്‍കുന്ന പണം മുഴുവന്‍ കൊള്ളയടിക്കുന്നു. ആ പണം തട്ടിയെടുക്കുന്ന തമ്പ്രാക്കന്‍മാരുടെ ഗുരുവാണ് പിണറായി വിജയന്‍. കേരളത്തില്‍ കൊലപാതകങ്ങളുടെ എണ്ണം ദിനം പ്രതി വര്‍ദ്ധിക്കുകയാണ്. ചോരക്കറ പുരളുന്ന മണ്ണാണ് എങ്ങും. വസ്തുവില്‍ കൊടികുത്തി അവരെ ആത്മഹത്യയിലേക്ക് തള്ളി വിടുകയല്ല വേണ്ടത്. ഗര്‍ഭിണിയെ വരെ സിപിഎം പാര്‍ട്ടി പ്രവര്‍ത്തകര്‍ ചവുട്ടി പിഞ്ചുകുഞ്ഞിനെ കൊല്ലുന്നു. സാമൂഹിക പരിഷ്‌കര്‍ത്തക്കള്‍ കേരളത്തിനു വേണ്ടി ഒഴുക്കിയ വിയര്‍പ്പ് വെറുതെയായെന്നും കുമ്മനം പറഞ്ഞു. എല്‍ജെപി ദേശീയ ഉപാദ്ധ്യക്ഷന്‍ രാമചന്ദ്ര പസ്വാന്‍, കേരള കോണ്‍ഗ്രസ് ചെയര്‍മാന്‍ പി.സി. തോമസ്, ജെഎസ്എസ് സംസ്ഥാന പ്രസിഡന്റ് ആര്‍.പൊന്നപ്പന്‍, എല്‍ജെപി സംസ്ഥാന പ്രസിഡന്റ് എം.മൊഹബൂബ്, പിഎസ്പി സംസ്ഥാന ജനറല്‍ സെക്രട്ടറി കെ.കെ.പൊന്നപ്പന്‍, കേരള കോണ്‍ഗ്രസ് നാഷണിലിസ്റ്റ് ചെയര്‍മാന്‍ കുരുവിള മാത്യൂസ്, സോഷ്യലിസ്റ്റ് ജനതാദള്‍ വി.വി. രാജേന്ദ്രന്‍ തുടങ്ങിയവര്‍ സംസാരിച്ചു.

സ്പര്‍ദ്ധയും വിദേഷ്വവും വെടിഞ്ഞ് ഒരൊറ്റ ആരാധനാ സമൂഹമായി ദൈവസന്നിധിയില്‍ ഏവരും കടന്നു വരുന്ന അനുഗ്രഹീത മുഹൂര്‍ത്തത്തിന് വേണ്ടി മലങ്കരസഭ കാത്തിരിക്കുന്നു: പരിശുദ്ധ എപ്പിസ്‌കോപ്പൽ സുന്നഹദോസ്

സ്പര്‍ദ്ധയും വിദേഷ്വവും വെടിഞ്ഞ് ഒരു ആരാധക സമൂഹമായി ദൈവസന്നിധിയില്‍ ഏവരും കടന്നു വരുന്ന അനുഗ്രഹീത മുഹൂര്‍ത്തത്തിന് വേണ്ടി മലങ്കരസഭ കാത്തിരിക്കുകയാണെന്നും ഈ ലക്ഷ്യത്തെ പ്രതികൂലമായി ബാധിക്കുന്ന യാതൊരു നടപടിയും മലങ്കര സഭാംഗങ്ങളായ ആരുടെ ഭാഗത്തു നിന്നും ഉണ്ടാകരുതെന്നും ഈ ലക്ഷ്യത്തിന് ഏവരുടെയും സഹായവും പങ്കാളിത്തവും ഉണ്ടാകണമെന്നും മലങ്കര ഓര്‍ത്തഡോക്സ് സുറിയാനി സഭാ എപ്പിസ്ക്കോപ്പല്‍ സുന്നഹദോസ് അംഗീകരിച്ച പ്രമേയത്തില്‍ ആഹ്വാനം ചെയ്തു. 1934 ലെ മലങ്കര സഭാ ഭരണഘടനയുടെയും 2017 ജൂലൈ 3 ലെ ബഹു. സുപ്രീം കോടതി വിധിയുടെയും അടിസ്ഥാനത്തിലായിരിക്കണം സഭയിൽ സമാധാനം കൈവരിക്കേണ്ടത്. ഇവ അംഗീകരിക്കുന്ന ഇടവക ജനങ്ങളില്‍ ആര്‍ക്കും ഇടവകയില്‍ യാതൊരു ബുദ്ധിമുട്ടും തടസ്സവും ഉണ്ടാവുകയില്ലെന്നും സുന്നഹദോസ് പ്രഖ്യാപിച്ചു. ഭാരതത്തിന്റെ അപ്പോസ്തോലനായ മാർത്തോമാ ശ്ലീഹായുടെ പെരുന്നാൾ ദിനമായ ജൂലൈ 3 -നു ഉണ്ടായ സുപ്രീം കോടതി വിധി സഭാ സമാധാനത്തിനുള്ള ദൈവീക പദ്ധതിയായി മലങ്കരസഭ വിശ്വസിക്കുന്നു.

മലങ്കര ഓർത്തഡോക്സ് സുറിയാനി സഭ സമാധാനമാണ് എക്കാലവും ആഗ്രഹിക്കുന്നത്. സഭയിലെ ഇടവക പള്ളികളെല്ലാം സമാധാനപൂർവ്വം ഭരിക്കപ്പെടണമെന്നും സഭാവിശ്വാസികൾ ക്രിസ്തീയ വിശ്വാസത്തിലും സഭാ ജീവിതനിഷ്‌ഠയിലും അടിയുറച്ച് സഭയുടെ ഘടനകളോടുള്ള വിധേയത്വത്തിലും അച്ചടക്കത്തിലും നിലനിൽക്കണമെന്നും മലങ്കരസഭ ആഗ്രഹിക്കുന്നു. 2017 ജൂലൈ മാസം 3–ാം തീയതി ബഹുമാനപ്പെട്ട സുപ്രീം കോടതിയിൽ നിന്നുണ്ടായ വിധി, പാത്രിയർക്കീസ് വിഭാഗം എന്ന് വിശേഷിപ്പിക്കപ്പെടുന്ന ഒരു സമൂഹം ബഹുമാനപ്പെട്ട സുപ്രിംകോടതിയിൽ സമർപ്പിച്ച അപ്പീലിന്മേൽ ഉണ്ടായ വിധിതീർപ്പാണ്. ഈ വിധിതീർപ്പ് സഭയിൽ സമാധാനം സ്ഥാപിക്കുവാനും വിശ്വാസികളേവരും തർക്കവിതർക്കങ്ങൾ അവസാനിപ്പിച്ച് വ്യക്തമായി നിർവ്വചിക്കപ്പെട്ടിട്ടുള്ള ഒരു സംവിധാനത്തിന് കീഴിൽ സമാധാനപൂർവ്വം നിലകൊള്ളുവാനും അങ്ങേയറ്റം സഹായകമായ സുവർണ്ണ രേഖയായാണ് കണക്കാക്കപ്പെടുന്നത്.

1934 ലെ സഭാ ഭരണഘടനയുടെയും മറ്റു ഭരണക്രമങ്ങളുടെയും അടിസ്ഥാനത്തിൽ, വ്യവസ്ഥാപിതമായ മാർഗങ്ങളിൽക്കൂടി ഭരിക്കപ്പെട്ടുകൊണ്ടിരുന്ന സഭയിൽ 1970 മുതൽ പ്രശ്‌നങ്ങൾ ഉണ്ടായപ്പോൾ, പലപ്പോഴും മധ്യസ്ഥന്മാർ ഇടപെടുകയും ഗവൺമെന്റ് അധികാരികളുടെ സാന്നിധ്യത്തിൽ പല എഗ്രിമെന്റുകളും ഉണ്ടാക്കുകയും ചെയ്‌തിരുന്നു. എന്നാൽ അവയെല്ലാം ലംഘിക്കപ്പെടുകയും, പലപ്പോഴും സമാധാന ഭഞ്ജനമുണ്ടാക്കപ്പെടുകയും, മലങ്കരസഭയുടെ പള്ളികൾ അനധികൃതമായി കൈയ്യേറപ്പെടുകയും, ഇവിടെ ഒരുഭരണക്രമം നിലനിൽക്കുമ്പോൾ 2002 -ൽ പുതിയ ഭരണക്രമങ്ങൾ രൂപീകരിക്കപ്പെടുകയും ചെയ്‌ത സാഹചര്യത്തിൽ, ഒരു ജനാധിപത്യസംവിധാനത്തിന്റെ ഭാഗമായ ജൂഡീഷ്യറി ഈ വിഷയത്തിൽ ഇടപെട്ട് തീർപ്പ് കൽപിക്കുക എന്ന ഉദ്ദേശ്യത്തോടുകൂടിയും സമാധാനസ്ഥാപനത്തിനുമാണ് കോടതികളെ സമീപിക്കുവാൻ മലങ്കരസഭ പലപ്പോഴും നിർബന്ധിതമായത്.

ഒരു ജനാധിപത്യരാജ്യത്തിൽ അധികാരമുള്ള മദ്ധ്യസ്ഥനാണ് നീതിന്യായ കോടതി. ഇരുവിഭാഗങ്ങളുടെയും പക്കലുള്ള തെളിവുകളും രേഖകളും ഉൾപ്പെടെ പരിശോധിച്ചതിന് ശേഷമാണല്ലോ കോടതികൾ വിധി പ്രസ്താവിക്കുന്നത്. ജനാധിപത്യം, ഭൂരിപക്ഷം, രേഖകൾ എന്നിവയുടെ അടിസ്ഥാനത്തിലുള്ള എല്ലാ വാദഗതികളും നീതിന്യായ കോടതികൾ സവിസ്തരം പരിഗണിച്ചതിന് ശേഷമാണ് ബഹുമാനപ്പെട്ട സുപ്രീംകോടതി വിധി പ്രസ്താവിച്ചിട്ടുള്ളത്. ആ വിധി നടപ്പാക്കുന്നത് തന്നെ പ്രശ്‌നപരിഹാരത്തിനുള്ള അംഗീകൃത നടപടിയാണ്. എന്നാൽ നീതിന്യായ കോടതിയുടെ മദ്ധ്യസ്ഥത അംഗീകരിക്കാൻ കൂട്ടാക്കാത്തവർ മറ്റു മദ്ധ്യസ്ഥന്മാരെ ചെവിക്കൊള്ളുമോ?1995 – ൽ സഭാകേസ് സുപ്രീം കോടതിയിൽ നടക്കുന്ന സമയത്ത് ജഡ്‌ജിമാർ ഇരുകക്ഷികളോടും ചോദിച്ചതാണ്, നിങ്ങൾക്ക് കോടതിക്കുപുറത്ത് മറ്റു മദ്ധ്യസ്ഥന്മാരെ വച്ച് ഒരു തീർപ്പ് ഉണ്ടാക്കരുതോ എന്ന്. അന്ന് ഇരുവിഭാഗവും തങ്ങൾക്ക് കോടതി നടപടികളിൽ പൂർണ്ണ വിശ്വാസം ഉണ്ടെന്നും, കോടതിയുടെ തീർപ്പ് സ്വീകാര്യമാണ് എന്നും പറഞ്ഞിരുന്നു. ഇപ്പോൾ 2017 ജൂലൈ 3 –ലെ വിധി തങ്ങൾക്ക് പ്രതികൂലമായപ്പോൾ പാത്രിയർക്കീസ് വിഭാഗം കോടതിയെ ചോദ്യം ചെയ്യുന്നതും കോടതിയിൽ ക്രമക്കേട് ഉണ്ടെന്ന് ആരോപിക്കുന്നതും കോടതിയുടെ നിക്ഷ്‌പക്ഷതയിൽ പോലും സംശയം ഉന്നയിക്കുന്നതും കോടതിയലക്ഷ്യത്തിന്റെ പരിധിയിൽ വരും എന്ന് മറന്നുക്കരുത്. കോടതിവിധികൾ ഓർത്തഡോക്സ് പക്ഷം വിലകൊടുത്തു വാങ്ങിയതാണ് എന്ന പ്രസ്താവനപോലും ഉണ്ടായിട്ടുണ്ടെന്ന് കാണുന്നു. അത് ദൈവം ക്ഷമിക്കട്ടെ.

പാത്രിയർക്കീസ് വിഭാഗത്തിലെ ആളുകളുടെ സ്വത്താണ് പള്ളികൾ എന്നാണല്ലോ തോമസ് പ്രഥമൻ ബാവായുടെ വാദം. മലങ്കര സഭ ഒരു ട്രസ്റ്റാണ്. സഭയുടെ സ്വത്തുക്കളും, ഇടവകപള്ളികളും എല്ലാം അതിൽ ഉൾപ്പെടും. ആരൊക്കെ എന്തൊക്കെ ത്യാഗം സഹിച്ച് നിർമ്മിച്ചവയായാലും, ഒരു ട്രസ്റ്റിന്റെ ഭാഗമായിക്കഴിഞ്ഞാൽ പിന്നെ നിർമ്മിച്ചവനും, അതിനുവേണ്ടി പണം മുടക്കിയവനും അതിന്മേൽ അവകാശമില്ല. ട്രസ്റ്റിൽ നിക്ഷിപ്‌തമായിരിക്കുന്ന സ്വത്തുക്കളൊന്നും ആരുടെയും സ്വന്തമല്ല. അവകാശമുള്ളവർ ട്രസ്റ്റിന്റെ ഭരണംനടത്തും. മലങ്കര സഭ ഭരിക്കപ്പെടേണ്ടത് 1934 ലെ ഭരണഘടന അനുസരിച്ചാണെന്ന് കേരളഹൈക്കോടതിയും,ഭാരതത്തിന്റെ പരോമോന്നത കോടതിയായ സുപ്രീം കോടതിയും പലപ്രാവശ്യം ആവർത്തിച്ചു ഉറപ്പിച്ചു വിധിച്ചു കഴിഞ്ഞു. എന്നിട്ടും ഇതിനെയൊന്നും തങ്ങൾ ബഹുമാനിക്കില്ല എന്ന നിലപാട് ഖേദകരമാണ്. നീതിന്യായ വ്യവസ്ഥിതികളോടുള്ള വെല്ലുവിളിയുമാണ്. 1934–ൽ നിലവിൽവന്നതും ബഹുമാനപ്പെട്ട സുപ്രീംകോടതി അംഗീകരിച്ചതുമായ ഭരണഘടന പ്രകാരം ഇടവക ഭരണം നടത്തുക എന്നതുകൊണ്ട് ഉദ്ദേശിക്കുന്നത് സഭയുടെ ചിട്ടകൾ പാലിച്ചുകൊണ്ട് സഭാംഗങ്ങളായ വിശ്വാസികൾ ഇടവക ഭരണത്തിൽ അവർക്കർഹമായ പങ്ക് വഹിക്കുക എന്നുതന്നെയാണ്. ഇടവകകളുടെ സ്വത്തുക്കൾ സഭാ കേന്ദ്രം പിടിച്ചടക്കുവാൻ ശ്രമം നടത്തുന്നു എന്ന പ്രചരണം സത്യത്തിന് നിരക്കാത്തതാണ്.

കേരളത്തിലെ ഇതര ക്രൈസ്തവ സമൂഹങ്ങളെയും സർക്കാരിനെയും എന്തിന് കുറ്റപ്പെടുത്തുന്നു. ബഹു. സുപ്രീം കോടതി തീർപ്പു കൽപ്പിച്ചിരിക്കുന്ന വിഷയം ഇൻഡ്യയിലെ ഒരുപൗരനും ചോദ്യം ചെയ്യുവാൻ അവകാശമില്ല എന്ന ബോധ്യം സഭാ നേതാക്കൾക്കും സാമൂഹ്യ നേതാക്കൾക്കും സർക്കാരിനും ഉള്ളതുകൊണ്ടാണ് അവർ മൗനം അവലംബിക്കുന്നത്. സുപ്രീം കോടതിയുടെ തീർപ്പ് രാജ്യത്തിന്റെ നിയമമാണെന്ന തത്വം മനസ്സിലാക്കി ആയത് നടപ്പാക്കലാണ് സർക്കാരിന്റെ ദൗത്യം.

അനധികൃതമായി ഒരു പള്ളിയും ഒരു സ്ഥാപനവും കൈയടക്കുവാൻ മലങ്കരഓർത്തഡോക്സ് സഭ ശ്രമിച്ചിട്ടില്ല, ശ്രമിക്കുകയുമില്ല. എന്നാൽ സഭയുടെ പുരാതന സ്വത്തുക്കളൊന്നും കൈയേറുവാൻ അനുവദിക്കയില്ല. അവ സഭയുടെതാണ്. എത്ര കാലം കഴിഞ്ഞാലും അത് സഭയുടെതായി നിലനിൽക്കും. ഓരോകാലത്തും സഭ ആരു ഭരിക്കുന്നുവോ അവർ അതു ഭരിക്കും. അത് വെട്ടിമുറിക്കുവാനുള്ളതല്ല. സംഘർഷം ഉണ്ടാക്കും എന്ന പ്രതീതി സൃഷ്‌ടിച്ച് കോടതി ഉത്തരവിനെ വെല്ലുവിളിക്കാൻ ശ്രമിക്കുന്നതും ഇഷ്‌ടമില്ലാത്ത ഉത്തരവുകൾ ഉണ്ടായാൽ സംഘർഷമുണ്ടാകുമെന്ന ധാരണപരത്തുവാൻ ആസൂത്രിത നീക്കം നടത്തുന്നതും ഒരു കാരണവശാലും അംഗീകരിക്കാനാവില്ല എന്നും ബഹുമാനപ്പെട്ട സുപ്രീംകോടതി പരാമർശിച്ചിട്ടുള്ളത് മാധ്യമങ്ങൾ പ്രസിദ്ധീകരിച്ചിട്ടുണ്ട്‌.

സഭാവിശ്വാസികളുടെ ആത്മീകവും ലൗകികവുമായ ഒരാവശ്യങ്ങളും സഭ മുടക്കുകയില്ല. ശവസംസക്കാരം തടസപ്പെടുത്തുന്നു എന്നത് വെറും ആരോപണമാണ്. മരിച്ചവർക്കായുള്ള ചരമ വാർഷികവും, പ്രത്യേകപ്രാർത്ഥനകളും ഒന്നും നടത്തുന്നതിന് സഭ തടസം നിൽക്കുന്നില്ല. ഒരോ പള്ളിയിലും കർമ്മങ്ങൾ നടത്തുവാൻ നിയമപരമായി അവകാശമുള്ള വൈദികരുടെ നേതൃത്വത്തിലാവണം കർമ്മങ്ങൾ നടത്തപ്പെടേണ്ടത്. അല്ലാതെ വരുമ്പോഴാണ് പ്രശ്‌നങ്ങൾ ഉണ്ടാകുന്നത്. സമാധാനവും ഐക്യവും ആഗ്രഹിക്കുന്നവർ യുദ്ധത്തിനുള്ള വെല്ലുവിളി അവസാനിപ്പിക്കണം. രാജ്യത്തെ നിയമങ്ങൾ അനുസരിക്കണം എന്ന് മാത്രമാണ് മലങ്കര സഭക്ക് പറയുവാനുള്ളത്.

പ്രീ-മാരിറ്റല്‍ കൗണ്‍സലിംഗ്

കേരള വനിതാ കമ്മീഷന്‍റെ നേതൃത്വത്തില്‍ വിവാഹ ജീവിതത്തിന് തയ്യാറെടുക്കുന്ന യുവതീ – യുവാക്കള്‍ക്ക് വിവാഹ മുന്നൊരുക്ക കൗണ്‍സലിംഗ് (പ്രീ-മാരിറ്റല്‍ കൗണ്‍സലിംഗ്) പരിപാടി സംഘടിപ്പിക്കുന്നു.

രണ്ടു ദിവസത്തെ കൗണ്‍സലിംഗ് പരിപാടിയില്‍ തിരുവനന്തപുരം, കോട്ടയം, മലപ്പുറം, കണ്ണൂര്‍ ജില്ലകളില്‍ നിന്നുള്ള 18നും 35നും മദ്ധ്യേ പ്രായമുള്ള യുവതീ- യുവാക്കള്‍ക്ക് ഓണ്‍ലൈന്‍ വഴിയും നേരിട്ടും അപേക്ഷിക്കാവുന്നതാണ്.

കൂടുതല്‍ വിവരങ്ങള്‍ക്ക്

മലങ്കര സോഷ്യല്‍ സര്‍വ്വീസ് സൊസൈറ്റി, സെന്‍റ് മേരീസ് കാമ്പസ്, പട്ടം പി.ഒ., തിരുവനന്തപുരം 695004, ഫോണ്‍: 8592828763, 9496422663.
സുശീല ഗോപാലന്‍ സ്മാരക സ്ത്രീപദവി നിയമ പഠന കേന്ദ്രം, കണ്ണൂര്‍. ഫോണ്‍: 0497 2708069

അപേക്ഷകള്‍ സ്വീകരിക്കുന്ന അവസാന തീയതി 20.02.2018

Online Registration Website: kwcpmc.wixsite.com/msss