ഓസ്ട്രേലിയ അഡലൈഡിൽ മലങ്കര ഓർത്തഡോക്സ് സഭക്ക് സ്വന്തം ദേവാലയം ഒരുങ്ങുന്നു

ഓസ്ട്രേലിയ: അഡലൈഡ് സെൻറ്. ഗ്രീഗോറിയോസ് ഇന്ത്യൻ ഓർത്തഡോക്സ് ഇടവകയുടെ പത്തു വർഷക്കാലമായുള്ള പ്രാർത്ഥനയും സ്വപ്നവും യാഥാർത്ഥ്യമാകുന്നു. ദൈവത്തെ ആരാധിക്കുന്നതിന് സ്വന്തമായ ഒരു ദേവാലയം എന്നത് യാഥാർഥ്യത്തിലേക്ക് എത്തിയിരിക്കുന്നു. 1.23 ഏക്കർ സ്ഥലവും (2B Tolmer Road, Elizabeth Park, Adelaide, SA-5113) ദേവാലയവും അനുബന്ധ സൗകര്യങ്ങളും ആണ് മലങ്കര സഭക്ക് സ്വന്തമായി മാറിയത്. അഡലൈഡ് മലയാളി സമൂഹത്തിൻ്റെ സ്വന്തമായ ആദ്യ ദേവാലയം എന്ന പ്രത്യേകതയും ഇതിന് കൈവരും എന്നതിൽ ദൈവത്തെ നന്ദിയോടെ സ്തുതിക്കുന്നു. ഇടവക മെത്രാപ്പോലീത്ത മദ്രാസ് ഭദ്രാസനാധിപൻ അഭിവന്ദ്യ ഡോ.യൂഹാനോൻ മാർ ദീയസ്കോറോസ് തിരുമേനിയുടെ ശക്തമായ പിന്തുണയും, ഇടവക വികാരി റവ.ഫാ.അനിഷ് കെ.സാമിൻ്റെ നേതൃത്വവും, മാനേജിങ് കമ്മിറ്റി-ബിൽഡിംഗ് കമ്മിറ്റി അംഗങ്ങളുടെ അക്ഷീണമായ പ്രയത്നവും ഇടവക ജനങ്ങളുടെ സഹകരണവും മൂലമാണ് സ്വന്തമായ ദേവാലയം എന്നത് യാഥാർത്ഥ്യത്തിലേക്ക് എത്തിച്ചേരുന്നത്. ഇടവകയുടെ കാവൽ പിതാവായ പരിശുദ്ധ പരുമല തിരുമേനിയുടെ മധ്യസ്ഥതയിൽ അഭയപ്പെട്ടു കൊണ്ട് ദേവാലയ കൂദാശക്ക് വേണ്ടിയുള്ള ഒരുക്കത്തിൽ അഡലൈഡ് ദേവാലയം മുന്നേറുന്നു.

2007-ൽ ഭദ്രാസനാധിപൻ ആയിരുന്ന അഭിവന്ദ്യ ഡോ. യാക്കൂബ് മാർ ഐറേനിയോസ് മെത്രാപ്പോലീത്തയുടെ അനുവാദത്തോടെ മെൽബൺ കത്തീഡ്രൽ വികാരി ആയിരുന്ന വെരി റവ.ജോസഫ് തളിയപ്പറമ്പിൽ കോർ-എപ്പിസ്കോപ്പയുടെ നേതൃത്വത്തിലാണ് അഡലൈഡിൽ ആരാധന ആരംഭിക്കുന്നത്. തുടർന്ന് 10 വർഷമായി റവ.ഫാ.കെ.വൈ.ചാക്കോ, റവ.ഫാ.ചാൾസ് ജേക്കബ്, റവ.ഫാ.ഷിനു കെ.തോമസ്, റവ.ഫാ.ഫ്രഡിനാർഡ് പത്രോസ്, റവ.ഫാ.പ്രദീപ് പൊന്നച്ചൻ, റവ.ഫാ.സജു ഉണ്ണൂണ്ണി എന്നീ ബഹുമാന്യരായ വൈദീകർ മെൽബൺ കത്തീഡ്രലിൽ നിന്നും വന്ന് വിശുദ്ധ ആരാധന അർപ്പിച്ചു വന്നു. 2017 ഓഗസ്റ്റിൽ ആണ് അഡലൈഡ് ഇടവകയുടെ പുതിയ വികാരിയായി റവ.ഫാ.അനിഷ് കെ.സാമിനെ മദ്രാസ് ഭദ്രാസനാധിപൻ അഭിവന്ദ്യ ഡോ.യൂഹാനോൻ മാർ ദീയസ്കോറോസ് തിരുമേനി നിയമിച്ച് കൽപന പുറപ്പെടുവിക്കുന്നത്.

അഡലൈഡ് സെൻറ് ഗ്രീഗോറിയോസ് ഇന്ത്യൻ ഓർത്തഡോക്സ് ഇടവകയുടെ ദശവർഷ ജൂബിലി ആഘോഷങ്ങളുടെ സമാപന സമ്മേളനം സമുചിതമായി നടത്തപ്പെട്ടു

ഓസ്ട്രേലിയ: അഡലൈഡ് സെൻറ് ഗ്രീഗോറിയോസ് ഇന്ത്യൻ ഓർത്തഡോക്സ് ഇടവകയുടെ ദശവർഷ ജൂബിലി (Decennial Jubilee) ആഘോഷങ്ങളുടെ സമാപന സമ്മേളനം ഏപ്രിൽ 1 ഞായറാഴ്ച അഡലൈഡ് പാർക്‌സ് തീയേറ്ററിൽ (The Parks Community Centre, 46 Cowan St., Angle Park, SA) വച്ച് സമുചിതമായി നടത്തപ്പെട്ടു. വൈകിട്ട് 5 മണിക്ക് ആരംഭിച്ച സമ്മേളനം ഇടവക മെത്രാപ്പോലീത്ത അഭിവന്ദ്യ ഡോ.യൂഹാനോൻ മാർ ദീയസ്കോറോസ് തിരുമേനി ഉദ്‌ഘാടനം ചെയ്തു. ഇടവക വികാരി റവ.ഫാ.അനിഷ് കെ.സാം യോഗത്തിൽ അദ്ധ്യക്ഷത വഹിച്ചു. ജിങ് ലീ (Assistant Minister to the Premier of South Adelaide), റവ.ഫാ.സജി കെ.മാത്യു, റവ.ടോണി ഈപ്പൻ വർക്കി, പാസ്റ്റർ മാൽകം പെക്, ദീന സജു എന്നിവർ ആശംസകൾ അർപ്പിച്ചു. ജൂബിലി സുവനീർ പ്രകാശനം അഭിവന്ദ്യ തിരുമേനി നിർവഹിച്ചു. അഡലൈഡിലെ എല്ലാ ദേവാലയങ്ങളിൽ നിന്നുമുള്ള കലാപരിപാടികൾ സമ്മേളത്തിന് മുന്നോടിയായി നടത്തപ്പെട്ടു. സമ്മേളത്തിന് ശേഷം അഡലൈഡ് ബീറ്റ്‌സ് ഓർക്കസ്ട്രയുടെ ഭക്തിഗാനാർച്ചന ‘സ്വർഗീയ നാദം’ നടത്തപ്പെട്ടു. ലിസ ജിൻസ് സ്വാഗതവും, സജി വർഗീസ് ചിറ്റിലപ്പിള്ളി നന്ദിയും പ്രകാശിപ്പിച്ചു. ജൂബിലി കമ്മിറ്റിയും, ഇടവക മാനേജിങ് കമ്മിറ്റിയും ക്രമീകരണങ്ങൾക്ക് നേതൃത്വം നൽകി.

അഡലൈഡ് ഓർത്തഡോക്സ് ദേവാലയം ദശവർഷ ജൂബിലി നിറവിൽ

ഓസ്ട്രേലിയ: അഡലൈഡ് സെൻറ് ഗ്രീഗോറിയോസ് ഇന്ത്യൻ ഓർത്തഡോക്സ് ഇടവകയുടെ ദശവർഷ ജൂബിലി (Decennial Jubilee) ആഘോഷങ്ങളുടെ സമാപന സമ്മേളനം ഏപ്രിൽ 1 ഞായറാഴ്ച അഡലൈഡ് പാർക്‌സ് തീയേറ്ററിൽ (The Parks Community Centre, 46 Cowan St., Angle Park, SA) വച്ച് സമുചിതമായി നടത്തപ്പെടും. വൈകിട്ട് 5 മണിക്ക് ആരംഭിക്കുന്ന സമ്മേളനം ഇടവക മെത്രാപ്പോലീത്ത അഭിവന്ദ്യ ഡോ.യൂഹാനോൻ മാർ ദീയസ്കോറോസ് തിരുമേനി ഉദ്‌ഘാടനം ചെയ്യും. ഇടവക വികാരി റവ.ഫാ.അനിഷ് കെ.സാം യോഗത്തിൽ അദ്ധ്യക്ഷത വഹിക്കും. ബഹുമാന്യനായ മേയർ ഡേവിഡ് ഓ ലഗ്‌ലിൻ (City of Prospect, Adelaide), ജിങ് ലീ (Member of Legislative Council, Adelaide), അഡലൈഡിൽ ആരാധന നടത്തുന്ന എല്ലാ സഭകളിലേയും ബഹുമാന്യരായ വൈദികശ്രേഷ്ഠർ എന്നിവർ ആശംസകൾ അർപ്പിക്കും. ജൂബിലി സുവനീർ പ്രകാശനം അഭിവന്ദ്യ തിരുമേനി നിർവഹിക്കും. അഡലൈഡിലെ എല്ലാ ദേവാലയങ്ങളിൽ നിന്നുമുള്ള കലാപരിപാടികൾ സമ്മേളത്തിന് മുന്നോടിയായി നടത്തപ്പെടും. സമ്മേളത്തിന് ശേഷം അഡലൈഡ് ബീറ്റ്‌സ് ഓർക്കസ്ട്രയുടെ ഭക്തിഗാനാർച്ചന നടത്തപ്പെടും. ആഘോഷങ്ങളുടെ ഭംഗിയായ നടത്തിപ്പിനായി ജൂബിലി കമ്മിറ്റിയും, ഇടവക മാനേജിങ് കമ്മിറ്റിയും വിപുലമായ ക്രമീകരണങ്ങൾ ചെയ്തു വരുന്നു. ഏവരെയും ജൂബിലി ആഘോഷ പരിപാടികളിലേക്ക് കർതൃനാമത്തിൽ ഹാർദ്ദമായി സ്വാഗതം ചെയ്യുന്നു.

നോർത്ത് അമേരിക്കയും യൂറോപ്പും കടന്ന് ശാലോം വേൾഡ് ഓസ്ട്രേലിയയിലേക്ക്

സിഡ്നി: നോർത്ത് അമേരിക്കയിലും യൂറോപ്പിലും ആത്മീയവസന്തം സമ്മാനിച്ച ശാലോം വേൾഡ് ഇംഗ്ലീഷ് ചാനൽ ഓസ്ട്രേലിയയിലേക്ക് എത്തുന്നു, ഓസ്ട്രേലിയൻ ദിനമായ ജനുവരി 26 രാവിലെ 8.00 മുതൽ. ശാലോം മീഡിയ ഓസ്ട്രേലിയയുടെ രക്ഷാധികാരികളിൽ ഒരാളും മെൽബൺ സെന്റ് തോമസ് സീറോ മലബാർ ബിഷപ്പുമായ മാർ ബോസ്‌ക്കോ പുത്തൂരിന്റെ അനുഗ്രഹാശിസുകളോടെ, മറ്റൊരു രക്ഷാധികാരിയായ ഹൊബാർട്ട് ആർച്ച്ബിഷപ്പ് ജൂലിയൻ പോർട്ടിയസാണ് ചാനലിന്റെ സ്വിച്ച് ഓൺ കർമം നിർവഹിക്കുക. ഹൊബാർട് സെന്റ് മേരീസ് കത്തീഡ്രലിലെ പ്രഭാത ദിവ്യബലി അർപ്പണത്തിനുശേഷമാകും സ്വിച്ച്ഓൺ കർമം.

ലോകമെമ്പാടുമുള്ള മലയാളികളിലേക്ക് സുവിശേഷത്തിന്റെ സദ്വാർത്ത പകരുന്ന ശാലോമിന്റെ ദൃശ്യമാധ്യമശുശ്രൂഷ 2014 ഏപ്രിൽ 27നാണ് ഇംഗ്ലീഷ് ജനതയ്ക്കുമുന്നിൽ മിഴി തുറന്നത്. ഡിവൈൻ മേഴ്സി തിരുനാൾ ദിനത്തിൽ, വാഴ്ത്തപ്പെട്ട ജോൺ പോൾ രണ്ടാമനെയും ജോൺ 23-ാമനെയും വിശുദ്ധഗണത്തിലേക്ക് ഉയർത്തുന്ന തിരുക്കർമങ്ങൾ വത്തിക്കാനിൽനിന്ന് തൽസമയം പ്രേക്ഷകരിലേക്കെത്തിച്ചുകൊണ്ടായിരുന്നു മുഴുവൻ സമയ കത്തോലിക്കാ കരിസ്മാറ്റിക് ചാനലായ ശാലോം വേൾഡിന്റെ ആരംഭം.

നോർത്ത് അമേരിക്കയ്ക്കുശേഷം ഘട്ടം ഘട്ടമായി എല്ലാ ഭൂഖണ്ഡങ്ങളിലേക്കും ചാനൽ വ്യാപിപ്പിക്കാനുള്ള പദ്ധതിയുടെ മൂന്നാം ഘട്ടമാണ് ഇപ്പോൾ സാധ്യമാകുന്നത്. 2016ലെ ഈസ്റ്റർ ദിനമായ മാർച്ച് 12ന് തുടക്കം കുറിച്ച ശാലോം വേൾഡ് യൂറോപ്പിന്റെ പ്രക്ഷേപണമായിരുന്നു രണ്ടാം ഘട്ടം. യൂറോപ്പിൽനിന്നുള്ള പരിപാടികൾ ഉൾപ്പെടുത്തി പൂർണമായും യൂറോപ്പ്യൻ സമയക്രമത്തിലാണ് ശാലോം വേൾഡ് യൂറോപ്പി ന്റെ സംപ്രേക്ഷണം. ഏഷ്യൻ വൻകരയാണ് അടുത്ത ഘട്ടത്തിൽ പ്രക്ഷേപണം ആരംഭിക്കാൻ ഉദ്ദേശിക്കുന്ന ഭൂഖണ്ഡം.

കത്തോലിക്കാസഭയോടും സഭാപ്രബോധനങ്ങളോടും വിധേയപ്പെട്ട് ലോക സുവിശേഷവൽക്കരണം സാധ്യമാക്കാനും സഭയുടെ വിവിധ ശുശ്രൂഷകൾക്ക് പിന്തുണയേകാനും സഹായകമായ പരിപാടികളാണ് ശാലോം വേൾഡിന്റെ ഉള്ളടക്കം. ലോകമെങ്ങും നടക്കുന്ന മിഷണറി പ്രവർത്തനങ്ങളെ പൊതുസമൂഹത്തിന്റെ ശ്രദ്ധയിൽപ്പെടുത്തുന്നതിനൊപ്പം മിഷൻ പ്രവർത്തനങ്ങൾക്ക് പിന്തുണയേകാൻ പ്രചോദനമേകുന്ന പരിപാടികളും ഉൾപ്പെടുത്തിയിട്ടുണ്ട്.

ആത്മീയവളർച്ചയ്ക്കുതകുന്ന വിശ്വാസപ്രബോധനങ്ങൾ, ഡോക്യുമെന്ററികൾ, ടോക് ഷോ, മ്യൂസിക് വീഡിയോസ്, കൺസേർട്സ്, സന്മാർഗമൂല്യങ്ങൾ പകരുന്ന സിനിമകൾ, നാടകങ്ങൾ, കുട്ടികൾക്കുവേണ്ടിയുള്ള ആനിമേഷൻ വീഡിയോകൾ എന്നിവ ശാലോം വേൾഡി ന്റെ ജനപ്രിയ പരിപാടികളിൽ ചിലതുമാത്രം. വത്തിക്കാനിൽ പാപ്പ പങ്കെടുക്കുന്ന പരിപാടികൾ, വിവിധ രാജ്യങ്ങളിൽ നടക്കുന്ന പേപ്പൽ പര്യടനങ്ങൾ എന്നിവയുടെ തൽസമയ സംപ്രേഷണവും ശാലോം വേൾഡിനെ കൂടുതൽ ശ്രദ്ധേയമാക്കുന്നു.

യു.കെ, കാനഡ, അയർലൻഡ് എന്നിവിടങ്ങളിൽനിന്ന് ദിവ്യബലികൾ തത്സമയം സംപ്രേഷണം ചെയ്യുന്നതിനൊപ്പം ജപമാലയർപ്പണം, ദിവ്യകാരുണ്യ ആരാധനയുടെ സംേപ്രഷണം എന്നിവയും അനുദിന പരിപാടികളിൽ ഉൾപ്പെടുത്തിയിട്ടുണ്ട്. മാസാദ്യവെള്ളിയാഴ്ചകളിൽ ക്രമീകരിച്ചിരിക്കുന്ന നൈറ്റ് വിജിലിൽ ലോകത്തിന്റെ വിവിധ ഭാഗങ്ങളിൽനിന്ന് പങ്കുചേരുന്നത് പതിനായിരക്കണക്കിന് വിശ്വാസികളാണ്.

കൂടാതെ മരിയൻ കോൺഫറൻസ്, ഡിവൈൻ മേഴ്‌സി കോൺഫറൻസ്, യൂക്കരിസ്റ്റിക്ക് കോൺഗ്രസ്, കരിസ്മാറ്റിക് കോൺഗ്രസ്, പ്രോ ലൈഫ് ഗാതറിംഗുകൾ, യൂത്ത് അൻഡ് അഡൽറ്റ് കോൺഫറൻ ഉൾപ്പെടെയുള്ള സമ്മേളനങ്ങളുടെ കവറേജും ഉൾപ്പെടുത്തിയിട്ടുണ്ട്. അമേരിക്കയിലെ സ്റ്റ്യൂബൻവിൽ യൂത്ത് കോൺഫറൻസിനൊപ്പം ഓസ്ട്രേലിയയിൽനിന്നുള്ള ഇഗ്നൈറ്റ് യൂത്ത് മിനിസ്ട്രി, നെറ്റ് യൂത്ത് മിനിസ്ട്രി എന്നിവയുടെ കോൺഫറൻസുകളും ശാലോം വോൾഡ് സംപ്രേഷണം ചെയ്യാറുണ്ട്.

പരസ്യങ്ങളെ ആശ്രയിക്കാതെ മുന്നേറുന്ന ശാലോം വേൾഡിന് ശക്തിപകരുന്നത് എസ്.പി.എഫ് (ശാലോം പീസ് ഫെല്ലോഷിപ്പ്) അംഗങ്ങളുടെ വിശ്വാസത്തിലൂന്നിയ പിന്തുണയാണ്. ശാലോം മീഡിയ യു.എസ്.എയുടെ ആസ്ഥാനമായ ടെക്സസിലെ മക്അലനിലാണ് പ്രക്ഷേപണകേന്ദ്രം. ടി.വി പരിപാടികൾ തയാറാക്കാൻ അമേരിക്കയ്ക്കും കാനഡയ്ക്കും പുറമെ യു.കെ, അയർലൻഡ്, വത്തിക്കാൻ എന്നിവിടങ്ങളിലും പ്രൊഡക്ഷൻ ഹൗസുകളുമുണ്ട്. ഓസ്ട്രേലിയയിലും പ്രൊഡക്ഷൻ യൂണിറ്റുകൾ തയാറായിക്കഴിഞ്ഞു.

നോർത്ത് അമേരിക്കയിലേതുപോലെ ഇതര ഭൂഖണ്ഡങ്ങളിലും സാറ്റലൈറ്റ് പ്രക്ഷേപണം ആരംഭിക്കാനുള്ള തയാറെടുപ്പിലാണ് ശാലോം വേൾഡ്. പ്രേക്ഷകർ കാണാനാഗ്രഹിക്കുന്ന പരിപാടികൾ www.shalomworld.org/live എന്ന വെബ് സൈറ്റിലൂടെയും സോഷ്യൽ നെറ്റ്വർക്ക് പ്ലാറ്റ്ഫോമിലൂടെയും ഐ.ഒ.എസ്, ആൻഡ്രോയിഡ് പ്ലാറ്റ്ഫോമിലൂടെയും കാണാൻ സൗകര്യവുമുണ്ട്. കൂടുതൽ വിവരങ്ങൾക്ക് www.shalomworld.org/connectedtv