ഡാളസില്‍ ആയിരങ്ങള്‍ തിങ്ങിനിറഞ്ഞ ഇമിഗ്രേഷന്‍ റാലി

ഡാളസ്: യു.എസ് പ്രധാന സിറ്റികളില്‍ ട്രംപിന്റെ ഇമിഗ്രേഷന്‍ “സീറോ ടോളറന്‍സ്’ പോളിസിക്കെതിരേ സംഘടിപ്പിച്ച പ്രകടനങ്ങളുടെ ഭാഗമായി ഇന്ന് (ജൂണ്‍ 30-ന്) ആയിരങ്ങള്‍ തിങ്ങിനിറഞ്ഞ പ്രതിക്ഷേധ പ്രകടനത്തിനു ഡാളസ് ഡൗണ്‍ സാക്ഷ്യംവഹിച്ചു.

യു.എസ് മെക്‌സിക്കോ അതിര്‍ത്തിയില്‍ തടവില്‍ പാര്‍പ്പിച്ചിരിക്കുന്ന മാതാപിതാക്കളില്‍ നിന്നു വേര്‍പെടുത്തിയ കുട്ടികളെ വിട്ടയയ്ക്കണമെന്നാവശ്യപ്പെട്ട് ശനിയാഴ്ച രാവിലെ 10 മണിക്ക് ഡാളസ് സിറ്റി ഹാള്‍ പരിസരത്ത് നിന്നാണ് പ്രകടനം ആരംഭിച്ചത്.

സ്റ്റെമന്‍സ് ഫ്രീവേയിലുള്ള യു.എസ് ഇമിഗ്രേഷന്‍ ആന്‍ഡ് കസ്റ്റംസ് എന്‍ഫോഴ്‌സ്‌മെന്റ് ബില്‍ഡിംഗിനു മുമ്പില്‍ എത്തിയതോടെ പ്രകടനത്തില്‍ പങ്കെടുത്തവര്‍ ഹൈവേ സര്‍വീസ് റോഡ് ഉപരോധിക്കാന്‍ ശ്രമിച്ചത് പോലീസും പ്രകടനക്കാരും തമ്മില്‍ തര്‍ക്കത്തിനിടയാക്കി. പ്രകടനക്കാരോട് പിരിഞ്ഞുപോകാന്‍ പോലീസ് ആവശ്യപ്പെട്ടിട്ടും പോലീസിന്റെ ഉത്തരവ് ലംഘിച്ച അഞ്ചുപേരെ അറസ്റ്റ് ചെയ്യേണ്ടിവന്നെന്നു പോലീസ് അറിയിച്ചു.

പ്രകടനത്തില്‍ പങ്കെടുത്തവര്‍ പ്ലാക്കാര്‍ഡുകള്‍ ഉയര്‍ത്തിയും, ട്രംപിനെതിരേ മുദ്രാവാക്യം മുഴക്കിയും, കുട്ടികളെ മോചിപ്പിക്കണമെന്നും ആവശ്യപ്പെട്ട് നീങ്ങിയപ്പോള്‍ റോഡിനിരുവശവും തിങ്ങിനിറഞ്ഞവരും ഇവര്‍ക്ക് പിന്തുണയുമായി പ്രകടനത്തില്‍ പങ്കെടുത്തു. പ്രകടനക്കാരെ അഭിസംബോധന ചെയ്ത് ഡമോക്രാറ്റിക് പ്രതിനിധി വിക്‌ടോറിയ, ഡാളസ് കൗണ്ടി ജഡ്ജ് ക്ലെ ജെന്‍തിന്‍സ് തുടങ്ങിയവര്‍ പ്രസംഗിച്ചു.

പി.പി. ചെറിയാന്‍

ഹാരിസ് കൗണ്ടിയില്‍ വെസ്റ്റ് നൈല്‍ വൈറസ് വ്യാപകമാകുന്നു

ഹാരിസ് കൗണ്ടി (ടെക്‌സസ്സ്): കടുത്ത വേനല്‍ക്കാലം ആരംഭിച്ചതോടെ കൊതുകുകളില്‍ നിന്നും പടരുന്ന വെസ്റ്റ് നൈല്‍ വൈറസ് വ്യാപകമാകുന്നതായി പബ്ലിക്ക് ഹെല്‍ത്ത് ഡിപ്പാര്‍ട്ട്‌മെന്റ് പുറത്തിറക്കിയ പത്രക്കുറിപ്പില്‍ പറയുന്ന കൊതുകുകളില്‍ നിന്നും ശേഖരിച്ച സാമ്പിളുകള്‍ പരിശോധിച്ചതില്‍ ജൂണ്‍ 29 വരെ 32 എണ്ണത്തിലാണ് വൈസ്റ്റ് നൈല്‍ വൈറസ് കണ്ടെത്തിയതില്‍ കൂടുതലാണ് ഈ സീസണ്‍ ആരംഭത്തില്‍ തന്നെ കണ്ടെത്തിയിരിക്കുന്നതെന്ന് കൗണ്ടി പബ്ലിക്ക് ഹെല്‍ത്ത് മൊസ്കിറ്റൊ ആന്റ് വെക്ടര്‍ ഡിവിഷന്‍ വെബ്‌സൈറ്റില്‍ ചൂണ്ടിക്കാണിക്കുന്നു.

വെള്ളം കെട്ടി നില്‍ക്കാതെ പരിസരം സൂക്ഷിക്കണമെന്നും, കെട്ടിക്കിടക്കുന്ന വെള്ളത്തില്‍ കൊതുകിനെ നശിപ്പിക്കുന്ന മരുന്ന് തെളിക്കണമെന്നും അധികൃതര്‍ നിര്‍ദ്ദേശിച്ചിട്ടുണ്ട്.കൊതുക് ശല്യം കൂടുതലുള്ള വൈകുന്നേരം പുറത്തിറങ്ങുന്നവര്‍ കൊതുകുകടി ഏല്‍ക്കാതിരിക്കുന്നതിന് ശരീരം കവര്‍ ചെയ്യുന്ന വസ്ത്രം ധരിക്കണമെന്നും ആരോര്യ വകുപ്പധികൃതര്‍ നിര്‍ദ്ദേശിക്കുന്നു.

രോഗം വ്യാപിക്കാതിരിക്കുന്നതിനുള്ള മുന്‍ കരുതലുകള്‍ എല്ലാവരും സ്വീകരിക്കണമെന്ന മുന്നറിയിപ്പും അധികൃതര്‍ നല്‍കിയിട്ടുണ്ട്.

പി.പി. ചെറിയാന്‍

സിറ്റി മേയറും ഭര്‍ത്താവും തമ്മില്‍ അടി: ഇരുവരും ജയിലില്‍

ഇലംവുഡ് (ഒഹായൊ): ഇലംവുഡ് മേയര്‍ വില്യം വില്‍സനും ഭര്‍ത്താവ് വില്യം സ്മിത്തും മദ്യപിച്ചു തമ്മില്‍ അടിയുണ്ടാക്കിയതിന് ഇരുവരേയും പൊലീസ് അറസ്റ്റ് ചെയ്തു ജയിലിലടച്ചു. ജൂണ്‍ 25 തിങ്കളാഴ്ച വൈകിട്ടായിരുന്നു സംഭവം. സിന്‍സിയാറ്റി പ്രൈഡ് പരേഡ് ആന്റ് ഫെസ്റ്റിവലില്‍ പങ്കെടുക്കുന്നതിനിടയിലാണ് ഇരുവരും തമ്മില്‍ തര്‍ക്കം ആരംഭിച്ചത്.

വില്‍സന്റെ പാര്‍ട്‌നര്‍ സ്മിത്തും മറ്റൊരാളും ഫെസ്റ്റിവലില്‍ നിന്നും മടങ്ങുന്നതിനു തീരുമാനിച്ചതാണു വില്‍സനെ പ്രകോപിപ്പിച്ചത്. വില്‍സന് അവിടെ കൂടുതല്‍ സമയം നില്‍ക്കണമെന്നായിരുന്നു ആഗ്രഹം.ഇരുവരും മനസ്സില്ലാ മനസ്സോടെ കാറില്‍ മടക്കയാത്ര ആരംഭിച്ചു. വീട്ടിലേക്കുള്ള വഴിയില്‍ വച്ച് ഇരുവരും കലഹിക്കുകയും, വീട്ടിലെത്തിയ ശേഷം അടിയുണ്ടാക്കുകയുമായിരുന്നു.

സംഭവം അറിഞ്ഞു സ്ഥലത്തെത്തിയ ഇലംവുഡ് പൊലീസ് കണ്ടത് വീടു മുഴുവന്‍ അടിച്ചു തകര്‍ത്ത് രക്തം ഒലിപ്പിച്ചു നില്‍ക്കുന്ന മേയറേയും ഭര്‍ത്താവിനേയുമാണ്.മുഖത്തും കണ്ണിലും പരുക്കേറ്റ ഇരുവരേയും പൊലീസ് പ്രഥമ ചികിത്സ നടത്തിയശേഷം അറസ്റ്റ് ചെയ്തു ജയിലിലടച്ചു.

ആക്രമണത്തിന്റെ ഉത്തരവാദിത്തം പരസ്പരം പഴി ചാരുന്നതിനാണ് മേയറും സ്മിത്തും ശ്രമിച്ചതെന്ന് അറസ്റ്റ് ചെയ്ത പൊലീസ് ഓഫിസര്‍ സെര്‍ജന്റ് റോബര്‍ട്ട് മെക്കോടണല്‍ പറഞ്ഞു. ഡൊമസ്റ്റിക് വയലന്‍സിന് ഇവര്‍ക്കെതിരെ കേസ് ചാര്‍ജു ചെയ്തിട്ടുണ്ട്.

പി.പി. ചെറിയാന്‍

സൗഖ്യദായക ശുശ്രൂഷയായിരിക്കണം സഭയുടെ ദൗത്യം: റൈറ്റ് റവ. മാര്‍ തിമോത്തിയോസ്

ഡാലസ് : ബാഹ്യ ആന്തരിക സമ്മര്‍ദ്ദങ്ങള്‍ മൂലം തകര്‍ന്നിരിക്കുന്ന മാനവ ഹൃദയങ്ങള്‍ക്കുള്ള സൗഖ്യദായക ശുശ്രൂഷയായിരിക്കണം സഭയും വിശ്വാസ സമൂഹവും ഏറ്റെടുക്കേണ്ടതെന്നു ചെങ്ങന്നൂര്‍ മാവേലിക്കര മര്‍ത്തോമാ ഭദ്രാസനാധിപന്‍ റൈറ്റ് റവ. തോമസ് മാര്‍ തിമോത്തിയോസ് ഉദ്‌ബോധിപ്പിച്ചു.ജൂണ്‍ 29 വെള്ളിയാഴ്ച വൈകിട്ട് ഡാലസ് സെന്റ് പോള്‍സ് മാര്‍ത്തോമാ ഇടവക സന്ദര്‍ശനത്തിനിടെ വിബിഎസ് വിദ്യാര്‍ഥികളേയും ഇടവക ജനങ്ങളേയും അഭിസംബോധന ചെയ്തു സംസാരിക്കുകയായിരുന്നു തിരുമേനി.

101ാം വയസ്സിലേക്ക് പ്രവേശിച്ച ക്രിസോസ്റ്റം വലിയ മെത്രാപ്പോലീത്തായുടേയും 88ാം വയസ്സിലേക്കു പ്രവേശിച്ച ജോസഫ് മാര്‍ത്തോമാ മെത്രാപ്പോലീത്തായുേടയും മാതൃകകള്‍ സഭാ ജനങ്ങള്‍ക്ക് അനുകരണീയമാണെന്നും തിരുമേനി പറഞ്ഞു.നാലാള്‍ ചുമന്നു കൊണ്ടുവന്ന പക്ഷപാതക്കാരനെ സൗഖ്യമാക്കിയത് അകത്തിരിക്കുന്നവരുടെ വിശ്വാസം കണ്ടിട്ടല്ലെന്നും, പുറമെ നിന്നു വന്നവരുടെ വിശ്വാസം കണ്ടിട്ടാണെന്നും മാര്‍ക്കോസ് രണ്ടിന്റെ പന്ത്രണ്ടാം വാക്യം ആസ്പദമാക്കി തിരുമേനി വിശദീകരിച്ചു. ക്രിസ്തുവിനേയും സഭാ പിതാക്കന്മാരേയും തിരിച്ചറിയാത്ത ഒരു സമൂഹം വളര്‍ന്നു വരുന്നുയെന്ന യാഥാര്‍ത്ഥ്യം സരസമായി തന്റെ അനുഭവത്തിലൂടെ തിരുമേനി വിശദീകരിച്ചു.

കേരളത്തിലെ പെറ്റ് സ്റ്റേറ്റിനു മുമ്പില്‍ തിരുമേനി നല്‍കുന്നതറിഞ്ഞ് അവിടെ എത്തിച്ചേര്‍ന്നവരില്‍ ഒരാള്‍ കൈകൂപ്പി വളരെ ഭവ്യമായി പിതാവേ അങ്ങ് ഏതു സഭയുടെ പിതാവാണെന്ന് ചോദിച്ചു. താന്‍ ഒരു കത്തോലിക്കാ ബിഷപ്പാണെന്നാണ് അദ്ദേഹം കരുതിയത് ! ചോദ്യം ചോദിച്ച ആള്‍ മറ്റാരുമായിരുന്നില്ലെന്നും അവിടെ തന്നെയുള്ള മാര്‍ത്തോമാ സഭയുടെ ട്രസ്റ്റിയായിരുന്നു എന്നും പറഞ്ഞതു കേള്‍വിക്കാരില്‍ ചിരിപടര്‍ത്തി.

ഡാലസ് സെന്റ് പോള്‍സ് ചര്‍ച്ചില്‍ എത്തിച്ചേര്‍ന്ന എപ്പിസ്‌കോപ്പായെ റവ. മാത്യു ജോസഫ് (മനോജച്ചന്‍) സ്വാഗതം ചെയ്തു. ചെങ്ങന്നൂര്‍ മാവേലിക്കര ഭദ്രാസനത്തില്‍ തിരുമേനിയുടെ നേതൃത്വത്തില്‍ നടക്കുന്ന കരുതല്‍ ഉള്‍പ്പെടെ 32 പ്രോജക്ടുകളെ കുറിച്ച് അച്ചന്‍ ആമുഖമായി വിശദീകരിച്ചു. സന്ധ്യാ നമസ്ക്കാരത്തിന് തിരുമേനിയും അച്ചന്മാരും ആത്മായ ശുശ്രൂഷകന്‍ ഫില്‍ മാത്യുവും നേതൃത്വം നല്‍കി.വിബിഎസ് വിദ്യാര്‍ത്ഥികള്‍ ആലപിച്ച ഗാനം ശ്രുതി മധുരമായിരുന്നു.

ഡാലസ് യുവജന സംഖ്യം പിരിച്ചെടുത്ത തുകയുടെ ചെക്ക് വൈസ് പ്രസിഡന്റ് ബീന വര്‍ഗീസ്, ട്രസ്റ്റി റോബി ചേലങ്കരി എന്നിവര്‍ ചേര്‍ന്ന് തിരുമേനിക്ക് നല്‍കി.മാര്‍ത്തോമ സഭയിലെ സീനിയര്‍ പട്ടക്കാരന്‍ റവ. കെ. വി. സൈമണ്‍ അച്ചന്റെ പ്രാര്‍ത്ഥനക്കുശേഷം ട്രസ്റ്റി തോമസ് ജോര്‍ജ് (തമ്പി) നന്ദി പറഞ്ഞു.

പി.പി.ചെറിയാന്‍

സുനന്ദ നായരുടെ നൃത്ത ശില്പവും ശില്പശാലയും എന്‍ എസ് എസ് സംഗമത്തെ വേറിട്ടതാക്കും

ഷിക്കാഗോ: മോഹിനിയാട്ടത്തിന്റെ അന്തര്‍ദേശീയ അമ്പാസിഡറായി അറിയപ്പെടുന്ന സുനന്ദ നായരുടെ സജീവ സാന്നിധ്യം ഷിക്കാഗോയില്‍ ആഗസ്റ്റ് 10, 11, 12 തീയതികളില്‍ നടക്കുന്ന എന്‍ എസ് എസ് ഓഫ് നോര്‍ത്ത് അമേരിക്കയുടെ ദേശീയ സംഗമത്തെ വേറിട്ടതാക്കും. സംഗമവേദിയില്‍ ശിവശക്തി നൃത്തശില്പം അവതരിപ്പിക്കുന്ന സുനന്ദ നായര്‍ മോഹിനിയാട്ട ശില്പശാലയും നടത്തും. ഡോ സുനന്ദയുടെ പരിശിലനകളരി സംഗമത്തിനെത്തുന്ന നൃത്ത സ്നേഹികള്‍ക്ക് മുതല്‍കൂട്ടാകും. മോഹിനിയാട്ടത്തിനു നല്‍കിയ സമഗ്ര സംഭാവന വിലയിരുത്തി ഡോ സുനന്ദയെ ആദരിക്കുകയും ചെയ്യുമെന്ന പ്രസിഡന്റ് എം.എന്‍.സി നായര്‍ , ജനറല്‍ സെക്രട്ടറി അജിത് നായര്‍, ചെയര്‍മാന്‍ ജയന്‍ മുളങ്ങാട്, കോ ചെയര്‍മാന്‍ സുനില്‍ നായര്‍, കള്‍ച്ചറല്‍ പ്രോഗ്രാം ചെയര്‍മാന്‍ ശിവന്‍ മുഹമ്മ എന്നിവര്‍ അറിയിച്ചു.

അമേരിക്കയിലും ഇന്ത്യയിലും നൃത്തവിദ്യാലയങ്ങളുള്ള ഈ കലാകാരിക്ക് പഠിപ്പിക്കലും സ്വയം പഠിക്കലുമായി നൃത്തത്തില്‍ അലിഞ്ഞുചേര്‍ന്നുള്ള കലാജീവിതമാണുള്ളത്. ആറാംവയസ്സില്‍ ഭരതനാട്യമാണ് പഠിച്ചുതുടങ്ങിയത്. പത്താമത്തെ വയസ്സില്‍ കഥകളി പഠിച്ചുതുടങ്ങിയെങ്കിലും ഭരതനാട്യത്തില്‍ത്തന്നെയാണ് കൂടുതല്‍ ശ്രദ്ധിച്ചത്. മോഹിനിയാട്ടത്തില്‍ സാമ്പ്രദായിക ശീലങ്ങളെ മാറ്റി ഗണപതിസ്തുതി, അഷ്ടപദി, അഷ്ടനായിക എന്നിങ്ങനെയുള്ള വ്യത്യസ്തങ്ങളായ ഇനങ്ങള്‍ അവതരിപ്പിക്കുന്ന പത്മഭൂഷന്‍ ഡോ. കനക റെലെയുടെ. പ്രിയ ശിഷ്യയാണ് സുനന്ദ.
മുംബൈയിലെ ‘നളന്ദ’യില്‍നിന്ന് മോഹിനിയാട്ടത്തില്‍ ബിരുദാനന്തരബിരുദം നേടി ബോംബെ യൂണിവേഴ്‌സിറ്റിയില്‍ ലക്ച്ചറര്‍ ആയി ജോലിചെയ്തു വരുന്ന വേളയില്‍ മോഹിനിയാട്ടത്തില്‍ ബിരുദാനന്തര ബിരുദം എടുക്കുന്ന ഇന്ത്യയിലെ തന്നെ ആദ്യത്തെ വിദ്യാര്‍ഥിയായിരുന്നു സുനന്ദാ നായര്‍. തുടര്‍ന്നാണ് ഭര്‍ത്താവിന്റെ ജോലിമാറ്റം മൂലം അമേരിക്കയില്‍ പോകേണ്ടിവന്നത്.ക്യാപ്റ്റന്‍ ആനന്ദ് നായര്‍ ആണ് ഭര്‍ത്താവ്.ഹൂസ്റ്റണിലെ സുനന്ദ പെര്‍ഫോമിങ് ആര്‍ട്‌സ് സെന്റര്‍ ഡയറക്ടര്‍ ആണ് സുനന്ദാ നായര്‍. സിയായും അനിരുദ്ധനും മക്കളാണ്.

കേരളസംഗീതനാടക അക്കാദമി കലാശ്രീ പുരസ്‌കാരം, കേരള കലാമണ്ഡലം കലാരത്്‌നം, കേന്ദ്ര സംഗീത നാടക അക്കാദമി സ്‌ക്കോളര്‍ഷിപ്പ് യു.എസ്.എ. കിങ്സ് സര്‍വകലാശാലയില്‍ നിന്നുള്ള ഡി.ലിറ്റ്, അന്തര്‍ദേശീയ പീസ് കൗണ്‍സിലിന്റെ ഗ്രാന്‍ഡ് അച്ചീവേഴ്‌സ് അവാര്‍ഡ് തുടങ്ങി നിരവധി പുരസ്‌കാരങ്ങള്‍ ഈ കലാകാരിയെ തേടിയെത്തിയിട്ടുണ്ട്.പുതുമയുള്ള ഒട്ടേറെ നൃത്താവതരണ പ്രോജക്റ്റുകളുമായി മുന്നോട്ടുതന്നെ യാത്രതുടരുകയാണ് സുനന്ദ നായര്‍.

അമേരിക്കയിലെ വിവിധ വേദികള്‍ക്കു പുറമെ സോവിയറ്റ് യൂണിയന്‍, വടക്കന്‍ കൊറിയ,മിഡില്‍ ഈസ്റ്റ്, സിംഗപ്പൂര്‍, എന്നിവിടങ്ങളിലൊക്കെ സുനിത സൃത്താവിഷ്‌ക്കരണം നടത്തിയിട്ടുണ്ട്.

മധ്യപ്രദേശിലെ ഖജുരാഹോ ഉത്സവം,ഒറീസയിലെ കൊണാര്‍ക് ഉത്സവം,ജയ്പൂര്‍, ജോധ്പൂര്‍, ഉദയ്പൂര്‍ എന്നിവിടങ്ങളിലെ യുവ മഹോത്സവങ്ങള്‍,തിരുവനന്തപുരം സൂര്യ ഫെസ്റ്റിവല്‍, ഉജ്ജയിന്‍ കാളിദാസ് സമോവര്‍,ഗുജറാത്ത്‌മോഡേരാ ഫെസ്റ്റിവല്‍, മൈസൂര്‍ ദസ്സേറ ഉത്സവം തുടങ്ങി ഭാരതത്തിലെ തലയെടുപ്പുള്ള നൃത്തോല്‍സവങ്ങളിലെല്ലാം സുനന്ദ നായരുടെ മോഹിനിയാട്ടം നടത്താനുള്ള അവസരം സുനന്ദയ്ക്കുണ്ടായി. അമേരിക്കയിലെ വിവിധ വേദികള്‍ക്കു പുറമെ സോവിയറ്റ് യൂണിയന്‍, വടക്കന്‍ കൊറിയ,മിഡില്‍ ഈസ്റ്റ്, സിംഗപ്പൂര്‍, എന്നിവിടങ്ങളിലൊക്കെ സുനന്ദ നൃത്താവിഷ്‌ക്കരണം നടത്തിയിട്ടുണ്ട്.

സെന്റ് മേരിസില്‍ വി.തോമാശ്ലീഹായുടെ ദുക്‌റാന തിരുനാള്‍ ആഘോഷിച്ചു

ചിക്കാഗോ: ഭാരതത്തിന്റെ അപ്പസ്‌തോലന്‍ വി.തോമാശ്ലീഹായുടെ ദുക്‌റാന തിരുനാള്‍ മോര്‍ട്ടണ്‍ഗ്രോവ് സെന്റ് മേരീസ് ക്‌നാനായ ദേവാലയത്തില്‍ ആഘോഷിച്ചു. ജൂലൈ 1 ഞായറാഴ്ച രാവിലെ പത്തു മണിക്ക് ആഘോഷമായി നടത്തിയ തിരുക്കര്‍മ്മങ്ങളിലും വിശുദ്ധ കുര്‍ബാനയിലും റവ.ഫാ. തോമസ് മുളവനാല്‍ മുഖ്യകാര്‍മികത്വം വഹിച്ചു.

അതിപുരാതനവും ചരിത്രപ്രസിദ്ധവുമായ പുന്നത്തറ പഴയ പള്ളിയുടെ മധ്യസ്ഥനായ വിശുദ്ധ തോമാശ്ലീഹായുടെ തിരുനാള്‍ ചിക്കാഗോയില്‍ വസിക്കുന്ന പുന്നത്തറ ഇടവകങ്ങളുടെ സഹകരണത്തിലും നേതൃത്വത്തിലും മാണ് നടത്തപ്പെട്ടത്. വി. കുര്‍ബാനയ്ക്കുശേഷം ഇടവക വികാരി ഫാ. തോമസ് മുളവനാലിന്റെ നാമഹേതുദിനം ഇടവകയിലെ എക്‌സിക്യൂട്ടീവ് അംഗങ്ങളും, പാരിഷ് കൗണ്‍സില്‍ മെമ്പേഴ്‌സും,എല്ലാ തോമസ് നാമധാരികളും ഒത്തൊരുമിച്ച് കേക്കുമുറിച്ച് ആചരിച്ചു.

തദവസരത്തില്‍ എക്‌സിക്യൂട്ടീവ് യുവജന പ്രതിനിധി അംഗം ടോണി കിഴക്കേക്കുറ്റ് തോമസ് അച്ഛന് നാമഹേതു തിരുനാള്‍ ആശംസിച്ച് സംസാരിച്ചു . ഈവര്‍ഷം ആദ്യകുര്‍ബാന സ്വീകരിച്ച കുട്ടികള്‍ ഒരുമാസത്തോളം അനുദിനം മുടങ്ങാതെ പള്ളിയില്‍ വന്ന് വിശുദ്ധകുര്‍ബാനയില്‍ സജീവമായി സംബന്ധിക്കുന്നതിന് ഏര്‍പ്പെടുത്തിയ മത്സരത്തില്‍ ഒന്നും രണ്ടും മൂന്നും സമ്മാനങ്ങള്‍ കരസ്ഥമാക്കിയ കുട്ടികള്‍ക്ക് സമ്മാനങ്ങള്‍ വിതരണം ചെയ്തു.

തിരുനാള്‍ ആചരണ ചടങ്ങുകളുടെ സുഗമമായ നടത്തിപ്പിന് ചര്‍ച്ച എക്‌സിക്യൂട്ടീവ് വേണ്ട ക്രമീകരണങ്ങള്‍ ഒരുക്കി. നൂറുകണക്കിന് ജനങ്ങള്‍ പങ്കെടുത്ത തിരുനാള്‍ ആഘോഷങ്ങളുടെ സമാപനത്തില്‍ പുന്നത്തറ ഇടവകാഗംങ്ങള്‍ സ്‌പോണ്‍സര്‍ ചെയ്ത സ്‌നേഹവിരുന്നും ഉണ്ടായിരുന്നു.

സ്റ്റീഫന്‍ ചൊള്ളമ്പേല്‍ (പി.ആര്‍.ഒ) അറിയിച്ചതാണിത്.

ജോയിച്ചന്‍ പുതുക്കുളം

ജോണ്‍ കല്ലോലിക്കല്‍ ഫൊക്കാന ആര്‍.വി.പിയായി മത്സരിക്കുന്നു

റ്റാമ്പാ: മൂന്നു ദശാബ്ദത്തിലധികമായി സാമൂഹിക-സാംസ്കാരിക- രാഷ്ട്രീയ മേഖലകളില്‍ തനതായ വ്യക്തിമുദ്ര പതിപ്പിച്ചിട്ടുള്ള ജോണ്‍ കല്ലോലിക്കല്‍ ഫ്‌ളോറിഡയില്‍ നിന്നും ഫൊക്കാന ആര്‍.വി.പിയായി മത്സരിക്കുന്നു.

കോളജ് പഠനകാലത്ത് കോളജ് യൂണിയന്‍ ചെയര്‍മാന്‍, കെ.എസ്.യു താലൂക്ക് പ്രസിഡന്റ്, യൂത്ത് കോണ്‍ഗ്രസ് മണ്ഡലം പ്രസിഡന്റ് എന്നീ നിലകളില്‍ പ്രവര്‍ത്തിച്ചശേഷം ജോണ്‍ കല്ലോലിക്കല്‍ ഉദ്യോഗാര്‍ത്ഥം ഡല്‍ഹിയിലേക്ക് കുടിയേറി. അവിടെ ജോലി ചെയ്തിരുന്ന 15 വര്‍ഷം വിവിധ മലയാളി സാമൂഹിക- സാംസ്കാരിക സംഘടനകളുമായി ഇടപഴകുവാന്‍ സാധിച്ചു.

നിലവില്‍ മലയാളി അസോസിയേഷന്‍ ഓഫ് റ്റാമ്പായുടെ (എം.എ.ടി) സെക്രട്ടറിയായി പ്രവര്‍ത്തിക്കുന്ന ജോണ്‍ കഴിഞ്ഞവര്‍ഷം മലയാളി അസോസിയേഷന്‍ ഓഫ് റ്റാമ്പാ നടത്തിയ ഗിന്നസ് വേള്‍ഡ് റിക്കോര്‍ഡ് ഓണസദ്യയുടെ ഫുഡ് ഡിപ്പാര്‍ട്ട്‌മെന്റ് ചെയര്‍മാനായിരുന്നു.

താന്‍ ആര്‍.വി.പിയായി തെരഞ്ഞെടുക്കപ്പെട്ടാല്‍ ഫൊക്കാന ഫ്‌ളോറിഡ റീജിയനെ കൂടുതല്‍ ഉയര്‍ച്ചയിലേക്ക് നയിക്കുമെന്നും നാളിതുവരെ പരിപാലിച്ചുവരുന്ന പൊതുരംഗത്തെ മാന്യതയും സത്യസന്ധതയും ആത്മാര്‍ത്ഥതയും തുടര്‍ന്നും ഉണ്ടായിരിക്കുമെന്നും ജോണ്‍ ഉറപ്പുനല്‍കുന്നു.

പിന്നിട്ട പാതയിലെ പ്രവര്‍ത്തനക്ഷമതയും സത്യസന്ധതയുമാണ് തന്നെ മുന്നോട്ടു നയിക്കുന്നതെന്നും, വാക്കിനേക്കാള്‍ പ്രവര്‍ത്തിയിലാണ് താന്‍ വിശ്വസിക്കുന്നതെന്നും ഏറ്റെടുത്ത ദൗത്യം വിജയിപ്പിക്കുന്നതിനു എത്ര കഠിനമായ പ്രയത്‌നം നടത്താനും താന്‍ തയാറാണെന്നും ജോണ്‍ വ്യക്തമാക്കി. തെരഞ്ഞെടുക്കപ്പെടുന്ന പക്ഷം സംഘടനയോട് നൂറുശതമാനം കൂറ് പുലര്‍ത്തുകയും എല്ലാവരേയും സമഭാവനോയോടെ കാണുകയും സത്യസന്ധമായി പ്രവര്‍ത്തിക്കുകയും ചെയ്യുമെന്നു ജോണ്‍ വാക്കുതരുന്നു.

എല്ലാ പ്രതിനിധികളും വോട്ട് നല്‍കി വിജയിപ്പിക്കണമെന്നു ജോണ്‍ വിനീതമായി അഭ്യര്‍ത്ഥിക്കുന്നു.

ജോയിച്ചന്‍ പുതുക്കുളം

സി.എസ്.ഐ കൗണ്‍സില്‍ രജതജൂബിലി നിറവില്‍

വടക്കേ അമേരിക്കയിലുള്ള സി.എസ്.ഐ ഇടവകകളുടെ ഭരണസമിതിയായ സി.എസ്.ഐ നോര്‍ത്ത് അമേരിക്കന്‍ കൗണ്‍സില്‍ രൂപീകൃതമായിട്ട് 2019-ല്‍ 25 വര്‍ഷങ്ങള്‍ പൂര്‍ത്തിയാകുന്നു. ഒരു വര്‍ഷം നീണ്ടുനില്‍ക്കുന്ന രജതജൂബിലി ആഘോഷങ്ങള്‍ ജൂലൈ എട്ടാംതീയതി ഞായറാഴ്ച ഉദ്ഘാടനം ചെയ്യും.

ജൂലൈ 8-ന് ഞായറാഴ്ച രാവിലെ 10 മണിക്ക് ജോസഫ് ജെ. സ്വീന്‍സി ഹൈസ്കൂള്‍ ഓഡിറ്റോറിയത്തില്‍ വച്ച് (380 ക്രാന്‍ബറി റോഡ്, ഈസ്റ്റ് ബ്രൗണ്‍സ് വിക്, എന്‍.ജെ 08816) ഒരു സ്‌തോത്ര ശുശ്രൂഷ നടത്തപ്പെടും. ന്യൂയോര്‍ക്ക്, ന്യൂജേഴ്‌സി, പെന്‍സില്‍വാനിയ, കണക്ടിക്കട്ട് സംസ്ഥാനങ്ങളിലുള്ള സി.എസ്.ഐ ഇടവകകള്‍ സംയുക്തമായി ഈ സ്‌തോത്ര ശുശ്രൂഷയ്ക്ക് നേതൃത്വം നല്‍കും. സി.എസ്.ഐ സഭയുടെ പരമാധ്യക്ഷന്‍ മോസ്റ്റ് റവ. തോമസ് കെ. ഉമ്മന്‍ തിരുമേനി ആരാധനയ്ക്ക് നേതൃത്വം നല്‍കും.

ആരാധനയ്ക്കുശേഷം നടക്കുന്ന പൊതുസമ്മേളനത്തില്‍ സി.എസ്.ഐ ജനറല്‍ സെക്രട്ടറി റവ. ഡോ. സി.ആര്‍. സദാനന്ദ മുഖ്യ സന്ദേശം നല്‍കും. രജതജൂബിലിയോടനുബന്ധിച്ച് പുറത്തിറക്കുന്ന സുവനീര്‍ പ്രകാശനം ഈസ്റ്റ് ബ്രൗണ്‍സ് വിക് മേയര്‍ ഹോണറബിള്‍ ബ്രാഡ് ജെ. കോളന്‍ നിര്‍വഹിക്കും.

ജൂലൈ 8-ന് 10 മണിക്ക് നടക്കുന്ന സ്‌തോത്ര പ്രാര്‍ത്ഥനയിലും പൊതുസമ്മേളനത്തിലും പങ്കെടുക്കുന്നതിന് എല്ലാ സി.എസ്.ഐ സഭാ വിശ്വാസികളേയും ക്ഷണിക്കുന്നു. കൂടുതല്‍ വിവരങ്ങള്‍ക്ക്: റവ. വില്യം ഏബ്രഹാം (കൗണ്‍സില്‍ വൈസ് പ്രസിഡന്റ്) 832 288 7859, മാത്യു ജോഷ്വാ (കൗണ്‍സില്‍ സെക്രട്ടറി) 516 761 2406, റവ. ജോബി ജോയി (ജനറല്‍ കണ്‍വീനര്‍) 848 247 8005, ബിജു ഉമ്മന്‍ (പബ്ലിസിറ്റി കണ്‍വീനര്‍) 914 523 9501.

ജോയിച്ചന്‍ പുതുക്കുളം

അഭിഷേകാഗ്നി ധ്യാനം ഡാലസിൽ ജൂലൈ 6, 7, 8 തീയതികളിൽ

ഗാര്‍ലാന്‍ഡ്‌ (ഡാലസ്): അട്ടപ്പാടി സെഹിയോന്‍ മിനിസ്ട്രി സ്‌ഥാപക – ഡയറക്ടറും പ്രശസ്ത ധ്യാന ഗുരുവുമായ ഫാ.സേവ്യര്‍ ഖാന്‍ വട്ടായില്‍ നയിക്കുന്ന അഭിഷേകാഗ്നി ധ്യാനം ജൂലൈ 6, 7, 8 (വെള്ളി – ഞായർ) തീയതികളിൽ ഡാളസ് സെന്റ്‌ തോമസ്‌ സിറോ മലബാര്‍ ഫൊറോന ദേവാലയത്തില്‍ നടക്കും.
വൈകുന്നേരം 4 മണിമുതൽ 9 മണിവരെയാണ് ധ്യാനം. പ്രശസ്ത ധ്യാന ഗുരു ഫാ. സാജു ഇലഞ്ഞിയിലും ധ്യാനശുശ്രൂഷയില്‍ പങ്കെടുക്കും.

വിശ്വാസികളേവരേയും ധ്യാനത്തിലേക്കു സ്വാഗതം ചെയ്യുന്നതായി ഫൊറോന വികാരി ഫാ. ജോഷി എളമ്പാശ്ശേരിൽ അറിയിച്ചു.

കൂടുതല്‍ വിവരങ്ങള്‍ക്ക്:
മൻജിത് കൈനിക്കര : 972-679-8555
മോൻസി വലിയവീട് : 214-562-6399

മാർട്ടിൻ വിലങ്ങോലിൽ

അന്താരാഷ്ട്ര യോഗാ ദിനം ഗ്രീന്‍ബര്‍ഗില്‍ വിപുലമായി കൊണ്ടാടി

ന്യൂയോര്‍ക്ക്: ഇന്ത്യന്‍ കള്‍ച്ചറല്‍ അസോസിയേഷന്‍ ഓഫ് നോര്‍ത്ത് അമേരിക്കയുടേയും, ഇന്ത്യന്‍ കോണ്‍സുലേറ്റിന്റേയും, ഗ്രീന്‍ബര്‍ഗ് പാര്‍ക്ക് ആന്‍ഡ് റിക്രിയേഷന്റേയും സംയുക്താഭിമുഖ്യത്തില്‍ നാലാമത് അന്താരാഷ്ട്ര യോഗാദിനം വെസ്റ്റ് ചെസ്റ്റര്‍ കൗണ്ടിയിലെ (ന്യൂയോര്‍ക്ക്) ഗ്രീന്‍ബര്‍ഗ് റിച്ചാര്‍ഡ് പ്രസര്‍ പാര്‍ക്കില്‍ ജൂണ്‍ 23-നു നൂറിലധികം തദ്ദേശവാസികളായ യോഗ അനുയായികളുടെ സജീവ സാന്നിധ്യത്തില്‍ ആഘോഷിച്ചു.

ഇന്ത്യന്‍ കോണ്‍സുലേറ്റിന്റേയും ഗ്രീന്‍ബര്‍ഗ് പാര്‍ക്‌സ് ആന്‍ഡ് റിക്രിയേഷന്റേയും സപ്പോര്‍ട്ടോടുകൂടി യോഗാദിന പരിപാടികള്‍ പ്ലാന്‍ ചെയ്തു. വളരെയേറെ ഉത്സാഹത്തോടുകൂടി ഈ പ്രോഗ്രാം ടൗണിന്റെ പരിപാടിയായി തന്നെ നടത്താനും അതിനുള്ള വേദിയും, യോഗയില്‍ ജനങ്ങള്‍ക്ക് അവബോധമുണ്ടാക്കുന്നതിനായി ഗ്രീന്‍ബര്‍ഗ് നേച്ചര്‍ സെന്ററില്‍ ആഴ്ചയില്‍ രണ്ടു ദിവസം യോഗ പരിശീലനം നടത്തുന്നതിനുള്ള സൗകര്യവും പാര്‍ക്ക് ആന്‍ഡ് റിക്രിയേഷന്‍ കമ്മീഷണര്‍ ജെറാള്‍ഡ് ബൈറിനും, ഗ്രീന്‍ബര്‍ഗ് നേച്ചര്‍ സെന്റര്‍ ഡയറക്ടര്‍ മാര്‍ഗരറ്റ് ഗോള്‍ഡ് ബെര്‍ഗുമായി സംസാരിച്ച് ടൗണ്‍ സൂപ്പര്‍വൈസര്‍ മിസ്റ്റര്‍ പോള്‍ ഫെയ്‌നര്‍ ഏര്‍പ്പാടാക്കി. ഇതികൂടാതെ ടൗണിന്റേയും നേച്ചര്‍ സെന്ററിന്റേയും കലണ്ടറിലെ സോഷ്യല്‍ മീഡിയയിലും പ്രസിദ്ധീകരിച്ചും യോഗ ദിനത്തിനായി ഗ്രീന്‍ബര്‍ഗ് ടൗണ്‍ ടീം നിര്‍ലോഭമായി ചെയ്തുതന്ന സഹായങ്ങള്‍ ശ്ശാഘനീയമാണ്.

യോഗദിനത്തില്‍ പ്രൊജക്ട് സെല്‍ഫ് യു.എസ്.എ, യോഗ ട്രെയിനര്‍ ഗുരു പ്രീത് കൗര്‍, ഡോ. വിമല ഭട്ട്, ഗുരു ദിലീപ് കുമാര്‍, ഇന്ത്യന്‍ കള്‍ച്ചറല്‍ അസോസിയേഷനെ പ്രതിനിധീകരിച്ച് ശിവദാസന്‍ നായര്‍ എന്നിവര്‍ യോഗ ലീഡ് ചെയ്തു.

ഇന്ത്യന്‍ കോണ്‍സുലേറ്റ് ജനറലിനെ പ്രതിനിധീകരിച്ച് കൗണ്‍സില്‍ ദേവദാസന്‍ നായര്‍, ഗ്രീന്‍ബര്‍ഗ് ടൗണ്‍ സൂപ്പര്‍വൈസര്‍ പോള്‍ ഫെയ്‌നര്‍, പാര്‍ക്ക് ആന്‍ഡ് റിക്രിയേഷന്‍ കമ്മീഷണര്‍ ജെറാള്‍ഫ് ബൈറന്‍ എന്നിവര്‍ ഗ്രീന്‍ബര്‍ഗ് നിവാസികളോടൊപ്പം ആദ്യാവസാനം യോഗയില്‍ പങ്കെടുത്തു.

വൈറ്റ് പ്ലെയിന്‍സ് ഹോസ്പിറ്റല്‍ യോഗ മാറ്റുകളും, ഇന്ത്യന്‍ കോണ്‍സുലേറ്റ് ടീ ഷര്‍ട്ടുകളും നല്‍കി ഈ പരിപാടിയെ സപ്പോര്‍ട്ട് ചെയ്തതും ഇത്തരുണത്തില്‍ സ്മരണീയമാണ്.

പ്രവചനത്തെ തെറ്റിച്ച് മനോഹരമായ കാലാവസ്ഥയും പരിപാടിയുടെ വിജയത്തിന് അനുകൂലമായി. ഇന്ത്യന്‍ കള്‍ച്ചറല്‍ അസോസിയേഷന്‍ ഓഫ് നോര്‍ത്ത് അമേരിക്ക പ്രസിഡന്റ് ശിവദാസന്‍ നായര്‍ എല്ലാവരേയും സ്വാഗതം ചെയ്തു. ഡോ. ഭാവന പഹ്വ നന്ദിയും രേഖപ്പെടുത്തി. ഡോ. ജയശ്രീ നായര്‍ എം.സി ആയിരുന്നു.

ജോയിച്ചന്‍ പുതുക്കുളം