ഡോ സുനന്ദ നായര്‍: മോഹിനിയാട്ടത്തിന്റെ ആഗോള അംബാസിഡര്‍

ഹ്യൂസ്റ്റണ്‍: മുപ്പത്തിമൂന്നു വര്‍ഷം മുന്‍പ്. മുംബയ് അന്ധേരി തക്ഷീലകോളനിയിലെ ഫ്ളാറ്റിന്റെ ചെറിയമുറി. ഭരതനാട്യവും കഥകളിയും പഠിച്ച സുനന്ദ, ടിവിയിലെ നൃത്ത പരിപാടിയില്‍ കണ്ണും നട്ടിരിക്കുകയാണ്. കനക റെലെയുടെ മോഹിനിയാട്ടമാണ് ദൂരദര്‍ശനില്‍. കണ്ടതും പഠിച്ചതുമായ നൃത്ത രൂപങ്ങളില്‍ നിന്നും സങ്കല്പത്തില്‍ നിന്നും വേറിട്ട മാനവും തലവുമുള്ള നൃത്താവിഷ്്ക്കാരം. വ്യത്യസ്ഥ നൃത്തച്ചുവടുകള്‍. മോഹിനിയാട്ടത്തില്‍ സാധാരണയായി കാണുന്ന ചൊല്‍ക്കെട്ട്, പദം, തില്ലാന എന്നിങ്ങനെയുള്ള സാമ്പ്രദായിക ശീലങ്ങളെ മാറ്റി ഗണപതിസ്തുതി, അഷ്ടപദി, അഷ്ടനായിക എന്നിങ്ങനെയുള്ള വ്യത്യസ്തങ്ങളായ ഇനങ്ങള്‍. ലോ കോളേജ് വിദ്യാര്‍ത്ഥിയായ സുനന്ദ മനസ്സില്‍ ഉറപ്പിച്ചു. ഈ നൃത്തമാണ് എനിക്ക് വേണ്ടത്. മോഹിനിയാട്ടം പഠിക്കണം. അതും കനക റെലെയില്‍ നിന്ന്.
അമ്മയോട് പറഞ്ഞപ്പോള്‍ പിന്തുണച്ചെങ്കിലും സാധിക്കുമോ എന്ന സംശയം. ‘ഭരതനാട്യം നന്നായി ചെയ്യും. കഥകളിയും അറിയാം അതു പോരേ’ എന്ന ചോദ്യവും. ഭരതനാട്യം പഠിപ്പിച്ച ഗുരു ദീപക് മസുംദാറിനോടും ആഗ്രഹം പറഞ്ഞു. ‘കനകറെലെയോട് ശുപാര്‍ശ ചെയ്യാം. പക്ഷേ, പുറത്തുനിന്നുള്ള കുട്ടികളെ അവര്‍ പഠിപ്പിക്കില്ല. നൃത്തരൂപമെന്നതിലുപരി ശാസ്ത്രീയമായും, വൈജ്ഞാനികമായും മോഹിനിയാട്ടത്തെ ജനങ്ങള്‍ക്കിടയിലേക്ക് എത്തിക്കുന്നതില്‍ സാരമായ പങ്കു വഹിച്ച നര്‍ത്തകിയാണ്. മുംബൈ കേന്ദ്രമാക്കി അവര്‍ നടത്തുന്ന നളന്ദ നൃത്തകലാ മഹാവിദ്യാലയത്തില്‍ പൂര്‍ണ്ണ സമയ ഡിഗ്രി കോഴ്സിനു ചേര്‍ന്നാലേ നൃത്തം പഠിക്കാനാകു’. ശിഷ്യയുടെ ആഗ്രഹത്തിന്റെ തീവ്രത ഉള്‍ക്കൊണ്ട് ദീപക് മസുംദാര്‍ ശ്രമിച്ചു നോക്കാം എന്നുമാത്രം പറഞ്ഞു. മസുംദാറിന്റെ ശുപാര്‍ശയുമായി എത്തിയ സുനന്ദയിലെ നര്‍ത്തകിയെ കണ്ടറിഞ്ഞതുപോലെയായിരുന്നു കനകറെലെയുടെ പ്രതികരണം. നാളെ തന്നെ വന്നു ചേര്‍ന്നു കൊള്ളൂ. നിയമ വിദ്യാര്‍ത്ഥിയാണെന്നും അതു തുടരണമെന്നാഗ്രഹമുണ്ടെന്നും സുനന്ദ സൂചിപ്പിച്ചപ്പോള്‍ ‘രണ്ടും കൂടി ഒന്നിച്ചെങ്ങനെ’ എന്നു ചോദിച്ചെങ്കിലും നിയമ പഠനം മുടക്കേണ്ട എന്ന മറുപടിയും വന്നു. മുംബൈ ലോ കോളേജില്‍ നിന്ന് നിയമബിരുദവും ഇംഗ്ലണ്ടിലെ മാഞ്ചസ്റ്റര്‍ സര്‍വ്വകലാശാലയില്‍ നിന്ന് രാജ്യാന്തര നിയമത്തില്‍ ഗവേഷണവും നടത്തിയിട്ടുള്ള കനക റെലെ, നൃത്തത്തോടൊപ്പം നിയമപഠനത്തേയും സ്നേഹിച്ചിരുന്നതാകാം സുനന്ദയ്ക്കായി ഒരിളവിനു കാരണം. ആ ഇളവ് മോഹിനിയാട്ടത്തിന്റെ ചരിത്രത്തിലെ പുതിയൊരു ഏടിനു തുടക്കമാകുകയായിരുന്നു. ഗുരുവിനു ചേര്‍ന്ന ശിഷ്യയായി സുനന്ദ മാറി. മോഹിനിയാട്ടം വിഷയമായെടുത്ത് ബിരുദവും ബിരുദാനന്തര ബിരുദവും എടുത്ത ആദ്യത്തെ ആള്‍. ഇതേ വിഷയത്തില്‍ ഡോക്ടറേറ്റും. രാജ്യത്തിനകത്തും പുറത്തുമുള്ള നൃത്തവേദികളെ നടന വൈഭവം കൊണ്ട് വിസ്മയിപ്പിച്ച നര്‍ത്തകി. നിരവധി കലാപ്രതിഭകളുടെ ഇഷ്ട ഗുരുനാഥ. മോഹിനിയാട്ടത്തിന്റെ അന്താരാഷ്ട്ര അംബാസിഡര്‍ എന്ന വിശേഷണം പേറുന്ന മലയാളി. ഡോ. സുനന്ദാ നായര്‍.
അമേരിക്കയില്‍ സ്ഥിരതാമസമാക്കിയ സുനന്ദ, ജീവിതത്തില്‍ പിന്നിട്ട വഴികളെക്കുറിച്ചും അവിചാരിത വഴിത്തിരിവുകളെക്കുറിച്ചും സംസാരിക്കുന്നു

മുംബയ് മലയാളി

അച്ഛന്‍ ബാലകൃഷ്ണനും അമ്മ സുലോചനയും പാലക്കാടുകാരാണ്. അച്ഛന് മുംബയില്‍ ഫാര്‍മസിക്യൂട്ടിക്കല്‍ കമ്പനിയില്‍ ജോലി ആയിരുന്നതില്‍ ജനിച്ചതും വളര്‍ന്നതുമെല്ലാം മുംബയിലാണ്. രണ്ട സഹോദരന്മാര്‍. സതീഷും സുഹാസും. സെന്റ് തോമസ് അക്കാദമി, ചിനായി കാളേജ് ഓഫ് കൊമേഴ്സ്, ജെ സി ലോ കോളേജ് എന്നിവിടങ്ങളിലായിരുന്നു പഠനം. ഭര്‍ത്താവ് ക്യാപ്റ്റന്‍ ആനന്ദ് നായര്‍. കെമിക്കല്‍ എഞ്ചീനീയറായ അനിരുദ്ധും ഹൈസ്‌ക്കൂള്‍ വിദ്യാര്‍ത്ഥി സിയയും മക്കള്‍

വഴിത്തിരിവ്

കലാമണ്ഡലം കൃഷ്ണന്‍ കുട്ടി വാര്യര്‍ നാട്ടിലെ ജോലി ഉപേക്ഷിച്ച് മുംബയിലെത്തി. കലാമണ്ഡലം ഗോപി ആശാന്റേയും സത്യഭാമയുടേയും ഒക്കെ ഗുരുവായ അദ്ദേഹത്തിന്റെ ശിഷ്യ ആകാന്‍ ഭാഗ്യം കിട്ടിയതാണ് ജീവിതത്തിലെ വഴിത്തിരിവ്. ആറാം വയസ്സില്‍ നിലവിളക്കിനു മുന്നില്‍ ഗുരുവിനു ദക്ഷിണകൊടുത്ത് നമസ്‌ക്കിച്ചത് ഇപ്പോഴും മനസ്സിലുണ്ട്. ഭരതനാട്യത്തിന് ദീപക് മസുംദാറിനെ ഗുരുവായി കിട്ടിയതും അദ്ദേഹത്തിന്റെ ശുപാര്‍ശ പ്രകാരം കനക റെലെയുടെ ശിഷ്യ ആയതും ജീവിതം വഴി തിരിച്ചുവിട്ടു.
നൃത്തത്തോട് എന്താണ് ഇത്ര അഭിനിവേശം തോന്നാന്‍ കാരണം എന്നറിയില്ല. അച്ഛന്റേയോ അമ്മയുടേയോ കുടുബത്തില്‍ നര്‍ത്തകരില്ല. സ്‌ക്കൂളില്‍ പോകുന്നതിനേക്കാള്‍ താല്‍പര്യം വാര്യര്‍ സാറിന്റെ നൃത്ത ക്ളാസില്‍ പോകാനായിരുന്നു. ഒരു ക്ളാസ് പോലും മുടക്കില്ല. അന്ന് മാസത്തിലൊന്ന് മലയാളം സിനിമ തീയേറ്ററില്‍ വരും. കുടുംബത്തിലെ മറ്റുള്ളവര്‍ സിനിമ കാണാന്‍ പോകും. ഞാന്‍ ആ സമയം കൂടി ഡാന്‍സ് ക്ളാസിലിരിക്കും. എന്റെ ക്ളാസ് കഴിഞ്ഞാല്‍ മറ്റുള്ളവരെ പഠിപ്പിക്കുന്നത് കണ്ടിരിക്കും. പത്താം ക്ളാസില്‍ പരീക്ഷയക്ക് ഒരുമാസം മുന്‍പ് തല്‍ക്കാലം നൃത്ത പഠനം നിര്‍ത്താന്‍ അമ്മ നിര്‍ബന്ധിച്ചു. ഞാന്‍ സമ്മതിച്ചില്ല. എന്നാല്‍ ഒരു ദിവസം വാര്യര്‍ സാര്‍ പറഞ്ഞു” ഇനി പരീക്ഷ കഴിഞ്ഞ് വന്നാല്‍ മതി’. എനിക്കുറപ്പുണ്ടായിരുന്ന അത് അദ്ദേഹം സ്വയം പറയുന്നതല്ലന്ന്. വീട്ടിലെത്തി അമ്മയെ ചോദ്യം ചെയ്തപ്പോള്‍ ഉറപ്പായി. വാര്യര്‍ സാറിനെകൊണ്ട് അമ്മ പറയിപ്പിച്ചതാണെന്ന്. വാര്യര്‍ സാര്‍ തന്നെയാണ് കൂടുതല്‍ പഠിക്കണമെന്നും അതിന് വലിയ ഗുരുക്കനാമരൂടെ അടുത്തു പോകണമെന്നും നിര്‍ബന്ധിച്ചത്. അങ്ങനെയാണ് ദീപക് മസുംദാറിന്റെ അടുത്തു പോകുന്നത്. ഭരതനാട്യം പഠിപ്പിക്കാമെന്ന് അദ്ദേഹം ഏറ്റു. അദ്ദേഹത്തിന്റെ കീഴിലെ പഠനമാണ് പ്രൊഫഷണല്‍ ഡാന്‍സറായി മാറാന്‍ കാരണം. എനിക്ക് എന്തൊക്കയൊ ചെയ്യാന്‍ കഴിയുമെന്ന ആത്മവിശ്വാസം വന്നു. പിന്നെ ജീവിതത്തിന്റെ ഭാഗമായി മാറിയ ഡോ കനക റെലെ.

ഡോ. കനക റെലെ,
നളന്ദ നൃത്തകലാ വിദ്യാലയം

ദീപക് മസുംദാറിന്റെ ശുപാര്‍ശകത്തുമായി ഡോ കനക റെലെയെ കാണാന്‍ നളന്ദ നൃത്തകലാ വിദ്യാലയത്തിലെത്തിയത് മായാതെ മനസ്സിലുണ്ട്. ശിഷ്യ ആക്കാമെന്ന് കനക റെലെ സമ്മതിച്ചു. ചേരാനുള്ള അപേക്ഷ ഫോം വാങ്ങാന്‍ നില്‍ക്കുമ്പോള്‍ മണിയപ്പന്‍ സാര്‍ നേരെ വരുന്നു. അന്ന് മുംബയില്‍ അറിയപ്പെടുന്ന മൃദംഗ വിദ്വാനാണ് അദ്ദേഹം. ഞാന്‍ ഭരതനാട്യം അവതരിപ്പിച്ച പല വേദികളിലും മൃദംഗം വായിച്ചത് മണിയപ്പന്‍ സാര്‍ ആയിരുന്നതിനാല്‍ നല്ല പരിചയവും. മോഹിനിയാട്ടം പഠിക്കാന്‍ വന്നതാണെന്നു പറഞ്ഞപ്പോള്‍ അദ്ദേഹം വിലക്കി. ‘നീ മോഹിനിയാട്ടം പഠിക്കരുത്. നല്ലതുപോലെ ഭരതനാട്യം ചെയ്യുന്നുണ്ടല്ലോ. കൂടുതല്‍ മുന്നോട്ടു പോകാന്‍ ഭരതനാട്യമാണ് നല്ലത്. മോഹിനിയാട്ടം കൂടി പഠിക്കാന്‍ പോയാല്‍ രണ്ടും ഇല്ലാതാകും. ഭരതനാട്യത്തില്‍ നിനക്ക് വലിയ ഭാവിയുണ്ട്’ എന്നു പറഞ്ഞ് മണിയപ്പന്‍ സാര്‍ അപേക്ഷ ഫോം പൂരിപ്പിക്കാന്‍ സമ്മതിച്ചില്ല. എന്റെ താല്‍പര്യം ആവര്‍ത്തിച്ചപ്പോള്‍ ഏതായാലും വീട്ടില്‍ പോയി ഒന്നുകൂടി ആലോചിക്ക് എന്നുപറഞ്ഞു വിട്ടു. തടസ്സ വാദങ്ങള്‍ക്ക് ആഗ്രഹത്തിനു തടയിടാനായില്ല. കനക റെലെയുടെ ശിഷ്യയായി. അവഗണനയുടെ ചുഴിക്കുത്തില്‍ നിന്നും നവചൈതന്യം നല്‍കി മോഹിനിയാട്ടത്തിന് പുതുജീവന്‍ നല്‍കിയവരില്‍ പ്രമുഖയാണ് ഡോ. കനക് റെലെ. മോഹിനിയാട്ടത്തിന്റെ ലാസ്യഭംഗിയെ അപ്പാടെ ജീവിതത്തിലേക്ക് ആവാഹിച്ച നര്‍ത്തകി. വ്യത്യസ്തമായ വീക്ഷണകോണിലൂടെ സ്വന്തം കലയിലൂടെ തന്നെ സമൂഹത്തിലെ തെറ്റിനുനേരെ പ്രതികരിക്കുന്ന കലാകാരി. സ്വദേശം ഗുജറാത്തെങ്കിലും കേരളത്തിന്റെ ലാസ്യനടനത്തോടായിരുന്നു പ്രിയം. ആ അര്‍പ്പണ മനോഭാവത്താല്‍ അനുഗ്രഹീതമായതാവട്ടെ മോഹിനിയാട്ടവും. നളന്ദ നൃത്ത കലാ മഹാവിദ്യാലയത്തിന്റെ സ്ഥാപക. പത്മഭൂഷന്‍ നല്‍കി രാജ്യം ആദരിച്ച കലാകാരി. കനക റെലെയുടെ ശിഷ്യ എന്നതുതന്നെയാണ് ഇന്നും എന്റെ പ്രധാന സ്വത്വം.

ഉള്‍ക്കിടുക്കത്തോടെ ആദ്യ മത്സരം

ചിനായി കൊമേഴ്സ് ആന്റ് മാനേജ്മെന്റ് കോളേജില്‍ ബി കോം മൂന്നാം വര്‍ഷം പഠിക്കുകയാണ്. ഒരു ദിവസം കോളേജിന്റെ ഇടനാഴിയിലൂടെ നടക്കുമ്പോള്‍ രണ്ടു മൂന്നു കുട്ടികള്‍ തടഞ്ഞു നിര്‍ത്തി ‘ നീ കോളനിയിലും മറ്റും ഡാന്‍സു ചെയ്യുമല്ലോ. ഞങ്ങള്‍ കണ്ടിട്ടുണ്ട്. എതിരൊന്നും പറയേണ്ട. ഇത്തവണ സര്‍വകലാശാല മത്സരത്തില്‍ കോളേജിനെ പ്രതിനിധീകരിച്ച് പങ്കെടുക്കണം. മുന്‍ വര്‍ഷങ്ങളില്‍ കോളേജിനെ പ്രതിനിധീകരിച്ച കുട്ടിയുണ്ട്. അതുമായി ഒരു മത്സരം നടത്താം. അധ്യാപകര്‍ കണ്ട് വിലയിരുത്തിയ ശേഷം മതി. മത്സരത്തിന് തയ്യാറാകുക’ കോളേജ് യൂണിയന്‍ പ്രവര്‍ത്തകരായിരുന്ന അവര്‍ തീര്‍ത്തു പറഞ്ഞു. ഉള്‍ക്കിടിലമാണ് ഉണ്ടായത്. ചെറിയ വേദികളില്‍ നൃത്തം ചെയ്യും എന്നല്ലാതെ മത്സരത്തിനുള്ള കഴിവൊന്നമില്ല എന്ന തോന്നലായിരുന്നു മുന്നില്‍. വീട്ടിലെത്തി കാര്യം പറഞ്ഞപ്പോള്‍ അമ്മയുടെ അഭിപ്രായവും മത്സരിക്കണം എന്നുതന്നെ. മത്സര ദിവസത്തിനു തലേന്ന് എതിരെ മത്സരിക്കേണ്ട കുട്ടിയെ കണ്ടു. മത്സരിക്കാന്‍ തന്നെയാണോ തീരുമാനെമെന്ന് കുട്ടി ചോദിച്ചു. അതെ എന്ന് മറുപടി നല്‍കി. മത്സര ദിവസം ആ കുട്ടി കോളേജില്‍ വന്നില്ല. വിധികര്‍ത്താക്കളെല്ലാം എത്തി. എതിരാളിയില്ലങ്കിലും നൃത്തം അവതരിപ്പിച്ച് കാണണം എന്നവര്‍ നിര്‍ദ്ദേശിച്ചു. എന്തെന്നില്ലാത്ത ഭയത്തോടെയാണ് തില്ലാന ചെയ്തത്. നൃത്തം കഴിഞ്ഞപ്പോള്‍ വിധി കര്‍ത്താക്കള്‍. ‘കുട്ടി രണ്ടു വര്‍ഷമായി എവിടെ ആയിരുന്നു ‘എന്നു ചോദിച്ചുകൊണ്ട് സ്റ്റേജിലെത്തി അനുമോദിച്ചു. സര്‍വകലാശാല മത്സരത്തില്‍ സ്വര്‍ണ്ണ മെഡല്‍ കിട്ടിയത് ഏറെ ശ്രദ്ധേയയാകാന്‍ ഇട നല്‍കി. ആ വര്‍ഷം കോളേജിനെ പ്രതിനിധികരിച്ചു പങ്കെടുത്ത മത്സരങ്ങളിലെല്ലാം ഒന്നാം സ്ഥാനം.
ഇതേ ഭയത്തോടെ അരങ്ങിലേറിയത് ദല്‍ഹിയിലാണ്. നളന്ദയില്‍ ചേര്‍ന്ന് ഏതാനും മാസങ്ങള്‍ പിന്നിട്ടതേയുള്ളു. ദല്‍ഹിയില്‍ കനക റെലെയുടെ നൃത്താവിഷ്‌ക്കാരം. എന്നെയും സംഘത്തില്‍ കൂട്ടി. അത് വലിയൊരു അംഗീകാരമായിരുന്നു. അതി പ്രശസ്തരിരിക്കുന്ന വേദിയില്‍ ഗുരു കനക റെലെയ്ക്കൊപ്പം നൃത്തം. സ്വപ്നത്തില്‍ പോലും ചിന്തിക്കാനാവാത്തകാര്യം. ‘പൂന്തേന്‍ നേര്‍ മൊഴി സഖി ഞാന്‍ വിരഹം പൂണ്ടു വലഞ്ഞിടുന്നേന്‍….’. സ്വാതിതിരുനാളിന്റെ വിരഹാര്‍ദ്രമായ പദങ്ങള്‍ക്ക് അനുസരിച്ച് ചുവടു വെക്കുന്ന മുഗ്ദ നായികയുടെ ചെറിയൊരു വേഷമായിരുന്നു എന്റേത്. അക്കാലത്തെ ഏറ്റവും പ്രശസ്തനായ നൃത്ത-സംഗീത നിരൂപകന്‍ സുഗുടു മാമ (പി.സുബ്രമണ്യം) സദസ്സിലുണ്ടായിരുന്നു. കനക റെലെയുടെ നൃത്താവിഷ്‌ക്കാരത്തെക്കുറിച്ച് സ്റ്റേറ്റ്മാന്‍ പത്രത്തില്‍ അദ്ദേഹം ലേഖനം എഴുതി. അതില്‍ എന്നെകുറിച്ചും പേരെടുത്ത് പരാമര്‍ശം വന്നു. യുവ നര്‍ത്തകകളില്‍ പ്രതീക്ഷ നല്‍കുന്നവള്‍ എന്ന് അദ്ദേഹം കുറിച്ചു. അത് വലിയൊരു അംഗീകാരവും ബഹുമതിയും ആയിരുന്നു. നൃത്ത രംഗത്തുള്ളവര്‍ എന്നെ നിരീക്ഷിക്കാന്‍ അത് ഇട നല്‍കി.

നിയമം, ഭരതനാട്യം, കഥകളി

നിയമ പഠനം തുടര്‍ന്നു കൊണ്ടുതന്നെ മോഹിയാട്ട പഠനവും തുടരാം എന്നു കരുതിയാണ് നളന്ദയില്‍ ചേര്‍ത്തത്. തുടക്കത്തിലേ അത് സാധ്യമല്ലന്നു തിരിച്ചറിഞ്ഞു. നിയമ പഠനത്തിന് വിരാമമിട്ടു. മോഹിനിയാട്ടമാണ് വഴി എന്ന് തിരിച്ചറിഞ്ഞപ്പോള്‍ ഭരതനാട്യവും കഥകളിയും വേണ്ടന്നുവെച്ചു. ഓരോ നൃത്തരൂപങ്ങളും ഓരോ ഭാഷപോലെയാണ്. ഒന്നിലധികം ഭാഷകള്‍ പഠിച്ചാല്‍ സംസാരത്തിനിടയില്‍ പലഭാഷകളിലേയും വാക്കുകളും വാചകങ്ങളും കയറിവരും. മലയാളം പറയുന്നതിനിടയില്‍ ഇംഗ്ളീഷ് വാക്കുകള്‍ ഉപയോഗിക്കുന്നതുപോലെ. അതിനാല്‍ മോഹിനിയാട്ടം പഠിക്കാനാണ് തീരുമാനമെങ്കില്‍ തുടര്‍ന്ന് അതുമാത്രം പഠിക്കാന്‍ കനക റെലെ നിര്‍ദ്ദേശിച്ചു. ആറാം വയസ്സില്‍ തുടങ്ങിയ കഥകളി പഠനവും അരങ്ങേറ്റം കുറിച്ച ഭരതനാട്യവും വേണ്ടന്നു വെച്ചു. കഥകളിയിലെ പരിശീലനമുറകളും ഭരതനാട്യത്തിലെ അനുശീലനവും മോഹിനിയാട്ടം പഠനത്തിന് വഴികാട്ടിയായി.

മോഹിനിയാട്ടത്തില്‍ ബിരുദാനന്തര ബിരുദം, പിഎച്ച്ഡിയും

മോഹിനിയാട്ടത്തില്‍ ബിരുദാനന്തരബിരുദം നേടിയ ആദ്യ വിദ്യാര്‍ഥി എന്നതില്‍ അഭിമാനമുണ്ട്. ബോംബെ സര്‍വകലാശാലയുടെ കീഴിലുള്ള നളന്ദയില്‍ അധ്യാപികയായി ചേര്‍ന്നു. യുജിസി മാനദണ്ഡപ്രകാരം നെറ്റ് പരീക്ഷയും പാസായി. ഡോക്ടറേറ്റ് എടുക്കണമെന്നായിരുന്നു ആഗ്രഹം. പക്ഷേ ഗുരു കനക റെലെ വിലക്കി. ‘മികച്ച രീതിയില്‍ നൃത്തം ചെയ്യാന്‍ കഴിവുള്ള നീ അതിലാണ് ശ്രദ്ധിക്കേണ്ട്. ഗവേഷണത്തിനൊക്കെ കൂടുതല്‍ സമയം കളയേണ്ടി വരും. അത് നിന്റെ നൃത്താവിഷ്‌ക്കരണത്തെ ബാധിക്കും.’ എന്നതായിരുന്നു വിശദീകരണം. ഡോക്ടറേറ്റ് സ്വപ്നത്തിന് താല്‍ക്കാലിക വിട നല്‍കി. എങ്കിലും ഉപേക്ഷിച്ചില്ല. അവിചാരിതമായി 2012 ല്‍ പിഎച്ച്ഡിയുടെ കാര്യം പരാമര്‍ശിച്ചപ്പോള്‍, ആഗ്രഹം കൊണ്ടുനടക്കുകയാണെങ്കില്‍ ആകട്ടെ എന്നായി. പക്ഷേ കര്‍ശന നിര്‍ദ്ദേശം വെച്ചു. ‘പരിപാടികളുടെ പേരു പറഞ്ഞ് ഗവേഷണം ഉഴപ്പാന്‍ പറ്റില്ല. അങ്ങനെ വന്നാല്‍ അന്നു നിര്‍ത്തും’ ഗുരു പറഞ്ഞതിലും രണ്ടൂമാസം മുന്‍പുതന്നെ പ്രബന്ധം തയ്യാറാക്കി നല്‍കാനായി. ‘മോഹിനിയാട്ടത്തിലെ സഹജമായ ഭാവാത്മക സ്ത്രീ സ്വാതന്ത്രവാദം’ എന്നതായിരുന്നു വിഷയം. സര്‍വകലാശാല ഡോക്ടറേറ്റും സമ്മാനിച്ചു.

പ്രവാസം, തിരുവാതിര, കത്രീന

ഹൃദയം പറിക്കുന്ന വേദനയോടെയാണ് 2000ല്‍ അമേരിക്കയിലേക്ക് പറന്നത്. ഭര്‍ത്താവ് ആനന്ദ് നായര്‍ നേവിയില്‍ ക്യാപ്റ്റനായിരുന്നു. അമേരിക്കയില്‍ ജോലി ലഭിച്ച ഭര്‍ത്താവിനൊപ്പം പോകാന്‍ നിര്‍ബന്ധിതയായി. അതോടെ നൃത്തജീവിതം അനിശ്ചിതാവസ്ഥയിലും. ആദ്യം ന്യൂഓര്‍ലിയന്‍സിലായിരുന്നു താമസം. ഒരു ദിവസം അവിടുത്തെ മലയാളി അസോസിയേഷനിലെ ചില വനിതകള്‍ വീട്ടിലെത്തി. ‘നര്‍ത്തകിയാണെന്നറിഞ്ഞു. ഓണത്തിന് അവതരിപ്പാക്കാന്‍ കുട്ടികളെ തിരുവാതിര പഠിപ്പിക്കാമോ’ എന്നതായിരുന്നു അവരുടെ ആവശ്യം. കരച്ചിലാണ് വന്നതെങ്കിലും പ്രകടിപ്പിക്കാനായില്ല. അഹങ്കാരി എന്നു പറയിപ്പിക്കരുതല്ലോ. എന്റെ നൃത്തപാരമ്പര്യത്തെക്കുറിച്ച് അവര്‍ക്കറിയുകയുമില്ല. തിരുവാതിര പരിശീലിപ്പിക്കുക മാത്രമല്ല, ഒരു ഡാന്‍സ് അവതരിപ്പിക്കണമെന്ന നിര്‍ബന്ധവും വന്നു. അണിഞ്ഞൊരുങ്ങി വേദിയിലെത്തി. സംഗീതം ഉയര്‍ന്നപ്പോള്‍ ആകെയൊരു പതര്‍ച്ച. പാട്ട് സി.ഡി യില്‍ നിന്ന്. അതേവരെ സി.ഡി യില്‍ പാട്ടിട്ട് ആടിയിട്ടില്ല. അടി തെറ്റുമെന്ന ആശങ്കയില്‍ ഒരുവിധം ആടിത്തീര്‍ത്തു. പക്ഷേ, അത് മറ്റൊരു തുടക്കമായിരുന്നു. കുട്ടികളെ നൃത്തം പഠിപ്പിക്കണമെന്ന ആവശ്യവുമായി പലരും എത്തി. സുനന്ദാസ് പെര്‍ഫോമന്‍സ് ആര്‍ട് സെന്റര്‍ എന്നപേരില്‍ നൃത്ത വിദ്യാലയം. കുറച്ചു നാളുകള്‍കൊണ്ടൂതന്നെ പേരെടുക്കാനായി. എന്നാല്‍ 2005 ആഞ്ഞടിച്ച കത്രീന കൊടുങ്കാറ്റ് വില്ലനായി. നൃത്തവിദ്യാലയവും സ്റ്റുഡിയോയും എല്ലാം കാറ്റും മഴയും കൊണ്ടുപോയി. താമസം ഹൂസ്റ്റണിലേക്ക്. അവിടെ നൃത്ത വിദ്യാലയം പുനരാരംഭിച്ചു. ഇന്ന് നിരവധി കുട്ടികള്‍ പഠിക്കുന്ന അമേരിക്കയാകെ അറിയപ്പെടുന്ന നൃത്തസ്ഥാപനമാണിത്. ഒപ്പം മൂംബയില്‍ ശ്രുതിലയ ഇന്‍സ്റ്റിറ്റ്യൂട്ട് ഓഫ് ഫൈന്‍ ആര്‍ട്സും നടത്തിക്കൊണ്ടുപോകുന്നു. ഗുരു കലാമണ്ഡലം കൃഷ്ണന്‍ കുട്ടി വാര്യര്‍ നടത്തിക്കൊണ്ടിരുന്ന സ്ഥാപനമാണിത്. ഞാന്‍ വിദ്യാര്‍ത്ഥിയായിരിക്കുമ്പോള്‍ അദ്ദേഹം എന്നെ ഏല്‍പിച്ച സ്ഥാപനം.

ഹൂസ്റ്റണ്‍ – മുംബൈ ഷട്ടില്‍

താമസം ഹൂസ്റ്റണിലാണെങ്കിലും മനസ്സ് മുംബയില്‍ എന്നു പറയാം. നാട്ടില്‍ നൃത്താവതരണത്തിന് കിട്ടുന്ന അവരമൊന്നും പാഴാക്കില്ല. മധ്യപ്രദേശിലെ ഖജുരാഹോ ഉത്സവം, ഒറീസയിലെ കൊണാര്‍ക് ഉത്സവം, ജയ്പൂര്‍, ജോധ്പൂര്‍, ഉദയ്പൂര്‍ എന്നിവിടങ്ങളിലെ യുവ മഹോത്സവങ്ങള്‍, തിരുവനന്തപുരം സൂര്യ ഫെസ്റ്റിവല്‍, ഉജ്ജയിന്‍ കാളിദാസ് സമോവര്‍, ഗുജറാത്ത് മോഡേരാ ഫെസ്റ്റിവല്‍, മൈസൂര്‍ ദസ്സേറ ഉത്സവം തുടങ്ങി ഭാരതത്തിലെ തലയെടുപ്പുള്ള നൃത്തോല്‍സവങ്ങളിലെല്ലാം മോഹിനിയാട്ടം നടത്താനുള്ള ഭാഗ്യണ്ടായി. അമേരിക്കയിലെ വിവിധ വേദികള്‍ക്കു പുറമെ സോവിയറ്റ് യൂണിയന്‍, വടക്കന്‍ കൊറിയ, മിഡില്‍ ഈസ്റ്റ്, സിംഗപ്പൂര്‍, എന്നിവിടങ്ങളിലൊക്കെ നൃത്താവിഷ്‌ക്കരണം നടത്താനായി. മുംബയില്‍ ചെറിയ പരിപാടികള്‍ക്കു പോലും എത്തേണ്ടി വരാറുണ്ട്. രാവിലെ വിമാനത്തിലെത്തി, അല്പനേരം വിശ്രമിച്ച്, ഉച്ചക്ക് പരിശീലനം നടത്തി, വൈകിട്ട് നൃത്തവും കഴിഞ്ഞ് രാത്രി വിമാനത്തിന് തിരികെ പോയ നിരവധി സന്ദര്‍ഭങ്ങളുണ്ട്. വിമാനത്താവളത്തില്‍ വെച്ച് നൃത്ത വസ്ത്രങ്ങള്‍ മാറേണ്ടിവന്ന സാഹചര്യം പോലും ഉണ്ടായിട്ടുണ്ട്. എന്തൊക്കെയായാലും ഇന്ത്യയില്‍ വര്‍ഷത്തില്‍ മൂന്നു നാല് വേദികളില്‍ നൃത്തം അവതരിപ്പിക്കാനുള്ള അവസരം കിട്ടാറുണ്ട്.

മറുനാടന്‍ നര്‍ത്തകര്‍

മറുനാടന്‍ കുട്ടികള്‍ പാട്ടിനും ഡാന്‍സിനും ഒന്നും അത്ര പോരാ എന്നൊരു ധാരണ പലര്‍ക്കുമുണ്ട്. അത് തെറ്റിധാരണയാണ്. നമ്മുടെ സംസ്‌കാരത്തില്‍നിന്ന് മാറിനില്‍ക്കേണ്ടി വരുമ്പോള്‍, തനതു സംസ്‌കാരം അതേമട്ടില്‍ മുമ്പോട്ടു കൊണ്ടുപോകുക എന്നുള്ളത് ശ്രമകരമായേക്കാം. അതും അമേരിക്കപോലുള്ള ഒരിടത്ത് താമസിക്കുമ്പോള്‍. പക്ഷേ അതിനായി കഠിനമായി ശ്രമിക്കുന്നവരാണ് പ്രവാസികള്‍ എന്നാണ് അനുഭവം. അഞ്ചു മുതല്‍ അമ്പത്തിയഞ്ച് വയസ്സുവരെയുള്ളവര്‍ നൃത്തം പഠിക്കാനെത്തുന്നുണ്ട്. നാട്ടില്‍ നൃത്തം പഠിച്ച് മുടങ്ങിയവരും പഠിക്കാനാഗ്രഹിച്ച് നടക്കാതിരുന്നവരുമൊക്കെ പ്രവാസ ജീവിതത്തില്‍ ആഗ്രഹ സാഫല്യം തേടുന്നു. പഠനത്തിന് പ്രായമില്ലന്ന് തെളിയിച്ച് പലരും വേദിയില്‍ അസാധാരണ പ്രകടനം കാഴ്ചവെയ്ക്കാറുമുണ്ട്. കൊച്ചുകുട്ടികള്‍ ആദ്യം മാതാപിതാക്കളുടെ താല്‍പര്യപ്രകാരമാണ് പഠിക്കാനെത്തുന്നതെങ്കിലും പിന്നീട് നൃത്തം ആവേശമായി കരുതി ക്ളാസിലെത്തുന്നു. നാട്ടിലുള്ളവര്‍ക്ക് കിട്ടുന്ന പല സൗകര്യങ്ങലും ഇല്ലാതാതെയാണ് അവര്‍ കല പഠിക്കുന്നത്. വിദേശത്ത് സി.ഡി. പോലുള്ള റെക്കോഡുകളെയാണ് ആശ്രയിക്കുക. പെര്‍ഫോര്‍മര്‍ എന്ന നിലയില്‍ അത് ബുദ്ധിമുട്ടായി തോന്നിയിട്ടുണ്ട്. നൃത്തം സംവിധാനം ചെയ്യുമ്പോള്‍ സഹപ്രവര്‍ത്തകരുമായുള്ള തുടര്‍ച്ചയായുള്ള സമ്പര്‍ക്കം കൊറിയോഗ്രാഫിയെ എളുപ്പമാക്കും. ഒരുമിച്ചുള്ള പ്രാക്ടീസുകളും കൂടുതല്‍ ഗുണം ചെയ്യും. വിദേശത്ത് സ്ഥിരതാമസമാക്കുന്ന കലാകാരികള്‍ക്ക് ഈ സൗകര്യങ്ങളൊന്നും കിട്ടില്ല. പക്ഷേ ആരോടും ഒപ്പം നില്‍ക്കാവുന്ന മികവു പുലര്‍ത്തുന്ന നിരവധി കലാകാരികള്‍ മറുനാടുകളിലുണ്ട്. നൃത്തവിദ്യാലയം നടത്തിപ്പിനു പുറമെ രണ്ട് നൃത്തോത്സവങ്ങള്‍ കൂടി സംഘടിപ്പിക്കുന്നുണ്ട്. മോഹിനിയാട്ടത്തിന് ഗുരു നല്‍കിയ സംഭാവനയെ മാനിച്ച് മുംബയില്‍ ‘കനക് നൃത്തോത്സവവും’ യുവ കലാകാരന്മാരെ മികച്ച പെര്‍ഫോര്‍മര്‍ ആക്കി മാറ്റുക എന്ന ലക്ഷത്തോടെ ഹൂസ്റ്റണില്‍ ‘നര്‍ത്തകി ഫെസ്റ്റിവലും’

മോഹിനിയാട്ടം തനി കേരളീയം

കേരളത്തിന്റെ അഭിമാന നടനങ്ങളിലൊന്നാണ് മോഹിനിയാട്ടം. അടിമുടി കേരളീയമായ അനുഭൂതിയും സാംസ്‌കാരികതയും ഉള്‍ക്കൊള്ളുന്ന നൃത്തരൂപം. മുദ്രകളിലും ലാസ്യചലനങ്ങളിലും സംഗീതത്തിലുമെല്ലാം നിറയുന്ന ലാവണ്യശോഭയാല്‍ ലോകത്തിന്റെ മനം കവര്‍ന്ന ക്ളാസിക് കലാരൂപം. പ്രത്യേക രീതിയില്‍ ഞൊറിഞ്ഞുടുത്ത കസവു വസ്ത്രം മുല്ലപ്പൂചുറ്റി ആകര്‍ഷകമാക്കി നാഗഫണ രീതിയില്‍ ചുറ്റികെട്ടിയ തലമുടി, കര്‍ണാഭരണം, മൂക്കുത്തി, ശിരോലങ്കാരങ്ങള്‍, പതക്കം, പവന്‍മാല, നാഗപടമാല, പാലയ്ക്കാമോതിരം, അരഞ്ഞാണ്‍, ചിലങ്ക തുടങ്ങി വര്‍ണ്ണാഭമായ അലങ്കാരങ്ങള്‍. കയ്യിലും കാലിലും മൈലാഞ്ചി. ചുണ്ടുകള്‍ ചുവപ്പിക്കും. കണ്ണും പുരികവും അഞ്ജനമെഴുതി ആകര്‍ഷകമാക്കും. എല്ലാത്തിലുമുണ്ട് കേരളീയത്വം. മോഹിനിയാട്ടത്തിലെ അഭിനയവും കേരളത്തിന്റെ ഭംഗി വിളിച്ചോതുന്ന ആടയാഭരണരീതികളും ഏറെ ആകര്‍ഷിച്ചിട്ടുണ്ട്.

കേരളത്തിലെ നൃത്തരൂപങ്ങളില്‍ ഏറ്റവും പ്രധാനപ്പെട്ട ലാസ്യ സമ്പ്രദായമാണ് മോഹിനിയാട്ടം. മോഹിപ്പിക്കുന്നവളാണ് മോഹിനി. മോഹിനിയുടെ നൃത്തം എന്ന അര്‍ത്ഥത്തിലാണ് മോഹിമായാട്ടം. തിരുവിതാംകൂര്‍ മഹാരാജാവായിരുന്ന കാര്‍ത്തിക തിരുനാളിന്റെ ബാലരാമഭരതത്തില്‍ മോഹിനീ നടനത്തെക്കുറിച്ച് പരാമര്‍ശമുണ്ട്. ലോകത്തിന്റെ മനം കവരുന്ന ക്ളാസിക് നൃത്തരൂപമായി മോഹിനിയാട്ടം എത്തിയതിനു പിന്നില്‍ നിരവധി പേരുടെ സംഭാവനകളുണ്ട്. എടുത്തുപറയേണ്ടത് സ്വാതി തിരുനാളിന്റെ പങ്കാണ് . സാഹിത്യത്തിലും സംഗീതത്തിലുമെല്ലാം ആഴമേറിയ പാണ്ഡിത്യമുണ്ടായിരുന്ന അദ്ദേഹം വൈവിധ്യമാര്‍ന്ന ഗാനസാഹിത്യം നല്‍കിയും അവതരണത്തില്‍ വ്യവസ്ഥാപിതത്വം വരുത്തിയും ഈ കലാരൂപത്തെ മോഹനമാക്കുന്നതില്‍ ശ്രദ്ധേയ ഇടപെടല്‍ നടത്തി. കേരള കലാമണ്ഡലവും മഹാകവി വള്ളത്തോളും നടത്തിയ പ്രയത്നങ്ങള്‍ മോഹിനിയാട്ടത്തിന് പുതിയ ഉണര്‍വുണ്ടാക്കി ശ്രേഷ്ഠ നര്‍ത്തകികളുടെ സമര്‍പ്പിത സംഭാവനകള്‍ ഭരതനാട്യം പോലുള്ള ഭാരതീയ നൃത്തങ്ങള്‍ക്കൊപ്പം മോഹിയാട്ടത്തെ ലോകശ്രദ്ധയില്‍ പ്രതിഷ്ഠിക്കുന്നതില്‍ പങ്കുവഹിച്ചു.ഇന്ത്യയുടെ ക്ളാസിക് ഭൂപടത്തില്‍ മോഹിനിയാട്ടത്തെ പ്രതിഷ്ഠിക്കുന്നതില്‍ ഡോ കനകെ റെലെയുടെ സംഭാവന മുന്നില്‍ നില്‍ക്കുന്നു. നാടകാചാര്യന്‍ കാവാലം നാരായണപണിക്കരെപോലുള്ളവരും മോഹിനിയാട്ടത്തിന് പ്രചാരവും പ്രാമുഖ്യവും കിട്ടാനായി പ്രവര്‍ത്തിച്ചവരാണ്.

മോഹിനിയാട്ടത്തെ മറ്റ് ഭാരതീയ നൃത്തരൂപങ്ങള്‍ക്കൊപ്പം ലോകശ്രദ്ധയില്‍ പ്രതിഷ്ഠിക്കുന്നതില്‍ തന്റേതായ സംഭാവന നല്‍കി യാത്രതുടരുകയാണ് ഡോ സുനന്ദ നായര്‍. സംഗീതനാടക അക്കാദമിയുടേത് ഉള്‍പ്പെടെ നിരവധി അവാര്‍ഡുകളും അംഗീകാരങ്ങളും നേടി മോഹിനിയാട്ടത്തിന്റെ ആഗോള അംബാസിഡര്‍ എന്ന പേരുമായി.

ഫോമ സെന്‍ട്രല്‍ റീജിയന്‍ (ഷിക്കാഗോ) കമ്മിറ്റി രൂപീകരിച്ചു

ഷിക്കാഗോ: ഫോമ സെന്‍ട്രല്‍ റീജിയന്റെ (ഷിക്കാഗോ) പ്രഥമ യോഗം റീജണല്‍ വൈസ് പ്രസിഡന്റ് ബിജി ഫിലിപ്പ് ഇടാട്ടിന്റെ അധ്യക്ഷതയില്‍ മോര്‍ട്ടന്‍ഗ്രോവിലുള്ള തായ് റെസ്റ്റോറന്റില്‍ വച്ചു നടത്തപ്പെട്ടു. 2018- 20 കാലയളവിലേക്കുള്ള റീജിയന്റെ പ്രവര്‍ത്തനങ്ങള്‍ക്കായുള്ള കമ്മിറ്റി ഈ പ്രഥമ യോഗത്തില്‍ വച്ച് രൂപീകരിക്കപ്പെട്ടു.

ഷിക്കാഗോയിലെ സാമൂഹ്യ-സാംസ്കാരിക രംഗത്തെ നിറസാന്നിധ്യവും ഫോമ മുന്‍ നാഷണല്‍ കമ്മിറ്റി അംഗവുമായ പീറ്റര്‍ കുളങ്ങര സെന്‍ട്രല്‍ റീജിയന്റെ ചെയര്‍മാനായും ഡോ. സാല്‍ബി പോള്‍ ചേന്നോത്ത് വൈസ് ചെയര്‍മാനായും, ബിജി സി. മാണി സെക്രട്ടറിയായും, വനിതാ പ്രതിനിധിയായി നിഷ എറിക്കും, ട്രഷററായി അച്ചന്‍കുഞ്ഞ് മാത്യുവും, ജോയിന്റ് സെക്രട്ടറിയായി ജീന്‍ പുത്തന്‍പുരയ്ക്കലും, പി.ആര്‍.ഒ ആയി സിനു പാലയ്ക്കത്തടവും, അഡൈ്വസറി കൗണ്‍സില്‍ ചെയര്‍മാനായി സ്റ്റാന്‍ലി കളരിക്കമുറിയും, മെമ്പര്‍മാരായി ജോസി കുരിശിങ്കല്‍, ജോണിക്കുട്ടി പിള്ളവീട്ടില്‍ എന്നിവരേയും യോഗം ഐക്യകണ്‌ഠ്യേന തെരഞ്ഞെടുത്തു.

പ്രസ്തുത യോഗത്തില്‍ ഫോമ നാഷണല്‍ കമ്മിറ്റി മെമ്പര്‍മാരായ ജോണ്‍ പാട്ടപ്പതി, ആഷ്‌ലി ജോര്‍ജ്, ബെന്നി വാച്ചാച്ചിറ, ജോസി കുരിശിങ്കല്‍, സണ്ണി വള്ളിക്കളം, രഞ്ചന്‍ ഏബ്രഹാം, ജിതേഷ് ചുങ്കത്ത്, ജോര്‍ജ് മാത്യു, സന്തോഷ് കാട്ടൂക്കാരന്‍, ജിജി സാം, ബിജു ഫിലിപ്പ്, സോണി തോമസ് എന്നിവര്‍ ആശംസകള്‍ നേര്‍ന്നു സംസാരിച്ചു.

നവംബര്‍ പത്താം തീയതി ശനിയാഴ്ച വൈകിട്ട് 7 മണിക്ക് മോര്‍ട്ടന്‍ഗ്രോവിലുള്ള സെന്റ് മേരീസ് ക്‌നാനായ പള്ളി ഓഡിറ്റോറിയത്തില്‍ വച്ചു ഫോമ ഷിക്കാഗോ റീജിയന്റെ നേതൃത്വത്തില്‍ നടത്തുന്ന ഫാമിലി നൈറ്റിലേക്ക് എല്ലാ മലയാളി കുടുംബങ്ങളേയും ഫോമ സെന്‍ട്രല്‍ റീജിയന്‍ എക്‌സിക്യൂട്ടീവ് കമ്മിറ്റി ഹാര്‍ദ്ദവമായി സ്വാഗതം ചെയ്തു.

ജോയിച്ചന്‍ പുതുക്കുളം

സി. സംഗീത അയിത്തമറ്റം എസ്.സി.എന്‍ പുതിയ മദര്‍ ജനറല്‍

കെന്റക്കി: സിസ്റ്റേഴ്‌സ് ഓഫ് ചാരിറ്റി ഓഫ് നസറത്തിന്റെ പുതിയ മദര്‍ ജനറാള്‍ (പ്രസിഡന്റ്) ആയി സംഗീത അയിത്തമറ്റത്തില്‍ തെരഞ്ഞെടുക്കപ്പെട്ടു. അസിസ്റ്റന്റ് ജനറാളുമാരായി സി. ജാക്വി ജേസു, സി. അഡലിന്‍ ഫെഹ്രിബിച്ച് എന്നിവരേയും തെരഞ്ഞെടുത്തു.

സി. സംഗീത അയിത്തമറ്റം എസ്.സി.എന്‍ സഭയുടെ ആദ്യത്തെ മലയാളി മദര്‍ ജനറാളാണ്. തലശേരി അതിരൂപതയിലെ ആലക്കോട്, പരപ്പ ഇടവകാംഗമാണ്.

2018 സെപ്റ്റംബര്‍ ഒന്നാംതീയതി സി. സംഗീതയുടെ നേതൃത്വത്തിലുള്ള പുതിയ കൗണ്‍സില്‍ ചുമതലയേറ്റു. 1812-ല്‍ അമേരിക്കയിലെ കെന്റക്കിയില്‍ സ്ഥാപിതമായ സന്യാസസഭയാണ് സിസ്റ്റേഴ്‌സ് ഓഫ് ചാരിറ്റി ഓഫ് നസറത്ത്.

അമേരിക്ക, യൂറോപ്പ്, ആഫ്രിക്ക, ഏഷ്യ, ഇന്ത്യ എന്നിവടങ്ങളില്‍ വിദ്യാഭ്യാസം, ആശുപത്രികള്‍, സാമൂഹിക പ്രവര്‍ത്തനം എന്നീ മേഖലകളില്‍ സഭ സേവനം ചെയ്യുന്നു. അമേരിക്കയിലെ 20 സംസ്ഥാനങ്ങളില്‍ സിസ്റ്റേഴ്‌സ് ഓഫ് നസറത്തിന്റെ സേവനം ലഭ്യമാണ്. കെന്റക്കിയിലുള്ള സ്പാല്‍ഡിങ്ങ് യൂണിവേഴ്‌സിറ്റി സഭയുടേതാണ്.

ഇന്ത്യയില്‍ കേരളം ഉള്‍പ്പടെ വിവിധ സംസ്ഥാനങ്ങളിലും സഭാംഗങ്ങള്‍ സേവനം ചെയ്യുന്നു. ആലക്കോട്, പരപ്പ അയിത്തമറ്റത്തില്‍ പരേതരായ മാത്യുവിന്റേയും മേരിയുടേയും മകളാണ് സി. സംഗീത. അഞ്ച് സഹോദരന്മാരും, അഞ്ച് സഹോദരിമാരും ഉണ്ട്.

ബിജു ആന്‍ഡ് പ്രിന്‍സി ആലുംമൂട്ടില്‍ ലോസ്ആഞ്ചലസ്, സി. എല്‍സ കോയിക്കല്‍ നോര്‍ത്ത് കരോളിന, ഫാ. ജോസ് കോയിക്കല്‍ വൈസ് പ്രൊവിന്‍ഷ്യാള്‍ ഡോണ്‍ബോസ്‌കോ ബാംഗ്ലൂര്‍ എന്നിവര്‍ സഹോദര മക്കളാണ്.

ജോര്‍ജുകുട്ടി പുല്ലാപ്പള്ളില്‍ അറിയിച്ചതാണിത്.

ജോയിച്ചന്‍ പുതുക്കുളം

മാർത്തോമ യുവജന സഖ്യം മിഡ് വെസ്റ്റ് റീജിയൻ സമ്മേളനവും കലാമേളയും ചിക്കാഗോയിൽ സെപ്റ് 22 നു

നോർത്ത് അമേരിക്കൻ മാർത്തോമ യുവജന സഖ്യം മിഡ് വെസ്റ്റ് റീജിയൻ വാർഷിക സമ്മേളനവും കലാമേളയും സെപ്റ്റമ്പർ മാസം 22 ശനിയാഴ്ച രാവിലെ 10 മണിക്ക് ചിക്കാഗോ മാർത്തോമാ യുവജന സഖ്യത്തിന്റെ ആഭിമുഖ്യത്തിൽ ചിക്കാഗോ മാർത്തോമാ പള്ളിയിൽ വച്ച് നടത്തപ്പെടുന്നു.റീജിയണൽ പ്രസിഡന്റ് റെവ ജോജി ഉമ്മൻ അദ്ധ്യക്ഷത വഹിക്കുന്ന മീറ്റിംഗിൽ ചിക്കാഗോ CSI ഇടവക വികാരി റെവ ഷിബു റജിനോൾഡ് പനച്ചിക്കൽ അച്ചൻ “Renewal of life through the word of God” എന്ന വിഷയത്തെ ആസ്പദമാക്കി മുഖ്യപ്രഭാഷണം നടത്തുകയും ചർച്ചകൾക്കു നേതൃത്വം നല്കുകയും ചെയ്യും . തുടർന്നു റീജിയണൽ യുവജന സഖ്യം അംഗങ്ങൾ പങ്കെടുക്കുന്ന കലാമേള ഉച്ച കഴിഞ്ഞു 2 മണിക്ക് ആരംഭിക്കും .

മിഡ്‌വെസ്റ് റീജിയണൽ ഉൾപ്പെടുന്ന ഡിട്രോയിറ്റ് മാർതോമ ചര്ച്ച , ചിക്കാഗോ മാർത്തോമ ചർച്ച, ചിക്കാഗോ St Thomas മാർതോമ്മാ ചർച്ച എന്നിവിടങ്ങളിൽ നിന്നുള്ള എല്ലാ യുവജന സഖ്യം അംഗങ്ങളും ഇതിൽ പങ്കെടുത്തു ഈ കോൺഫറൻസ് ഏറ്റവും വിജയ കരമാക്കി തീർക്കണം എന്ന് മിഡ്‌വെസ്റ് റീജിയണൽ യുവജന സഖ്യം വൈസ് പ്രസി:സുനിയ ചാക്കോ ,സെക്രട്ടറി ഷാലൻ ജോർജ്‌ എന്നിവർ അഭ്യർത്തിച്ചു .

പി.പി. ചെറിയാന്‍

ഹൂസ്റ്റണില്‍ നിന്നും സിര്‍സി മിഷന്‍ ഫീല്‍ഡിന് സമ്മാനമായി മഹീന്ദ്ര വാഹനം

ഹൂസ്റ്റണ്‍: മാര്‍ത്തോമ സഭയുടെ നിരവധി സുവിശേഷ, പ്രേക്ഷിത പ്രവര്‍ത്തനങ്ങള്‍ക്ക് നേതൃത്വം നല്‍കുന്ന കര്‍ണ്ണാടകയിലെ സില്‍സി മിഷന്‍ ഫീല്‍ഡിന് ഹൂസ്റ്റണ്‍ മാര്‍ത്തോമാ സമൂഹം പത്ത് ലക്ഷം വിലമതിക്കുന്ന മഹിന്ദ്ര ജീപ്പ് സമ്മാനമായി നല്‍കി.ഹൂസ്റ്റണ്‍ ഇമ്മാനുവേല്‍ മാര്‍ത്തോമാ ഇടവക വികാരിയായി പ്രവര്‍ത്തിച്ചിരുന്ന, സിര്‍സിയിലേക്ക് സ്ഥലം മാറി പോയ റവ. ജോണ്‍സന്‍ തോമസ് ഉണ്ണിത്താനച്ചന്റെ അഭ്യര്‍ത്ഥനയെ മാനിച്ചാണ് വാഹനം സംഭാവനയായി നല്‍കുന്നതിന് തീരുമാനിച്ചത്.

സാമൂഹ്യമായി പിന്നോക്കം നില്‍ക്കുന്ന വലിയൊരു ജന വിഭാഗത്തിന്റെ ഉന്നമനം ലക്ഷ്യമാക്കി ഉള്‍ ഗ്രാമങ്ങളിലെ പെണ്‍ കുട്ടികള്‍ക്ക് വേണ്ടി നടത്തുന്ന ബെഥാന്യ ഹോസ്റ്റല്‍ പ്രവര്‍ത്തനങ്ങള്‍ക്ക് ഈ വാഹനം വളരെ പ്രയോജനകരമാണെന്ന് ഉണ്ണിത്താനച്ചന്‍ പറഞ്ഞു.

സിര്‍സി മിഷ്യന്‍ ഫില്‍ഡിന്റെ ആവശ്യങ്ങള്‍ മനസ്സിലാക്കി സംഭാവനകള്‍ നല്‍കിയ എല്ലാവരോടും മുന്‍ വികാരി നന്ദി അറിയിച്ചു. സിര്‍സി മിഷന്റെ പ്രവര്‍ത്തനങ്ങള്‍ ഏകോപിപ്പിക്കുന്നതിനും, വിവിധ പ്രദേശങ്ങളിലേക്ക് ചെന്നെത്തുന്നതിനും ഈ വാഹനം വലിയ തോതില്‍ സഹായകരമാണെന്നും അച്ചന്‍ പറഞ്ഞു.

സിര്‍സി മിഷന്‍ ഫില്‍ഡ് മിഷനറിയായും സിര്‍സി സെന്റ് പോള്‍സ് മാര്‍ത്തോമാ ഇടവകയുടെ വികാരിയായും റവ. ജോണ്‍സന്‍ തോമസ് ഉണ്ണിത്താനച്ചന്‍ കുടുംബ സമേതം പ്രവര്‍ത്തിച്ചു വരുന്നു.

പി.പി. ചെറിയാന്‍

60 മിനിറ്റ്‌സ് എക്‌സിക്യൂട്ടീവ് പ്രൊഡ്യൂസറെ പുറത്താക്കി

ന്യൂയോര്‍ക്ക്: അമേരിക്കയില്‍ മാത്രമല്ല ലോകത്തെല്ലാടവും ടെലിവിഷന്‍ പ്രേക്ഷകരുടെ പ്രിയപ്പെട്ട പ്രോഗ്രാമായ ’60 മിനിട്ട്‌സിന്റെ’ എക്‌സിക്യൂട്ടീവ് പ്രൊഡ്യൂസര്‍ ജെഫ് ഫേഗറെ സി ബി എസ് ന്യൂസില്‍ നിന്നും പുറത്താക്കിയതായി നെറ്റ് വര്‍ക്ക് പ്രസിഡന്റ് ഡേവിഡ് റോഡ്‌സ് സെപ്റ്റംബര്‍ 13 ബുധനാഴ്ച പുറത്തിറക്കിയ പ്രസ്താവനയില്‍ പറയുന്നു.

കമ്പനി പോളിസിക്ക് എതിരായി പ്രവര്‍ത്തിച്ചുവെന്നാണ് പുറത്താക്കലിന് കാരണമായി ചൂണ്ടിക്കാണിക്കുന്നത്.ഈയ്യിടെ സി ബി എസ് പുറത്താക്കുന്ന മൂന്നാമത്തെ പ്രമുഖനാണ് ജെഫ്. ന്യൂസ് ആംഗര്‍ ചാര്‍ലി റോഡ്‌സിനെ കഴിഞ്ഞ നവംബറിലും, കോര്‍പറേഷന്‍ സി ഇ ഒ ലസ്ലി മൂണ്‍വെസിന ഞായറാഴ്ചയും ഇതേ കാരണത്തിന് പുറത്താക്കിയിരുന്നു.

കഴിഞ്ഞ മുപ്പത്തിയാറ് വര്‍ഷമായി ഇവിടെ പ്രവര്‍ത്തിക്കുന്ന ജെഫ്, സി ബി എസിന്റെ അമ്പതാം വാര്‍ഷിക സ്മരണിക ഈയ്യിടെയാണ് പുറത്തിറക്കിയത്.ജെഫിനെ പുറത്താക്കിയ സ്ഥാനത്തേക്ക് തല്‍ക്കാലം ബില്‍ ഓവന്‍സിനെ ചുമതല ഏല്‍പിച്ചിട്ടുണ്ട്.ജോലി സമയത്ത് സ്ത്രീ ജീവനക്കാരോടുള്ള മോശമായ പെരുമാറ്റമാണ് ജെഫിന്റെ പുറത്താക്കലിന് മറ്റൊരു കാരണമായി ചൂണ്ടിക്കാണിക്കുന്നത്.

ഫോമ സണ്‍ഷൈന്‍ റീജിയന്‍ പ്രവര്‍ത്തനോദ്ഘാടനം 22-ന്

ഫ്‌ളോറിഡ: ഓര്‍ലാന്റോയിലെ ജോര്‍ജ് ഡി. പാര്‍ക്കിന്‍സ് സിവിക് സെന്റര്‍ ഹാളില്‍ വച്ചു ഫോമ സണ്‍ഷൈന്‍ റീജിയന്റെ പ്രവര്‍ത്തനോദ്ഘാടന ചടങ്ങ് സെപ്റ്റംബര്‍ 22-നു ശനിയാഴ്ച നടത്തുന്നു. സണ്‍ഷൈന്‍ റീജിയന്‍ ആര്‍.വി.പി ബിജു തോണിക്കടവിലിന്റെ അധ്യക്ഷതയില്‍ ചേരുന്ന യോഗത്തില്‍ ഫോമ നാഷണല്‍ പ്രസിഡന്റ് ഫിലിപ്പ് ചാമത്തില്‍ ഉദ്ഘാടനം നിര്‍വഹിക്കും.

ഫോമ ജനറല്‍ സെക്രട്ടറി ജോസ് ഏബ്രഹാം, ട്രഷറര്‍ ഷിനു ജോസഫ്, ജോയിന്റ് സെക്രട്ടറി ഷാജു ജോസഫ്, ഫോമ സണ്‍ഷൈന്‍ റീജിയന്‍ നാഷണല്‍ കമ്മിറ്റി മെമ്പര്‍ പൗലോസ് കുയിലാടന്‍, നോയല്‍ മാത്യു, വിമന്‍സ് റെപ്രസന്റേറ്റീവ് അനു ഉല്ലാസ്, മുന്‍ ആര്‍.വി.പി ബിനു മാമ്പിള്ളി എന്നിവര്‍ പ്രസംഗിക്കും.

ചടങ്ങില്‍ സണ്‍ഷൈന്റെ കീഴിലുള്ള എല്ലാ അസോസിയേഷനുകളുടേയും പങ്കാളിത്തത്തോടെ അണിയിച്ചൊരുക്കുന്ന വിവിധ കലാപരിപാടികള്‍ ഉണ്ടായിരിക്കും. ദയ കാമ്പയില്‍, നോയല്‍ മാത്യു, പൗലോസ് കുയിലാടന്‍ എന്നിവര്‍ കലാപരിപാടികള്‍ക്ക് നേതൃത്വം നല്‍കും.

സണ്‍ഷൈന്‍ റീജിയന്റെ ഉദ്ഘാടനത്തോടനുബന്ധിച്ച് നടക്കുന്ന എല്ലാ പ്രവര്‍ത്തനങ്ങളുടേയും വിജയത്തിനായി അസോസിയേഷന്‍ പ്രസിഡന്റുമാരായ സണ്ണി കൈതമറ്റം, സോളി വേണാട്, സജി കരിമ്പന്നൂര്‍, ജോമോള്‍ ഫിലിപ്പ്, ഡോ. ജഗതി നായര്‍, സാം പാറത്തുണ്ടില്‍, ജോബി പൊന്നുംപുരയിടം, നിനു വിഷ്ണു, ജോയ് തോമസ് എന്നിവരും പ്രവര്‍ത്തനരംഗത്ത് ഉണ്ടായിരിക്കുമെന്നു സണ്‍ഷൈന്‍ ആര്‍.വി.പി ബിജു തോണിക്കടവ് അറിയിച്ചു.

ജോയിച്ചന്‍ പുതുക്കുളം

ചിക്കാഗോ സോഷ്യല്‍ ക്ലബ്ബ് അന്താരാഷ്ട്ര വടംവലി മത്സരം: താമ്പാ ടസ്‌കേഴ്‌സിന് ഉജ്ജ്വലവിജയം

നോര്‍ത്ത് അമേരിക്കന്‍ മലയാളി കായിക ചരിത്രത്തില്‍ പുതിയൊരി അദ്ധ്യായം എഴുതിച്ചേര്‍ത്തുകൊണ്ട് ചിക്കാഗോ സോഷ്യല്‍ ക്ലബ്ബിന്റെ 6-ാമത് അന്തര്‍ദേശീയ വടംവലി മത്സരത്തിന് തിരശ്ശീല വീഴുമ്പോള്‍ 2016, 2017 ലെ ചാമ്പ്യന്മാരായ കുവൈറ്റ് കെ.കെ.ബി. ടീമിനെ ഒന്നിനെതിരെ രണ്ടു സെറ്റുകള്‍ക്ക് തറപറ്റിച്ചുകൊണ്ട് താമ്പാ ടസ്‌ക്കേഴ്‌സ് നെടിയകാലായില്‍ മാണി മെമ്മോറിയല്‍ എവര്‍റോളിംഗ് ട്രോഫിയും ജോയി നെടിയകാല സ്‌പോണ്‍സര്‍ ചെയ്ത 5001 ഡോളറും കരസ്ഥമാക്കിയ അവിസ്മരണീയ നിമിഷങ്ങള്‍ക്കാണ് ചിക്കാഗോ സെന്റ് മേരീസ് മൈതാനം സാക്ഷ്യം വഹിച്ചത്.

രണ്ടാം സ്ഥാനം ഫിലിപ്പ് മുണ്ടപ്ലാക്കല്‍ സ്‌പോണ്‍സര്‍ ചെയ്ത 3001 ഡോളറും ജോയി മുണ്ടപ്ലാക്കല്‍ മെമ്മോറിയല്‍ എവര്‍റോളിംഗ് ട്രോഫിയും കുവൈറ്റ് കെ.കെ.ബി. ടീം കരസ്ഥമാക്കിയപ്പോള്‍ മൂന്നാം സ്ഥാനം സാബു പടിഞ്ഞാറേല്‍ സ്‌പോണ്‍സര്‍ ചെയ്ത 2001 ഡോളറും ജോര്‍ജ്ജ് പടിഞ്ഞാറേല്‍ മെമ്മോറിയല്‍ എവര്‍റോളിംഗ് ട്രോഫിയും കാനഡ ഗ്ലാഡിയേറ്റേഴ്‌സ് കരസ്ഥമാക്കി. നാലാം സ്ഥാനം ചിക്കാഗോ മംഗല്യ ജൂവല്ലേഴ്‌സ് സ്‌പോണ്‍സര്‍ ചെയ്ത 1001 ഡോളറും എവര്‍റോളിംഗ് ട്രോഫിയും ന്യൂയോര്‍ക്ക് കിംഗ് കോബ്‌സ് കരസ്ഥമാക്കി. ടൂര്‍ണമെന്റ് എം.വി.പി. യായി താമ്പാ ടസ്‌കേഴ്‌സിന്റെ ജയിന്‍ മൂലക്കാട്ട്, ബെസ്റ്റ് ഫ്രണ്ട് ആയി കുവൈറ്റ് കെ.കെ.ബി. യുടെ സമദ്, ബെസ്റ്റ് ബാക്കായി കാനഡ ഗ്ലാഡിയേറ്റേഴ്‌സിന്റെ ശരത്ത്, ബെസ്റ്റ് ടീം ആയി കാനഡ ഗ്ലാഡിയേറ്റേഴ്‌സിനെയും തെരഞ്ഞെടുത്തു.

ടൂര്‍ണമെന്റ് ഉദ്ഘാടനം ചെയ്തത് മോര്‍ട്ടന്‍ഗ്രോവ് മേയര്‍ ങൃ. ഉമി ഉശാമൃശമ ആണ്. തുടര്‍ന്നു നടന്ന ഓണാഘോഷവും പൊതുയോഗവും സെന്റ് മേരീസ് പള്ളി അസി. വികാരി ഫാ. ബിന്‍സ് ചേത്തല ഉദ്ഘാടനം ചെയ്തു. നാട്ടില്‍ പോലും കാണാന്‍ കഴിയാത്ത വമ്പിച്ച ജനാവലി പങ്കെടുത്ത വടംവലി മത്സരവും ഓണാഘോഷവും ചെണ്ടമേളങ്ങളും ഒക്കെ മലയാളികളുടെ ഗൃഹാതുര സ്മരണകളെ ഉണര്‍ത്തുവാന്‍ പര്യാപ്തമാണെന്ന് ബിന്‍സച്ചന്‍ പറഞ്ഞു.

തുടര്‍ന്ന് പ്രസിഡന്റ് അലക്‌സ് പടിഞ്ഞാറേലിന്റെ അദ്ധ്യക്ഷതയില്‍ ചേര്‍ന്ന പൊതുയോഗത്തില്‍ വൈസ് പ്രസിഡന്റ് സജി മുല്ലപ്പള്ളി സ്വാഗതവും, സെക്രട്ടറി ജോസ് മണക്കാട്ട് ആശംസയും, ട്രഷറര്‍ മാനി കരികുളം കൃതജ്ഞതയും പറഞ്ഞു. വടംവലി കമ്മിറ്റി ചെയര്‍മാന്‍ സിറിയക്ക് കൂവക്കാട്ടില്‍ വടംവലി വിജയികളെ പ്രഖ്യാപിച്ചു. വളരെ ചിട്ടയോടും കൃത്യനിഷ്ഠയോടെയും നടത്തിയ ഈ പരിപാടിക്ക് സോഷ്യല്‍ ക്ലബ്ബ് ഒറ്റക്കെട്ടായി പ്രവര്‍ത്തിച്ചതാണ് ഇതിന്റെ വിജയം എന്ന് പ്രസിഡന്റ് അലക്‌സ് പടിഞ്ഞാറേല്‍ പറഞ്ഞു.

ഈ പരിപാടി വിജയിപ്പിക്കാന്‍ സഹായിച്ച കെ.വി. ടി.വി., ഏഷ്യാനെറ്റ്, ഫ്‌ളവേഴ്‌സ് ടി.വി., ഫാന്‍സി വീഡിയോ, സംഗമം പത്രം, കേരള എക്‌സ്പ്രസ്സ്, ജോയിച്ചന്‍ പുതുകുളം, ക്‌നാനായ വോയ്‌സ്, ഫോട്ടോഗ്രാഫര്‍ മോനു വര്‍ഗ്ഗീസ്, റഫറിമാരായ ജോസ് ഇടിയാലി, നിണല്‍ മുണ്ടപ്ലാക്കല്‍, കമന്റേറ്റേഴ്‌സ് ആയ സജി പൂതൃക്കയില്‍, റൊണാള്‍ഡ് പൂക്കുമ്പേല്‍, സ്വാദിഷ്ടമായ ഓണസദ്യയൊരക്കിയ മലബാര്‍ കാറ്ററിംഗ് തുടങ്ങി എല്ലാവരോടും നന്ദി സംഘാടകസമിതി അറിയിച്ചു.

കൂടാതെ പങ്കെടുത്ത എല്ലാ ടീമുകള്‍ക്കും, ചിക്കാഗോയിലെയും നോര്‍ത്ത് അമേരിക്കയിലെയും എല്ലാ വടംവലി ആരാധകര്‍ക്കും, ലോകമെമ്പാടും തത്സമയം കെ.വി. ടി.വി. യിലൂടെ കണ്ട എല്ലാ പ്രേക്ഷകര്‍ക്കും, മത്സരം നടത്തുന്നതിനായി ഈ മൈതാനം തന്ന സെന്റ് മേരീസ് ചര്‍ച്ചിനും, ഈ ടൂര്‍ണമെന്റിന്റെ മെഗാ സ്‌പോണ്‍സറായ പേരന്റ് പെട്രോളിയത്തിനും, ഞങ്ങളെ സാമ്പത്തികമായി സഹായിച്ച എല്ലാ സ്‌പോണ്‍സര്‍മാര്‍ക്കും, ചിക്കാഗോയിലെ മറ്റ് മലയാളി ക്ലബ്ബുകള്‍ക്കും, മേയര്‍ ഡാന്‍ ഡിമരിയയ്ക്കും, ഔട്ട് സ്റ്റാന്റിംഗ് പെര്‍ഫോമന്‍സ് കാഴ്ചവച്ച ഫസ്റ്റ് എയ്ഡ് കമ്മിറ്റി, മറ്റ് വിശിഷ്ടാതിഥികള്‍ എന്നിവരോടും അതിനുമപ്പുറം ഇത് വന്‍ വിജയമാക്കിത്തീര്‍ത്ത സോഷ്യല്‍ ക്ലബ്ബിലെ എല്ലാ മെമ്പര്‍മാരോടും നന്ദിയും കടപ്പാടും അറിയിക്കുന്നു.

മാത്യു തട്ടാമറ്റം അറിയിച്ചതാണിത്.

ജോയിച്ചന്‍ പുതുക്കുളം

2018 കൊളംബസ് നസ്രാണി പുരസ്കാരം ബിനോയ് റപ്പായിക്ക്

ഒഹായിയോ: അമേരിക്കയിലെ സെന്‍റ് മേരീസ് സീറോ മലബാര്‍ കൊളംബസ് മിഷനെ കാരുണ്യത്തിന്‍റെ വലിയ ഉയരങ്ങളിലേക്ക് കൈ പിടിച്ചു ഉയര്‍ത്തിയ ബിനോയ് റപ്പായിയുടെ അക്ഷീണ പ്രവര്‍ത്തനങ്ങള്‍ ആണ് അദ്ദേഹത്തെ കൊളംബസ് നസ്രാണി പുരസ്കാരത്തിന് അര്‍ഹനാക്കി. മുന്നൂറോളം ഭവന രഹിതരായ അമേരിക്കകാര്‍ക് ഒരു നേരത്തെ ഭക്ഷണം ഈസ്റ്റര്‍ നോമ്പ് കാലങ്ങളില്‍ എത്തിച്ചുകൊടുത്ത വൈ.ഡബ്ല്യു.സി.എ ചാരിറ്റി ഇവന്‍റ് സംഘടിപ്പിച്ചു കൊണ്ട് ആണ് ബിനോയ് തന്റെ പ്രവര്‍ത്തനങ്ങള്‍ക്കു തുടക്കം ഇട്ടത്. മിഷന്‍ ഡയറക്ടര്‍ റവ.ഫാ. ദേവസ്സ്യ കാനാട്ടിനോടൊന്നിച്ചു അദ്ദേഹം തുടങ്ങിയ, അന്നന്നപ്പത്തിനായി കഷ്ടപ്പെടുന്ന കേരളത്തിലെ ആറു നിര്‍ദ്ധന കുടുംബങ്ങള്‍ക്ക് എല്ലാ മാസവും പണം എത്തിച്ചു കൊടുക്കുന്ന സംരംഭം ഇന്നും ഒരു മുടക്കവും കൂടാതെ തുടര്‍ന്നു കൊണ്ടിരിക്കുന്നു. മിഷന്റെ ചരിത്രത്തില്‍ ആദ്യമായി കൊളംബസിലെ ജനങ്ങളെ ഒരുമിച്ചു കൂട്ടി ബിനോയ് സംഘടിപ്പിച്ച ബ്ലഡ് ഡോണെഷന്‍ െ്രെഡവ് ഒരു വന്‍ വിജയം ആയിരുന്നു. അമേരിക്കയിലെ കാരാഗ്രഹങ്ങളില് കഴിയുന്നവരിലേക്കു കാരുണ്യം എത്തിക്കുന്ന കൈറോസ് സംഘടനയെ കൊളംബസ് മിഷനിലേക്കു പരിചയപ്പെടുത്തിയ ക്യാമ്പയിന്‍ ബിനോയ് സംഘടിപ്പിച്ചു.

ഒഹായിയോയില്‍ വച്ചു നടന്ന പരിശുദ്ധ കന്യകാ മറിയത്തിന്റെ തിരുന്നാള്‍ ആഘോഷങ്ങളോടനുബന്ധിച്ചു കൊളംബസ് കത്തോലിക്കാ രൂപതാ മെത്രാന്‍ മാര്‍ ഫ്രെഡറിക് ഫ്രാന്‍സിസ് ക്യാമ്പെല്‍ ആണ് ബിനോയ്ക്ക് പുരസ്കാരം നല്‍കിയത്

തൃശൂര്‍ രൂപതയിലെ ഒല്ലൂര്‍ ഇടവകാംഗങ്ങള്‍ ആയ പി. എ. റപ്പായി പ്രെമി റപ്പായി ദമ്പതികളുടെ മകന്‍ ആണ് . ഭാര്യ ആന്‍സി. മക്കള്‍ കാതറിന്‍, ക്രിസ്റ്റീന, ക്രിസ്റ്റല്‍.

കോളുമ്പസില്‍ നിന്നും പി.ആര്‍.ഓ. റോസ്മി അരുണ്‍ അറിയിച്ചതാണ് ഈ വാര്‍ത്ത.

ജോയിച്ചന്‍ പുതുക്കുളം

സ്റ്റാറ്റന്‍ ഐലന്റ് ഹിന്ദു ക്ഷേത്രം ദുരിതാശ്വാസ നിധി കൈമാറി

ന്യുയോര്‍ക്ക്: പ്രളയത്തി ദുരിതത്തില്‍ പെട്ട കേരളീയര്‍ക്ക് സഹായവുമായി സ്റ്റാറ്റന്‍ ഐലന്റ് ഹിന്ദു ക്ഷേത്രവും. ദുരിതാശ്വാസ പ്രവര്‍ത്തനങ്ങള്‍ക്കായി ക്ഷേത്രത്തിലെത്തുന്ന ഭക്തരില്‍ നിന്ന് നിധി ശേഖരണം നടത്തി. രണ്ടു ദിവസം കൊണ്ട് ആറു ലക്ഷത്തോളം രുപ സ്വരൂപിക്കാനായി. ക്ഷേത്രം ഭരണസമിതി അംഗം ഡോ എസ് രാമചന്ദ്രന്‍ നായര്‍ കേരളത്തിലെത്തി തുക കൈമാറി. തിരുവല്ല ചക്കുളത്ത് കാവിലെ ദുരിതാശ്വാസ ക്യാമ്പില്‍ നടന്ന ചടങ്ങില്‍ സേവാഭാരതി കോര്‍ഡിനേറ്റര്‍ പ്രസാദ് ബാബു തുക ഏറ്റുവാങ്ങി.

പ്രളയം വിതച്ച ദുരിതത്തിനിടയിലും സേവനത്തിന്റേയും സഹകരണത്തിന്റേയും നല്ല കാഴ്ചകള്‍ ഉണ്ടായത് പ്രതീക്ഷ നല്‍കുന്ന കാര്യമാണെന്ന് ഡോ എസ് രാമചന്ദ്രന്‍ നായര്‍ പറഞ്ഞു.നിഷ്‌കാമ കര്‍മ്മം എന്ന ഹിന്ദു മതത്തിന്റെ അടിസ്ഥാന മൂല്യങ്ങല്‍ ഉയര്‍ത്തിപ്പിടിച്ച് പ്രവര്‍ത്തിച്ച എല്ലാവരും അഭിനന്ദനം അര്‍ഹിക്കുന്നതായും അദ്ദേഹം സൂചിപ്പിച്ചു. സുനാമി സമയത്തും സ്റ്റാറ്റന്‍ ഐലന്റ് ഹിന്ദു ക്ഷേത്രം സേവാഭാരതി മുഖേന കേരളത്തില്‍ ദിരിതാശ്വാസ പ്രവര്‍ത്തനം നടത്തിയ കാര്യവും രാമചന്ദ്രന്‍ നായര്‍ അനുസ്മരിച്ചു.

സുപ്രഭാ നായര്‍, ശാരദാമ്മ, സേവാഭാരതി ഭാരവാഹികളായ ടി എസ് അജയകുമാര്‍, ഒ കെ അനില്‍, ശ്രീനീഷ്, പി ശ്രീകുമാര്‍, തുടങ്ങിയവര്‍ സന്നിഹിതരായിരുന്നു.