പ്രളയബാധിതര്‍ക്ക് ആശ്വാസമായ് അമേരിക്കയിലെ എന്‍.ആര്‍.ഐ അസോസിയേഷനുകള്‍

കേരളത്തിലെ പ്രളയമേഖലയില്‍ ദുരിതമനുഭവിക്കുന്നവര്‍ക്ക് ആശ്വാസമായ് അമേരിക്കയിലെ എന്‍.ആര്‍.ഐ അസോസിയേഷനുകള്‍ മുന്നോട്ട് വരുന്നു. പ്രവാസികള്‍ക്ക് അവരുടെ നാട്ടില്‍ നേരിട്ട് സഹായമെത്തിക്കുവാനുള്ള അവസരമാണിത്. എസ്.ടു.വി സൊസൈറ്റിയാണ് ഈ പ്രവര്‍ത്തനങ്ങളുടെയെല്ലാം മേല്‍നോട്ടം വഹിക്കുന്നത്. ഓരോ മേഖലയിലുീ പരിശീലനം ലഭിച്ച വോളന്റിയേഴ്‌സിനെ എസ്.ടു.വി സൊസൈറ്റി തിരഞ്ഞെടുത്തിട്ടുണ്ട്. മൊബൈല്‍ ആപ്ലിക്കേഷനില്‍ എല്ലാ വോളന്റിയേഴ്‌സും ലോഗിന്‍ ചെയ്ത് അവരുടെ പ്രവര്‍ത്തനങ്ങള്‍ രേഖപ്പെടുത്താവുന്നതാണ്. സ്‌പോണ്‍സര്‍ ചെയ്യുന്ന വ്യക്തികള്‍ക്ക് അവരുടെ ലോഗിന്‍ ഉപയോഗിച്ച് വോളന്റിയര്‍മാരുടെ വിവരങ്ങളും പ്രവര്‍ത്തനങ്ങളും വിലയിരുത്താന്‍ സാധിക്കും. ഇതു വഴി സ്‌പോണ്‍സിന് അവരുടെ പണം ശരിയായ് വിനിയോഗിക്കുന്നുണ്ടോയെന്ന് ഉറപ്പ് വരുത്താന്‍ സാധിക്കും.

ഈ പദ്ധതിയുടെ ഉദ്ഘാടനം കോട്ടയം ജില്ലയിലെ വടയാറില്‍ സെപ്റ്റംബര്‍ മൂന്നിന് നടക്കുന്ന മെഗാ മെഡിക്കല്‍ ക്യാംപില്‍ വച്ചായിരിക്കും. അവിടുത്തെ റോട്ടറി ക്ലബ്, പഞ്ചായത്ത്, വിശ്വാസ് തുടങ്ങിയവയുടെ നേതൃത്വത്തിലാണ് മെഡിക്കല്‍ ക്യാംപ് നടക്കുന്നത്. മെഡിക്കല്‍ ക്യാംപില്‍ പങ്കെടുക്കുന്നവര്‍ക്ക് സൗജന്യമായ് മരുന്നുകളും അത്യാവശ്യ സാധനങ്ങളായ അരി, വീട്ടുപകരണങ്ങള്‍, പഠനോപകരണങ്ങള്‍, പുതപ്പ്, പായ, വസ്ത്രങ്ങള്‍ തുടങ്ങിയവയും ശുചീകരണ കിറ്റും വിതരണം ചെയ്യുന്നതാണ്.

മെഡിക്കല്‍ ക്യാംപിനോടൊപ്പം വെള്ളപ്പൊക്കമുണ്ടായ മേഖലകളില്‍ സര്‍വേയും വോളന്റിയേഴ്‌സ് മുഖാന്തരം നടത്തും. വെള്ളത്തിന്റെ ഗുണമേന്‍മ പരിശോധിച്ച് ശുദ്ധജലത്തിന്റെ ലഭ്യത ഉറപ്പാക്കുന്നു. പ്രളയബാധിത മേഖലകളിലുള്ള സ്കൂള്‍, ലൈബ്രറി, വെയ്റ്റിംഗ് ഷെഡ് എന്നിവിടങ്ങളില്‍ വെള്ളം പൊങ്ങിയതിന്റെ അളവ് വോളന്റിയേഴ്‌സ് രേഖപ്പെടുത്തും. ഈ പദ്ധതി വഴി ജലം ശുദ്ധീക്കുവാനുള്ള ഉപകരണം പൊതുസ്ഥലളില്‍ സ്ഥാപിക്കും.

തിങ്കളാഴ്ചത്തെ മെഡിക്കല്‍ ക്യാംപ് കൂടാതെ തുടര്‍ ക്യാംപുകളും സര്‍വേകളും നടത്തി വടയാര്‍ ഹെല്‍ത്ത് ആന്റ ഡിസാസ്റ്റര്‍ ബുക്ക് പ്രകാശനം ചെയ്യും. ഇതില്‍ വടയാര്‍ നടന്ന മെഡിക്കല്‍ ക്യാംപുകളുടെയും സര്‍വേകളുടെയും ഫലങ്ങള്‍ പ്രസിദ്ധീകരിക്കും. കൂടാതെ പകര്‍ച്ചവ്യാധികളും വെള്ളപ്പൊക്കവും തടയുവാനും അവ നേരിടുവാനുമുള്ള നിര്‍ദ്ദേശങ്ങള്‍ ബുക്കിലുണ്ടായിരിക്കും. വെള്ളം പൊങ്ങിയ പ്രദേശങ്ങള്‍ ഉള്‍ക്കൊള്ളിച്ച് ഒരു മാപ് ബുക്കില്‍ ഉള്‍പ്പെടുത്തും. റോട്ടറി ക്ലബ് പ്രസിഡന്റ് രാജു തോമസ്, സെക്രട്ടറി ഐജു നീരക്കല്‍, പ്രതിനിധികളായ ഷിജോ മാത്യു, ഷൈന്‍, വിശ്വാസിന്റെ പ്രസിഡന്റ് ജോസ് ജോസഫ് ചക്കുങ്കല്‍, സെക്രട്ടറി എം. കെ തോമസ് പ്രതിനിധികളായ ജോളി തോമസ്, വാര്‍ഡ് മെമ്പറായ നിമ്മി മാര്‍ട്ടിന്‍ തുടങ്ങിയവരാണ് ഈ പദ്ധതിക്കു വേണ്ട ഒരുക്കങ്ങള്‍ നടത്തുന്നതും മെഡിക്കല്‍ ക്യാംപുകള്‍ സംഘടിപ്പിക്കുന്നതുീ. എന്‍.ആര്‍.ഐ അസോസിയേഷനുകളെ പ്രതിനിധീകരിച്ച് ഹ്യൂസ്റ്റ്ണില്‍ നിന്നും പയസ്, ചിക്കാഗോയില്‍ നിന്നുള്ള ജോജോ എന്നിവരാണ് ഈ പദ്ധതിക്ക് പിന്നില്‍ പ്രവര്‍ത്തിക്കുന്നവര്‍.

എസ്.ടു.വി സൊസൈറ്റിയാണ് ഈ പദ്ധതി ഓര്‍ഗനൈസ് ചെയ്യുന്നത്. പദ്ധതിയുമായ് സഹകരിക്കുവാന്‍ താത്പര്യമുള്ളവര്‍ എസ്.ടു.വി സൊസൈറ്റിയുടെ വെബ്‌സൈറ്റില്‍ രജിസ്റ്റര്‍ ചെയ്യുക. http://s2vsocitey.in/

ജോയിച്ചന്‍ പുതുക്കുളം

ഇല്ലിനോയി മലയാളി അസോസിയേഷന്‍ രാജാ കൃഷ്ണമൂര്‍ത്തിയുമായി ചര്‍ച്ച നടത്തി

അമേരിക്കന്‍ കോണ്‍ഗ്രസിലെ കോണ്‍ഗ്രസ് മാന്‍ രാജാകൃഷ്ണമൂര്‍ത്തിയുമായി ഇല്ലിനോയി മലയാളി അസോസിയേഷന്‍ പ്രതിനിധി സംഘം പ്രസിഡന്റ് ജോര്‍ജ് പണിക്കരുടെ നേതൃത്വത്തില്‍ കേരളത്തിന്റെ പുനര്‍നിര്‍മ്മാണത്തെപ്പള്ളി ചര്‍ച്ച നടത്തി. കേരളത്തിന്റെ ഇപ്പോഴത്തെ അവസ്ഥയില്‍ നമ്മുടെ സഹോദരങ്ങളെ ഏതൊക്കെ രീതിയില്‍ സഹയിക്കാനുകുമെന്നുള്ള ചിന്തകളില്‍ ഉയര്‍ന്നുവന്ന ആശയമാണ് ഈ കൂടിക്കാഴ്ചയ്ക്ക് വഴിതെളിച്ചത്.

ഏകദേശം 30 മിനിറ്റോളം നീണ്ട ചര്‍ച്ചകളില്‍ കേരളത്തിന്റെ പുനര്‍നിര്‍മ്മിതിയില്‍ അമേരിക്കന്‍ ഗവണ്‍മെന്റില്‍ നിന്നും, വിവിധ നോണ്‍ ഗവണ്‍മെന്റല്‍ ഏജന്‍സികളില്‍ നിന്നും എങ്ങനെ സഹായം ലഭിക്കാമെന്നും, അതിന്റെ വിവിധ വശങ്ങളെപ്പറ്റിയും സംസാരിക്കുകയുണ്ടായി. കേരളാ ഗവണ്‍മെന്റുമായും ആശയവിനിമയം നടത്താന്‍ തന്റെ സെക്രട്ടറിയും, മലയാളിയുമായ അറ്റോര്‍ണി സാഹി ഏബ്രഹാമിനെ ഉടന്‍തന്നെ ചുമതലപ്പെടുത്തി. കേരളാ ഗവണ്‍മെന്റില്‍ നിന്നും മറുപടി ലഭിച്ചാല്‍ ഉടന്‍തന്നെ തന്റെ പരിധിയില്‍ നിന്നുകൊണ്ട് അമേരിക്കന്‍ ഗവണ്‍മെന്റ് വഴിയും മറ്റു ഏജന്‍സികളുമായി സഹകരിച്ച് കേരളത്തെ സഹായിക്കന്നതില്‍ തനിക്കും സന്തോഷമേ ഉള്ളുവെന്നും രാജാ പ്രതിനിധി സംഘത്തോട് പറഞ്ഞു.

ഇല്ലിനോയിയിലെ എട്ടാമത് ഡിസ്ട്രിക്ടില്‍ നിന്നും രണ്ടാം തവണ ഈ നവംബറില്‍ മത്സരത്തെ നേരിടുകയാണ് രാജാ കൃഷ്ണമൂര്‍ത്തി. തന്റെ തിരക്കുപിടിച്ച പരിപാടികള്‍ക്കിടയില്‍ ഇല്ലിനോയി മലയാളി അസോസിയേഷന്‍ പ്രതിനിധികളെ കാണാന്‍ സമയം കണ്ടെത്തിയ കോണ്‍ഗ്രസ് മാനെ ജോര്‍ജ് പണിക്കര്‍ നന്ദി അറിയിച്ചു.

സെക്രട്ടറി വന്ദന മാളിയേക്കല്‍, സീനിയര്‍ വൈസ് പ്രസിഡന്റ് റോയി മുളങ്കുന്നം, വൈസ് പ്രസിഡന്റ് ജോര്‍ജ് മാത്യൂസ് എന്നിവരും പ്രതിനിധിസംഘത്തിലുണ്ടായിരുന്നു.

ജോയിച്ചന്‍ പുതുക്കുളം

128-മത് സാഹിത്യ സല്ലാപം ‘പ്രളയ ദുരിതാശ്വാസം’ ചര്‍ച്ച

ഡാലസ്: 2018 സെപ്റ്റംബര്‍ ഒന്നാം തീയതി ശനിയാഴ്ച സംഘടിപ്പിക്കുന്ന നൂറ്റിയിരുപത്തിയെട്ടാമത് അമേരിക്കന്‍ മലയാളി സാഹിത്യ സല്ലാപം കേരളത്തിലെ ‘പ്രളയ ദുരിതാശ്വാസം’ എന്ന വിഷയമാണ് ചര്‍ച്ച ചെയ്യുന്നത്. കേരളം കണ്ട മഹാപ്രളയത്തില്‍ ജീവനും സ്വത്തും നഷട്ടപ്പെട്ടവരുടെ ദുഃഖത്തില്‍ പങ്കു ചേരുന്നതിനും അവര്‍ക്ക് ആവശ്യമായ ആശ്വാസ നടപടികള്‍ എന്തൊക്കെ ആയിരിക്കണം എന്ന് വിശദീകരിക്കുവാനുമായിട്ടാണ് ഈ ചര്‍ച്ച. അമേരിക്കന്‍ മലയാളികള്‍ സകല രാഷ്ട്രീയ വൈരവും മറന്ന് പുതുകേരള സൃഷ്ടിക്കായി നിലവിലുള്ള കേരള സര്‍ക്കാരുമായി കൈകൊര്‍ക്കേണ്ടതിന്‍റെ ആവശ്യകത ഈ സല്ലാപത്തില്‍ ചര്‍ച്ച ചെയ്യുന്നതാണ്. അമേരിക്കന്‍ മലയാളികളുമായി ബന്ധപ്പെട്ട സാമൂഹിക സാഹിത്യ സാംസ്കാരിക ഭാഷാ വിഷയങ്ങള്‍ സമഗ്രമായി ചര്‍ച്ച ചെയ്യുവാന്‍ താത്പര്യമുള്ള സഹൃദയരായ എല്ലാ നല്ല ആളുകളെയും ഭാഷാസ്നേഹികളെയും അമേരിക്കന്‍ മലയാളി സാഹിത്യ സല്ലാപത്തിലെയ്ക്ക് സ്വാഗതം ചെയ്യുന്നതായി ഭാരവാഹികള്‍ അറിയിച്ചു.

2018 ഓഗസ്റ്റ്‌ നാലാം തീയതി ശനിയാഴ്ച സംഘടിപ്പിച്ച നൂറ്റിയിരുപത്തിയേഴാമത് അമേരിക്കന്‍ മലയാളി സാഹിത്യ സല്ലാപം ‘അമേരിക്കയിലെ മലയാള ഭാഷാ പഠനം’ എന്ന വിഷയമാണ് ചര്‍ച്ച ചെയ്തത്. ഓസ്ടിനിലുള്ള യൂണിവേഴ്സിറ്റി ഓഫ് ടെക്സാസിലെ മലയാള ഭാഷാദ്ധ്യപികയായ ഡോ. ദര്‍ശന ശശിയാണ് ഈ വിഷയത്തില്‍ പ്രബന്ധം അവതരിപ്പിച്ചത്‌. ന്യൂയോര്‍ക്കിലെ ഗുരുകുലം മലയാളം സ്കൂളിനു നേതൃത്വം നല്‍കുന്ന ജെ. മാത്യൂസ്‌ മലയാള ഭാഷാധ്യാപനത്തിന്‍റെ പ്രായോഗിക ബുദ്ധിമുട്ടുകള്‍ വിശദീകരിച്ചു. കൂടാതെ മലയാള ഭാഷാഭ്യസനവുമായി ബന്ധപ്പെട്ട പ്രമുഖ ഭാഷാ പണ്ഡിതരായ അമേരിക്കന്‍ മലയാളികള്‍ ചര്‍ച്ചയില്‍ പങ്കെടുത്ത് സല്ലാപം വിജ്ഞാന പ്രദമാക്കി. ഔദ്യോഗികവും അല്ലാത്തതുമായ ഭാഷാധ്യാപനത്തിന്‍റെ പ്രായോഗിക വശങ്ങളും ഗുണദോഷങ്ങളും വിശദമായി ചര്‍ച്ച ചെയ്യുകയുണ്ടായി.

നാട്ടിലേയ്ക്ക് സ്ഥിരതാമസത്തിനായി പോകുന്ന സാഹിത്യ സല്ലാപത്തിന്‍റെ സജീവാംഗവും പ്രമുഖ സംഘാടകനുമായ മനോഹര്‍ തോമസിന് സാഹിത്യ സല്ലാപത്തിന്‍റെ പേരില്‍ യാത്രാമംഗളങ്ങള്‍ നേരുകയുണ്ടായി.

ചെറിയാന്‍ കെ. ചെറിയാന്‍, ജോര്‍ജ്ജ് മണ്ണിക്കരോട്ട്, സാമുവേല്‍ കൂടല്‍, സി. എം. സി., ബാബുജി മാരാമണ്‍ കാനഡ, ജോണ്‍ ആറ്റുമാലില്‍, അച്ചാമ്മ ചന്ദ്രശേഖരന്‍, സാമുവേല്‍ എബ്രഹാം, രാജമ്മ തോമസ്‌, ജോര്‍ജ്ജ് വര്‍ഗീസ്, അബ്ദുല്‍ പുന്നയൂര്‍ക്കളം, മാത്യു നെല്ലിക്കുന്ന്, ഡോ. രാജന്‍ മര്‍ക്കോസ്, രാജു തോമസ്‌, ജോസഫ്‌ പൊന്നോലി, കുര്യാക്കോസ്, ഡോ. എന്‍. പി. ഷീല, വര്‍ഗീസ്‌ എബ്രഹാം ഡെന്‍വര്‍, സജി, ജേക്കബ്‌ തോമസ്‌ വിളയില്‍, ചാക്കോ ജോര്‍ജ്ജ്, അലക്സാണ്ടര്‍ മേപ്പിള്‍ട്ടണ്‍, ജേക്കബ്‌ സി., ജെയിംസ്‌ ജോസഫ്, പി. എം. മാത്യു, പി. പി. ചെറിയാന്‍, സി. ആന്‍ഡ്റൂസ്, ജയിന്‍ മുണ്ടയ്ക്കല്‍ എന്നിവര്‍ ചര്‍ച്ചയില്‍ സജീവമായി പങ്കെടുത്തു. അമേരിക്കയിലെ വിവിധ ഭാഗങ്ങളില്‍ നിന്നായി ധാരാളം ശ്രോതാക്കളും ഉണ്ടായിരുന്നു.

എല്ലാ മാസത്തിലെയും ആദ്യ ശനിയാഴ്ചയിലായിരിക്കും അമേരിക്കന്‍ മലയാളി സാഹിത്യ സല്ലാപം നടത്തുന്നത്. സല്ലാപത്തില്‍ പങ്കെടുക്കുവാന്‍ എല്ലാ ആദ്യശനിയാഴ്ചയും രാവിലെ പത്തു മുതല്‍ പന്ത്രണ്ട് വരെ (ഈസ്റേ്റണ്‍ സമയം) നിങ്ങളുടെ ടെലിഫോണില്‍ നിന്നും താഴെ കൊടുത്തിരിക്കുന്ന ടെലിഫോണ്‍ നമ്പരിലേയ്ക്ക് വിളിക്കാവുന്നതാണ് …..

1-857-232-0476 കോഡ് 365923

ടെലിഫോണ്‍ ചര്‍ച്ചയില്‍ പങ്കെടുക്കുന്ന എല്ലാവര്‍ക്കും ചോദ്യങ്ങള്‍ ചോദിക്കാന്‍ അവസരം ഉണ്ടായിരിക്കും. jain@mundackal.com , internationalmalayalam@gmail.com എന്ന ഇ-മെയില്‍ വിലാസങ്ങളില്‍ ചര്‍ച്ചയില്‍ അവതരിപ്പിക്കാന്‍ താത്പര്യമുള്ള വിഷയങ്ങളും ചോദ്യങ്ങളും മുന്‍കൂറായി അയച്ചു കൊടുക്കാവുന്നതാണ്. കൂടുതല്‍ വിവരങ്ങള്‍ക്ക് ബന്ധപ്പെടുക: 813-389-3395 / 469-620-3269

Join us on Facebook https://www.facebook.com/groups/142270399269590/

ജയിന്‍ മുണ്ടയ്ക്കല്‍

വെള്ളക്കെടുതിക്കെതിരെ തുഴയെറിഞ്ഞ് കനേഡിയന്‍ നെഹ്‌റു ട്രോഫി വള്ളംകളി

ടൊറോന്റോ : കേരളം വെള്ളപ്പൊക്കദുരിതത്തില്‍ നട്ടംതിരിയുമ്പോള്‍ ഒരു വള്ളംകളി മത്സരം നടത്തുന്നതിന്റെ ഔചിത്യമില്ലായ്മ മനസ്സിലാക്കി സംഘാടകര്‍ പല തവണ ഉപേക്ഷിക്കണമെന്ന് തീരുമാനിച്ച കനേഡിയന്‍ നെഹ്‌റു ട്രോഫി വള്ളംകളി മത്സരം, ഒടുവില്‍ വെള്ളക്കെടുതിക്കെതിരെ തുഴയാനുള്ള ശക്തമായ സമരായുധമാക്കിയപ്പോള്‍ വന്‍വിജയം! .

കേരളത്തിന്റെ ദുരിതാശ്വാസ പ്രവര്‍ത്തനങ്ങള്‍ക്ക് കാനഡയിലെ ഭരണപ്രതിപക്ഷങ്ങളുടെ പിന്തുണയും സഹായവും നേടിയെടുക്കാന്‍ ഈ വള്ളംകളി മത്സരം കൊണ്ട് സാധിച്ചുവെന്നത് സംഘാടകരായ ബ്രാംപ്ടണ്‍ മലയാളി സമാജത്തിന് അഭിമാനിക്കാവുന്ന നേട്ടമാണ്. കണ്‍സര്‍വേറ്റീവ് പാര്‍ട്ടി പ്രെസിഡന്റും കേന്ദ്ര പ്രതിപക്ഷ നേതാവുമായ ആന്‍ഡ്രൂ ഷേര്‍, മെമ്പര്‍ ഓഫ് പാര്‍ലമെന്‍റ് റൂബി സഹോട്ട, മെമ്പര്‍ ഓഫ് പ്രൊവിന്‍ഷ്യല്‍ പാര്‍ലമെന്‍റ് ദീപക് ആനന്ദ്, ബ്രാംപ്ടന്‍ മേയര്‍ സ്ഥാനാര്‍ത്ഥി പാട്രിക്ക് ബ്രൗണ്‍ എന്നിവര്‍ ചടങ്ങില്‍ സംബന്ധിച്ച് കേരളത്തിന് സഹായങ്ങള്‍ വാഗ്ദാനം ചെയ്തു. സെപ്റ്റംബറില്‍ പാര്‍ലമെന്റ് സമ്മേളിക്കുമ്പോള്‍ ഇത് സംബന്ധിച്ചുള്ള പ്രഖ്യാപനം ഉണ്ടാകുമെന്നാണ് പ്രതീക്ഷിക്കുന്നത്.

മുന്‍ വര്‍ഷങ്ങളേക്കാള്‍ കൂടുതല്‍ ടീമുകള്‍ പങ്കെടുത്ത വള്ളംകളി മത്സരത്തില്‍ ന്യൂയോര്‍ക്കില്‍ നിന്നെത്തിയ “ജലകേസരി ” ചാമ്പ്യന്മാരായി. ടി .എം .എസ് ചുണ്ടന്‍ രണ്ടാം സ്ഥാനം നേടി . വിജയികള്‍ക്ക് മുഖ്യാതിഥി ആന്‍ഡ്രൂ ഷേര്‍ നെഹ്‌റു ട്രോഫിയും, സ്‌പോണ്‍സര്‍ മനോജ് കരാത്ത 1000 ഡോളര്‍ കാഷ് അവാര്‍ഡും സമ്മാനിച്ചു. മലയാളം സിനിമ സംവിധായകന്‍ കെ മധു, ടൈഗര്‍ ജീത് സിംഗ് സീനിയറും , ജൂനിയറും വിശിഷ്ടാതിഥികളായി ചടങ്ങില്‍ പങ്കെടുത്തു.

കേരളത്തിലെ വെള്ളക്കെടുതിയോടനുബന്ധിച്ചു ജാതിമത , സംഘടനാ വിത്യാസമില്ലാതെ എല്ലാ മലയാളികള്‍ക്കും ഒത്തുചേര്‍ന്ന് ഐക്യദാര്‍ഢ്യം പ്രഖ്യാപിക്കാനും , മത സൗഹാര്‍ദ്ദ പ്രാര്‍ത്ഥന നടത്താനും സംഘാടകര്‍ ഈ അവസരം ഉപയോഗിച്ചു .

തദവസരത്തില്‍ ബ്രാംപ്ടണ്‍ മലയാളീ സമാജം തുടങ്ങുന്ന “ഹെല്‍പ് കേരള ഫണ്ട് ” കാമ്പയിനും ആന്‍ഡ്രൂ ഷേര്‍ ഉദ്ഘാടനം ചെയ്തു.

വിവിധ മലയാളി സംഘടനകളുടെ ഭാരവാഹികളായ ടോമി കോക്കാട്ട്, പ്രസാദ് നായര്‍, ജോബ്‌സണ്‍ ഈശോ , സന്തോഷ് സാക്ക് കോശി, സൈമണ്‍ പ്ലാത്തോട്ടം, എന്നിവരും ഗുരുവായൂരപ്പന്‍ അമ്പലത്തിലെ മുഖ്യതന്ത്രി ദിവാകരന്‍ നമ്പൂതിരിപ്പാട് , സജീബ് കോയ, ഫാ. ഡാനിയേല്‍ ചാക്കോ, റെവ.ജോര്‍ജ് വര്‍ഗീസ് എന്നിവര്‍ ചടങ്ങില്‍ സംബന്ധിച്ച് സംസാരിച്ചു.

“വള്ളം കളി മാറ്റിവെച്ചു നാട്ടില്‍ വെള്ളപ്പൊക്ക ദുരിതത്തില്‍ മരണമടഞ്ഞവരെയും ദുരിതത്തിലായവരെയും ഓര്‍ത്ത് ദുഖിച്ചും സഹതപിച്ചും വെറുതെ വീട്ടില്‍ ഇരുന്നിട്ട് ഒരു കാര്യവുമില്ല. പകരം ദുഃഖം ഉള്ളിലൊതുക്കിയിട്ടാണെങ്കിലും നമ്മുടെ പ്രവര്‍ത്തനങ്ങളിലൂടെ കേരളത്തെ കരകയറ്റാന്‍ നമ്മുക്ക് എന്ത് ചെയ്യാനാകുമെന്ന ചിന്തയാണ് വള്ളം കളി നടത്താനും അതിലൂടെ നമ്മുടെ നിവേദനം വേണ്ട സ്ഥലങ്ങളിലെല്ലാം എത്തിച്ചു പരിഹാരം നേടാനും ദുരിദാശ്വാസനിധിയിലേക്ക് പണം ശേഖരിക്കാനും തീരുമാനിച്ചത്. ” സംഘാടകനായ ബ്രാംപ്ടണ്‍ മലയാളീ സമാജം പ്രസിഡണ്ട് കുര്യന്‍ പ്രക്കാനം വിശദീകരിച്ചു. കുറേപ്പേര്‍ എതിര്‍പ്പുകളുമായി ആദ്യം വന്നെങ്കിലും അവരുടെ വികാരം മനസ്സിലാക്കിക്കൊണ്ട് തന്നെ വളരെയധികം ആളുകള്‍ തക്കസമയത്ത് സഹായത്തിനായെത്തിയതാണ് പരിപാടികള്‍ വിജയകരമായി നടത്താന്‍ സാധിച്ചത്. അദ്ദേഹം പറഞ്ഞു.

റീമാക്‌സ് റിയല്‍റ്റിയിലെ മനോജ് കരാത്തയായിരുന്നു പരിപാടിയുടെ പ്രധാന സ്‌പോണ്‍സര്‍. കാനഡയിലെ പ്രമുഖ ടീം ആയ ടി എം എസ് ചുണ്ടന്‍ മത്സരത്തില്‍ രണ്ടാം സ്ഥാനം നേടി.വനിതകളുടെ മത്സരത്തില്‍ ഗ്ലാഡിയേറ്റെഴ്‌സ് വിജയികള്‍ ആയി.

പ്രസിഡണ്ട് കുര്യന്‍ പ്രാക്കാനത്തിന്റെ നേതൃത്വത്തില്‍ തോമസ് വര്‍ഗീസ്, ഗോപകുമാര്‍ നായര്‍ , ജോജി ജോര്‍ജ് , മത്തായി മാത്തുള്ള, ഷിബു ചെറിയാന്‍, ബിനു ജോഷ്വാ , ജോസഫ് പുന്നശ്ശേരില്‍, ഷൈനി സെബാസ്റ്റിയന്‍ , സിന്ധു സജോയ്, മോന്‍സി തോമസ്, സാം പുതുക്കേരില്‍ , സോമന്‍ സക്കറിയ, ശ്രീരാജ്, ഫാസില്‍ മുഹമ്മദ്, ജോയി ഇമ്മാനുവേല്‍ , ജയമോഹന്‍ മേനോന്‍ എന്നിവരാണ് പരിപാടികള്‍ക്ക് ചുക്കാന്‍ പിടിച്ചത്. വെബ്: www.bramptonbotarace.ca .

ജയിസണ്‍ മാത്യു

ബര്‍ഗന്‍ഫീല്‍ഡ് എട്ടുനോമ്പാചരണവും വചനശുശ്രൂഷയും

ന്യൂജേഴ്‌സി: അനുഗ്രഹങ്ങളുടെ ഉറവിടമായ വിശുദ്ധ ദൈവമാതാവിന്റെ നിത്യചൈതന്യത്താല്‍ പ്രശോഭിതമായിരിക്കുന്ന ന്യൂജേഴ്‌സി ബര്‍ഗന്‍ഫീല്‍ഡ് സെന്റ് മേരീസ് സിറിയന്‍ ഓര്‍ത്തഡോക്‌സ് ദേവാലയത്തില്‍ പരിശുദ്ധ ദൈവമാതാവിന്റെ ജനനപ്പെരുന്നാളിനോടനുബന്ധിച്ചുള്ള എട്ടുനോമ്പാചരണവും, കാലം ചെയ്ത ബസേലിയോസ് പൗലൂസ് ദ്വിതീയന്‍ ബാവയുടെ ഇരുപത്തിരണ്ടാമത് ഓര്‍മ്മയും സെപ്റ്റംബര്‍ ഒന്നാം തീയതി ശനിയാഴ്ച മുതല്‍ എട്ടാം തീയതി ശനിയാഴ്ച വരെ ഭക്തിനിര്‍ഭരമായ ചടങ്ങുകളോടെ ആചരിക്കുന്നു. അഭിവന്ദ്യ പിതാക്കന്മാരായ ആര്‍ച്ച് ബിഷപ്പ് യല്‍ദോ മോര്‍ തീത്തോസ് മെത്രാപ്പോലീത്ത (മലങ്കര അതിഭദ്രാസനാധിപന്‍), ആര്‍ച്ച് ബിഷപ്പ് ആയൂബ് മോര്‍ സില്‍വാനോസ് മെത്രാപ്പോലീത്ത (ക്‌നാനായ അതിഭദ്രാസനാധിപന്‍) എന്നിവരുടെ മഹനീയ കാര്‍മികത്വവും നേതൃത്വവും വ്രതാനുഷ്ഠാന ദിനങ്ങളില്‍ ഉണ്ടായിരിക്കുന്നതാണ്. അനുഗ്രഹീത വചനശുശ്രൂഷകനും ധ്യാനഗുരുവുമായ വന്ദ്യ പൗലോസ് പാറേക്കര കോര്‍എപ്പിസ്‌കോപ്പ നയിക്കുന്ന വചനശുശ്രൂഷയും ധ്യാനവും എട്ടുനോമ്പിലെ എല്ലാ ദിവസവും ക്രമീകരിച്ചിട്ടുണ്ട്.

സെപ്റ്റംബര്‍ ഒന്നാംതീയതി ശനിയാഴ്ച രാവിലെ 8.45-ന് പ്രഭാത പ്രാര്‍ത്ഥനയും തുടര്‍ന്നു 9.30-നു അമേരിക്കയിലെ മലങ്കര അതിഭദ്രാസനാധിപനും പാത്രിയര്‍ക്കാ വികാരിയുമായ അഭിവന്ദ്യ ആര്‍ച്ച് ബിഷപ്പ് യല്‍ദോ മോര്‍ തീത്തോസ് മെത്രാപ്പോലീത്തയുടെ മുഖ്യകാര്‍മികത്വത്തില്‍ വിശുദ്ധ കുര്‍ബാന. മലങ്കരയുടെ പ്രകാശഗോപുരമായ പുണ്യശ്ശോകനായ ശേഷം ബസേലിയോസ് പൗലോസ് ദ്വിതീയന്‍ കാതോലിക്കാബാവയുടെ 22-മത് ദുക്‌റാനയോടനുബന്ധിച്ച് പ്രത്യേക അനുസ്മരണ ശുശ്രൂഷകള്‍ നടത്തപ്പെടും. 11 മണിക്ക് വെരി റവ. പൗലോസ് പാറേക്കര കോര്‍എപ്പിസ്‌കോപ്പ നയിക്കുന്ന ധ്യാനം, ഉച്ചനമസ്കാരം, വൈകുന്നേരം 6.30-നു സന്ധ്യാപ്രാര്‍ത്ഥന, 7 മണിക്ക് ഗാനശുശ്രൂഷ, 7.30 മുതല്‍ വന്ദ്യ കോര്‍എപ്പിസ്‌കോപ്പ നയിക്കുന്ന വചന ശുശ്രൂഷ എന്നിവയാണ് പ്രഥമ ദിന പരിപാടികള്‍. രണ്ടാം തീയതി ഞായറാഴ്ചയും, മൂന്നാം തീയതി തിങ്കളാഴ്ചയും രാവിലെ 8.45-ന് ആരംഭിക്കുന്ന പ്രഭാത പ്രാര്‍ത്ഥന, വിശുദ്ധ കുര്‍ബാന എന്നിവയ്ക്ക് യഥാക്രമം വെരി റവ. പൗലോസ് പാറേക്കര കോര്‍എപ്പിസ്‌കോപ്പ, റവ.ഫാ.ഡോ. ജെറി ജേക്കബ് എം.ഡി (മലങ്കര അതിഭദ്രാസന സെക്രട്ടറി) എന്നിവര്‍ നേതൃത്വം നല്‍കും. സെപ്റ്റംബര്‍ നാലാം തീയതി ചൊവ്വാഴ്ച മുതല്‍ ഏഴാംതീയതി വെള്ളിയാഴ്ച വരെ രാവിലെ രാവിലെ 7 മണിക്ക് പ്രഭാത പ്രാര്‍ത്ഥനയും, 7.30-നു വിശുദ്ധ കുര്‍ബാനയും ആണ് ക്രമീകരിച്ചിരിക്കുന്നത്. റവ.ഫാ. ബിജോ മാത്യു (ചൊവ്വാഴ്ച), റവ.ഫാ. സിബി ഏബ്രഹാം (ബുധന്‍), റവ.ഫാ. ജേക്കബ് ജോസ് (വ്യാഴം), റവ.ഫാ. ബെല്‍സണ്‍ കുര്യാക്കോസ് (വെള്ളി) എന്നിവര്‍ വിശുദ്ധ കുര്‍ബാന അര്‍പ്പിക്കും.

ഒന്നാം തീയതി മുതല്‍ ഏഴാം തീയതി വരെയുള്ള ദിവസങ്ങളില്‍ ഉച്ചയ്ക്ക് 11 മണിക്ക് ധ്യാനം, വൈകുന്നേരം 7.30-നു വചനശുശ്രൂഷ എന്നിവ ക്രമീകരിച്ചിട്ടുണ്ട്. വന്ദ്യ പൗലോസ് പാറോക്കര കോര്‍എപ്പിസ്‌കോപ്പ നേതൃത്വം നല്‍കും. വിശുദ്ധ ദൈവമാതാവിന്റെ ജനനപ്പെരുന്നാള്‍ ദിനമായ സെപ്റ്റംബര്‍ എട്ടാം തീയതി രാവിലെ 8.45-ന് ആരംഭിക്കുന്ന പ്രഭാത പ്രാര്‍ത്ഥനയ്ക്കും തുടര്‍ന്നുള്ള വിശുദ്ധ കുര്‍ബാനയ്ക്കും അമേരിക്ക, കാനഡ, യൂറോപ്പ് മേഖലയുള്‍പ്പെട്ട ക്‌നാനായ അതിഭദ്രാസനാധിപന്‍ അഭിവന്ദ്യ ആര്‍ച്ച് ബിഷപ്പ് ആയൂബ് മോര്‍ സില്‍വാനോസ് മെത്രാപ്പോലീത്ത മുഖ്യകാര്‍മികത്വം വഹിക്കും. ആഘോഷമായ റാസ, ആശീര്‍വാദം, നേര്‍ച്ചവിളമ്പ് എന്നിവയോടെ പെരുന്നാള്‍ ചടങ്ങുകള്‍ക്ക് സമാപനമാകും. സെപ്റ്റംബര്‍ ഒമ്പതാം തീയതി ഞായറാഴ്ച വന്ദ്യ പൗലോസ് പാറേക്കര കോര്‍എപ്പിസ്‌കോപ്പ വിശുദ്ധ കുര്‍ബാന അര്‍പ്പിക്കും.

ആത്മശരീര മനസ്സുകളുടെ നവീകരണത്തിനായി കതൃസന്നിധിയില്‍ വിശുദ്ധ ദൈവമാതാവിന്റെ മദ്ധ്യസ്ഥം സ്വീകരിച്ച് ധ്യാനനിമഗ്നരായി താമസിക്കുവാന്‍ ആഗ്രഹിക്കുന്നവര്‍ക്കുവേണ്ട എല്ലാ സൗകര്യങ്ങളും ദേവാലയത്തില്‍ ഒരുക്കിയിട്ടുണ്ട്. മത-സാമുദായിക വ്യത്യാസം കൂടാതെ അനേകര്‍ക്ക് അനുഗ്രഹങ്ങളുടെ ഉറവിടമായി പരിലസിക്കുന്ന വിശുദ്ധ ദേവാലയത്തിലേക്ക് ഏവരേയും ഭക്ത്യാദരവുകളോടെ സ്വാഗതം ചെയ്യുന്നുവെന്നു ഇടവക വികാരി റവ.ഫാ. പോള്‍ ടി. പറമ്പത്ത്, ഇതര ഭാരവാഹികള്‍ എന്നിവര്‍ അറിയിക്കുന്നു.

വിലാസം: St. Marys Syriac Orthodox Church, 173 North Washington Ave, Berganfeild, NJ 07621.
ബിജു ചെറിയാന്‍ അറിയിച്ചതാണിത്.

നേരിട്ട് സഹായം എത്തിച്ച് മഹിമ

ന്യൂയോര്‍ക്ക്: പ്രളയം തീര്‍ത്ത സങ്കടക്കടല്‍ താണ്ടാന്‍ ശ്രമിക്കുന്ന കേരളത്തിന് ന്യുയോര്‍ക്കില്‍ നിന്ന് നേരിട്ട് സഹായവുമായി മലയാളി ഹിന്ദു മണ്ഡലം (മഹിമ). തിരുവന്തപുരത്തും പന്തളത്തും പ്രവര്‍ത്തിക്കുന്ന സേവാഭാരതി ദുരിതാശ്വാസ കേന്ദ്രങ്ങളില്‍ മഹിമ പ്രസിഡന്റ് രഘു നായര്‍ നേരിട്ടെത്തി അരി ഉള്‍പ്പെടെയുള്ള ഭക്ഷ്യ സാധനങ്ങള്‍, മരുന്ന്, ശുചീകരണ സാധനങ്ങള്‍, തുണി തുടങ്ങിയവ കൈമാറി.

തിരുവന്തപുരത്ത് കോട്ടയക്കകം സ്‌കുളില്‍ പ്രവര്‍ത്തിക്കുന്ന ദുരിതാശ്വാസ ക്യാമ്പില്‍ സേവാഭാരതി സംസ്ഥാന സംഘടനാ സെക്രട്ടറി ഹരിദാസ് മഹിമ പ്രസിഡന്റ് രഘു പി നായരില്‍ നിന്ന് സാധനങ്ങള്‍ ഏറ്റു വാങ്ങി. ജന്മഭൂമി ന്യുസ് എഡിറ്റര്‍ പി ശ്രീകുമാര്‍, സേവാഭാരതി പ്രവര്‍ത്തകരായ ദേവീദാസ്, ഷാജു ശ്രീകണ്ഠേശ്വരം, ജയകുമാര്‍, ബാലമുരളി, പി സുനില്‍കുമാര്‍, അഡ്വ. ഗീത എന്നിവര്‍ സന്നിഹിതരായിരുന്നു.
മഹിമ നല്‍കിയ സാധനങ്ങള്‍ ഉടന്‍ തന്നെ മാന്നാറിലെ പ്രധാന സംഭരണകേന്ദ്രത്തിലേക്ക് മാറ്റി. സാധനങ്ങള്‍ കയറ്റിയ വാഹനം നാളികേരം ഉടച്ചശേഷം രഘുനായര്‍ ഫ്ളാഗ് ഓഫ് ചെയ്തു.

മഹിമയുടെ ദുരിതാശ്വാസ സഹായത്തിന്റെ ആദ്യ ഗടുവാണ് ഇപ്പോള്‍ നല്‍കുന്നതെന്ന് രഘു പി നായര്‍ പറഞ്ഞു. പറഞ്ഞറിയിക്കാന്‍ പറ്റാത്ത കെടുതിയാണ് ഉണ്ടായത്. അതുപോലെ നടക്കുന്ന സേവനപ്രവര്‍ത്തനങ്ങളും വാര്‍ത്തകള്‍ക്ക് വിവരിക്കാനാവാത്തതാണ്. വളരെ ചിട്ടയോടെ സേവാഭാരതി സേവനപ്രവര്‍ത്തനങ്ങള്‍ നടത്തുന്നത് ബോധ്യപ്പെട്ടതിനാലാണ് അവര്‍ മുഖേന സഹായം എത്തിക്കുന്നതെന്നും രഘു പി നായര്‍ പറഞ്ഞു. അര്‍ഹിക്കുന്നവര്‍ക്ക് സഹായം എത്തുമെന്ന് ഉറപ്പുണ്ടെന്നും അദ്ദേഹം പറഞ്ഞു.

2004ല്‍ സുനാമി ഉണ്ടായപ്പോള്‍ സേവാഭാരതി മുഖേന വീടു നിര്‍മ്മിച്ചു നല്‍കാന്‍ ധനസഹായം ചെയ്ത സംഘടനയാണ് മഹിമ. അതിന്റെ തുടര്‍ച്ച എന്ന നിലയിലാണ് ഇപ്പോഴത്തെ സഹായത്തെ കാണുന്നതെന്ന് പി ശ്രീകുമാര്‍ പറഞ്ഞു.

രാജ്യത്തിനകത്തും പുറത്തും നിന്ന് നിരവധി സഹായ വാഗ്ദാനങ്ങള്‍ ഉണ്ട്. വീദേശത്തുനിന്ന നേരിട്ടെത്തി പ്രവര്‍ത്തനങ്ങളില്‍ പ്രമുഖര്‍ പങ്കെടുക്കുന്നത് പ്രവര്‍ത്തകര്‍ക്ക് ആവേശം നല്‍കുമെന്ന് സേവാഭാരതി സംസ്ഥാന സംഘടനാ സെക്രട്ടറി ഹരിദാസ് പറഞ്ഞു.

സേവാഭാരതി തിരുവന്തപുരത്ത് നടത്തുന്ന പ്രവര്‍ത്തനങ്ങള്‍ ദേവീദാസ് വിവരിച്ചു. മൂന്നു ദിവസത്തിനുള്ളില്‍ തിരുവനന്തപുരത്തുനിന്ന സാധനങ്ങള്‍ കയറ്റി അയയ്ക്കുന്ന 32-മത് വാഹനമാണ് രഘുനായര്‍ ഫ്ഷാഗ് ഓഫി ചെയ്തതെന്നും അദ്ദേഹം വ്യക്തമാക്കി.

മഹിമ പദ്ധതി ഇട്ടിരുന്ന ഓണാഘോഷ പരിപാടികള്‍ റദ്ദാക്കി ദുരിതത്തില്‍ അകപ്പെട്ടവര്‍ക്ക് ഐക്യദാര്‍ഡ്യം പ്രഖ്യാപിക്കുന്നതായി ജനറല്‍ സെക്രട്ടറി സുരേഷ് ഷണ്‍മുഖം അറിയിച്ചു. ഓണാഘോഷത്തിനു പകരം ദുരിതാശ്വാസ നിധി ശേഖരണവും സെപ്റ്റമ്പര്‍ 9 ന് ക്യൂന്‍സ് ഗ്‌ളന്‍ ഓക്‌സ് സ്‌ക്കൂളില്‍ പ്രാര്‍ത്ഥനാ സത്‌സംഗം നടത്തുമെന്നും സുരേഷ് പറഞ്ഞു.

പി ശ്രീകുമാര്‍

ഒക്കലഹോമ സെയിന്റ് ജോര്‍ജ് ദേവാലയത്തില്‍ പൗലോസ് പാറേക്കര കോറെപ്പിസ്‌കോപ്പ ധ്യാനയോഗം നടത്തുന്നു

ഒക്കലഹോമ: ബെഥനി സെയിന്റ് ജോര്‍ജ് സിറിയക് ഓര്‍ത്ത്‌ഡോക്‌സ് ദേവാലയത്തില്‍ ഓഗസ്റ്റ് 24, 25, 26 (വെള്ളി, ശനി, ഞായര്‍) ദിവസങ്ങളില്‍ പ്രശസ്ത സുവിശേഷ പ്രസംഗകനും വേദശാസ്ത്ര പണ്ഡിതനുമായ പൗലോസ് പാറേക്കര കോറെപ്പിസ്‌കോപ്പായുടെ നേതൃത്വത്തില്‍ ധ്യാനയോഗം നടത്തപെടുന്നു.

ഓഗസ്റ്റ് 24 വെള്ളിയാഴ്ച്ച വൈകുന്നേരം 6:30 മുതല്‍ 9:30 വരെയും, ഓഗസ്റ്റ് 25 ശനിയാഴ്ച രാവിലെ 10 മുതല്‍ വൈകുന്നേരം 5:00 വരെയും, ആഗസ്റ്റ് 26 ഞായാഴ്ച വിശുദ്ധ æര്‍ബാനക്ക് ശേഷം 3 മണി വരേയും ധ്യാനയോഗം തുടരും.

ഈ ധ്യാനയോഗത്തില്‍ പങ്കെടുത്ത് അനുഗ്രഹം പ്രാപിçവാനുമായി സഭാഭേദമെന്യെ എവരെയും സ്വാഗതം ചെയ്യുന്നതായി പള്ളി ഭരണ സമിതി അറിയിക്കുന്നു.

ജോയിച്ചന്‍ പുതുക്കുളം

മഴക്കെടുതിയില്‍ എന്‍.എസ്സ് .എസ്സ് കാലിഫോര്‍ണിയയുടെ സഹായ ഹസ്തം

സാന്റാ ക്ലാര, കാലിഫോര്‍ണിയ: കേരളത്തിലെ വെള്ളപ്പൊക്ക ദുരിതാശ്വാസത്തിനായി നായര്‍ സൊസൈറ്റി ഓഫ് കാലിഫോര്‍ണിയ വിവിധ ദുരിതാശ്വാസ ക്യാമ്പുകളിലേക്ക് ആദ്യ ഗഡുവായി മൂന്നര ലക്ഷം രൂപയുടെ അവശ്യ സാമഗ്രികളുടെ വിതരണം ആരംഭിച്ചു. വിതരണത്തിന്റെ ഉദ്ഘാടനം പള്ളിപ്പുറം ഗവണ്മെന്റ് എല്‍ പി സ്കൂളിലെ ദുരിതാശ്വാസ ക്യാമ്പില്‍ വച്ച് വസ്ത്രങ്ങളും മറ്റ് അവശ്യ സാധനങ്ങളും വില്ലേജ് ഓഫീസര്‍ക്ക് കൈമാറി എന്‍എസ്സ് എസ്സ് കാലിഫോര്‍ണിയയുടെ പ്രെസിഡണ്ട് സ്മിത നായര്‍ നിര്‍വഹിച്ചു. വില്ലേജ് ഓഫീസറോടൊപ്പം തിരുവനതപുരം ജില്ല പഞ്ചായത്ത് മെമ്പര്‍ ജലീല്‍, അണ്ടൂര്‍ക്കോണം പഞ്ചായത്ത് വൈസ് പ്രസിഡന്റ് അഷ്‌റഫ് , പഞ്ചായത്ത് മെമ്പര്‍മാരായ വിജയ കുമാര്‍, പ്രദീപ് കൃഷ്ണന്‍, രമേശന്‍ എന്നിവരും സാധനങ്ങള്‍ ഏറ്റുവാങ്ങി. റിട്ടയേര്‍ഡ് റീജിയണല്‍ പ്രോവിഡന്റ് ഫണ്ട് കമ്മിഷണര്‍ എസ്സ് എസ്സ് നായര്‍, പള്ളിപ്പുറം രാമചന്ദ്രന്‍, അഡ്വ. ചന്ദ്രചൂഡന്‍ എന്നിവരും സന്നിഹിതരായിരുന്നു. ദുരിതാശ്വാസ കേന്ദ്രത്തിലെ ഇരുന്നൂറോളം വരുന്ന അന്തേവാസികളുമായി അവിടത്തെ സാഹചര്യങ്ങളെക്കുറിച്ച് സ്മിത നായര്‍ വിശദമായി ചോദിച്ചറിയുകയും അവിടത്തെ ഭാരവാഹികളുടെ ആത്മാര്‍ത്ഥതയെയും കരുതലിനെയും അഭിനന്ദിക്കുകയും ചെയ്തു. ആവശ്യമെങ്കില്‍ തുടര്‍ന്നും കൂടുതല്‍ സഹായം വാഗ്ദാനം ചെയ്തു.

ആലപ്പുഴ ഗവണ്മെന്റ് ഗേള്‍സ് ഹൈസ്കൂള്‍, കരിച്ചാറ ഗവണ്മെന്റ് എല്‍പി സ്കൂള്‍ എന്നിവിടെയും കോട്ടയം നഗരത്തിലെ പത്തോളം സ്ഥലത്തെയും ക്യാമ്പുകളും എന്‍എസ്സ് എസ്സ് കാലിഫോര്‍ണിയയുടെ പ്രതിനിധികര്‍ സന്ദര്‍ശനം നടത്തുകയും ആവശ്യമായ സാധനങ്ങള്‍ വാങ്ങി വിതരണം ചെയ്യുകയും ചെയ്തു. എന്‍എസ്സ് എസ്സ് കാലിഫോര്‍ണിയയുടെ ബോര്‍ഡ് മെമ്പര്‍ മധു മുകുന്ദനാണ് ആലപ്പുഴ ജില്ലയിലെ വിതരണങ്ങള്‍ ഏകോപിപ്പിച്ചത്. കോട്ടയത്ത് നിന്നുള്ള അമേരിക്കന്‍ പ്രവാസികളായ സെക്രട്ടറി ജയ പ്രദീപും ജോയിന്റ് സെക്രട്ടറി അരവിന്ദ് നായരുമാണ് കോട്ടയം ജില്ലയിലെ വിതരണ പദ്ധതികള്‍ തയാക്കിയത്.

എന്‍എസ്സ് എസ്സ് കാലിഫോര്‍ണിയ കേരളത്തിലെ ദുരിതാശ്വാസത്തിനായി സമാഹരിക്കുന്ന നിധിയിലേക്ക് ഉദാരമായി സംഭാവന ചെയ്ത എല്ലാവര്‍ക്കും എന്‍എസ്സ് എസ്സ് കാലിഫോര്‍ണിയയുടെ സ്ഥാപകനും മുന്‍ പ്രസിഡന്റുമായ രാജേഷ് നായര്‍ നന്ദി അറിയിച്ചു. ദുരിതാശ്വാസ സഹായ വിതരണത്തിന്റെ ആദ്യ ദിനത്തില്‍ത്തന്നെ ഒന്നര ലക്ഷത്തിലധികം വിലയ്ക്കുള്ള അവശ്യ സാധനങ്ങള്‍ പല ക്യാമ്പുകളിലായി വിതരണം ചെയ്യാന്‍ സാധിച്ചതില്‍ അങ്ങേയറ്റം കൃതാര്‍ത്ഥതയുണ്ടെന്നും തുടര്‍ന്നുള്ള ദിനങ്ങളിലും ഇതിലും കൂടുതല്‍ സഹായം എത്തിക്കുമെന്ന് എന്‍എസ്സ് എസ്സ് കാലിഫോര്‍ണിയയുടെ ഭാരവാഹികള്‍ അറിയിച്ചു.

എന്‍എസ്സ് എസ്സ് കാലിഫോര്‍ണിയയുടെ ദുരിതാശ്വാസ നിധിയിലേക്ക് സംഭാവന തരാന്‍ താല്പര്യമുള്ളവര്‍ ദയവായി finance@nairs.org എന്ന അക്കൗണ്ടിലേക്ക് paypal വഴി അയച്ചു തരണമെന്ന് അഭ്യര്‍ത്ഥിക്കുന്നു.ഞങ്ങള്‍ ആ തുക മുഴുവനായി സഹായം അത്യാവശ്യമായ ആളുകള്‍ക്ക് നേരിട്ട് എത്തിച്ചു കൊടുക്കുന്നതാണ്.

ജോയിച്ചന്‍ പുതുക്കുളം

മലയാളി അസോസിയേഷന്‍ ഓഫ് ലൂയിവില്‍ ദുരിതാശ്വാസനിധിയിലേക്ക് 5 ലക്ഷം നല്‍കും

ലൂയിവില്‍, കെന്റക്കി: നൂറുകണക്കിന് ആളുകളുടെ ജീവനും, കോടികളുടെ നഷ്ടവും വിതച്ച കേരളത്തിലെ പ്രളയക്കെടുതി നേരിടുന്നതിനായി മുഖ്യമന്ത്രിയുടെ ദുരിതാശ്വാസനിധിയിലേക്ക് അഞ്ചു ലക്ഷം രൂപ നല്‍കാന്‍ മലയാളി അസോസിയേഷന്‍ ഓഫ് ലൂയിവില്‍ (എം.എ.എല്‍.എ.യു) തീരുമാനിച്ചു. നൂറ്റമ്പതോളം അംഗങ്ങള്‍ മാത്രമുള്ള താരതമ്യേന ചെറിയ സംഘടന ഇത്തവണത്തെ ഓണാഘോഷപരിപാടികള്‍ ദുരിതാശ്വാസ നിധിയിലേക്ക് ഫണ്ട് സമാഹരിക്കാന്‍ തീരുമാനിക്കുകയായിരുന്നു.

എണ്‍പതുകളുടെ ആദ്യ കാലഘട്ടത്തില്‍ ലൂയിവില്ലിലേക്ക് കുടിയേറിയ മലയാളികള്‍ തുടങ്ങിയ ഈ സംഘടന തൊണ്ണൂറുകളില്‍ വന്ന കംപ്യൂട്ടര്‍ പ്രൊഫണലുകളുടേയും, രണ്ടായിരത്തില്‍ വന്ന മെഡിക്കല്‍ പ്രൊഫണല്‍സിന്റേയും അംഗബലംകൊണ്ട് ശക്തിപ്രാപിക്കുകയായിരുന്നു.

2018-ലെ ഓണാഘോഷ പരിപാടികള്‍ ദുരിതാശ്വാസ പ്രവര്‍ത്തനങ്ങളിലേക്കുള്ള ഫണ്ട് സ്വരൂപിക്കാനായി രാജി രാജന്‍, ഷൈനി ജോസ്, മുരളി ശ്രീധരന്‍, മുരളി തീക്കൂട്ട്, ബിന സജി എന്നിവര്‍ അടങ്ങുന്ന എക്‌സിക്യൂട്ടീവ് കമ്മിറ്റി തീരുമാനിക്കുകയായിരുന്നു. ഈ പരിപാടി ഓഗസ്റ്റ് 18-നു ഫാ. ജോണ്‍ പുത്തേഴത്തുപറമ്പില്‍ ലൂയിവില്ലിലെ ഹൈറ്റ് സ്കൂളില്‍ ഉദ്ഘാടനം ചെയ്തു. ഇതിലൂടെ അഞ്ചു ലക്ഷം രൂപ സമാഹരിക്കാന്‍ അസോസിയേഷന് സാധിച്ചു. ഈ ഫണ്ടിലേക്ക് ഇനിയും തുക സമാഹരിക്കാന്‍ ലൂയിവില്ലിലെ മറ്റു സംഘടനകളുമായി ഒത്തു പ്രവര്‍ത്തിക്കാന്‍ ഇവര്‍ തീരുമാനിച്ചു. ദുരിതാശ്വാസ ഫണ്ടിലേക്ക് തുക നല്‍കുവാന്‍ താത്പര്യമുള്ളവര്‍ leadmalon@gmail.com എന്ന ഇമെയിലില്‍ ബന്ധപ്പെടുക.

ജോയിച്ചന്‍ പുതുക്കുളം

ഡാളസ് ഗുരു ജയന്തി ആഘോഷങ്ങൾ ഒഴിവാക്കി

ഡാളസ്; മഹാപ്രളയത്തിന്റെ ദുരിതക്കടലിൽ ആടിയുലയുന്ന കേരളജനതക്കു ഐക്യ ദാർഢ്യം പ്രഖ്യാപിച്ചുകൊണ്ട് ശ്രീ നാരായണ അസോസിയേഷൻ ഓഫ് നോർത്ത് ടെക്സസ്സിന്റെ ആഭിമുഖ്യത്തിൽ സെപ്റ്റംബർ ഒന്നിന് വിപുലമായി ആഘോഷിക്കുവാൻ തീരുമാനിച്ചിരുന്ന ഈ വർഷത്തെ ഗുരു ജയന്തി ചടങ്ങുകൾ ഒഴിവാക്കിയതായും ,അതിനു പകരമായി പ്രളയക്കെടുതിൽ ദുരിതമനുഭവിക്കുന്ന മലയാളി സഹോദരങ്ങളുടെ താൽക്കാലിക ആശ്വാസത്തിനായും പുനരുദ്ധാരണ പ്രവർത്തനങ്ങൾക്കായും ഫണ്ട് ശേഖരണവും , പ്രാർത്ഥന യോഗങ്ങളും സംഘടിപ്പിക്കുവാൻ തീരുമാനിച്ചതായി ഭാരവാഹികൾ അറിയിച്ചു .

ഈ സംരംഭത്തിൽ സഹായസഹകരങ്ങൾ നൽകുവാൻ താല്പര്യമുള്ളവർ താഴെ കാണുന്ന ഫോൺനമ്പറിലോ ഈമെയിലിലോ ബന്ധപ്പെടണമെന്നതും അഭ്യർത്ഥിച്ചിട്ടുണ്ട് – (317)-64-SNMNT – ഇമെയിൽ – info@snmnt.org

പി പി ചെറിയാൻ