ഏവര്‍ക്കും മാതൃക ആയി ഒരു മലയാളി സംഘടന; ബീന പ്രതീപിന്റെ നേതൃത്വത്തില്‍ ഗാമയ്ക്ക് പുതിയ അരങ്ങ്

അമേരിക്കയിലെ മലയാളി സംഘടനകളില്‍ പ്രഥമ സ്ഥാനമാണ് ഗ്രേറ്റര്‍ അറ്റ്‌ലാന്റാ മലയാളി അസ്സോസിയേഷനുള്ളത് (ഗാമ) .ഗാമയുടെ പ്രവര്‍ത്തനങ്ങള്‍ പുതു വര്‍ഷത്തിലേക്കു കുതിക്കുമ്പോള്‍ പുതിയ നേതൃത്വവും അധികാരമേറ്റെടുത്തു പ്രവര്‍ത്തനങ്ങള്‍ക്കു തുടക്കം കുറിച്ചു.

ഗാമയുടെ പ്രവര്‍ത്തന ശൈലി കൊണ്ടാണ് അമേരിക്കയിലെ മലയാളി സംഘടനകള്‍ക്ക് മാതൃകയായി ഗാമ വളരുന്നതിന് ഗാമയുടെ പുതിയ പ്രസിഡന്റ് ബീനാ പ്രതീപ് പറഞ്ഞു. ഈ പ്രവര്‍ത്തന ശൈലിക്കാധാരം ഗാമയുടെ കഴിഞ്ഞ വര്‍ഷത്തെ പ്രവര്‍ത്തനങ്ങളില്‍ ശക്തമായ നേതൃത്വം നല്‍കിവരും, മുന്‍കാല ഭാരവാഹികളുടെയും പ്രവര്‍ത്തകരുടെയും അകമഴിഞ്ഞ പ്രോത്സാഹനം കൊണ്ടാണെന്നും അവര്‍ കൂട്ടിച്ചേര്‍ത്തു.ഗാമയുടെ പ്രവര്‍ത്തകരുടെ അര്‍പ്പണ ബോധം കൊണ്ടാണ് ഇത് സാധിച്ചത്. പ്രവര്‍ത്തിച്ചു സമൂഹത്തിനു നേരിട്ട് കാട്ടിക്കൊടുത്തു അംഗീകാരം നേടുക എന്ന തത്വമാണ് ഗാമയ്ക്കുള്ളത് .

അറ്റലാന്റ മലയാളികളുടെ വലിയ പ്രോത്സാഹനം കൊണ്ടു മാത്രമാണ് അമേരിക്കന്‍ മലയാളി പ്രസ്ഥാനങ്ങള്‍ക്ക് എന്നും മാതൃകയായിരിക്കുവാന്‍ സാധിക്കുന്നത് . മലയാളികളിലെ രണ്ടും മുന്നും തലമുറകളെ കൂട്ടിയിണക്കുന്ന കണ്ണിയായും തുടര്‍ന്നും പ്രവര്‍ത്തിക്കുമെന്നറിയിച്ച 2018ലെ എക്‌സിക്കുട്ടീവ് കമ്മിറ്റിയില്‍ പ്രവര്‍ത്തന ശൈലികൊണ്ട് മികവുറ്റ ഒരു നേതൃത്വ നിരയാണുള്ളത്.

13 അംഗങ്ങള്‍ അടങ്ങുന്ന ഈ കമ്മിറ്റിയുടെ പ്രസിഡന്റ് ബീന പ്രതീപാണ്. കൊച്ചിയില്‍ ഡോക്ടര്‍ ആയിരുന്നു 1990 മുതല്‍ യു.എസില്‍ .സെന്റ് തെരേസ കോളേജിലെ പൂ ര്‍വ വിദ്യാര്‍ത്ഥിനി മെസിസ് ല്‍ മാനേജരായി പതിനഞ്ചു വര്‍ഷം . മെസിസ് ല്‍ വിമന്‍സ് ഫോറം സെക്രട്ടറി ആയും പ്രവര്‍ത്തനം.1999ലാണ് ബീന ഗാമയില്‍ മെമ്പറാവുന്നത്. അനില്‍ മെച്ചേരിലാണ് ഗാമയുടെ വൈസ് പ്രസിഡന്റ്. കോട്ടയത്തുകാരനായ ഇദ്ദേഹം 12 വര്‍ഷമായി യു.എസ്.ല്‍. ഓഹിയോയില്‍ നിന്ന് 2006 ല്‍ അറ്റ്‌ലാനയിലേക്ക് മാറി. പിന്നീട് മാര്‍തയില്‍ ഇലക്ട്രിഷ്യനായി ജോലി ചെയ്തു. 2006 മുതല്‍ ഗാമയില്‍ സജീവമായി പ്രവര്‍ത്തിച്ചു.

മലപ്പുറത്തെ അരിക്കോടുകാരനായ അബൂബക്കര്‍ സിദ്ധീഖ് കമ്മിറ്റിയുടെ സെക്രട്ടറിയായി തിരഞ്ഞെടുക്കപ്പെട്ടു. മലപ്പുറത്തെ ജവഹര്‍ നവോദയ വിദ്യാലയത്തിലെ പൂര്‍വ വിദ്യാര്‍ത്ഥിയായ ഇദ്ദേഹം തിരുവനന്തപുരത്തെ ടഇഠ എഞ്ചിനീയറിംഗ് കോളേജില്‍ നിന്നും ഇലക്ട്രോണിക്‌സില്‍ ബി ടെക് നേടിയിട്ടുണ്ട്. അറ്റ്‌ലാന്റയിലെ ഹോം ഡിപോട്ടില്‍ ജോലി ചെയ്യുകയാണ് അദ്ദേഹം. പ്രസാദ് ഫിലിപ്പോസ് കമ്മിറ്റിയുടെ ജോയിന്‍ സെക്രട്ടറിയായി തിരഞ്ഞെടുക്കപ്പെട്ടു. 1996ല്‍ അറ്റലാനയിലേക്ക് താമസം മാറുകയും പിന്നീട് 16വര്‍ഷത്തോളം മെട്രോ അറ്റ്‌ലാന്റയില്‍ ഐടി കമ്പനിയില്‍ ജോലി ചെയ്തു. പിന്നീട് ഗാമയുടെ സ്‌പോണ്‍സര്‍മാരില്‍ ഒരാളായി മാറി. ദീപക് പാര്‍ത്ഥസാരഥി യാണ് ട്രഷററര്‍. 2013ലാണ് ദീപക് അറ്റ്‌ലാനയിലേക്ക് താമസം മാറിയത്.പിന്നീട് അല്‍ഫാറെറ്റയില്‍ സ്ഥിര താമസമാക്കി.ഗാമയിലെ വിവിധകമ്മിറ്റികളുടെ തലപ്പത്തു ബിനു ജോണ്‍,ജിജോ തോമസ്.കെവിന്‍ ബോബി,മില്‍ട്ടണ്‍ ഇമ്മട്ടി ,റോമിയോ തോമസ്,ടോണി തോമസ്,വിനു ചന്ദ്രന്‍ ,അടിമത്തറ പ്രീതി എന്നിവര്‍ കമ്മിറ്റി പ്രവര്‍ത്തനങ്ങളില്‍ സജീവമായി നിലകൊള്ളുമ്പോള്‍ ഗാമയുടെ പ്രവര്‍ത്തനങ്ങള്‍ ചുറുചുറുക്കോടെ മുന്നോട്ട് പോകുന്നു.

ഒരു പുതിയ സംഘടനാ പ്രവര്‍ത്തനശൈലി അമേരിക്കന്‍ മലയാളികള്‍ക്ക് മുന്‍പില്‍ കാഴ്ചവച്ച ഗാമയുടെ ജീവകാരുണ്യ,സാംസ്കാരിക ,സാമൂഹ്യ പ്രവര്‍ത്തങ്ങള്‍ അമേരിക്കന്‍ മലയാളികളുടെ ആദരവും അംഗീകാരവും നേടിയെടുക്കും എന്ന കാര്യത്തില്‍ തര്‍ക്കമില്ല .

മിനി നായര്‍ അറിയിച്ചതാണിത്.

മോര്‍ട്ടണ്‍ ഗ്രോവ് സെന്റ് മേരീസ് ദൈവാലയത്തില്‍ മൂന്ന് നോമ്പും പുറത്തുനമസ്കാരവും ഭക്തിനിര്‍ഭരമായി ആചരിച്ചു

ചിക്കാഗോ: മോര്‍ട്ടണ്‍ഗ്രോവ് സെന്റ് മേരീസ് ക്‌നാനായ ദൈവാലയത്തില്‍ ജനുവരി 24 ബുധനാഴ്ച വൈകിട്ട് 7 മണിക്ക് വി. കുര്‍ബാനയും തുടര്‍ന്ന് മൂന്ന് നോമ്പാചരണ പ്രാര്‍ത്ഥനയും പുറത്ത് നമസ്കാര കര്‍മ്മങ്ങളും നടത്തപ്പെട്ടു. സേക്രട്ട് ഹാര്‍ട്ട് ഫോറാന വികാരി.റവ.ഫാ എബ്രാഹം മുത്തോലത്ത് തിരുകര്‍മ്മങ്ങള്‍ക്ക് മുഖ്യ കാര്‍മ്മികത്വം വഹിച്ചു .റവ .ഫാ ബോബന്‍ വട്ടം പുറത്ത് സഹകാര്‍മമികനായിരുന്നു. ധാരാളം ജനങ്ങള്‍ പങ്കെടുത്ത ഈ പുറത്തു നമസ്കാര ചടങ്ങുകളുടെ പ്രസുദേന്തിമാര്‍ കടുത്തുരുത്തി ഇടവകയില്‍ നിന്നുള്ളവരായിരുന്നു.കടുത്തുരുത്തി പളളിയിലെ കരിങ്കല്‍ കുരിശിനെ അനുസ്മരിക്കുന്ന വിധത്തില്‍ തയ്യാറാക്കിയ 53 ചുറ്റുവിളക്കോടെ നിര്‍മമിച്ച കരിങ്കല്‍ കുരിശിന് ചുറ്റും ജനങ്ങള്‍ എണ്ണ ഒഴിച്ച് പ്രര്‍ത്ഥിക്കുകയും നേര്‍ച്ച കാഴ്ചകള്‍ സമര്‍പ്പിക്കയും ചെയ്യുതു . ക്‌നാനായക്കാര്‍ തങ്ങളുടെ തലപ്പള്ളിയായി പരിഗണിച്ചു പോരുന്ന കടുത്തുരുത്തി വലിയ പള്ളിയില്‍ പതിനാറരകോല്‍ പൊക്കമുള്ള ഭാരതത്തിലെ ഏറ്റവും വലിയ കരിങ്കല്‍ കുരിശായ കടുത്തുരുത്തിയിലെ കരിങ്കല്‍ കുരിശ് 1596 ല്‍ സ്ഥാപിച്ചു ഈ കുരിശിങ്കല്‍ പ്രാര്‍ത്ഥിക്കുവാനും നേര്‍ച്ചകാഴ്ചകള്‍ സമര്‍പ്പിക്കാനുമായി ജാതി മതഭേദമന്യേ ധാരാളം ജനങ്ങള്‍ വന്ന് കുരിശിനെവന്ദിച്ച് ചുറ്റുവിളക്ക് കത്തിക്കുകയും ചെയ്യുന്നു. കടുത്തുരുത്തി വലിയ പള്ളിയിയിലെ അതി പുരാതനകാലം മുതല്‍ക്കെയുള്ള പ്രധാനതിരുനാളായ മൂന്നുനോമ്പിന്റെ രണ്ടാം ദിവസമായ ചൊവ്വാഴ്ച വൈകുന്നേരം ചരിത്ര പ്രസിദ്ധമായ കരിങ്കല്‍ കുരിശിന്‍ ചുവട്ടില്‍ വച്ച് പരമ്പരാഗതമായി നടന്നുവരുന്ന ഒരു സമൂഹ പ്രാര്‍ത്ഥനയാണ് പുറത്തുനമസ്ക്കാരം. ഭക്തി നിര്‍ഭരവും പ്രാര്‍ത്ഥനാസമ്പുഷ്ടവുമായ ഈ ഭക്താനുഷ്ഠാനത്തില്‍ സംബന്ധിക്കുവാന്‍ കേരളത്തിന്റെ വിവിധ ഭാഗങ്ങളില്‍നിന്നും ധാരാളം ആളുകള്‍ വന്നെത്താറുണ്ട് . കടുത്തുരുത്തി വലിയ പള്ളിയില്‍ മാത്രം കാണുന്ന സായാഹ്നപ്രാത്ഥനയെന്നും വിളിക്കപ്പെടുന്ന ഈ പുറത്തുനമസ്ക്കാരം കുരിശടിയിലേക്ക് തിരികള്‍ കത്തിച്ച്

പ്രദക്ഷിണമായി പോയി, അഉ 345 ലെ കുടിയേറ്റയാത്രയില്‍ മരിച്ച് കടലില്‍ സംസ്ക്കരിക്കപ്പെട്ട പൂര്‍വ്വികരെ അനുസ്മരിച്ച് കടലിന്നഭിമുഖമായി നിന്ന് വിശ്വാസികള്‍ പ്രാര്‍ത്ഥിച്ചിരുന്ന പാരമ്പര്യമാണ് ഇതിന്റെ അടിസ്ഥാനം. താത്കാലികമായി സെ.മേരീസില്‍ ഈ കല്‍കുരിശ് നിര്‍മ്മിക്കുവാന്‍ നേതൃത്വം നല്കിയത് മത്തച്ചന്‍ ചെമ്മാച്ചേലാണ് . അനില്‍ മറ്റത്തിക്കുന്നേലിന്റെ നേതൃത്വത്തിലുള്ള ദേവാലയ ഗായകസംഘം ആത്മീയ ചൈതന്യം ഉണര്‍ത്തുന്ന കീര്‍ത്തനങ്ങളാല്‍ കര്‍മ്മങ്ങള്‍ കൂടുതല്‍ സജീവമാക്കി. സമാപനം സ്‌നേഹ വിരുന്നോടെയായിരുന്നു കൈക്കാരന്മാരായ ടിറ്റോ കണ്ടാരപ്പള്ളി സിബി കൈതക്ക തൊട്ടിയില്‍ പോള്‍സണ്‍ കുളങ്ങര, റ്റോണി കിഴക്കേക്കുറ്റ് എന്നിവരോടെപ്പം കടുത്തുരുത്തി ഇടവകാഗംങ്ങളും ചടങ്ങുകളുടെ സുഗമമായ നടത്തിപ്പിന് വേണ്ട ക്രമികരണങ്ങള്‍ ഒരുക്കി. സ്റ്റീഫന്‍ ചെളളമ്പേല്‍ (പി.ആര്‍.ഒ) അറിയിച്ചതാണിത്.

ജോയിച്ചന്‍ പുതുക്കുളം

ചിക്കാഗോ സോഷ്യല്‍ ക്ലബ്ബിന്റെ നാഷണല്‍ ചീട്ടുകളി ടൂര്‍ണമെന്റ് മാര്‍ച്ച് 17 ശനിയാഴ്ച

ചിക്കാഗോ മലയാളി സമൂഹത്തില്‍ കരുത്തിന്റെ തിരയിളക്കം സൃഷ്ടിച്ച അന്തര്‍ദേശീയ വടംവലി മത്സരത്തിനു ശേഷം സോഷ്യല്‍ ക്ലബ്ബ് വിഭാവനം ചെയ്യുന്ന അടുത്ത പ്രോഗ്രാമാണ് ചീട്ടുകളി മത്സരം. ബുദ്ധിയും തന്ത്രവും ഭാഗ്യവും തമ്മില്‍ ഏറ്റുമുട്ടുന്ന ഈ ചീട്ടുകളി മത്സരം മാര്‍ച്ച് 17-ാം തീയതി ശനിയാഴ്ച രാവിലെ 9 മണി മുതല്‍ ചിക്കാഗോ കെ.സി.എസിന്റെ ഡസ്‌പ്ലെയിന്‍സിലുള്ള പുതിയ കമ്മ്യൂണിറ്റി സെന്ററില്‍ (New Knanaya Center, 1800 Oakton Street, Desplaines IL 60018) വച്ച് നടത്തു്‌റ് വിവരം സന്തോഷപൂര്‍വ്വം അറിയിക്കുന്നു.

ഇതിലേക്ക് 18 വയസ്സിനു മേലുള്ള എല്ലാ മലയാളികളായ സ്ത്രീ പുരുഷ ഭേദമന്യേ പങ്കെടുക്കാവുതാണ്. (മത്സരം ഫീസ് മൂലം നിയന്ത്രിച്ചിരിക്കുന്നു)

28 (ലേലം) മൂന്നു പേര്‍, റെമ്മി ഒരു ബാച്ച് കുറഞ്ഞത് 8 പേര്‍ എന്നിവയാണ് മത്സരഇനങ്ങള്‍. ഈ ടൂര്‍ണമെന്റിന്റെ കണ്‍വീനേഴ്‌സ് അഭിലാഷ് നെല്ലാമറ്റം, ജില്‍സ് വയലുപടിയാനിക്കല്‍ എന്നിവരാണ്.

ഈ വാശിയേറിയ മത്സരത്തിലേക്ക് നോര്‍ത്ത് അമേരിക്കയിലെ എല്ലാ മലയാളികളെയും ചിക്കാഗോ സോഷ്യല്‍ ക്ലബ്ബിന്റെ ഭാരവാഹികളായ അലക്‌സ് പടിഞ്ഞാറേല്‍ (പ്രസിഡന്റ്), സജി മുല്ലപ്പള്ളി (വൈസ് പ്രസിഡന്റ്), ജോസ് മണക്കാട്ട് (സെക്രട്ടറി), പ്രസാദ് വെള്ളിയാന്‍ (ജോയിന്റ് സെക്രട്ടറി), ബിജു കരികുളം (ട്രഷറര്‍) എന്നിവരുടെയും അതുപോലെ ചിക്കാഗോ സോഷ്യല്‍ ക്ലബ്ബിന്റെ എല്ലാ മെമ്പേഴ്‌സിന്റെയും പേരില്‍ ചിക്കാഗോ കെ.സി.എസ്. പുതിയ കമ്മ്യൂണിറ്റി സെന്ററിലേക്ക് സ്വാഗതം ചെയ്യുന്നു. മാത്യു തട്ടാമറ്റം അറിയിച്ചതാണിത്.

നവകേരള മലയാളി അസോസിയേഷന് നവസാരഥികള്‍

സൗത്ത് ഫ്‌ളോറിഡ: സൗത്ത് ഫ്‌ളോറിഡയിലെ പ്രമുഖ മലയാളി സംഘടനായ നവകേരള മലയാളി അസോസിയേഷന്‍ ഓഫ് സൗത്ത് ഫ്‌ളോറിഡക്ക് നവസാരഥികള്‍. 2018 പ്രവര്‍ത്തനവര്‍ഷത്തേക്ക് ജോബി പൊന്നുംപുരയിടം (പ്രസിഡന്റ്), ഷാന്‍റ്റി വര്‍ഗീസ് (വൈസ് പ്രസിഡന്റ്), ബിജോയ് സേവ്യര്‍(സെക്രട്ടറി), ആനന്ദലാല്‍ രാധാകൃഷ്ണന്‍ (ജോ: സെക്രട്ടറി), ജെയിന്‍ വാത്യേലില്‍ (ട്രഷറര്‍ ) ,രഞ്ജന്‍ പുളിമൂട്ടില്‍(ജോ: ട്രഷറര്‍) എന്നിവരെ തെരെഞ്ഞെടുത്തു. സുരേഷ് നായര്‍ എക്‌സ് ഒഫീഷ്യയോ ആണ്.

കമ്മിറ്റി അംഗങ്ങളായി സജോ ജോസ് പല്ലിശ്ശേരി, സൈമണ്‍ പാറത്താഴം ,ഏലിയാസ് പനങ്ങയില്‍ , റിനു ജോണി, സുശീല്‍ നാലകത്ത്, മിലന്‍ തോമസ്, കുര്യാക്കോസ് പൊടിമറ്റം,സെബാസ്റ്റ്യന്‍ വയലിങ്കല്‍,പ്രിയ നായര്‍,ബെന്നി വര്‍ഗീസ് എന്നിവരെയും തെരെഞ്ഞെടുത്തു.

ജോയിച്ചന്‍ പുതുക്കുളം

ഗീതാമണ്ഡലം മണ്ഡല-മകരവിളക്ക് മഹോത്സവത്തിന് പരിസമാപ്തി

ചിക്കാഗോ: അറുപതു നാള്‍ നീണ്ടുനിന്ന അചഞ്ചല അയ്യപ്പ ഭക്തിയാല്‍ “സര്‍വം ഖല്വിദം ബ്രഹ്മ’ അല്ലെങ്കില്‍ സര്‍വ്വ ചരാചരങ്ങളിലും നിറഞ്ഞുനില്‍ക്കുന്നത് ഈ ബ്രഹ്മം തന്നെ എന്ന തിരിച്ചറിവ് ഓരോ ഭക്തനും നല്കിക്കൊണ്ട് ഗീതാമണ്ഡലം മണ്ഡല-മകരവിളക്ക് മഹോത്സവത്തിന് പരിസമാപ്തി കുറിച്ചു.

ഈവര്‍ഷത്തെ മകരവിളക്ക് മഹോത്സവ പൂജകള്‍ ആരംഭിച്ചത് സര്‍വ്വവിഘ്‌ന നിവരകനായ ശ്രീമഹാഗണപതിക്ക് ഗണപതി അഥര്‍വ്വോപനിഷ്ദ് മന്ത്രത്താല്‍ പ്രത്യേക പൂജകള്‍ ചെയ്തുകൊണ്ടാണ്. തുടര്‍ന്നു വൈക്കത്തപ്പനും, ഉണ്ണിക്കണ്ണനും, ആദിപരാശക്തിക്കും പ്രത്യേക പൂജകളും മഹാനൈവേദ്യ സമര്‍പ്പണവും നടത്തി. അതിനുശേഷം 2017- 18 വര്‍ഷത്തെ മകരവിളക്ക് മഹോത്സവത്തിനായി അയ്യപ്പ സ്വാമിയെ ഉണര്‍ത്തുപാട്ട് പാടി ഉണര്‍ത്തിയശേഷം കലിയുഗവരദനായ മണികണ്ഠ പെരുമാളിനെ ദീപാലങ്കാരങ്ങള്‍ കാട്ടിയശേഷം നട തുറന്നു. “ശിവസ്യഹൃദയം വിഷ്ണു: വിഷ്‌ണോസ്തുഹൃദയം ശിവ:’ എന്ന സ്കന്ദോപനിഷത്തിലെ വരികള്‍ ഉള്‍ക്കൊണ്ട് ഹരിഹര പുത്രനായ അയ്യപ്പസ്വാമിക്ക്, ഹരിഹരസൂക്തങ്ങളാള്‍ നെയ്യഭിഷേകവും, ശ്രീരുദ്ര ചമകങ്ങളാല്‍ ഭസ്മാഭിഷേകവും, പുരുഷസൂക്തത്തിനാല്‍ കളഭാഭിഷേകവും നടത്തിയശേഷം അഷ്ടദ്രവ്യകലശം ആടി. തുടര്‍ന്ന് നൈവേദ്യം സമര്‍പ്പിച്ച് പ്രത്യേക പൂജകള്‍ നടത്തിയ ശേഷം നട അടച്ചു.

ചിക്കാഗോയിലേയും, ഫേസ്ബുക്ക് വഴി അയ്യപ്പ പൂജകള്‍ ലൈവായി കണ്ടുകൊണ്ടിരുന്ന ലോകത്തിലെ എല്ലാ അയ്യപ്പഭക്തര്‍ക്കും ദിവ്യാനുഭൂതി പകര്‍ന്നുകൊണ്ട് ശരണഘോഷമുഖരിതമായ അന്തരീക്ഷത്തില്‍ അപ്പുക്കുട്ടന്‍ കലക്കലിന്റെ നേതൃത്വത്തില്‍ വാദ്യമേളങ്ങളുടെ അകമ്പടിയോടെ ബിജു കൃഷ്ണന്‍ സ്വാമി തലയില്‍ ഏറ്റിക്കൊണ്ടുവന്ന തിരുവാഭരണ ഘോഷയാത്രയെ, പ്രധാന പുരോഹിതന്‍ ശ്രീ ലക്ഷ്മി നാരായണ ശാസ്ത്രികള്‍ ആരതി ഉഴിഞ്ഞ് സ്വീകരിച്ച് തിരുവാഭരണപ്പെട്ടി സന്നിധാനത്തില്‍ എത്തിച്ചു. തിരുവാഭരണ വിഭൂഷിതനായ അയ്യപ്പസ്വാമിക്കു മുന്നില്‍ പടിപൂജയും അഷ്‌ടോത്തര അര്‍ച്ചനയും കര്‍പ്പൂരാരാധനയും നടത്തി നട അടച്ചു. വീണ്ടും ബിംബശുദ്ധി വരുത്തി പനിനീര്‍ അഭിഷേകം നടത്തി നട തുറന്ന് പുഷ്പാലങ്കാരം നടത്തിയ ശേഷം അയ്യപ്പമന്ത്ര കവചനത്തിനാലും സാമവേദ പാരായണത്തിനാലും മന്ത്രപുഷ്പ പാരായണത്തിനാലും അയ്യപ്പസ്വാമിയുടെ ഇഷ്ടാഭിഷേകമായ പുഷ്പാഭിഷേകവും അഷ്‌ടോത്തര അര്‍ച്ചനയും ദീപാരാധനയും നടത്തി. തുടര്‍ന്നു നമസ്കാരമന്ത്രവും, മംഗള ആരതിയും നടത്തിയശേഷം ഹരിവരാസനം പാടി നട അടച്ചു. പ്രസന്നന്‍ നമ്പൂതിരി മകരവിളക്ക് ഉത്സവത്തിനായി ഉയര്‍ത്തിയ കൊടി താഴ്ത്തി ഈവര്‍ഷത്തെ മണ്ഡല മകരവിളക്ക് ഉത്സവങ്ങള്‍ക്ക് പരിസമാപ്തികുറിച്ചു.

ജ്ഞാനത്തിന്റെ പരമകാഷ്ടയില്‍ ഗുരുതന്നെ ദൈവം, ദൈവം തന്നെ ഗുരു. ലോക ഗുരുവായിട്ടാണ് നാം അയ്യപ്പ തത്വത്തെ സങ്കല്‍പിച്ചിരിക്കുന്നത്. ദുര്‍ലഭമായ മനുഷ്യ ജന്മത്തില്‍ അറിയേണ്ടത് ഒന്നു മാത്രമാണ്- അതു ബ്രഹ്മവിദ്യ-പരമായ ജ്ഞാനമാണ്. ഈ തത്വം നമുക്ക് അനുഭവവേദ്യമാക്കിത്തീര്‍ത്ത ഒരു ഉജ്വലമായ പുണ്യകാലമായിരുന്നു മണ്ഡല മകരവിളക്ക് കാലം എന്നു ഗീതാമണ്ഡലം അധ്യക്ഷന്‍ ജയ് ചന്ദ്രന്‍ അഭിപ്രായപ്പെട്ടു. അയ്യപ്പതത്വം ലോകം മുഴുവന്‍ അംഗീകരിക്കപ്പെട്ടതിന്റെ തെളിവാണ് മരംകൊച്ചുന്ന തണുപ്പിനേയും അവഗണിച്ച് ഇന്നിവിടെ തടിച്ചുകൂടിയ ഭക്തജനപ്രവാഹം എന്നു വിശ്വനാഥന്‍ കട്ടകാടും, ശ്രീ സായ് ഭജന്‍ ഗ്രൂപ്പിന്റെ അതിമനോഹരമായ ഭജനകളും ഗീതാമണ്ഡലം ഭജന്‍ ഗ്രൂപ്പിന്റെ ഭജനകളും ഭക്തരെ ആനന്ദത്തിന്റെ പരമകാഷ്ഠയില്‍ എത്തിച്ചു എന്ന് വൈസ് പ്രസിഡന്റ് ശേഖരന്‍ അപ്പുക്കുട്ടന്‍ അഭിപ്രായപ്പെട്ടു. അമേരിക്കയില്‍ ആദ്യമായി അയ്യപ്പപൂജയ്ക്കായി നാരായണന്‍ അപ്പുക്കുട്ടന്‍ പണികഴിപ്പിച്ച മനോഹരമായ കൊടിമരം എല്ലാ അയ്യപ്പഭക്തര്‍ക്കും ശബരിമല സന്നിധാനത്ത് എത്തിയ പ്രതീതിയാണ് നല്‍കിയത്. ഈവര്‍ഷത്തെ അയ്യപ്പ പൂജകള്‍ കൃത്യമായ ആചാരാനുഷ്ഠാനങ്ങളോടെ നടത്തിയ പ്രധാന പുരോഹിതനായ ശ്രീ ലക്ഷ്മി നാരായണ ശാസ്ത്രികള്‍ക്കും, സഹ കാര്‍മികനായി പ്രവര്‍ത്തിച്ച ബിജു കൃഷ്ണനും, വേദപാരായണങ്ങള്‍ നടത്തിയ സീതാരാമ അയ്യര്‍ക്കും ഗീതാമണ്ഡലം സ്പിരിച്വല്‍ ലീഡര്‍ ആനന്ദ് പ്രഭാകര്‍ നന്ദി പ്രകാശിപ്പിച്ചു. ഈവര്‍ഷത്തെ ഗീതാമണ്ഡലത്തിന്റെ മകരവിളക്ക് മഹോത്സവം സ്‌പോണ്‍സര്‍ ചെയ്ത രമ നായര്‍ക്കും കുടുംബാംഗങ്ങള്‍ക്കും, മറ്റ് എല്ലാ അയ്യപ്പ പൂജകളും സ്‌പോണ്‍സര്‍ ചെയ്ത ഭക്തര്‍ക്കും, അയ്യപ്പപൂജകള്‍ക്കുള്ള പൂജാ സാമഗ്രികള്‍ നല്‍കിയ എസ്.എം.എസ് മലയാളി ഗ്രോസറി സ്റ്റോറിനും അതുപോലെ ഭക്തിഗാനമേള സംഘടിപ്പിച്ച സായ് ഗ്രൂപ്പിനും, ഗീതാമണ്ഡലം ഭജനസംഘത്തിനും, ഈവര്‍ഷത്തെ അയ്യപ്പ പൂജകളില്‍ പങ്കെടുത്ത എല്ലാ ഭക്തജനങ്ങള്‍ക്കും, ഇത് ഒരു വലിയ വിജയമാക്കാന്‍ സഹായിച്ച ആനന്ദ് പ്രഭാകറിനും മറ്റ് എല്ലാ കമ്മിറ്റി അംഗങ്ങള്‍ക്കും ജനറല്‍ സെക്രട്ടറി ബൈജു എസ് മേനോന്‍ നന്ദി അറിയിച്ചു.

മകരവിളക്ക് ഉത്സവത്തില്‍ പങ്കെടുത്ത എല്ലാ ഭക്തജനങ്ങളും ബ്രഹ്മശ്രീ ലക്ഷ്മി നാരായണ ശാസ്ത്രികളില്‍ നിന്ന് പ്രസാദം വാങ്ങി അനുഗ്രഹം തേടി. അതിനുശേഷം നടന്ന മഹാപ്രസാദ വിതരണത്തോടെ മകരവിളക്ക് ഉത്സവങ്ങള്‍ക്ക് കൊടിയിറങ്ങി.

രാമചന്ദ്രന്‍ നായര്‍ അറിയിച്ചതാണിത്.

ജോയിച്ചന്‍ പുതുക്കുളം

നോർത്ത് അമേരിക്കയും യൂറോപ്പും കടന്ന് ശാലോം വേൾഡ് ഓസ്ട്രേലിയയിലേക്ക്

സിഡ്നി: നോർത്ത് അമേരിക്കയിലും യൂറോപ്പിലും ആത്മീയവസന്തം സമ്മാനിച്ച ശാലോം വേൾഡ് ഇംഗ്ലീഷ് ചാനൽ ഓസ്ട്രേലിയയിലേക്ക് എത്തുന്നു, ഓസ്ട്രേലിയൻ ദിനമായ ജനുവരി 26 രാവിലെ 8.00 മുതൽ. ശാലോം മീഡിയ ഓസ്ട്രേലിയയുടെ രക്ഷാധികാരികളിൽ ഒരാളും മെൽബൺ സെന്റ് തോമസ് സീറോ മലബാർ ബിഷപ്പുമായ മാർ ബോസ്‌ക്കോ പുത്തൂരിന്റെ അനുഗ്രഹാശിസുകളോടെ, മറ്റൊരു രക്ഷാധികാരിയായ ഹൊബാർട്ട് ആർച്ച്ബിഷപ്പ് ജൂലിയൻ പോർട്ടിയസാണ് ചാനലിന്റെ സ്വിച്ച് ഓൺ കർമം നിർവഹിക്കുക. ഹൊബാർട് സെന്റ് മേരീസ് കത്തീഡ്രലിലെ പ്രഭാത ദിവ്യബലി അർപ്പണത്തിനുശേഷമാകും സ്വിച്ച്ഓൺ കർമം.

ലോകമെമ്പാടുമുള്ള മലയാളികളിലേക്ക് സുവിശേഷത്തിന്റെ സദ്വാർത്ത പകരുന്ന ശാലോമിന്റെ ദൃശ്യമാധ്യമശുശ്രൂഷ 2014 ഏപ്രിൽ 27നാണ് ഇംഗ്ലീഷ് ജനതയ്ക്കുമുന്നിൽ മിഴി തുറന്നത്. ഡിവൈൻ മേഴ്സി തിരുനാൾ ദിനത്തിൽ, വാഴ്ത്തപ്പെട്ട ജോൺ പോൾ രണ്ടാമനെയും ജോൺ 23-ാമനെയും വിശുദ്ധഗണത്തിലേക്ക് ഉയർത്തുന്ന തിരുക്കർമങ്ങൾ വത്തിക്കാനിൽനിന്ന് തൽസമയം പ്രേക്ഷകരിലേക്കെത്തിച്ചുകൊണ്ടായിരുന്നു മുഴുവൻ സമയ കത്തോലിക്കാ കരിസ്മാറ്റിക് ചാനലായ ശാലോം വേൾഡിന്റെ ആരംഭം.

നോർത്ത് അമേരിക്കയ്ക്കുശേഷം ഘട്ടം ഘട്ടമായി എല്ലാ ഭൂഖണ്ഡങ്ങളിലേക്കും ചാനൽ വ്യാപിപ്പിക്കാനുള്ള പദ്ധതിയുടെ മൂന്നാം ഘട്ടമാണ് ഇപ്പോൾ സാധ്യമാകുന്നത്. 2016ലെ ഈസ്റ്റർ ദിനമായ മാർച്ച് 12ന് തുടക്കം കുറിച്ച ശാലോം വേൾഡ് യൂറോപ്പിന്റെ പ്രക്ഷേപണമായിരുന്നു രണ്ടാം ഘട്ടം. യൂറോപ്പിൽനിന്നുള്ള പരിപാടികൾ ഉൾപ്പെടുത്തി പൂർണമായും യൂറോപ്പ്യൻ സമയക്രമത്തിലാണ് ശാലോം വേൾഡ് യൂറോപ്പി ന്റെ സംപ്രേക്ഷണം. ഏഷ്യൻ വൻകരയാണ് അടുത്ത ഘട്ടത്തിൽ പ്രക്ഷേപണം ആരംഭിക്കാൻ ഉദ്ദേശിക്കുന്ന ഭൂഖണ്ഡം.

കത്തോലിക്കാസഭയോടും സഭാപ്രബോധനങ്ങളോടും വിധേയപ്പെട്ട് ലോക സുവിശേഷവൽക്കരണം സാധ്യമാക്കാനും സഭയുടെ വിവിധ ശുശ്രൂഷകൾക്ക് പിന്തുണയേകാനും സഹായകമായ പരിപാടികളാണ് ശാലോം വേൾഡിന്റെ ഉള്ളടക്കം. ലോകമെങ്ങും നടക്കുന്ന മിഷണറി പ്രവർത്തനങ്ങളെ പൊതുസമൂഹത്തിന്റെ ശ്രദ്ധയിൽപ്പെടുത്തുന്നതിനൊപ്പം മിഷൻ പ്രവർത്തനങ്ങൾക്ക് പിന്തുണയേകാൻ പ്രചോദനമേകുന്ന പരിപാടികളും ഉൾപ്പെടുത്തിയിട്ടുണ്ട്.

ആത്മീയവളർച്ചയ്ക്കുതകുന്ന വിശ്വാസപ്രബോധനങ്ങൾ, ഡോക്യുമെന്ററികൾ, ടോക് ഷോ, മ്യൂസിക് വീഡിയോസ്, കൺസേർട്സ്, സന്മാർഗമൂല്യങ്ങൾ പകരുന്ന സിനിമകൾ, നാടകങ്ങൾ, കുട്ടികൾക്കുവേണ്ടിയുള്ള ആനിമേഷൻ വീഡിയോകൾ എന്നിവ ശാലോം വേൾഡി ന്റെ ജനപ്രിയ പരിപാടികളിൽ ചിലതുമാത്രം. വത്തിക്കാനിൽ പാപ്പ പങ്കെടുക്കുന്ന പരിപാടികൾ, വിവിധ രാജ്യങ്ങളിൽ നടക്കുന്ന പേപ്പൽ പര്യടനങ്ങൾ എന്നിവയുടെ തൽസമയ സംപ്രേഷണവും ശാലോം വേൾഡിനെ കൂടുതൽ ശ്രദ്ധേയമാക്കുന്നു.

യു.കെ, കാനഡ, അയർലൻഡ് എന്നിവിടങ്ങളിൽനിന്ന് ദിവ്യബലികൾ തത്സമയം സംപ്രേഷണം ചെയ്യുന്നതിനൊപ്പം ജപമാലയർപ്പണം, ദിവ്യകാരുണ്യ ആരാധനയുടെ സംേപ്രഷണം എന്നിവയും അനുദിന പരിപാടികളിൽ ഉൾപ്പെടുത്തിയിട്ടുണ്ട്. മാസാദ്യവെള്ളിയാഴ്ചകളിൽ ക്രമീകരിച്ചിരിക്കുന്ന നൈറ്റ് വിജിലിൽ ലോകത്തിന്റെ വിവിധ ഭാഗങ്ങളിൽനിന്ന് പങ്കുചേരുന്നത് പതിനായിരക്കണക്കിന് വിശ്വാസികളാണ്.

കൂടാതെ മരിയൻ കോൺഫറൻസ്, ഡിവൈൻ മേഴ്‌സി കോൺഫറൻസ്, യൂക്കരിസ്റ്റിക്ക് കോൺഗ്രസ്, കരിസ്മാറ്റിക് കോൺഗ്രസ്, പ്രോ ലൈഫ് ഗാതറിംഗുകൾ, യൂത്ത് അൻഡ് അഡൽറ്റ് കോൺഫറൻ ഉൾപ്പെടെയുള്ള സമ്മേളനങ്ങളുടെ കവറേജും ഉൾപ്പെടുത്തിയിട്ടുണ്ട്. അമേരിക്കയിലെ സ്റ്റ്യൂബൻവിൽ യൂത്ത് കോൺഫറൻസിനൊപ്പം ഓസ്ട്രേലിയയിൽനിന്നുള്ള ഇഗ്നൈറ്റ് യൂത്ത് മിനിസ്ട്രി, നെറ്റ് യൂത്ത് മിനിസ്ട്രി എന്നിവയുടെ കോൺഫറൻസുകളും ശാലോം വോൾഡ് സംപ്രേഷണം ചെയ്യാറുണ്ട്.

പരസ്യങ്ങളെ ആശ്രയിക്കാതെ മുന്നേറുന്ന ശാലോം വേൾഡിന് ശക്തിപകരുന്നത് എസ്.പി.എഫ് (ശാലോം പീസ് ഫെല്ലോഷിപ്പ്) അംഗങ്ങളുടെ വിശ്വാസത്തിലൂന്നിയ പിന്തുണയാണ്. ശാലോം മീഡിയ യു.എസ്.എയുടെ ആസ്ഥാനമായ ടെക്സസിലെ മക്അലനിലാണ് പ്രക്ഷേപണകേന്ദ്രം. ടി.വി പരിപാടികൾ തയാറാക്കാൻ അമേരിക്കയ്ക്കും കാനഡയ്ക്കും പുറമെ യു.കെ, അയർലൻഡ്, വത്തിക്കാൻ എന്നിവിടങ്ങളിലും പ്രൊഡക്ഷൻ ഹൗസുകളുമുണ്ട്. ഓസ്ട്രേലിയയിലും പ്രൊഡക്ഷൻ യൂണിറ്റുകൾ തയാറായിക്കഴിഞ്ഞു.

നോർത്ത് അമേരിക്കയിലേതുപോലെ ഇതര ഭൂഖണ്ഡങ്ങളിലും സാറ്റലൈറ്റ് പ്രക്ഷേപണം ആരംഭിക്കാനുള്ള തയാറെടുപ്പിലാണ് ശാലോം വേൾഡ്. പ്രേക്ഷകർ കാണാനാഗ്രഹിക്കുന്ന പരിപാടികൾ www.shalomworld.org/live എന്ന വെബ് സൈറ്റിലൂടെയും സോഷ്യൽ നെറ്റ്വർക്ക് പ്ലാറ്റ്ഫോമിലൂടെയും ഐ.ഒ.എസ്, ആൻഡ്രോയിഡ് പ്ലാറ്റ്ഫോമിലൂടെയും കാണാൻ സൗകര്യവുമുണ്ട്. കൂടുതൽ വിവരങ്ങൾക്ക് www.shalomworld.org/connectedtv

മഞ്ഞിനിക്കര ബാവായുടെ ഓര്‍മ്മപ്പെരുന്നാള്‍ ചിക്കാഗോയില്‍

ചിക്കാഗോ: ചിക്കാഗോയില്‍ അന്ത്യോഖ്യ സിംഹാസനത്തിന്‍ കീഴിലുള്ള സെന്റ് പീറ്റേഴ്‌സ് യാക്കോബായ സുറിയാനി പള്ളി, സെന്റ് ജോര്‍ജ് യാക്കോബായ സുറിയാനി പള്ളി, സെന്റ് മേരീസ് ക്‌നാനായ യാക്കോബായ സുറിയാനി പള്ളി, എന്നീ ഇടവകകള്‍ ചേര്‍ന്നു നടത്തിവരുന്ന പരിശുദ്ധ മോറാന്‍ മോര്‍ ഇഗ്നാത്തിയോസ് ഏലിയാസ് തൃതിയന്‍ പാത്രിയര്‍ക്കീസ് ബാവായുടെ, 86-ാമത് ഓര്‍മ്മപ്പെരുന്നാള്‍ 2018 ഫെബ്രുവരി 10, 11 തിയതികളില്‍ ചിക്കാഗോ സെന്റ് പീറ്റേഴ്‌സ് യാക്കോബായ സുറിയാനി പള്ളിയില്‍ വച്ചു നടത്തുന്നതിന് തീരുമാനിച്ചു.

ഫെബ്രുവരി 4 ഞായറാഴ്ച വി: കുര്‍ബ്ബാനക്കു ശേഷം 12.30 ചിക്കാഗോ സെന്റ് പീറ്റേര്‌ഴ്‌സ് യക്കോബായ പള്ളിയില്‍ പെരുന്നാള്‍ കൊടിയേറ്റുന്നതാണു. ഫെബ്രുവരി 10 ശനിയാഴ്ച വൈകുന്നേരം 7 മണിക്ക് അമേരിക്കന്‍ ഭദ്രാസന മെത്രാപ്പോലിത്ത അഭി: യല്‍ദോ മോര്‍ തീത്തോസ് തിരുമേനിയുടെ പ്രധാന കാര്‍മ്മികത്വത്തില്‍ സന്ധ്യാപ്രാര്‍ത്ഥനയും തുടര്‍ന്ന് വചനസന്ദേശവും നടക്കും.
പെരുന്നാളിനോടനുബന്ധിച്ച് ശനിയാഴ്ച സന്ധ്യാപ്രാര്‍ത്ഥനക്കു ശേഷം ക്വയര്‍ഫെസ്റ്റ് ഉണ്ടായിരിക്കുന്നതാണു. ആശിര്‍വാദത്തോടുകൂടി ശനിയാഴ്ചത്തെ പരിപാടികള്‍ അവസാനിക്കും.

ഫെബ്രുവരി 11-ാം തിയതി ഞായറാഴ്ച രാവിലെ 9 മണിക്ക് പ്രഭാതപ്രാര്‍ത്ഥനയും 10 മണിക്ക് അഭി: യല്‍ദോ മോര്‍ തീത്തോസ് തിരുമേനിയുടെ പ്രധാന കാര്‍മ്മികത്വത്തില്‍ വി: അഞ്ചിന്മേല്‍ കുര്‍ബ്ബാനയും ആരംഭിക്കും. തുടര്‍ന്ന് സ്‌നേഹവിരുന്നോടു കൂടി ഈ വര്‍ഷത്തെ പെരുന്നാളിനു് തിരശീലവീഴും.

ജോയിച്ചന്‍ പുതുക്കുളം

കുട്ടമ്പുഴയിലെ ആദിവാസി ജനങ്ങള്‍ക്ക് ഫൊക്കാനയുടെ കൈത്താങ്ങ്

കോതമംഗലം: അമേരിക്കയിലെ മലയാളി കൂട്ടായ്മയായ ഫൊക്കാന കേരളത്തിലെ കോതമംഗലം താലൂക്കിലെ കുട്ടമ്പുഴ പഞ്ചായത്തിലെ ആദിവാസി ജനങ്ങളുടെ കുടിയിലേക്ക് രോഗനിര്‍ണ്ണയ ഉപകരണങ്ങളും, അത്യാഹിത രക്ഷാ സജ്ജീകരണങ്ങളും എത്തിക്കുന്നു. ഇതിലൂടെ കുട്ടമ്പുഴയെ ഗോഗവിമുക്ത ഗ്രാമമാക്കി മാറ്റുകയാണ് ഫൊക്കനയുടെ ലക്ഷ്യം.

കേരളത്തിലെ വിദൂര ഗ്രാമങ്ങളിലൊന്നാണ് കുട്ടമ്പുഴ. 2011-ലെ കണക്ക് പ്രകാരം അവിടുത്തെ ജനസംഖ്യ 24,791 ആണ്. കുട്ടമ്പുഴ പഞ്ചായത്തില്‍ നിന്നും 15 കിലോമീറ്റര്‍ വനത്തിലൂടെ നടന്നുവേണം ആദിവാസികളുടെ കുടിയിലെത്താന്‍. അതുകൊണ്ടുതന്നെ ഇവര്‍ക്ക് പുറംലോകവുമായി ആശയവിനിമയം സാധ്യമല്ല. അതിനാല്‍ അപകടങ്ങള്‍ നടന്നാല്‍ പോലും 15 കിലോമീറ്റര്‍ മറികടന്നുവേണം കുട്ടമ്പുഴ പഞ്ചായത്തിലെ ജീപ്പ് പോലുള്ള വാഹനങ്ങളെ ആശ്രയിക്കാന്‍. ഇതിമൂലം അപകടങ്ങള്‍ സംഭവിച്ചാല്‍ വിദഗ്ധ ചികിത്സ കിട്ടാതെയുള്ള മരണം ഇവിടെ പതിവാണ്. ഓരോ വര്‍ഷവും നൂറിലേറെ ആദിവാസി ജനങ്ങള്‍ക്ക് പാമ്പുകടിയേല്‍ക്കുകയും, മരത്തില്‍ നിന്നു വീഴുകയും, വന്യമൃഗങ്ങളുടെ ആക്രമണത്തിന് ഇരയാകുകയും ചെയ്യുന്നു. അത്യാഹിത സജ്ജീകരണങ്ങള്‍ ഇല്ലാത്തതിനാല്‍ ഗര്‍ഭിണികളായ സ്ത്രീകളേയും തക്ക സമയത്ത് ആശുപത്രിയിലെത്തിക്കാനാകാതെ മരണപ്പെടുന്നു.

ഈ പ്രതിസന്ധിക്ക് പരിഹാരമായും, കുട്ടമ്പുഴയിലെ ആദിവാസികളുടെ മരണനിരക്ക് കുറയ്ക്കാനും, ഫൊക്കാനയുടെ പ്രതിനിധികളായ പോള്‍ കറുകപ്പള്ളി, ജോയ് ഇട്ടന്‍, ഫിലിപ്പോസ് ഫിലിപ്പ് എന്നിവരും , അമേരിക്കന്‍ സംഘടനയായ എന്‍.എ.ഐ.ഐ.പി ഭാരവാഹികളും, കൂടാതെ അമൃത ഹോസ്പിറ്റല്‍, നാഷണല്‍ ഹെല്‍ത്ത് മിഷന്‍ എന്നിവരും ഈ സംരംഭത്തില്‍ അണിചേരുന്നു.

ഇതിലൂടെ കുട്ടമ്പുഴയിലെ 14 കുടികളില്‍ ആരോഗ്യ നിരീക്ഷണ ഉപകരണങ്ങള്‍ നല്‍കുകയും, അത്യാഹിതം സംഭവിച്ചാല്‍ ആശുപത്രികളേയും ജീപ്പ്, ആംബുലന്‍സ് തുടങ്ങിയ വാഹനങ്ങളേയും വിവരം അറിയിക്കാനും ഇവയുടെ സാന്നിധ്യം ജനങ്ങളെ അറിയിക്കാനുമായി വികസിപ്പിച്ചെടുത്ത മൊബൈല്‍ ആപ്ലിക്കേഷന്‍ എല്ലാ ജീപ്പ്, ആംബുലന്‍സ് ഡ്രൈവര്‍മാര്‍ക്കും എത്തിക്കുന്നു.

ഇതിനു മുന്നോടിയായി 2018 ജനുവരി 28-നു കുട്ടമ്പുഴയിലെ സ്‌പെഷാലിറ്റി ക്ലിനിക്കല്‍ ലബോറട്ടറി അംഗമായ ബിനോയ്, പി.എച്ച്.സി ഹെല്‍ത്ത് ഇന്‍സ്‌പെക്ടര്‍ കെ.ആര്‍ സുഗുണന്‍, വാര്‍ഡ് മെമ്പര്‍ നിബി എബി, ഫൊക്കാനയെ പ്രതിനിധീകരിച്ച് ജോയ് ഇട്ടന്‍, ഉരുളന്തണ്ണി ഫ്രണ്ട്‌സ് ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ് എന്നിവരുടെ മഹനീയ സാന്നിധ്യത്തില്‍ ഉരുളന്തണ്ണി സരസ്വതി ശിശുമന്ദിരം സ്കൂളില്‍ വച്ച് ഈ ദൗത്യത്തിനു തുടക്കംകുറിച്ചു.

കൂടുതല്‍ വിവരങ്ങള്‍ക്ക്: യു.എസ്.എ 847 562 1051, ഇന്ത്യ 9496 955 379.

ജോയിച്ചന്‍ പുതുക്കുളം

സീറോ മലബാര്‍ കത്തീഡ്രലില്‍ ടാക്‌സ് സെമിനാര്‍ ജനുവരി 28-ന്

ഷിക്കാഗോ: ഷിക്കാഗോ എസ്.എം.സി.സിയുടെ നേതൃത്വത്തില്‍ ജനുവരി 28-ന് നികുതിയെക്കുറിച്ചുള്ള സെമിനാര്‍ നടത്തുന്നു. വര്‍ഷങ്ങളായി ഈ മേഖലയില്‍ പ്രാവീണ്യമുള്ള ജോസഫ് ചാമക്കാല സി.പി.എ, ആന്‍ഡ്രൂസ് തോമസ് സി.പി.എ എന്നിവരാണ് സെമിനാറില്‍ സംസാരിക്കുന്നത്.

ജനുവരി 28-നു രാവിലെ 9.30-ന് ആരംഭിക്കുന്ന സെമിനാറില്‍ ചോദ്യോത്തരങ്ങള്‍ക്കുള്ള സമയവും ക്രമീകരിച്ചിരിക്കുന്നു. 2017-ലെ ടാക്‌സ് സംബന്ധമായ മാറ്റങ്ങളും വിശദാംശങ്ങളും സെമിനാറില്‍ വിശദീകരിക്കും.

സീറോ മലബാര്‍ കത്തീഡ്രലിന്റെ പാരീഷ് ഹാളില്‍ വച്ചാണ് സെമിനാര്‍ നടത്തപ്പെടുന്നത്. സെമിനാറിന്റെ സുഗമമായ നടത്തിപ്പിന് ഷിബു അഗസ്റ്റിന്‍, ജോസഫ് നാഴിയംപാറ, ജോണ്‍സണ്‍ കണ്ണൂക്കാടന്‍ എന്നിവര്‍ നേതൃത്വം നല്‍കുന്നു.

എസ്.എം.സി.സിക്കുവേണ്ടി മേഴ്‌സി കുര്യാക്കോസ് അറിയിച്ചതാണിത്.

ജോയിച്ചന്‍ പുതുക്കുളം

ഫ്രണ്ട്സ് ഓഫ് തിരുവല്ലയ്ക്കു പുതിയ സാരഥികൾ

ഹൂസ്റ്റൺ: ഹൂസ്റ്റണിലെ പ്രമുഖ മലയാളി സംഘടനകളിലൊന്നായ ഫ്രണ്ട്സ് ഓഫ് തിരുവല്ലയുടെ 2018-19 ലേക്കുള്ള പുതിയ ഭാരവാഹികളെ തെരഞ്ഞെടുത്തു.

ജനുവരി 20നു ശനിയാഴ്ച വൈകുന്നേരം 5:30 മുതൽ സ്റ്റാഫോർഡിലുള്ള ദേശി റെസ്റ്റോറന്റിൽ വച്ച് നടന്ന പുതുവത്സര കുടുംബ സംഗമത്തോടനുബന്ധിച്ചാണ് തെരഞ്ഞെടുപ്പ് നടന്നത്.

പ്രസിഡന്റ് റോബിൻ ഫിലിപ്പ് അധ്യക്ഷത വഹിച്ച ചടങ്ങിൽ മാർത്തോമാ സഭയിലെ സീനിയർ വൈദികൻ റവ. എസ്. അലക്സാണ്ടർ ക്രിസ്തുമസ് പുതുവത്സര സന്ദേശം നൽകി. റവ.ഫാ. എബ്രഹാം തോട്ടത്തിൽ ആശംസകൾ അർപ്പിച്ചു.

സെക്രട്ടറി ഉമ്മൻ തോമസ് വാർഷിക റിപ്പോർട്ടും ട്രഷറർ ടെറീഷ് തോമസ് കണക്കും അവതരിപ്പിച്ചു. തുടർന്ന് നടന്ന തെരഞ്ഞെടുപിന് എം.ടി.മത്തായി ഇലക്ഷൻ കമ്മിഷണർ ആയി പ്രവർത്തിച്ചു.

2018-19 ലേക്കു തെരഞ്ഞെടുക്കപ്പെട്ട ഫ്രണ്ട്സ് ഓഫ് തിരുവല്ല ഭാരവാഹികൾ;

ഈശോ ജേക്കബ് (പ്രസിഡന്റ്), റോബിൻ ഫിലിപ്പ് (വൈസ് പ്രസിഡന്റ് ), തോമസ് ഐപ്പ് (സെക്രട്ടറി), ഉമ്മൻ തോമസ് (ട്രഷറർ), ബിജു ജോർജ് (ജോയിന്റ് സെക്രട്ടറി), സുജ കോശി (ജോയിന്റ് ട്രഷറർ).

ഡയറക്ടർ ബോർഡ് അംഗങ്ങൾ ; പി.എ വർഗീസ്, സാം സക്കറിയ,മറിയാമ്മ ഉമ്മൻ, ജോർജ്‌ തോമസ്, ഡോ. അന്ന.കെ ഫിലിപ്പ്, മോൻസി വർഗീസ്,വിനോദ് ഈപ്പൻ, ഇ.എ.എബ്രഹാം, റെനി കവലയിൽ.

വൈസ് പ്രസിഡന്റ് തോമസ് ഐപ്പ് നന്ദി പ്രകാശിപ്പിച്ചു.

വിവിധ കലാപരിപാടികളും വിഭവ സമൃദ്ധമായ ഡിന്നറും തിരുവല്ല സംഗമ സന്ധ്യയെ മികവുറ്റതാക്കി മാറ്റി.

ജീമോൻ റാന്നി