എസ്.ബി. അലുംമ്‌നിക്ക് പുതിയ നേതൃത്വവും, പ്രതിഭാ പുരസ്കാര വിതരണവും

ചിക്കാഗോ: ചങ്ങനാശേരി എസ്.ബി ആന്‍ഡ് അസംപ്ഷന്‍ പൂര്‍വ്വ വിദ്യാര്‍ത്ഥി സംഘടനയുടെ ചിക്കാഗോ ചാപ്റ്ററിന്റെ അടുത്ത രണ്ടു വര്‍ഷത്തേക്കുള്ള ഭാരവാഹികളെ തെരഞ്ഞെടുത്തു. ഒപ്പം 2017-ലെ ഹൈസ്കൂള്‍ പ്രതിഭാ പുരസ്കാര വിജയികളെ പ്രഖ്യാപിക്കുകയും സമ്മാനങ്ങള്‍ വിതരണം ചെയ്യുകയും ചെയ്തു. ഏപ്രില്‍ 21-ന് ഡസ്‌പ്ലെയിന്‍സിലുള്ള ഇമ്പീരിയല്‍ ട്രാവല്‍സ് ഹാളിലാണ് സമ്മേളനം നടന്നത്.

ആല്‍വീന ജോസഫും, എമിലി ഷിജോയും പ്രാര്‍ത്ഥനാഗാനം ആലപിച്ചുകൊണ്ട് സമ്മേളനം ആരംഭിച്ചു. ഷാജി കൈലാത്ത് സ്വാഗതവും, ഷിബു അഗസ്റ്റിന്‍ അധ്യക്ഷ പ്രസംഗവും, ഡോ. ജയിംസ് മാത്യു മുഖ്യ പ്രഭാഷണവും നടത്തി. റോസ് ഉറുമ്പാക്കല്‍ ഗാനം ആലപിച്ചു. ഗുഡ്‌വിന്‍ ഫ്രാന്‍സീസ് ഇന്ത്യന്‍ ദേശീയ ഗാനം ആലപിച്ചു. റെറ്റി കൊല്ലാപുരം വാര്‍ഷിക പ്രവര്‍ത്തന റിപ്പോര്‍ട്ടും, ജോണ്‍ നടയ്ക്കപ്പാടം സാമ്പത്തിക റിപ്പോര്‍ട്ടും അവതരിപ്പിച്ചു. സണ്ണി വള്ളിക്കളം നന്ദി പറഞ്ഞു. ജെന്നിഫര്‍ ജയിംസ് അവതാരകയായിരുന്നു. തെരഞ്ഞെടുപ്പിന് ചുക്കാന്‍ പിടിച്ചത് ജയിംസ് ഓലിക്കരയും, ജിജി മാടപ്പാട്ടും, ബിജി കൊല്ലാപുരവുമാണ്.

മുഖ്യാതിഥിയായിരുന്ന ഡോ. ജയിംസ് മാത്യു തന്റെ മുഖ്യ പ്രഭാഷണത്തില്‍ അറിവിനൊപ്പം ചെയ്യേണ്ടതും ചെയ്യരുതാത്തതും ഏതൊക്കെയെന്ന തിരിച്ചറിവുകൂടി നേടുമ്പോഴാണ് വിദ്യാഭ്യാസത്തിനു അര്‍ത്ഥമുണ്ടാകുന്നതെന്നും അതല്ലാതെ നേടുന്ന വിദ്യ അറിവിന്റെ തലത്തില്‍ മാത്രം ഒതുങ്ങുന്നു എന്നും പറഞ്ഞു.

അടുത്ത രണ്ടു വര്‍ഷത്തേക്കുള്ള സംഘടനയുടെ ഭാരവാഹികളായി താഴെപ്പറയുന്നവരെ യോഗം ഐക്യകണ്‌ഠ്യേന തെരഞ്ഞെടുത്തു.

എക്‌സിക്യൂട്ടീവ് സമിതി:
രക്ഷാധികാരി: റവ. ഡോ. ജോര്‍ജ് മഠത്തിപ്പറമ്പില്‍
പ്രസിഡന്റ്: ഷാജി കൈലാത്ത്, വൈസ് പ്രസിഡന്റുമാര്‍: ആന്റണി ഫ്രാന്‍സീസ് ആന്‍ഡ് ജോളി കുഞ്ചെറിയ. സെക്രട്ടറി: ഷീബാ ഫ്രാന്‍സീസ്, ട്രഷറര്‍: ജോണ്‍ നടയ്ക്കപ്പാടം, ജോ. സെക്രട്ടറി: റോയിച്ചന്‍ വിലയവീട്, ജോ. ട്രഷറര്‍: സെബാസ്റ്റ്യന്‍ വാഴേപ്പറമ്പില്‍.

സമിതി അംഗങ്ങള്‍:
ബിജി കൊല്ലാപുരം, ചെറിയാന്‍ മാടപ്പാട്ട്, ഷിബു അഗസ്റ്റിന്‍, ജോഷി വള്ളിക്കളം, ജയിംസ് ഓലിക്കര, സണ്ണി വള്ളിക്കളം, ബോബന്‍ കളത്തില്‍.

ഉപദേശകസമിതി:
ജോസഫ് നെല്ലുവേലില്‍, ലൈജോ ജോസഫ്, പ്രൊഫ. കെ.എസ്. ആന്റണി, കുഞ്ഞുമോന്‍ ഇല്ലിക്കല്‍, ജോസ് ചേന്നിക്കര.

സമ്മേളന മധ്യേ സംഘടനയുടെ ചിക്കാഗോ ചാപ്റ്റര്‍ പഠനത്തില്‍ മികവു പുലര്‍ത്തുന്ന അംഗങ്ങളുടെ മക്കളെ പ്രോത്സാഹിപ്പിക്കുന്നതിനും ആദരിക്കുന്നതിനും വേണ്ടി സ്ഥാപിച്ചിട്ടുള്ള 2017-ലെ ഹൈസ്കൂള്‍ വിദ്യാഭ്യാസ പ്രതിഭാ പുരസ്കാര വിജയികളെ പ്രഖ്യാപിക്കുകയും, സമ്മാനങ്ങള്‍ വിതരണം ചെയ്യുകയും ചെയ്തു.

ഇത്തരം ഉയരങ്ങള്‍ കീഴടക്കുന്നതിന് കുട്ടികള്‍ക്ക് പ്രേരകവും ത്വരകളുമായി നില്‍ക്കുന്നത് മാതാപിതാക്കള്‍ക്ക് മക്കളോടുള്ള വലിയ സമര്‍പ്പണവും മക്കള്‍ക്ക് മാതാപിതാക്കളോടുള്ള പ്രതിബദ്ധതയുമാണെന്ന് ആമുഖമായി പറഞ്ഞുകൊണ്ട് അസംപ്ഷന്‍ കോളജ് പൂര്‍വ്വ വിദ്യാര്‍ത്ഥികളായ ഷീബാ ഫ്രാന്‍സീസും, ജോളി കുഞ്ചെറിയയും പുരസ്കാര ജേതാക്കളെ സദസിന് പരിചയപ്പെടുത്തിക്കൊണ്ട് പ്രഖ്യാപനം നടത്തി.

മാത്യു വാച്ചാപറമ്പില്‍ സ്മാരക പുരസ്കാരത്തിന് ആന്‍ മേരി ഉറുമ്പാക്കല്‍ അര്‍ഹയായപ്പോള്‍, ടിം ജോസഫും, ഷോണ്‍ വെട്ടിക്കാട്ടും റവ.ഡോ. ജോര്‍ജ് മഠത്തിപ്പറമ്പില്‍ പൗരോഹിത്യ സുവര്‍ണ്ണ ജൂബിലി സ്മാരക പുരസ്കാരത്തിന് അര്‍ഹരായി. ഈ പുരസ്കാരം സ്‌പോണ്‍സര്‍ ചെയ്തിരിക്കുന്ന വാച്ചാപറമ്പില്‍ കുടുംബത്തിന് സംഘടനയുടെ പേരില്‍ ഭാരവാഹികള്‍ തദവസരത്തില്‍ നന്ദി പറഞ്ഞു.

ആന്‍ മേരി ഉറുമ്പാക്കലും ടിം ജോസഫും ഷോണ്‍ വെട്ടിക്കാട്ടും യഥാക്രമം ഡോ. ജയിംസ് മാത്യു, ഡോ. ഫിലിപ്പ് വെട്ടിക്കാട്ട്, ജോസഫ് നെല്ലുവേലി എന്നീ വിശിഷ്ടാതിഥികളില്‍ നിന്നും പുരസ്കാരങ്ങള്‍ ഏറ്റുവാങ്ങി.

ഷിബു അഗസ്റ്റിന്‍, ജോണ്‍ നടയ്ക്കാപ്പാടം, ജയിംസ് ഓലിക്കര, എബി തുരുത്തിയില്‍, ബിജി കൊല്ലാപുരം, ജിജി മാടപ്പാട്ട്, റെറ്റി കൊല്ലാപുരം, ആന്റണി ഫ്രാന്‍സീസ്, ജോഷി വള്ളിക്കളം, ആന്റണി പന്തംപ്ലാക്കല്‍, സണ്ണി വള്ളിക്കളം, ജോജോ വെങ്ങാന്തറ, ഷീബാ ഫ്രാന്‍സീസ്, ജോളി കുഞ്ചെറിയ, ബോബന്‍ കളത്തില്‍, ലൈജോ ഒളശ്ശ എന്നിവര്‍ ചടങ്ങുകള്‍ക്ക് നേതൃത്വം നല്‍കി. സമ്മേളനത്തിനു വേദിയൊരുക്കി തന്ന ഇമ്പീരിയല്‍ ട്രാവല്‍സ് മാനേജ്‌മെന്റിനു സംഘടനയുടെ പേരില്‍ ഭാരവാഹികള്‍ നന്ദി പറഞ്ഞു. വൈകിട്ട് 9.30-നു ഡിന്നറോടെ യോഗം പര്യവസാനിച്ചു. ആന്റണി ഫ്രാന്‍സീസ് വടക്കേവീട് അറിയിച്ചതാണിത്.

ജോയിച്ചന്‍ പുതുക്കുളം

കുര്യാക്കോസ് തര്യന് യാത്രയയപ്പ് നല്‍കി

ന്യൂയോര്‍ക്ക്: യോങ്കേഴ്‌സ് സെന്റ് തോമസ് ഓര്‍ത്തഡോക്‌സ് ഇടവക അംഗമായ കുര്യാക്കോസ് തരിയനും സഹധര്‍മ്മിണി സുജയും ടെക്‌സസിലേക്ക് താമസം മാറുന്നത് പ്രമാണിച്ച് 22ാം തീയതി ഞായറാഴ്ച ഇടവക സമുചിതമായ യാത്രയയപ്പ് നല്‍കി ആദരിച്ചു.

കഴിഞ്ഞ 36 വര്‍ഷത്തിനുമേല്‍ ഇടവകയുടേയും, ഭദ്രാസനത്തിന്റേയും മറ്റ് സാമൂഹിക പ്രസ്ഥാനങ്ങളുടെയും ചുമതലക്കാരനായി മാന്യമായ സേവനം കാഴ്ചവെച്ച വ്യക്തിത്വത്തിന്റെ ഉടമയാണ് കുര്യാക്കോസ് തരിയന്‍.വിശുദ്ധ കുര്‍ബ്ബാനയ്ക്ക് ശേഷം നടന്ന അനുമോദന സമ്മേളനത്തില്‍ റവ.ഫാ.ജോബ്‌സണ്‍ കോട്ടപ്പുറം, ട്രഷറാര്‍ കുരിയാക്കോസ് വറുഗീസ്, സെക്രട്ടറി ജോണ്‍ ഐസക്ക് എന്നിവര്‍ അദ്ദേഹത്തിന് എല്ലാവിധ ആശംസകളും നേര്‍ന്ന് കൊണ്ട് സംസാരിച്ചു.

സ്തുത്യര്‍ഹമായ സേവനത്തിനുള്ള പ്ലാക്കും, സമ്മാനവും ഏബ്രഹാം തോമസ്, ജോണ്‍ ഐസക്ക്, കുരിയാക്കോസ് വറുഗീസ്, പ്രിന്‍സി പതിക്കല്‍, റോയി ഏബ്രഹാം എന്നിവര്‍ കുര്യാക്കോസിനും കുടുംബത്തിനും നല്‍കി ആദരിച്ചു.

ഇടവക നല്‍കിയ ആദരവുകള്‍ക്ക് കുര്യാക്കോസ് തര്യന്‍ നന്ദി പ്രകാശിപ്പിച്ചു. പിന്നീട് നടന്ന മെന്‍സ് ഫോറം, മാര്‍ത്തമറിയം സമാജം മീറ്റിംഗുകളില്‍ കുര്യാക്കോസ് തര്യനേയും സുജയേയും ആദരിച്ച് വര്‍ഗീസ് പാപ്പന്‍ചിറ, ജെയിംസ് മാത്യു, സി.ജെ. ജോണ്‍സണ്‍, ലീലാമ്മ മത്തായി, ജെസി മാത്യു എന്നിവര്‍ പ്രസംഗിച്ചു.

കുര്യാക്കോസ് തര്യന്റെ സേവനങ്ങളെ അഭിനന്ദിക്കുകയും, ശോഭനമായ ഒരു ഭാവി കുടുംബത്തിന് ആശംസിക്കുകയും ചെയ്തു. പി.ആര്‍.ഒ മാത്യു ജോര്‍ജ് അറിയിച്ചതാണിത്.

ജോയിച്ചന്‍ പുതുക്കുളം

ഹൂസ്റ്റൺ ശ്രീ ഗുരുവായൂരപ്പൻ ക്ഷേത്രത്തിൽ ശിവ പ്രതിഷ്ഠയും ഉത്സവവും ഏപ്രിൽ 26 മുതൽ മെയ് 5 വരെ

അമേരിക്കയിലെ ഏറ്റവും പ്രശസ്തമായ ക്ഷേത്രങ്ങളുടെ നഗരമായ ഹൂസ്റ്റണിലെ ശ്രീ ഗുരുവായൂരപ്പൻ ക്ഷേത്രത്തിലെ പ്രതിഷ്ഠാ വാർഷികവും ഉത്സവവും (11620 Ormandy St, Houston}2018 ഏപ്രിൽ മാസം 26 മുതൽ മേയ് മാസം 5 വരെ കൊണ്ടാടുകയാണ്.

നോർത്ത് അമേരിക്കയിലെ ആദ്യത്തെ കേരളീയ ശൈലിയിൽ പിറവി കൊണ്ട ക്ഷേത്രമായ ഹ്യുസ്റ്റണിലെ ശ്രീ ഗുരുവായൂരപ്പൻ ക്ഷേത്രം മറ്റൊരു നാഴികക്കല്ല് കൂടി പിന്നിടാൻ തയാറെടുക്കുന്നു .ഭക്തജനങ്ങളുടെ ഏറെക്കാലത്തെ ആഗ്രഹ സഫലീകരണം സാധ്യമാക്കിക്കൊണ്ടു ശിവ പ്രതിഷ്ഠ യാഥാർഥ്യമാകുന്നു.

തന്ത്രി ബ്രഹ്മ ശ്രീ ദിവാകരൻ നമ്പൂതിരിപ്പാടിന്റെ നിർദ്ദേശാനുസരണം 2018 ഏപ്രിൽ 26 നു പ്രതിഷ്ഠാ കർമം നടത്തുവാൻ തീരുമാനിച്ചതായി ക്ഷേത്ര ഭരണസമിതി ഭാരവാഹികൾ അറിയിച്ചു.ശിവ പ്രതിഷ്ഠ മുഹൂർത്തം ഏപ്രിൽ 26 നു വ്യാഴാഴ്ച രാവിലെ 7 മുതൽ 9 വരെ വരെയാണ്. അന്ന് വൈകുന്നേരം 7.30 നു കൊടിയേറ്റവും നടത്തപെടുന്നതാണ്. ഉത്സവസമയത്തു കൊടിയേറ്റവും പറയിടീലും സമൃദ്ധിയും ആരോഗ്യവും കൊണ്ടുവരുന്നുവെന്നാണ് പരമ്പരാഗത വിശ്വാസം. പ്രശസ്ത സംഗീതജ്ഞരായ മലയാളത്തിന്റെ വാനമ്പാടി കെ.എസ്.ചിത്രയുടെയും ശരത്തിന്റെയും സാന്നിധ്യം കൊടിയേറ്റ സന്ധ്യയെ മികവുറ്റതാക്കി മാറ്റും.

ഈ വർഷത്തെ ഉത്സവത്തിന് വളരെ ആകർഷകമായ വിവിധ ഇനം ക്ഷേത്ര കലകളും മറ്റ് കലാരൂപങ്ങളും ഉൾക്കൊള്ളിച്ചിട്ടുണ്ട്. താളവാദ്യങ്ങളുടെ കുലപതിയായ പല്ലാവൂർ ശ്രീധരൻ മാരാർ നേതൃത്വം നൽകുന്ന വിസ്മയിപ്പിക്കുന്ന ചെമ്പട, പഞ്ചാരി, തായമ്പക, ഇടക്കാ, സോപാനസംഗീതം എന്നിവയുടെ മാസ്മരിക പ്രപഞ്ചം എന്തുകൊണ്ടും മാറ്റുകൂട്ടുന്നതായിരിക്കും. ഈ ഉത്സവത്തിന്റെ മറ്റൊരു പ്രത്യേകതപ്രമുഖ ക്ഷേത്രകലയായ കഥകളിയാണ്.(ഏപ്രിൽ 28 നു ശനിയാഴ്ച വൈകുന്നേരം 8 മണിക്ക്) ലോകത്തിലുള്ള എല്ലാ കലകളുടേയും പൂർണ രൂപമായിരുന്ന കഥകളി ഇപ്പോഴും ലോകത്തിലെ ഒന്നാമത്തെ കലാരൂപമായി കണക്കാക്കപ്പെടുന്നു. ഏപ്രിൽ 29 നു ഞായറാഴ്ച അവതരിപ്പിക്കുന്ന ഓട്ടൻതുള്ളൽ, ചാക്യാർ കൂത്ത് എന്നീ കലാരൂപങ്ങൾ ഉത്സവത്തെ വ്യത്യസ്തമാക്കും.

മെയ് 5 നു ശനിയാഴ്ച വൈകുന്നേരം കർണാനന്ദകരമായ സംഗീതവുമായി പ്രശസ്തനും പ്രഗല്ഭനും ആയ സംഗീത വിദ്വാൻ ഡൽഹി മുത്തുകുമാറും സംഘവും അവതരിപ്പിക്കുന്ന സംഗീത കച്ചേരി ഉത്സവത്തിന് മാറ്റ് കൂട്ടും. കൂടാതെ എല്ലാ പത്തു ദിവസങ്ങളിലും ഹൂസ്റ്റണിലെ പ്രശസ്ത കലാ സാംസ്കാരിക കേന്ദ്രങ്ങളിലെ കലാപ്രതിഭകൾ അവതരിപ്പിക്കുന്ന വിവിധ തരം കലാരൂപങ്ങളും ഉണ്ടായിരിക്കും.

അമേരിക്കയിലെ തന്നെ ശ്രീ ഗുരുവായൂരപ്പന്റെ അനുഗ്രഹം കൊണ്ട് സർവൈശ്വര്യങ്ങളും നിറഞ്ഞ ക്ഷേത്രമാണ് ഇതു്. കേരളത്തിലെ വിശ്വാസികളുടെ ആശ്വാസ കേന്ദ്രമായ ശ്രീ ഗുരുവായൂരപ്പൻ ക്ഷേത്രത്തിലെ ആചാരാനുഷ്ടാനങ്ങൾ അണുവിട വിടാതെ ഈ ക്ഷേത്രത്തിലും ആചരിക്കപ്പെടുന്നു.10 ദിവസങ്ങളിലായി കൊണ്ടാടുന്ന ഈ മഹോത്സവത്തിൽ താന്ത്രികാചാര്യന്മാരായ ഒരു സംഘം വേദ പണ്ഡിതന്മാർ ബ്രഹ്മശ്രീ ദിവാകരൻ നമ്പൂതിരിയുടെ മുഖ്യകാർമ്മികത്വത്തിൽ ഒന്നിക്കുന്നതാണ്. ഈ ഉത്സവകാലത്തു നടക്കുന്ന പ്രധാന ആചാരങ്ങളുടേയും അനുഷ്ടാനങ്ങളുടേയും പ്രാധാന്യം മനസ്സിലാക്കാൻ ഭക്തജനങ്ങൾക്ക് അവസരം ലഭിക്കുന്നതും പ്രത്യേകപൂജാതി കർമ്മങ്ങളിൽ പങ്ക് ചേരുവാനും പൂജകൾ നടത്തുവാനും അവസരം ലഭിക്കുന്നതാണ്.

മെയ് 5 നു ശനിയാഴ്ച വൈകുന്നേരം ആറാട്ടു, ഘോഷയാത്ര, കരിമരുന്നു പ്രയോഗം എന്നിവയോടു കൂടി ഉത്സവത്തിന് സമാപനം കുറിക്കും.

ഉത്സവത്തോടനുബന്ധിച്ച് കലശാഭിഷേകം, ശ്രീഭൂതബലി, ഉദയാസ്തമന പൂജ, ഉത്സവബലി എന്നിവയും കൊണ്ട് സമ്പന്നമാക്കുകയാണ്, ഭക്തജനങ്ങൾക്കു് ഇത് ഒരു പ്രത്യേക അനുഭവമായിരിക്കും ഈ വർഷത്തെ ഉത്സവം, ഭാരതത്തിലെ അതിപ്രശസ്തവും അനുഭവ ഗുണമുള്ളതുമായ ശിവ പ്രതിഷ്ഠയ്കും വിശിഷ്ഠമായ മറ്റെല്ലാ പൂജകൾക്കും എത്രയും നേരത്തേ തന്നെ ഉത്സവ കമ്മറ്റിയുമായി ബന്ധപ്പെടുക 713 729 8994

പ്രതിഷ്ഠ മഹോത്സവം അർത്ഥപൂർണമാക്കുവാൻ ക്ഷേത്ര കമ്മിറ്റിയുടെ പേരിൽ എല്ലാ ഭക്ത ജനങ്ങളെയും ഭക്തിയാദരങ്ങളോടെ സവിനയം ക്ഷണിക്കുന്നുവെന്നു പ്രസിഡന്റ് ഡോ. ബിജു പിള്ള അറിയിച്ചു.

കൂടുതൽ വിവരങ്ങൾക്ക്, ഡോ.ബിജു പിള്ള (പ്രസിഡണ്ട്) – 832-247-3411, ശശിധരൻ നായർ (വൈസ് പ്രസിഡന്റ്) – 832- 860- 0371, സോണിയ ഗോപൻ (സെക്രട്ടറി) 409-515-7223, അനിൽ ഗോപിനാഥ്‌ (ഉത്സവം കോർഡിനേറ്റർ) – 973-640-3831.

ജീമോൻ റാന്നി

ഫ്രണ്ട്സ് ഓഫ് തിരുവല്ല പിക്നിക് ഏപ്രിൽ 28 നു ശനിയാഴ്ച

ഹൂസ്റ്റൺ: ഫ്രണ്ട് ഓഫ് തിരുവല്ല ഹൂസ്റ്റൺന്റെ ആഭിമുഖ്യത്തിൽ ഈ വര്ഷത്തെ പിക്നിക് വൈവിധ്യമാർന്ന പരിപാടികളോടെ നടത്തുന്നതിനുള്ള ഒരുക്കങ്ങൾ പൂർത്തിയായതായി സംഘാടകർ അറിയിച്ചു.

പ്രകൃതിരമണീയത നിറഞ്ഞു നിൽക്കുന്ന മിസോറി സിറ്റിയിലെ കിറ്റി ഹോളോ പാർക്കിൽ ( Pavilion A, 9555, Highway 6 South, Missouri City, TX 77459) വച്ച് ഏപ്രിൽ 28 നു ശനിയാഴ്ച രാവിലെ 9 മുതൽ 3 വരെയാണ് പിക്നിക് നടത്തപ്പെടുന്നത്.

പ്രായഭേദമെന്യേ ഏവർക്കും പങ്കെടുക്കത്തക്ക വിധത്തിൽ നിരവധി കലാ കായിക വിനോദ പരിപാടികൾ പിക്നിക്കിനെ വേറിട്ടതാക്കും. ചിരിക്കാനും ചിന്തിക്കാനും ഗൃഹാതുര സ്മരണകൾ അയവിറക്കുന്നതിനും ഉള്ള നിരവധി വിഭവങ്ങളാണ് ഒരുക്കിയിരിയ്ക്കുന്നതെന്നും സംഘാടകർ അറിയിച്ചു. തിരുവല്ലയിൽ നിന്നും സമീപ സമീപ പ്രദേശങ്ങളായ കോഴഞ്ചേരി, കുമ്പനാട്, റാന്നി, മല്ലപ്പള്ളി, ചങ്ങനാശേരി,കോട്ടയം, കുട്ടനാട്, എടത്വ, ചെങ്ങന്നൂർ തുടങ്ങിയ പ്രദേശങ്ങളിൽ നിന്നും ഗ്രെയ്റ്റർ ഹൂസ്റ്റൺ ഏരിയയിൽ എത്തി താമസമാക്കിയിരിക്കുന്ന എല്ലാവരെയും ഈ പിക്നിക്കിൽ പങ്കെടുക്കാൻ ഹാർദ്ദവമായി ക്ഷണിക്കുന്നുവെന്നു ഭാരവാഹികൾ അഭ്യർത്ഥിച്ചു. സംഘടനയിൽ അംഗങ്ങളാകാൻ താല്പര്യം ഉള്ളവർ ഭാരവാഹികളെ ബന്ധപ്പെടണമെന്നും അറിയിച്ചു.

കൂടുതൽ വിവരങ്ങൾക്ക്;
തോമസ് ഐപ് – 713-779-3300
ഉമ്മൻ തോമസ് – 281-467-5642
എം.ടി. മത്തായി – 713-816-6947
ഈശോ ജേക്കബ് – 832-771-7646

ജീമോൻ റാന്നി

ഷിക്കാഗോ (ബെല്‍വുഡ്) സീറോ മലബാര്‍ കത്തീഡ്രലില്‍ പത്താമത് കുടുംബനവീകരണ കണ്‍വന്‍ഷന്‍

ഷിക്കാഗോ: ബല്‍വുഡ് സെന്റ് തോമസ് സീറോ മലബാര്‍ കത്തീഡ്രലില്‍ 2018 ജൂണ്‍ 14 മുതല്‍ 17 വരെ രാവിലെ 9.30 മുതല്‍ വൈകിട്ട് 5 മണി വരെ കുടുംബ നവീകരണ കണ്‍വന്‍ഷന്‍ നടത്തപ്പെടും. പ്രശസ്ത വചന പ്രഘോഷകനും അട്ടപ്പാടി സെഹിയോന്‍ ധ്യാനകേന്ദ്രം ഡയറക്ടറുമായ റവ.ഫാ. സേവ്യര്‍ ഖാന്‍ വട്ടായിലച്ചന്റെ നേതൃത്വത്തിലുള്ള സെഹിയോന്‍ ടീമാണ് ധ്യാനം നയിക്കുന്നത്.

മുതിര്‍ന്നവര്‍ക്ക് മലയാളത്തിലും, യുവജനങ്ങള്‍, കുട്ടികള്‍ എന്നിവരെ ഗ്രൂപ്പുകളായി വേര്‍തിരിച്ച് ഇംഗ്ലീഷിലുമായിരിക്കും വചനപ്രഘോഷണവും മറ്റു ശുശ്രൂഷകളും നടത്തുക. ബേബി സിറ്റിംഗിന് സൗകര്യമുണ്ടായിരിക്കും.

ദൈവകൃപ സമൃദ്ധമായി വര്‍ഷിക്കപ്പെടുന്ന ഈ ആത്മീയ വിരുന്നിലേക്ക് എല്ലാവരേയും സ്‌നഹപൂര്‍വ്വം ക്ഷണിക്കുന്നതായി വികാരി റവ.ഡോ. അഗസ്റ്റിന്‍ പാലയ്ക്കാപ്പറമ്പിലും, അസി. വികാരി റവ.ഡോ. ജയിംസ് ജോസഫും അറിയിച്ചു.

ജോയിച്ചന്‍ പുതുക്കുളം

നാടിന്റെ ഓര്‍മ്മകളുണര്‍ത്തി നമഹയുടെ വിഷു ആഘോഷം

എഡ്മണ്‍റ്റന്‍: നോര്‍ത്തേണ്‍ ആല്‍ബെര്‍ട്ട മലയാളീ ഹിന്ദു ആസോസിയേഷന്റെ (നമഹ) ഈ വര്‍ഷത്തെ വിഷു ആഘോഷം ബാല്‍വിന്‍ കമ്മ്യൂണിറ്റി ഹാളില്‍ വെച്ച് ഏപ്രില്‍ 21 നു നടത്തപ്പെട്ടു. ഉച്ചക്ക് തനതു കേരളീയ ശൈലിയില്‍ തൂശനിലയില്‍ സദ്യ വിളമ്പി കൊണ്ടാണ് ആഘോഷങ്ങള്‍ ആരംഭിച്ചത്. നമഹയുടെ അംഗങ്ങളായ കെ. പി.രാമകൃഷ്ണന്‍ , വിജീഷ് പരമേശ്വരന്‍ എന്നിവരുടെ നേതൃത്വത്തില്‍ നമഹ കുടുംബാംഗങ്ങള്‍ തന്നെയാണ് തലേ ദിവസം ഒരുമിച്ചു കൂടി സദ്യയൊരുക്കിയത്. വിഭവസമൃദ്ധമായ സദ്യക്ക് ശേഷം സമ്മേളന പരിപാടികള്‍ ആരംഭിച്ചു. നമഹ പ്രസിഡന്റ് ശശി കൃഷ്ണ അദ്ധ്യക്ഷത വഹിച്ച സമ്മേളനത്തില്‍ സെക്രട്ടറി പ്രമോദ് വാസു സ്വാഗതം ആശംസിച്ചു. എഡ്മണ്ടനിലെ ഇസ്‌കോണ്‍ ക്ഷേത്രത്തിലെ മുഖ്യ പൂജാരി ബാലകൃഷ്ണ പ്രഭുജി ഭദ്രദീപം കൊളുത്തി പരിപാടികള്‍ ഉത്ഘാടനം ചെയ്തു. എഡ്മണ്ടന്‍ എല്ലസ്‌ളി എംല്‍എ റോഡ് ലയോള ആയിരുന്നു വിഷു ദിനത്തെ മുഖ്യ അതിഥി. പ്രദീപ് നാരായണന്‍ നമഹയുടെ പ്രവര്‍ത്തനങ്ങളെ കുറിച്ച് വിശദീകരിച്ചു. സത്യസായി സെന്റര്‍ പ്രസിഡന്റ് നളിന കുമാര്‍, എച് സ് സ് പ്രതിനിധി ധനു എസ്, ഭാരതീയ കള്‍ച്ചറല്‍ സൊസൈറ്റി പ്രസിഡന്റ് അര്‍ച്ചന തിവാരി എന്നിവര്‍ പരിപാടിക്ക് ആശംസ നേര്‍ന്നു. വൈസ് പ്രസിഡന്റ് രവി മങ്ങാട്ട് പരിപാടിക്ക് നന്ദി പറഞ്ഞു.

സമ്മേളന ശേഷം നമഹ അംഗങ്ങള്‍ അവതരിപ്പിച്ച വര്‍ണ്ണാഭമായ കലാപരിപാടികള്‍ വേദിയില്‍ അവതരിപ്പിക്കപ്പെട്ടു. വിവിധ ശാസ്ത്രീയ നൃത്തങ്ങള്‍, ഗാനങ്ങള്‍, കോല്‍ക്കളി, സിനിമാറ്റിക് ഡാന്‍സ്, അക്ഷരശ്ലോകം തുടങ്ങിയ വ്യത്യസ്തങ്ങളായ കലാപരിപാടികള്‍ വിഷു സദ്യക്കുശേഷമുള്ള വേറൊരു വിരുന്നായി മാറി. പ്രശസ്തരായ കലാഗുരുക്കളുടെ ശിക്ഷണത്തിലാണ് കുട്ടികളും മുതിര്‍ന്നവരും കലാപരിപാടികള്‍ക്കായി ഒരുങ്ങിയത്. വൈകിട്ട് ഏഴു വരെ നീണ്ട കലാപരിപാടികള്‍ നാട്ടിലെ ഓര്‍മ്മകള്‍ ഉണര്‍ത്തുന്ന അസുലഭ സായാഹ്നം സൃഷ്ടിച്ചു.

റോയല്‍ ലിപേജ് സമ്മിറ്റ് റിയാലിറ്റി ഏജന്റ് ജിജോ ജോര്‍ജ് ആയിരുന്നു പരിപാടിയുടെ മുഖ്യ സ്‌പോണ്‍സര്‍.ദിനേശന്‍ രാജന്‍ ബാലഗോകുലം കുട്ടികള്‍ക്കുള്ള സമ്മാനങ്ങള്‍ സ്‌പോണ്‍സര്‍ ചെയ്തു. ഖജാന്‍ജി ബിജോഷ് മോഹനന്‍, ബിഗില പ്രദീപ്, കോര്‍ഡിനേറ്റര്‍മാരായ ഗൗതം കെ റാം, രജനി പണിക്കര്‍, ബോര്‍ഡ് മെമ്പര്‍മാരായ ബാബു കൊമ്പന്‍, കിഷോര്‍ രാജ് , സുഷമ ദിനേശന്‍ , അജയ് കൃഷ്ണ , പ്രജീഷ് നാരായണന്‍ , ജിഷ്ണു രാഘവ് തുടങ്ങിയവര്‍ പരിപാടികള്‍ക്ക് നേതൃത്വം നല്‍കി.

ജോയിച്ചന്‍ പുതുക്കുളം

നൈറ്റ്‌സ് ഓഫ് കൊളംബസ് ഡിന്നര്‍ നൈറ്റ് ആഘോഷിച്ചു

എഡ്മണ്‍റ്റണ്‍: സീറോ മലബാര്‍ ഇടവകയിലെ നൈറ്റ്‌സ് ഓഫ് കൊളംബസ് യൂണിറ്റായ സെയിന്റ് അല്‍ഫോന്‍സാ കൗണ്‍സിലിന്റെ (നമ്പര്‍ 16320 ) വാര്‍ഷിക ഡിന്നര്‍ നൈറ്റ് ഗംഭീരമായി ആഘോഷിച്ചു. സെയിന്റ് അല്‍ഫോന്‍സാ ഇടവകയിലെ പാരിഷ് ഹാളില്‍ വെച്ച്, ഏപ്രില്‍ 21 ശനിയാഴ്ച വൈകീട്ട് ആറര മുതല്‍ ഒന്പത് വരെയായിരുന്നു ഡിന്നര്‍ നൈറ്റ്. നൈറ്റ്‌സ് ഓഫ് കൊളംബസ് ലോക്കല്‍ യൂണിറ്റിലെ അംഗങ്ങളും അവരുടെ കുടുംബാംഗളുമായി ഇരുന്നൂറിലധികം പേര്‍ പരിപാടിയില്‍ പങ്കെടുത്തു. സ്വാദിഷ്ടമായ തനതു കേരളീയ അത്താഴത്തോടെയാണ് കൂട്ടായ്മ ആരംഭിച്ചത്. തുടര്‍ന്ന് നടന്ന യോഗത്തില്‍ ലോക്കല്‍ കൗണ്‍സില്‍ ഗ്രാന്റ് നൈറ്റ് ഡോണല്‍ ജോസഫ് സ്വാഗതം ആശംസിച്ചു. തുടര്‍ന്ന് ഇടവക വികാരി ഫാദര്‍ ജോണ്‍ കുടിയിരിപ്പില്‍ അനുഗ്രഹപ്രഭാഷണം നടത്തി.നൈറ്റ്‌സ് ഓഫ് കൊളംബസ് ചാരിറ്റീസ് പ്രസിഡന്റ് വാലി സ്‌െ്രെടറ്റ്, ഫ്രറ്റേര്‍ണല്‍ അഡ്വൈസര്‍ ബ്ലെയ്ക് സ്‌റ്റേബിങ്ങ്ടണ്‍ എന്നിവര്‍ വിശിഷ്ടാഥിതികളായിരുന്നു. കൂടാതെ എഡ്മന്റണിലും പരിസര പ്രദേശങ്ങളിലും ഉള്ള മുഴുവന്‍ മലയാളീ വൈദീകരും പ്രതേക ക്ഷണിതാക്കളായി ഈ കൂട്ടായ്മയില്‍ പങ്കെടുത്തു.

നൈറ്റ്‌സ് ഓഫ് കൊളംബസിലെ കുടംബാംഗളുടെ കലാപരിപാടികള്‍ ആയിരുന്നു തുടര്‍ന്ന് അരങ്ങേറിയത്. പ്രാര്‍ത്ഥനാഗാനത്തിനുശേഷം ഭരതനാട്യം, ഫ്യൂഷന്‍ ഡാന്‍സ്, ഭക്തിഗാനങ്ങള്‍, ഡ്യൂയറ്റ് സോളോ ഗാനങ്ങള്‍, നൃത്തങ്ങള്‍ എന്നിങ്ങനെ വിവിധ പരിപാടികള്‍ അരങ്ങില്‍ അവതരിപ്പിക്കപ്പെട്ടു. നിറഞ്ഞ ചാരുതയോടെ അവതരിപ്പിക്കപ്പെട്ട പരിപാടികള്‍ പ്രേക്ഷകരെ ഹഠാദാകര്ഷിക്കുന്നതായിരുന്നു. പുതിയ തലമുറയിലെ കുട്ടികള്‍ക്കു തങ്ങളുടെ കഴിവുകള്‍ പ്രകടിപ്പിക്കാനും പരിപോഷിപ്പിക്കുവാനും ഉള്ള നല്ല ഒരു വേദിയായിരുന്നു ഈ ഡിന്നര്‍ നൈറ്റ്. സെയിന്റ് അല്‍ഫോന്‍സാ കൗണ്‍സില്‍ മുന്‍ ഗ്രാന്റ് നൈറ്റ്മാരായ ജോസി പുതുശ്ശേരി, വര്‍ക്കി കളപ്പുരയില്‍, ഡെപ്യൂട്ടി ഗ്രാന്റ് നൈറ്റ് ബിബു മാത്യു, പ്രോഗ്രാം കോഓര്‍ഡിനേറ്റര്‍ മെജോ പി ജോസ് എന്നിവര്‍ പരിപാടിക്ക് നേതൃത്വം നല്‍കി. സെബാസ്റ്റ്യന്‍ പൈകട നന്ദി പറഞ്ഞു.

ആഗോള കത്തോലിക്കാ സഭയിലെ ഏറ്റവും വലിയ അല്‍മായ പ്രസ്ഥാനങ്ങളിലൊന്നായ നൈറ്റ്‌സ് ഓഫ് കൊളംബസ് എഡ്മണ്‍റ്റണിലെ സെയിന്റ് അല്‍ഫോന്‍സാ സീറോ മലബാര്‍ ഇടവകയില്‍ കഴിഞ്ഞ നാല് വര്‍ഷമായി സജീവമായി പ്രവര്‍ത്തിച്ചു വരുന്നു. നൂറ്റിമുപ്പതു അംഗങ്ങള്‍ ഉള്ള കൗണ്‍സില്‍ ഇടവകക്ക് സ്വന്തമായി ദേവാലയം വാങ്ങുന്നതില്‍ നിര്‍ണ്ണായകമായ സംഭാവനകള്‍ നല്‍കിയിട്ടുണ്ട്. അതോടൊപ്പം ഇടവകയുടെയും, അംഗങ്ങളുടെയും ദൈനം ദിന പ്രവര്‍ത്തങ്ങളിലും നൈറ്റ്‌സ് ഓഫ് കൊളംബസ് സജീവമായ സാന്നിധ്യമാണ്.

പി.വി. ബൈജു അറിയിച്ചതാണിത്.

ജോയിച്ചന്‍ പുതുക്കുളം

ഹരി ശിവരാമന്‍ കെ.എച്ച്.എന്‍.എ ജോയിന്റ് സെക്രട്ടറി

വാഷിംഗ്ടണ്‍: ന്യൂ ജേഴ്‌സിയില്‍ 2019 ല്‍ നടക്കുന്ന കേരള ഹിന്ദൂസ് ഓഫ് നോര്‍ത്ത് അമേരിക്ക (കെ.എച്ച്.എന്‍.എ) കണ്‍വന്‍ഷന്റെ ഭാഗമായുള്ള ജോയിന്റ് സെക്രട്ടറിയായി ഹരി ശിവരാമനെ ഐക്യകണ്‌ഠേന തിരഞ്ഞെടുത്തു.

12 വര്‍ഷംമുന്‍പാണ് ഹരി ശിവരാമന്‍ അമേരിക്കയിലേക്ക് കുടിയേറിയത്. കേരളത്തില്‍ ബാലഗോകുലവുമായി സഹകരിച്ചു ഏറെ പ്രവര്‍ത്തനങ്ങള്‍ നടത്തിയിട്ടുണ്ട്. ഭാരതീയ സംസ്‌കാരത്തിന്റെ തനിമ കുട്ടികള്‍ക്ക് പറഞ്ഞു കൊടുക്കുന്നതിലും ഹൈന്ദവ മതസംസ്‌കാരം പരിശീലിപ്പിക്കുന്നതിലും അന്നുണ്ടായിരുന്ന അതെ കൗതുകത്തോടെ തന്നെയാണ് അദ്ദേഹം അമേരിക്കയിലും പ്രവര്‍ത്തിക്കുന്നത്. കേരള ഹിന്ദു സൊസൈറ്റിയുടെ ഹ്യുസ്റ്റണിലുള്ള ബാലഗോകുലത്തില്‍ 2005 മുതല്‍ ഹരി കുട്ടികള്‍ക്കായുള്ള ക്ലാസുകള്‍ നടത്തുന്നുണ്ട്. ഹ്യൂസ്റ്റണ്‍ ശ്രീ ഗുരുവായൂരപ്പന്‍ ക്ഷേത്രത്തിന്റെ തുടക്ക കാലം മുതല്‍ സജീവമായി പ്രവര്‍ത്തിച്ചു വരുന്നു. വിവിധ സാമൂഹ്യ സംഘടനകളില്‍ ശക്തമായ സാന്നിധ്യം അറിയിക്കുന്നു . കുട്ടികള്‍ക്കും മുതിര്‍ന്നവര്‍ക്കുമായി നാരായണീയം ക്ലാസ് നടത്തുന്നുമുണ്ട്. കെ. എച്ച്. എന്‍. എ യുടെ 2013-15 ലെ ഡയറക്ടര്‍ ബോര്‍ഡ് അംഗവും 2017 ഡിട്രോയിറ്റ് കണ്‍വന്‍ഷന്‍ യുവ ചെയറുമായിരുന്നു. കോട്ടയം സ്വദേശിയാണ്.

KHNA Public Relations Division

നോര്‍ത്ത് അമേരിക്കന്‍ മലയാളികള്‍ നാടിന് മുതല്‍ക്കൂട്ടാകണം: “നന്മ’ കണ്‍വെന്‍ഷന്‍

ഷിക്കാഗോ: അമേരിക്കന്‍ മലയാളി മുസ്ലിംകളുടെ പുതിയ കൂട്ടായ്മയായ നോര്‍ത്ത് അമേരിക്കന്‍ നെറ്റ്‌വര്‍ക്ക് ഓഫ് മലയാളി മുസ്ലിം അസ്സോസിയേഷന്‍സ് ‘നന്മ’യുടെ ഒന്നാം പ്രതിനിധി സമ്മേളനവും കണ്‍വെന്‍ഷനും ഷിക്കാഗോയില്‍ വെച്ച് നടന്നു. അമേരിക്കയിലെയും കാനഡയിലെയും വിവിധ സ്റ്റേറ്റുകളെ പ്രതിനിധീകരിച്ച് 50ലധികം പ്രതിനിധികള്‍ പങ്കെടുത്തു.

പരിപാടിയില്‍ വെച്ച് ‘നന്മ’യുടെ ദേശീയ ഭാരവാഹികളായി യു. എ നസീര്‍ (ന്യൂ യോര്‍ക്, യൂ എസ് എ എക്‌സിക്യുട്ടീവ് പ്രസിണ്ട് ) റഷീദ് മുഹമ്മദ് (ഡാലസ്, യൂ എസ് എ എക്‌സിക്യുട്ടീവ് വൈസ് പ്രസിണ്ട്) മെഹബൂബ് കിഴക്കേപ്പുര (ന്യൂജേഴ്‌സി, യൂഎസ്എ എക്‌സിക്യുട്ടീവ് സെക്രട്ടറി) യാസ്മിന്‍ മെര്‍ച്ചന്‍റ് (ടൊറൊന്റോ , കാനഡ എക്‌സിക്യുട്ടീവ് ജോയിന്‍റ് സെക്രട്ടറി) നിയാസ് അഹമദ് (മിനിയപോളിസ്, യൂഎസ്എ ട്രഷറര്‍ ), അജീത് കാരേടത്ത് (ഡാലസ്, യൂ എസ് എ എക്‌സിക്യുട്ടീവ് ജോയിന്‍റ് ട്രഷറര്‍) എന്നിവരെ തെരെഞ്ഞെടുത്തു. അമേരിക്കയിലെയും കാനഡയിലെയും വിവിധ പ്രാദേശിക കൂട്ടായ്മകളുടെ സഹകരണത്തോടെ ദേശീയ തലത്തില്‍ തെരെഞ്ഞെടുക്കപ്പെട്ട ‘നന്മ’യുടെ ഭാരവാഹികള്‍ക്ക് ഷാഹ് ജഹാന്‍ (ഷിക്കാഗോ, യുഎസ്എ) സജീബ് കോയ (ടൊറൊന്റോ, കാനഡ) എന്നിവര്‍ സത്യ പ്രതിജ്ഞ ചൊല്ലിക്കൊടുത്തു .
ഉയര്‍ന്ന വിദ്യാഭ്യാസ, തൊഴില്‍ മേഖലകളിലുള്ള ധാരാളം മുസ്ലിം കുടുംബങ്ങള്‍ നോര്‍ത്ത് അമേരിക്കയിലുണ്ടെന്നും അവരുടെ കഴിവുകളും സമയവും മുഴുവന്‍ ആളുകള്‍ക്കും വേണ്ടി ഉപയോഗപ്പെടുന്ന തരത്തില്‍ പരസ്പരം ബന്ധപ്പെടാനും കേരളത്തില്‍നിന്ന് വിവിധ വിദ്യാഭ്യാസ, തൊഴില്‍, ചികിത്സ ആവശ്യാര്‍ഥം അമേരിക്കയിലും കാനഡയിലുമെത്തുന്ന ആളുകള്‍ക്ക് ആശ്രയിക്കാവുന്ന രൂപത്തില്‍ മെച്ചപ്പെട്ട ഗൈഡന്‍സ് സംവിധാനം ഒരുക്കാനും ‘നന്മ’ പ്രവര്‍ത്തകര്‍ തയ്യാറാകണമെന്ന് പ്രസിഡണ്ട് ആഹ്വനം ചെയ്തു.

തുടര്‍ന്ന് നടന്ന പ്രവര്‍ത്തന കരട് രേഖ ചര്‍ച്ചക്ക് നിറാര്‍ കുന്നത്ത് ബഷീര്‍ (വാഷിംഗ്ടണ്‍ ഡി സി, യു എസ് എ) നേതൃത്വം നല്‍കി. ചാരിറ്റി, ഗൈഡന്‍സ്, മറ്റു സംഘനകളുമായുള്ള സഹകരണം, വിദ്യാഭ്യാസം, കുടുംബം , ക്ലബുകള്‍ തുടങ്ങിയ വിവിധ വിഷയങ്ങളില്‍ ‘നന്മ’യുടെ പ്രാദേശിക, ദേശീയ കൂട്ടായ്മകള്‍ രൂപപ്പെടുത്താന്‍ തീരുമാനിച്ചു.

മൂന്നു തലമുറകളായി നോര്‍ത്ത് അമേരിക്കയുടെ വിവിധ ഭാഗങ്ങളില്‍ ജീവിക്കുന്ന 1000ലധികം കുടുംബങ്ങള്‍ക്ക് വേണ്ടി നിലവില്‍ വരുന്ന ‘നന്മ’ യുവാക്കളുടെയും സ്ത്രീകളുടെയും കാര്യത്തില്‍ പ്രത്യേക പരിപാടികള്‍ തയാറാക്കിയത് സുപ്രധാന നീക്കമാണെന്ന് ആശംസകളര്‍പ്പിച്ച്‌കൊണ്ട് ഡോ. മൊയ്ദീന്‍ മൂപ്പന്‍ (ഫ്‌ലോറിഡ, യു എസ് എ) അഭിപ്രായപ്പെട്ടു.

ഡയറക്ടര്‍ ബോര്‍ഡ് അംഗംങ്ങള്‍:
മീഡിയ ആന്‍ഡ് കമ്മ്യൂണികേഷന്‍സ്: ഹാമിദലി കൊട്ടപ്പറമ്പന്‍ (കെന്റക്കി, യുഎസ്എ)
വിമന്‍സ് അഫയേഴ്‌സ് : യാസ്മിന്‍ അമീന്‍ (ബോസ്റ്റണ്‍ , യുഎസ്എ)
യൂത്ത് അഫയേഴ്‌സ് : ഡോ.തസ്!ലീം കാസിം (നോര്‍ത്ത് ഡകോട്ട, യുഎസ്എ)
പ്രോഗ്രാം ആന്‍ഡ് പ്രോജെക്ടസ്: ഹര്‍ഷദ് രണ്ടുതെങ്ങുള്ളതില്‍ (ലോസ് ആഞ്ചലസ് , യുഎസ്എ)
അസെറ്റ്‌സ് ആന്‍ഡ് മെമ്പര്‍ഷിപ്പ് : ശിഹാബ് സീനത്ത് (ടൊറൊന്റോ , കാനഡ)

പരിപാടികള്‍ ഷിക്കാഗോ ആന്‍ഡ് വിസ്‌കോണ്‍സിന്‍ ഗ്രൂപ്പിന് വേണ്ടി മുഹമ്മദ് ഷാജി, ഫൈസല്‍ പൊന്നമ്പത്ത് (ഇരുവരും ഷിക്കാഗോ,യു എസ് എ) , എന്നിവരും ‘നന്മ’ക്ക് വേണ്ടി സമദ് പൊന്നേരി (ന്യൂ ജേഴ്‌സി , യു എസ് എ) , ഹമീദ് ഷിബിലി അഹമ്മദ് (കാന്‍സസ് യു എസ് എ) , ഷഹീന്‍ അബ്ദുല്‍ ജബ്ബാര്‍ (ബോസ്റ്റണ്‍, യു എസ് എ) , എന്നിവരും ചേര്‍ന്ന് നിയന്ത്രിച്ചു. ദേശീയഗാനങ്ങളോടെ ആരംഭിച്ച പരിപാടിയില്‍ മുഹമ്മദ് കമാല്‍ ഖുര്‍ആന്‍ പാരായണവും ലുഖ്മാന്‍ (ഇരുവരും ടെക്‌സസ്, യു എസ് എ) പ്രാര്‍ത്ഥനയും നിര്‍വഹിച്ചു.

ഹാമിദലി കൊട്ടപ്പറമ്പന്‍ അറിയിച്ചതാണിത്.

ജോയിച്ചന്‍ പുതുക്കുളം

മോര്‍ട്ടന്‍ ഗ്രോവ് സെന്റ് മേരീസില്‍ മതബോധന സ്കൂള്‍ കലോത്സവം അവിസ്മരണീയമായി

ചിക്കാഗോ: മതബോധന സ്കൂള്‍ കലോത്സവം അവിസ്മരണീയമായി . ചിക്കാഗോ : മോര്‍ട്ടന്‍ ഗ്രോവ് സെന്റ് മേരീസ് മതബോധന സ്കൂളിന്റെ ആഭിമുഖ്യത്തില്‍ പതിമൂന്നാമത് വാര്‍ഷിക കലോത്സവം വൈവിധ്യമാര്‍ന്ന പരിപാടികളോടെ ആഘോഷിച്ചു . സഭയിലെ വിശുദ്ധരുടെ ജീവിതത്തെ ആസ്പദമാക്കിയും,

ക്‌നാനായ മൂല്യങ്ങള്‍ ഉയര്‍ത്തിക്കൊണ്ടുള്ള കലാവിരുന്നൊരുക്കിയും മൂന്നര മണിക്കൂര്‍ നീണ്ടു നിന്ന പരിപാടികള്‍ ആണ് കുട്ടികള്‍ സ്റ്റേജില്‍ അവതരിപ്പിച്ചത് .പാഠ്യ പഠനേതര വിഷയങ്ങളില്‍ പ്രാധാന്യം കൊടുക്കുന്നതിനു വേണ്ടിയാണു ഡാന്‍സുകളുടെയും സ്കിറ്റുകളുടെയും രൂപത്തില്‍ ഓരോ വര്‍ഷവും സി സി ഡി ഫെസ്റ്റിവല്‍ നടത്തപ്പെടുന്നത് . സ്കൂളിലെ അഞ്ഞൂറിലധികം കുട്ടികളും അധ്യാപകരും പരിപാടിയില്‍ പങ്കുചേര്‍ന്നു . ഈശ്വര പ്രാര്‍ഥനയോടെ ആരംഭിച്ച ഫെസ്റ്റിവലില്‍ അസിസ്റ്റന്റ് വികാരി ഫാ . എബ്രഹാം കളരിക്കല്‍ സ്വാഗതം ആശംസിച്ചു. വികാരി ഫാ. തോമസ് മുളവനാല്‍ പരിപാടികള്‍ ഉദ്ഘാടനം ചെയ്തു. ഫാ. ബോബന്‍ വട്ടംപുറത്തു ആശംസാ പ്രസംഗം നടത്തി .

ഫാ. ജോസഫ് മേലേടം , സേക്രഡ് ഹാര്‍ട്ട് സ്കൂള്‍ ഡയറക്ടര്‍ ടീന തോമസ് നെടുവാമ്പുഴ , കെ .സി .എസ്. പ്രസിഡന്റ് ബിനു പൂത്തറയില്‍ ,ചര്‍ച് എക്‌സിക്യൂട്ടീവ് മെമ്പേഴ്‌സ് , സിസ്റ്റേഴ്‌സ്, സ്കൂള്‍ സെക്രട്ടറി ബിനു ഇടകര എന്നിവര്‍ ഉദ്ഘാടന വേദിയില്‍ സന്നിഹിതരായിരുന്നു . പ്രോഗ്രാം കോഓര്‍ഡിനേറ്റര്‍ ജ്യോതി ആലപ്പാട്ട് പ്രോഗ്രാമുകളെപ്പറ്റി വിശദീകരിച്ചു . സ്കൂള്‍ ഡയറക്ടര്‍ സജി പൂതൃക്കയില്‍ മാസ്റ്റര്‍ ഓഫ് സെറിമണി ആയിരുന്നു .അസിസ്റ്റന്റ് ഡയറക്ടര്‍ മനീഷ് കൈമൂലയില്‍ നന്ദി പ്രകാശിപ്പിച്ചു . ക്‌നാനായ വോയിസ് പരിപാടികള്‍ തത്സമയം സംപ്രേഷണം ചെയ്തു. അനില്‍ മറ്റത്തികുന്നേല്‍, ടോണി കിഴക്കേക്കുറ്റ് , സജി കോച്ചേരില്‍ എന്നിവര്‍ ശബ്ദവും വെളിച്ചവും നിയന്ത്രിച്ചു
.
ഡൊമിനിക് ചൊള്ളമ്പേല്‍ ഫോട്ടോഗ്രാഫി കൈകാര്യം ചെയ്തു. ഫെസ്റ്റിവലിന്റെ ഭാഗമായി സ്‌നേഹവിരുന്നും ഒരുക്കിയിരുന്നു. പരിപാടികള്‍ അവതരിപ്പിച്ച കുട്ടികളെയും പരിശീലിപ്പിച്ച അധ്യാപകരെയും വികാരിമാര്‍ അഭിനന്ദിച്ചു .

സ്റ്റീഫന്‍ ചൊള്ളമ്പേല്‍(പി.ആര്‍.ഒ) അറിയിച്ചതാണിത്.

ജോയിച്ചന്‍ പുതുക്കുളം