ജോസഫ് ചിറമേല്‍ നിര്യാതയായി

ജോയിച്ചന്‍ പുതുക്കുളം

ന്യൂജേഴ്‌സി: ഒല്ലൂര്‍ ചിറമേല്‍ ജോസഫ് (79) മാര്‍ച്ച് 1 ന് തൃശ്ശൂര്‍ ഒല്ലൂരിലുള്ള സ്വവസതിയില്‍ വച്ച് നിര്യാതനായി. മുണ്ടശ്ശേരില്‍ കുടുംബാംഗമായ എല്‍സി ചിറമേല്‍ ആണ് ഭാര്യ.

സംസ്കാരം മാര്‍ച്ച് – 3 ന് ശനിയാഴ്!ച വൈകീട്ട് 4 മണിക്ക് ഒല്ലൂര്‍ സെന്‍റ് ആന്റണി സീറോ മലബാര്‍ കാത്തോലിക് ഫൊറോനാ ദേവാലയത്തില്‍ വെച്ച് നടത്തപ്പെടും.

പരേതന്‍ ന്യൂജേഴ്‌സി മലയാളി സമൂഹത്തിന് ഏറെ പരിചിതനായിരുന്നു. മകള്‍ മരിയേലയോടും കുടുംബത്തോടൊപ്പം ന്യൂജേഴ്‌സില്‍ കഴിഞ്ഞ കുറേ വര്‍ഷങ്ങളായി താമസിച്ചു വരികയായിരുന്നു.

മക്കള്‍: ആന്റണി ജോസഫ് (സിംഗപ്പൂര്‍), മരിയേല പയ്യപ്പിള്ളി (ന്യൂ ജേഴ്‌സി).
മരുമക്കള്‍: സെല്‍വിന്‍ പയ്യപ്പിള്ളി (ന്യൂ ജേഴ്‌സി),മെര്‍ലിന്‍ ആന്റണി (സിംഗപ്പൂര്‍).
കൊച്ചു മക്കള്‍: ജോഷ് , ജെയ്‌സണ്‍, എസ്തര്‍ , കെവിന്‍.

സോമര്‍സെറ്റ് സെന്‍റ് തോമസ് സീറോ മലബാര്‍ ദേവാലയത്തില്‍ പരേതന് വേണ്ടി ഇന്ന് വൈകിട്ട് 7 .30 ന് കുര്‍ബാനയും ഒപ്പീസും ഉണ്ടായിരിക്കുന്നതാണ്.

ഏബ്രഹാം വര്‍ഗീസ് (ഷിബു) ഫൊക്കാന മിഡ് വെസ്റ്റ് റീജിയന്‍ വൈസ് പ്രസിഡന്റ് സ്ഥാനത്തേക്ക്

ജോയിച്ചന്‍ പുതുക്കുളം

ഫൊക്കാനയുടെ 2018- 20 കാലയളവില്‍ മിഡ് വെസ്റ്റ് റീജിയനെ ശക്തമാക്കുവാന്‍ റീജിയന്‍ വൈസ് പ്രസിഡന്റായി ഏബ്രഹാം വര്‍ഗീസ് (ഷിബു വെണ്‍മണി) മത്സരിക്കുന്നു.

ലീല മാരേട്ടിന്റെ ഫൊക്കാന പ്രസിഡന്റ് സ്ഥാനാര്‍ത്ഥിത്വം സംഘടനയ്ക്ക് ഒരു മുതല്‍ക്കൂട്ടാണെന്നു ഏബ്രഹാം വര്‍ഗീസ് പ്രസ്താവിച്ചു.

പൊതു പ്രവര്‍ത്തന രംഗത്ത് സുസമ്മതനും, വളരെ പ്രവര്‍ത്തന പരിചയവും നേടിയിട്ടുള്ള ഏബ്രഹാം വര്‍ഗീസ് (ഷിബു) ഫൊക്കാനയുടെ അഡീഷണല്‍ അസോസിയേറ്റ് സെക്രട്ടറി, നാഷണല്‍ കമ്മിറ്റി അംഗം, റീജിയണല്‍ സെക്രട്ടറി, ഫൊക്കാന നാഷണല്‍ കണ്‍വന്‍ഷന്‍ കമ്മിറ്റി അംഗം, ടൈം മാനേജ്‌മെന്റ് ചെയര്‍മാന്‍ എന്നീ സ്ഥാനങ്ങള്‍ ഉള്‍പ്പടെ നിരവധി നേതൃസ്ഥാനങ്ങള്‍ ഫൊക്കാനയില്‍ വഹിച്ചിട്ടുണ്ട്.

ഇന്ത്യന്‍ നാഷണല്‍ ഓവര്‍സീസ് കോണ്‍ഗ്രസ് (ഐ.എന്‍.ഒ.സി) മിഡ് വെസ്റ്റ് റീജിയന്‍ സെക്രട്ടറി, മിഡ് വെസ്റ്റ് മലയാളി അസോസിയേഷന്‍ സെക്രട്ടറി, ഇപ്പോഴത്തെ വൈസ് പ്രസിഡന്റ് തുടങ്ങിയ സാമൂഹ്യ രംഗത്തും, എക്യൂമെനിക്കല്‍ കൗണ്‍സില്‍ ഓഫ് കേരള ചര്‍ച്ചസിന്റെ സെക്രട്ടറി, ചിക്കാഗോ മാര്‍ത്തോമാ ചര്‍ച്ച് കമ്മിറ്റി മെമ്പര്‍, ഇടവക മിഷന്‍ സെക്രട്ടറി തുടങ്ങിയ സാമുദായിക രംഗത്തും, ആല്‍ഫാ പാര്‍ക്ക് ഇന്‍ക്, ആല്‍ഫാ പാര്‍ക്ക് പ്രൈവറ്റ് ലിമിറ്റഡ് തുടങ്ങിയവയുടെ ബോര്‍ഡ് ഓഫ് ഡയറക്ടര്‍, വിജയിയായ വ്യവസായി എന്നീ നിലകളിലും ബഹുമുഖ പ്രതിഭ തെളിയിച്ചിട്ടുള്ളതും, അനേക വര്‍ഷത്തെ പ്രവര്‍ത്തന പരിചയം കൈമുതലായുള്ള, അത്മാര്‍ത്ഥമായ പ്രവര്‍ത്തനങ്ങളിലൂടെ നമ്മുടെ സമൂഹത്തിന് നല്ല സേവനങ്ങള്‍ കാഴ്ചവെച്ചിട്ടുള്ള അദ്ദേഹം അമേരിക്കയില്‍ അറിയപ്പെടുന്ന ഒരു സാമൂഹ്യ പ്രവര്‍ത്തകന്‍ കൂടിയാണ്.

ഫൊക്കാന എന്ന പ്രസ്ഥാനത്തിനും, മിഡ്‌വെസ്റ്റ് റീജിയനിലും ഏബ്രഹാം വര്‍ഗീസിന്റെ (ഷിബു) സേവനം സംഘടനയുടെ വളര്‍ച്ചയ്ക്ക് ഏറെ സഹായിക്കും.

കാനഡ ഒരുങ്ങുന്നു ഒരു രാഷ്ട്രീയ അംഗത്തിനായി-മലയാളി പുതു മുഖങ്ങൾ രംഗത്ത്

കാനഡ:ബഡ്ജറ്റ് ചർച്ചകൾ അവസാന ഘട്ടത്തിൽ എത്തുമ്പോഴും,പുതിയ വേതന വ്യവസ്ഥകളിലും,വംശീയ പരിഗണനയിലും അധികം തല്പരർ ആകാതെ കനേഡിയൻ വോട്ടർമാർ,പ്രത്യേകിച്ചും ഒന്റാറിയോവിലെ വോട്ടർമാർക്കിടയിൽ മനം മാറ്റം.കൺസർവേറ്റീവ് പാർട്ടിയിൽ വിശ്വാസം അർപ്പിച്ചിരുന്ന ദീനികൾ ഒരു വിഭാഗവും,ലിബറൽ പാർട്ടിയിൽ വിശ്വാസം അർപ്പിച്ചിരുന്ന,ചെറുകിട കച്ചവടക്കാരിൽ ഭൂരി ഭാഗവും വരുന്ന തെരഞ്ഞെടുപ്പിൽ മാറ്റി ചിന്തിക്കുന്ന രീതിയിൽ താഴെത്തട്ടിൽ ചർച്ചകൾ നടക്കുന്നു.

കൺസർവേറ്റീവ് പാർട്ടി ആദ്യം നിശ്ചയിച്ചിരുന്ന പാട്രിക്നു മേൽ ലൈംഗീക പീഡന ആരോപണം ഉയർന്നതിനെ തുടർന്ന് മത്സര രംഗത്ത് നിന്നും മാറി നിൽക്കേണ്ടി വന്നിരിക്കുന്നു.പുതിയ നേതൃത്വത്തിൽ ഇപ്പോഴും ചർച്ചകൾ പൊടി പൊടിക്കുന്നു.കഴിഞ്ഞ തെരഞ്ഞെടുപ്പിൽ കൺസർവേറ്റീവ് വോട്ടുകൾ നാലൊരു ശതമാനം ചില അബദ്ധ പ്രസ്താവനകളിലൂടെ മാറി മറിഞ്ഞു ലിബറൽ പാർട്ടി കരസ്ഥമാക്കിയിരുന്നു.നിഖാബ് നിരോധനം,മത വ്യത്യാസം ഇല്ലാതെ ജോലി സ്ഥലത്തും,പൊതു സ്ഥലത്തും തുല്യത ഇതായിരുന്നു കൺസേർവേറ്റീവിന്റെ അജണ്ട.അതിൽ നിന്നും വ്യത്യസ്തമായ നടപടികളിലൂടെ ലിബറൽ പാർട്ടിയുടെ പ്രവർത്തനവും,പ്രസ്താവനകളും സങ്കുചിതമായി ചിന്തിക്കുന്ന ഒരു വിഭാഗം ജനങ്ങളുടെ വോട്ട് തട്ടുന്നതിൽ മികവ് കാട്ടി.
എന്നാൽ തെരഞ്ഞെടുപ്പിനി ശേഷം റാഫ്യൂജി നിയമങ്ങൾ,കുടിയേറ്റ നിയമങ്ങളിൽ വരുത്തിയ മാറ്റങ്ങൾ,അധിക വേതന വ്യവസ്ഥകളിൽ തകരുന്ന ചെറു കച്ചവടങ്ങളും,വ്യവസായങ്ങളും,ബാങ്കിങ് പലിശ വർധന,കെട്ടിട നികുതിയിലും,കെട്ടിട ലോൺ സംവിധാനങ്ങളിലും വന്ന നിയമങ്ങൾ,ഇവയെല്ലാം സാമ്പത്തീകമായി സാധാരണക്കാരെ വലക്കുകയാണ്.പല ഗാർഹിക സർവീസ് സ്ഥാപനങ്ങളും,ഗാർഹിക ചെറുകിട സ്റ്റോറുകളും പൂട്ടൽ ഭീഷണിയിൽ ആണ്.റിയൽഎസ്റ്റേറ്റ് മേഖലയിൽ വിപണനം വളരെ കുറഞ്ഞിരിക്കുന്നു.

പല നേട്ടങ്ങളും പ്രതീക്ഷിച്ചു ഭരണം തിരിച്ചു പിടിച്ചു ലിബറൽ സർക്കാർ ആശിക്കാരത്തിൽ വരുമ്പോൾ ഇന്ത്യ പോലുള്ള രാജ്യങ്ങൾക്കു പ്രൊവിൻഷ്യൽ,ഫെഡറൽ സർക്കാരുകളിൽ നല്ല പ്രാമുഖ്യം നൽകിയിട്ടുണ്ട് എങ്കിലും,വംശീയ പരമായി ഇവർക്ക് സ്വന്തം വംശജരെ നേരത്തേത് പോലെ സഹായിക്കാൻ കഴിയുന്നില്ല.ഈ ആരോപണം സിഖ്,ഗുജറാത്തി,തമിഴ്,ശ്രീലങ്കൻ വോട്ടർമാരുടെ ഇടയിൽ ശക്തവും ആണ്.
ഫെബ്രുവരി 1 മുതൽ 25 വരെ വോട്ടർമാരുടെ ഇടയിൽ ഒന്റാറിയോവിലെ പ്രമുഖ രാഷ്ട്രീയ പാർട്ടികളിൽ ഒന്ന് നടത്തിയ ടെലഫോണിക് സർവേയിൽ ആണ് ഇത് വ്യക്തമായത്.

ജഗ്‌മീർ സിങ് നെ ഉയർത്തിക്കാട്ടി ആണ് എൻ ഡി പി ഈ അവസരത്തിൽ തെരഞ്ഞെടുപ്പിനെ നേരിടുന്നത്.അത് കൊണ്ട് തന്നെ നല്ലൊരു ശതമാനം വോട്ട് എൻ ഡി പി യിലേക്ക് ഒഴുകും എന്നത് വ്യക്തമാണ്.

ഒന്റാറിയോ വിനെ സംബന്ധിച്ച് രണ്ടു നിർണ്ണായക തെരഞ്ഞെടുപ്പുകൾ ആണ് 2018-ൽ നടക്കുവാനിരിക്കുന്നത്.

ജൂൺ 07 നു മുനിസിപ്പൽ,ബോർഡ് ട്രസ്റ്റീ തെരഞ്ഞെടുപ്പും,ഒക്ടോബർ 22 നു പ്രൊവിൻഷ്യൽ തെരഞ്ഞെടുപ്പും.ഈ വിധികളുടെ അടിസ്ഥാനത്തിൽ ആയിരിക്കും 2019 ഒക്ടോബറിൽ നടക്കുന്ന ഫെഡറൽ തെരഞ്ഞെടുപ്പിന്റെ അവസാന മിനുക്കു പണികൾക്ക് രാഷ്ട്രീയ പാർട്ടികൾ രൂപം നൽകുക.പല സാമൂഹിക സംഘടനകളിലും സ്വാധീനം ചെലുത്തി എംപിപി മാർ വെളിച്ചത്തേയ്ക്കു ഇറങ്ങി തുടങ്ങിയിട്ടുണ്ട്.

ഇന്ത്യയിലെ കോൺഗ്രസിന് സമാനമായ കൺസർവേറ്റീവ്,കമ്യൂണിസ്റ്റ് മാർക്സിസ്റ്റിനു സമാനമായ എൻ ഡി പി ,സി പി ഐ ക്കു സമാനമായ ലിബറൽ,പ്രാദേശികതയെയും ,പാരമ്പരാഗതങ്ങളെയും പ്രതിനിധാനം ചെയ്യുന്ന ഗ്രീൻ പാർട്ടി , ഫ്രഞ്ച് പ്രൊവിൻസായ കുബക്ക്
ലെ പ്രാദേശിക പാർട്ടി ഉൾപ്പെടുന്ന അഞ്ചു പ്രമുഖ പാർട്ടികൾ മത്സരത്തിനു തയ്യാറെടുക്കുമ്പോഴും,ഭരിക്കുന്നവരോ,പ്രതിപക്ഷമോ ആരെയും തല്ലുകയോ,കൊല്ലുകയോ,ഒന്ന് മുഖം കറുപ്പിച്ചു ചീത്ത വിളിക്കുന്നു പോലും ഇല്ല എന്നതാണ് ജനാധിപത്യ രാജ്യങ്ങളിൽ വലിയവനായ ഇന്ത്യ പഠിക്കേണ്ടത്.

ഈ തവണയും മലയാളികളുടെ ഇടയിൽ നിന്നും പുതു മുഖങ്ങൾ പല രാഷ്ട്രീയ കൊടികളുടെ കീഴിൽ മത്സരത്തിനായി ഒരുങ്ങി കഴിഞ്ഞു.കഴിഞ്ഞ കാൽ തെരഞ്ഞെടുപ്പുകളിൽ ഉണ്ടായിരുന്ന പലരും പാർട്ടിയുടെ പല ഉത്തര വാദിത്വപ്പെട്ട ജോലികളിൽ വ്യാപൃതരും ആണ്.മറ്റു ഇന്ത്യൻ വംശജരുമായി തട്ടിച്ചു നോക്കുമ്പോൾ മലയാളികൾ എണ്ണത്തിൽ കുറവാണ്.പഞ്ചാബ്,ഗുജറാത്ത്,ശ്രീലങ്ക ,തമിഴ് എന്നിവർക്ക് ശേഷം മാത്രമേ മലയാളി വോട്ടർമാരുടെ എണ്ണം വരുന്നുള്ളൂ. മലയാളികളുടെ പ്രാതിനിധ്യവും,സാന്നിധ്യവും ഭരണ തലങ്ങളിലേയ്ക്ക് ഉയർത്തി കൊണ്ടുവരുവാൻ നാം ഓരോ മലയാളികളും പ്രതിജ്ഞാ ബദർ ആണ്.അതിന്നായി രാഷ്ട്രീയം,ജാതി മത ചിന്തകൾ എല്ലാം മറന്നു പരസ്പരം സഹായിക്കേണ്ടത് അത്യന്താപേക്ഷിതവും ആണ് എന്ന് മാത്രം അടിവരയിടുന്നു.

മാഗിന്റെ നേതൃത്വത്തിൽ വിജ്ഞാന പ്രദമായ സെമിനാറുകൾക്കു തുടക്കം കുറിച്ചു

ഹൂസ്റ്റൺ: മലയാളീ അസ്സോസിയേഷൻ ഓഫ് ഗ്രെയ്റ്റർ ഹൂസ്റ്റന്റെ (MAGH) നേതൃത്വത്തിൽ ഈ വർഷത്തെ പ്രവർത്തനങ്ങളുടെ ഭാഗമായി മലയാളീ സമൂഹത്തിനു ഏറ്റവും പ്രയോജനകരമായ, അറിവുകൾ പങ്കു വെക്കുന്ന വിവിധ സെമിനാറുകൾ നടത്തുന്നു.

തുടക്കമെന്നോണം “റിയൽ എസ്റ്റേറ്റ് (real estate) മേഖലയിൽ കൂടുതൽ നിക്ഷേപ സാധ്യതകളും കൂടുതൽ വരുമാനം ആർജിക്കുന്നതിനുള്ള അനന്ത സാധ്യതകളും” എന്ന വിഷയത്തെ അധികരിച്ചു നടന്ന സെമിനാർ പങ്കെടുത്തവർക്ക് അറിവിന്റെ പുതിയ മേഖലകൾ തുറന്നിട്ടു. ഹൂസ്റ്റണിലെ പ്രമുഖ റീയൽറ്റി ഗ്രൂപ്പായ പ്രോംപ്റ്റ് റീയൽറ്റി ആൻഡ് മോർട്ടഗേജ് (Prompt realty and Mortgage Inc) ബ്രോക്കർ ജോൺ.W. വര്ഗീസ് ഈ രംഗത്തെ തന്റെ ദീർഘവര്ഷത്തെ അനുഭവ പരിചയവും അറിവും പങ്കുവെച്ചുകൊണ്ടു സെമിനാറിന് നേതൃത്വം നൽകി.

മാർച്ച് 3 നു ശനിയാഴ്ച മാഗിന്റെ ആസ്ഥാനമായ കേരള ഹൗസിൽ വച്ച് വൈകുന്നേരം 3 മുതൽ നടന്ന സെമിനാറിൽ മാഗ് പ്രസിഡന്റ് ജോഷ്വാ ജോർജ്‌ അധ്യക്ഷത വഹിച്ചു. മലയാളി അസ്സോസിയേഷനു വേണ്ടി ആൻഡ്രൂസ് ജേക്കബ് വിഷയാവതരണം നടത്തി.

നിരവധി ആളുകൾ പങ്കെടുത്ത ഈ സെമിനാറിൽ റിയൽ എസ്റ്റേറ്റ് മേഖലയിലെ വിവിധ തരം ബിസിനസ് സാധ്യതകളെ കുറിച്ച വിപുലമായ ചർച്ചകൾ നടന്നു. പ്രേക്ഷകരുടെ ചോദ്യങ്ങൾക്കും സംശയങ്ങൾക്കും വിശദമായി ഉദാഹരണ സഹിതം ജോൺ വർഗീസ് മറുപടി നൽകി. വിപുലമായ സാദ്ധ്യതകൾ ഉള്ള ഈ രംഗത്തേക്ക് ധൈര്യമായി കടന്നു വരുവാനും അതിൽ കൂടി മെച്ചപ്പെട്ട സാമ്പത്തിക ഭദ്രത കൈവരിക്കുവാനും ജോൺ വർഗീസ് മലയാളി സുഹൃത്തുക്കളെയും പ്രത്യേകിച്ച് യുവ തലമുറയെയും ആഹ്വാനം ചെയ്തു. ഇന്നത്തെ സാഹചര്യത്തിൽ ഒരു വീട് സ്വന്തമായുള്ള ഒരാൾക്കു പുതിയ ഭവന വായ്പകൾ ലഭിക്കുന്നതിന് സാദ്ധ്യതകൾ വളരെയാണെന്നും അത് പ്രയോജനപെടുത്തി ഈ രംഗത്ത് കൂടുതൽ നിക്ഷേപങ്ങൾ നടത്തുവാനും അദ്ദേഹം ആഹ്വാനം ചെയ്തു.

എബ്രഹാം ഈപ്പൻ സ്വാഗതവും ബാബു മുല്ലശ്ശേരിൽ കൃതജ്ഞതയും പറഞ്ഞു.

‘കൃഷിയും അതിന്റെ നൂതന സാധ്യതകളും ‘ എന്ന വിഷയത്തെ അധികരിച്ചുള്ള അടുത്ത സെമിനാർ മാർച്ച് 10 നു ശനിയാഴ്ച നടത്തപെടുമെന്നു ഭാരവാഹികൾ അറിയിച്ചു.

ജീമോൻ റാന്നി